ابي شوركم ضروري جدا

وعليكم السلام

فرج الله همك
لا أعلم هل يفيدك الموضوع المثبت في القسم عن نقل الخدمات من جامعة لأخرى
وإن شاء الله تجدين إجابات من الأعضاء لما تبحثين عنه..

الله يجزاك خير اخوي على الرد أحب ابشركم صديقتي كلمت وكيلة القسم و قالت إنهم محتاجين و يبغوني بس المشكلة انا بحيرة كبيرة جدا
أنا مقدمة على ابتعاث داخلي و النتيجة بعد شهر و خايفة أبدا اجراءت نقل الخدمات و النتيجة تطول و تطلع نتيجة الابتعاث و وقتها بضطر اكتب خطاب لجامعتي عشان الموافقة الآن ايش الحل هل أشيل موضوع النقل من راسي و اكمل و ابتعث بس المشكلة إذا رجعت ماقدر انقل إلا لما اشتغل مدة ابتعاثي و انا محتاجة انقل جدا جدا لأن ماعندي سكن و الطريق هلكني و التذبذب ذبحني و أتعب نفسيتي و بنفس الوقت مابي اضيع الابتعاث لو انقبلت لأن ماضمن اجيب قبول بعدها و الخارجي مستحيل علي بالوقت الحالي نتيجة لظروفي الأسرية المتأزمة جدا و هل ممكن لو اجراءات نقلي خلصت مبكر اقدر اخذ الموافقة على الابتعاث من الجامعة اللي نقلت لها و لو اجراءات النقل طولت مثلا اقدر اخذ الموافقة على البعثة من جامعتي الحالية و بعدها هل توافق الجامعة على نقلي بعد قرار الابتعاث بحيث اول ماارجع أدوام بجامعتي الجديدة
ساعدوني الله يخليكم بصراحة اول مرة انحط بموقف كذا

ارائنا بشرية وتحتمل الخطأ اكثر من الصواب ...
اصحي اخر الليل وصلي ركعتين هو الي يعرف وش الافضل لكي
وفقك الله

الله يعينك و مأجورة على ضربة المشااوير ،،

بصراحة انا اول ما تعينت وقعت تعهد بعدم النقل لجامعة اخرى + اني اطلع ابتعاث و ارجع اشتغل بنفس الجامعة نفس المدة اللي ابتعثت فيها (و اكيد انك عارفه هالنظام)
اما كون في معيدات حولو لجامعات ثانية ليش ما تستفري منهم بالضبط !

+ ليش تحسي ان ابتعاثك مو مضمون؟ .. الجامعات تبغى معيديها يطلعو فاسرع وقت ممكن + قبول المعهد ما اسهل منه اسبوع و هو عندك و تخلصي اجراءات البعثه مع الجامعة و اللي ما تطول عن شهر
و انتي ببلد الابتعاث .. ادرسي لغة سنة و تقدري تمدديها سنتين حتى تحصلي قبول للماستر و راح تحصلي ان شاء الله

السلام عليكم
ياجماعة داخلة على الله ثم عليكم تساعدوني اموري تعقدت اكثر و اكثر ياربي رحمتك
انا مانقبلت ابتعاث داخلي و الحمد لله هذا قضاء و قدر لي يومين و انا ابكي من القهر كنت اتمنى انقبل عشان ارجع اكمل عند اهلي لما وضعي الأسري يتعدل و ارجع اداوم بكليتي الحين الأمور تعسرت
ابغى شوركم الآن ايش اسوي انا افكر السنة الجاية اقدم بجامعة خاصة حتى لو على حسابي ماعاد يهمني و الله انا طموحي كبير ماراح يوقفني عدم قبولي بجامعة حكومية صحيح كان شئ مؤثر و متعب نفسيا بس ماراح انتظر قبولهم فما ادري هل لو اخذت استثنائي من دوامي و درست بجامعة خاصة ورجعت لعملي يقبلوا شهادتي و يرقوني و إلا تصير لي مشكلة
الشئ الثاني ياريت من عنده خبرره ينورني بكيفية القبول بجامعة الخليج العربي في البحرين و ماهي شروطهم ؟؟

اول شي ربي يسهل امورك ، الواحد ما بيده الا الدعا
و الحمدلله كل شي خيره من ربي ،، و ثقي تماما دام انتي موكلة امورك لله و مصلية استخاره ربي ما راح يضيعك ،، انتي سويتي اللي عليكي و هذا اللي صار
دامك انسانه طموحه انا رأيي انك تسكتي الكلية و تبدأي بالبحث عن قبول لو بعد 6 اشهر او سنة ، منها الكلية تسكت و منها تتحسن اوضاعك في هالفترة
اما كونك تطلبي اجازة عشان تدرسي ثم ترجعي فيها مخاطرة وماتدري يروح تعبك هذا ع الفاضي او لا!

بالتوفيق.

الله يجزاك خير يااخوي على كلامك الطيب
بس ياعزيزي افهمني انا حتى ابتعاث خارجي مااقدر ابدا مع مين اروح و انا لا زوج و لا اخوان و اب مريض ماعندي احد ابدا اروح مع نفسي مااقدر حدي البحرين و هذا ان حصل بعد إذا جامعة بلادي ماقبلتني انا وين اروح و الله لو الظروف سامحة لي برا ماترددت و لاحتى قدمت هنا داخلي بس مااقول إلا الحمد لله على كل حال الله ياخذ حقي منهم انرفض و انا كل الشروط منطبقة علي مادري ايش يبغون اكثر حسبنا الله و نعم الوكيل فيهم حسبنا الله الله يجازيهم و يجازي كل من ظلمني

والله اني شفت موضوعك وحسيت انك متأزمة جدا فحبيت اقدم لك هذي النصيحة لعلك تجدين نفعها وفائدتها قريبا
اولا: انتي لازم تكوني عارفة ان مافي احد يقدر يجبرك على ابتعاث خارجي اذا ماكان لديك محرم......وفي لجان في كل كلية مهمتها دراسة الحالات هذي قدمي كل الاثباتات الي معاك وان انرفض طلب ابتعاثك الداخلي من جهة عملك فلك الحق في السؤال عن أسباب الرفض ولك الحق في المعارضة على القرار ....ومافي احد يقدر ينزلك لاوظيفة ادارية ولاغيره كلها امور يستدخدموها علشان تكملي دراسة بأسرع وقت...وفي أسوا الاحوال اذا ماتم موضوع دراستك بتبقي على وظيفة معيد ولااحد بيقلك ليش بقيتي ..... اعرف انه طموح لكن لكل شي وقت ... حددي هدفك وقدمي على جامعات اخرى مو شرط نفس الجامعة الي في مدينتك
ثانيا: ثقي تماما ان ماراده الله سيكون وان امره بين الكاف والنون ...احنا دايما نفكر انه الي اصابنا بلاء ونحمل الهم ونحزن لكن لو وضعنا قاعدة ان الله لايكتب للعبد الا كل خير فالمعاناة تبدا تخف والمفروض ان تختفي.... ممكن تزعلين الان وبعد فترة تكتشفي الخير والحكمة في قضاء الله سواء في تعيينك في منطقة بعيدة سواء في رفض ابتعاثك الداخلي وفي امور كثيرة في حياتك..... المسألة تحتاج صبر ودايما ادعي وقولي اللهم أرزقني يقيناً كاملاً حتى أعلم أنه لن يصيبني إلا ما كتبته لي..... المؤمن يتوكل على الله تعالى في جميع أموره .... عليه أن يؤمن بما كتبه الله تعالى له .... والله عزوجل ارحم الراحمين .... ارحم من الام على ولدها... تقربي الى الله عزوجل بالدعاء... والرسول عليه الصلاة والسلام قال لايرد القضاء الا الدعاء...ومابين طرفة عين وانتباهتها يغير الله من حال الى حال .... ادعي الله دائما بالتييسر والتسهيل .... صلي ركعتين في الثلث الاخير من الليل واكثري من الدعاء في السجود فاقرب مايكون العبد لله وهو ساجد وان الله حيي كريم ليستحي ان يرد يد العبد خائبتين صفرا.... ادعي بهذا الدعاء
اللهم ان في تدبيرك ما يغني عن الحيل...... وفي كرمك ماهو فوق الامل.....وفي حلمك ما يسد الخلل.....وفي عفوك ما يمحو الزلل......اللهم فبقوة تدبيرك وعظيم عفوك وسعة حلمك وفيض كرمك
اسالك ان تدبرني باحسن التدابير وتلطف بي وتنجيني مما يخيفني ويهمني......اللهم لا اضام وانت حسبي ولا افتقر وانت ربي......فاصلح لي شأني كله ولا تكلني لنفسي طرفة عين.... ولا حول ولا قوة الا بك
وتذكري دائما انها
ولرب نازلة يضيق بها الفتى ذرعا وعند الله منها المخرج
ضاقت فلما استحكمت حلقاتها فرجت وكنت اظنها لاتفرج .....
صدقيني بيجيكي الفرج والخير .... ممكن كثرت كلام بس ان شاءالله يفيدك في مشكلتك وفرج الله همك

يابنت احزنتيني لما قلتي أنك لك يومين تبكين
خوذي الأمور ببساطة ولو تفكرين فيها تراها ماهي نهاية العالم
الحمدلله واضح انك بصحة جيدة وهذا والله كافي أنك تكوني سعيدة إدري سمعتي مثل هالكلام كثير لكن والله ماتسوى. أذا بكيتي على الأمر هالبسيط هذا وش خليتي للي وضعهم أسوء من حالتك ,على سبيل المثال شوفي الأخ إبراهيم المشلول بالكامل اللي كتب بتويتر أن له سنه مشلول بالفراش ولا أحد يزوره وفيه ناس حالتهم أسوء منه والحمدلله على كل حال
يعني الهدف من كلامي لايضيق صدرك على شيء تافه وترى الضيقة والحزن من الشيطان وتأثر على صحة الأنسان.
وزي ماقالت الأخت اللي فوق
أنتي ماتعلمين وقد لاتعلمين أبداً الحكمة ممايحدث لك الآن
الله سبحانه لايقضي أمراً إلا لحكمة أرادها قديعلمها الناس وقد تخفى عليهم
ولك ان تتخيلي أنه لو كشف لك الغطاء وصرتي تشوفين المقدر لك في هالدنيا, لأخترتي الواقع يعني نفس اللي كتبه لك الله سبحانه
الله يسهلها ويسرها لك يارب وابشري بالدعاء.

وهذه هدية
بدر شاكر السياب لماصابه مرض مزمن
قال أبيات جميلة كل ماقرأتها أرتجف وطبعتها وعلقتها في الغرفة حتى أذا شتد ألمي قرأتها
هذي الأبيات يقول فيها أن المصايب هديه منك ياربي:



لك الحمد مهما استطال البلاء
ومهما استبدّ الألم،
لك الحمد، إن الرزايا عطاء
وان المصيبات بعض الكرم.
ألم تُعطني أنت هذا الظلام
وأعطيتني أنت هذا السّحر؟
فهل تشكر الأرض قطر المطر
وتغضب إن لم يجدها الغمام؟
شهور طوال وهذي الجراح
تمزّق جنبي مثل المدى
ولا يهدأ الداء عند الصباح
ولا يمسح اللّيل أو جاعه بالردى.
ولكنّ أيّوب إن صاح صاح:
«لك الحمد، ان الرزايا ندى،
وإنّ الجراح هدايا الحبيب
أضمّ إلى الصّدر باقاتها
هداياك في خافقي لا تغيب،
هداياك مقبولة. هاتها!»
أشد جراحي وأهتف
بالعائدين:
«ألا فانظروا واحسدوني،
فهذى هدايا حبيبي
وإن مسّت النار حرّ الجبين
توهّمتُها قُبلة منك مجبولة من لهيب.
جميل هو السّهدُ أرعى سماك
بعينيّ حتى تغيب النجوم
ويلمس شبّاك داري سناك.
جميل هو الليل: أصداء بوم
وأبواق سيارة من بعيد
وآهاتُ مرضى، وأم تُعيد
أساطير آبائها للوليد.
وغابات ليل السُّهاد، الغيوم
تحجّبُ وجه السماء
وتجلوه تحت القمر.
وإن صاح أيوب كان النداء:
«لك الحمد يا رامياً بالقدر
ويا كاتباً، بعد ذاك، الشّفاء!»