إجراءات ابتعاث معيدي ومحاضري جامعة الملك سعود (ذكور وإناث) والإجابة عن استفساراتهم

يعني الحين اول مااداوم اكلم عميد الكليه ... لان رئيس قسمنا ماعنده سالفه ... واقوله كذا وكذا ... خلاص ... وعقب ارفع له خطاب مع التقارير ... طيب الوالد جد لازم انه يقعد هنا مايقدر يروح ويجي ... وصعب عليه يروح حتى لو بعد 5 سنين ... وودي اكمل الدكتوراه هنا ... ومن الحين بعد بس من جد قفلوها في وجههي ومو عارفه وش اسوي..

عقب العيد كلميهم وإذا وافقوا على الخطاب والتاجيل فخير من الله.
وكان لك خاطر بالدراسة بالداخل ذيك الساعة تجيبين قبول من جامعة سعودية سوى جامعة الملك سعود أو غيرها وتحددين التخصص والدرجة الأكاديمية وبداية الدراسة وترفعين طلب الإبتعاث للدراسة بالداخل وتذكرين بالطلب الظروف الصحية لي ولي أمرك وأن لا يوجد مرافق للسفر للخارج. وايضا ترفقين أوراق رسمية بالظروف وعدم أمكانية الدراسة بالخارج, ونقول عل وعسى يقبلون عذرك. وإذا ما قبل العميد ومجلس القسم والكلية عذرك وظروفك أرفعي لمدير الجامعة نفس الأوراق يمكن يكون هو اللي يوافق لك.

والله يسهل امرك

اها ... الله يسعدك يارب ... يعني تظن بيرفضون طيب وش اسوي غصب عني ؟؟؟ وانا ابي اكمل من جد مع اني توني مناقشه رسالتي من شهرين بس ....

طيب قمر يعني الحين مااكلمه اجيب قبول واوراق على طول واقدمها للعميد حتى لو عقب 6 شهور او 9 شهور ... يعني اسكت قولتك ...لحد مااضبط وضعي ... عشان لااحتاس ...

ويسعدك يارب ..
ما أقدر أقولك يرفضون أو لا, الوضع يحتاج تفاصيل وإطلاع على تقارير, لكن إذا الإنسان عنده ظرف وهم أقتعنوا فيه لازم يوافقون غصب عليهم
تدري وش لون : خليهم ولا تعطيهم شي وإذا سألوك وين أرواقك, ذيك الساعة عطيهم قبول من جامعة سعودية وأوراق تبثت عدم أستطاعتك السفر للخارج.
ولا ضنيت أنهم يرفضون. لان الحق معك.
والله يوفقك

قولتك ؟؟؟ يعني اسكت ولا اكلم احد ,,, واداوم ,, ونهايه السنه اعطيهم القبول مع العذر ... كذا ينفع ,,, الله يوفقك لو كان بيمشي هالاسلوب معاهم ... احد سواها قبلي وضبط وضعه ....

أيه قولتي
خلك لا تسوين لهم شي حتى هم يدورنك, عاد متى ما سألوك ذيك الساعة جهزي القبول وصارت كثر وتبي تصير أكثر
والله يوفق الجميع

أخوي الموارد أتمنى لك كل التوفيق والأجر من الله
دراسة زوجتي راح تبدأ في 20 شوال المشكله إلى الآن ما بعد طلع قرار الابتعاث سألنا الجامعة قالوا لسى ما بعد جتنا موافقة وزارة التعليم العالي
سؤالي في إجازة رمضان ممكن وزارة التعليم العالي ترفع لجامعة الملك سعود موافقتها يعني في أحد يداوم في وزارة التعليم العالي، علما أن السفر سيكون في 13 شوال يعني بعد أسبوع من بداية الدوام بعد العيد
أو في رأيك نأجل قبول المعهد ثلاثة أشهر ؟؟؟؟؟؟؟؟؟؟؟؟؟؟
ولك كل الشكر والتقدير

حياك الله,
في تاريخ 22 رمضان تبداء أجازة موظفين الجامعة لذلك ما أتوقع يجي الرد لكن عودة الموظفين في 7 شوال لذلك يمكن الله يسهل أمركم ويجي الرد في الأسبوع الأول لكن أنت تأكد كم لهم الجامعة مرسلين الخطاب للوزارة؟ إذا له أكثر من شهر ونصف فالأمور زينه إن شاء الله.
وحتى لو ما جاء رد الوزارة بعد العيد مباشرة لا تقدمون على طلب تأجيل البعثة حتى يجب رد الوزارة, وإذا جاء رد موافقة الوزارة بعد تاريخ بداية الدراسة لازم تجيب قبول جديد بتاريخ دراسة جديد.

والله أعلم

أخوي الموارد الدوام طبعا في 9/10 والخطاب صدر لوزارة التعليم العالي في 20/8 وش رايك ننتظر أجل أول أسبوع من الدوام علما بأن لدي إجراء تقديم إجازه استثنائيه ما أدري راح يمديني انا أولا لأني موظف حكومي وسفرنا في تاريخ 13 شوال

أن كان في 20/8 أرسلوا الخطاب يعني يالله يالله يجي الرد في عقب العيد ويمكن ما يجي بالأسبوع الأول, لكن أنت لو تأخذ رقم معاملة الخطاب المرسل للوزارة من الجامعة وتروح للوزارة تسالهم يمكن يتمشي أمورك بالوزارة.

تبي نصيحتي
أنا اقول نط للوزارة وإذا ما قدرت تعجل بخطاب الموافقة من الوزارة.
وخذ الموضوع بروقان ولا تستعجل لإنك حتى لو ضغت على نفسك وحاولت تنشب للجامعة منتب مستفيد شي بحكم أن رد الوزارة لازم يرجع للجامعة.
والخطاب هذا سري بين الجامعة والوزارة ولا يعطونك منه نسخة والوزارة يرسلون صورة خطاب الموافقة أول ما يوقعه الوزير أو من ينيبه عن طريق الفاكس لمكتب مدير الجامعة والأصل يرسلونه عن طريق مراسلين الوزارة.
لذلك مالك إلا تصبر لين يوصل الرد ولا تطلب تأجيل إلا إذا جاء رد الوزارة ثم أطلب من المعهد أو الجامعة اللي بالخارج قبول جديد, طبعاً بعض المعاهد سمحين يعطونك تاجيل لمدة أسبوعين أو ثلاثة وبعضهم ما يعطونك إلا مع بداية كل فصل جديد, وبعضهم تقدر تطلب منهم قبول جديد بتاريخ الدراسة الأول وتاريخ مؤجل ويقولون لك أن امداك تجي وإلا تعال بالتاريخ الثاني وإن كنت مستعجل تواصل مع المعهد او الجامعة اللي بالخارج وتأكد إذا ممكن يساعدونك بالقبول وإذا قالك المعهد أوالجامعة: لا ما نعطيك تأجيل إلا إذا ألغيت القبول السابق أجل أصبر حتى توافق الوزارة.

أتمنى وصلت لك المعلومة.
والله أعلم