تفاصيل رحلتي ( جده نيويورك اورلاندو ) وشي مهم سار فيها

April 23rd, 2010, 07:33 AM

كان اقلاعي من جده يوم الخميس الساعه 2 صباحا وطبعن روحت ابودي العفش العصر قالو لا امريكا

لازم تودي العفش قبل الرحلة بـ 4 ساعات الموهم اني رجعت البيت وبعدين طلعت الساعه 11

روحت للجوازات حقونا كل شي تماام والتفتيش

وروحت لبوابة امريكا وكان برضو تفتيش لكن كل شي ع ما يراام

وركبت الطيارة وطبعن حسيت انو مقااعد السياحية مرررررة ما تخاارج و13 سااعه

قومت حولت ع درجة رجال الاعمال وكاانت مقااعدها اريح بـ 1000 مرة

الموهم اول ما اقلعنا وزعو علينا ورقتين طبعن البيانات عن الاسم واسم العائلة وتاريخ انتهاء الجواز وتاريخ انتهاء الفيزا وتاريخ الميلاد وهل انت مزارع او راعي وهل انت رايح امريكا للبزنس ووين بتسكن ف امريكا وهل معاك اكتر من 10000 دولار كاش وهل معاك اكل طبعن حطيت نعم انا وقالي ايش معاك قولت dates <<< تمر
ترا دي مو كولها لاني نسيت الباقي

و ع فكرة مو انا عبيتها كلمت الموضيف وما قصر جا وساعدني

طبعن لا احكيلكوم عن الرحلة بس الحمدلله حسيتها اهون من اللي سار بعد ما وصلت لنيويورك

واول ما وصلنا روحنا الجوازات ولمن جا دوري جلس ع الكمبيوتر وبعدين قاالي تعاال

ووداني زي الغورفا في اجانب يعني مو بس سعوديين الموهم جلست يمكن من 45 دقيقه لساعه

وبعدين قالي روح لاخر كونتر روحت الا واحد يديني ورقة ويقولي عبيهاا الموهم يوم عبيتها وجيت عندو الا يقولي اديني عنوان سكنك

قولتلو ما عندي سكن دحين قاالي انا ما اقدر امشيك الا بسكن الموهم جلست سااعه انا هوا نشوف حل للسكن الا الحمدلله طالعت ف الملف حق المعهد لقيت حاطين عنوان السكن

فا نصييييييييييحة انا واحد من المونتدى قاالي عادي العنوان حط عنوان المعهد لكن دا وقفني ومرمطني بسببو يقولي لازم عنوان سكن

الموهم اني خلصت الساعه 12 وكانت رحلتي التانية الساعه 4 يعني باقي 4 ساعات جلست بالمطار الين الرحلة و يلاا اركب الطياارة ع اورلاندو

طبعت روحت ع خطوط دلتا وطبعن لا فتشو فيا ولا ف اغراضي ولا ف لابي ولا ف شنطتي لا وانا نازل نيويورك ولا وانا رايح اورلاندو ولا يوم ما نزلت من اورلاندو عشاان كدا استغرب انكوم تقولو انو تفتيشهوم قوي

ومعقد والله انو تفتيشهوم زي تفتيش الرحلات الداخلية عندنا

وطبعن نزلت اورلاندو ودحين حاليا ف فندق رمادا الين ما القا عيلة ورقم غرفتي ولا بلاش اقولكوم هع هع

و ع فكرة شعب اورلاندو والله زي العسل الرجال يوم يشوفو معايا شنط يفتحولي البااب وسألت ولد عن رقم الغورفا ما قصر جلس يوصفلي هوا وامو واخوه والتاكسي اللي جابني من المطار تعامله مررة كويس والحورما حقت الاستقبال قولتلها اني ما اعرف انجليزي قالتلي مهي موشكلة وجلست تشرحلي حبة حبة

و ف النهاية اتعرفت ع 2 من تونس ف المطعم حق الفندق
ويلاا حباايبي تصبحون ع خير ليا 26 سااعه وانا متهجول بقووم انااام

والله يسهل للجميع ياارب واوصيكوم كل ما اشتقتو لاهلكوم اقرو قران واتقربو من الله لانو اذا الله معااك ما راح تحتاج شي وراح ترتاح ف غربتك يعني حتهون عليك

وقولولي ايش رايكوم ف الواو زي اوصيكوم هع هع

بييييس

• نشر عبر تويتر
• نشر عبر فيسبوك
• نشر عبر جوجل