قبل سفرك بـ 48 ساعه اقرأ موضوعي : )

 المشاركة الأصلية كتبت بواسطة MeMo0o_1

السلام عليكم ورحمة الله وبركاته

تحيه طيبه لجميع من يقرأ موضوعي وأتمنى أن أطرح للجميع ما يستفاد منه

انا حديث عهد بالولايات المتحده الأمريكية لكن اود أن اتكلم عن جميع الأمور وسأحاول أفصل لكم
باللي أقدر عليه

بالنسبه للي بيسافر لأمريكا أو الدول الثانية :

أولا .. معروف كل واحد وحسب أغراضه الشخصية وملابسه والبهارات ووو الخ

أنصح الجميع انه يجهز شنطتين << كافيه
تكون شنطه للملابس وبعض الأغراض

والشنطة الثانيه يكون فيها قطعتين من الملابس للضروره والأدوات الثانيه
مثل ادوات الحلاقه والصيدلية والبهارات والتمر والقهوة ... واللي ودك تاخذه

لكن أهم شي احرص انك ما تاخذ معك معلبات لأن يمكن يصادرونها منك
مثل الأجبان وحليب نستله او اي شي ثاني ممكن انه يتوفر بالأسواق
وهذي بعض الأمور تقدر تكتبها بورقه وتجهز على راحتك لو ما جهزت للحين :

1- تصوير الأوراق والمستندات وهي كالتالي:

الجواز
الرخصة
بطاقة الأحوال
بطاقة الصراف
كاش
ورقه القبول I-20
السيفس
الوثيقة و الشهادات ( لطلاب المراحل العليا )
السجل الاكاديمي ( لطلاب المراحل العليا )
التوصيات ( لطلاب المراحل العليا )

2- التأكد من خلو الكمبيوتر من برامج منسوخه ( إحتياطاً )

3- تجهيز الملابس وهي على النحو التالي ( امثله ) :

تيشيرتات
بناطيل
شبشب
جزم
جاكيت وبلوفرات
بجامة للبيت
حزام
ساعة يد
شال
قبع شتوي للرأس
قفازات
زي سعودي

4- تجهيز الأدوات المكتبية :
اقلام حبر ورصاص
ممحاه
قاموس
كمبيوتر
هاردسك
فلاش ميموري
شاحن جوال
ملف للورق المهم
مصحف
كتيب اذكار
سجاده صلاة
شنطة يدوية أو للظهر

5- تجهيز أدوات الصيدلية :
فوطه
شامبو
فرشة للشعر
فرشة أسنان
معجون أسنان
صابونه يد
ادوات حلاقه
كريم بشرة
عطر
مقص اظافر
ليفه للاستحمام

==========

.. اما الشنطه اللي بتكون في يدك ( اللي بتدخل بها الطياره )
ضروووووري يكون بها لبس شتوي
اما بلوفر او جاكيت وشال
لأن الجو بيكون بارد عليك بالطياره وبالمطار لما توصل بالسلامة

يجب عليك تجهيز الأوراق التاليه لأنك بتحتاج لها بالمطار :
نموذج i20
جواز السفر
قبول المعهد < يختلف عن i20
قرار الإبتعاث ( للمبتعثين من الحكومة )
صور شخصية مكشوفة الرأس للمبتعثين الذكور .. اما الإناث ما ادري يمكن حجاب وطالع شوي من الشعر

احرص اشد الحرص انه يكون معك كاش + بطاقة فيزا
لأن استخدام الفيزا اكثر من الكاش بكثيييير
بالنسبه للعزوبي اعتقد 2000 دولار كافيه لأول ما يوصل

بالنسبه للطلاب اللي رايحين أمريكا :

بعد الإقلاع بيتوزع عليكم نموذجين وهذي صور للنماذج :

اذا عطوك اياها سم بالله وسجل معلوماتك فيها مع الحرص ان الحروف تكون كابيتال
واذا ما فهمت بعض الأسئله ترى ما يمنع انك تسأل المضيفه أو احد بجنبك ..

لما تعبي النموذجين وتنتهي منهم .. جهز ما يلي لما تنزل مطار واشنطن:
1- النموذجين
2- نموذج I20
3- جواز السفر

لما توصل إلى المطار .. :

تأكد/ي أن ثقتك بالله عز وجل لن تخذلك .. توكل على الله الحي القيوم واسأل الله ان ييسر لك الأمور
انزل للمطار بكل هدوء مع السعوديين اللي معك

بيكون فيه مسارين .. ادخل مع المسار اللي يوجهونك له وخلك في المسار لحد ما يجي دورك
بعد ما يجي دورك بيقول لك الموظف روح لكاونتر رقم ...
خلك مجهز النماذج والباسبورت ولا تتعدى الخط الأصفر لين يطلب منك الضابط انك تجيه

بعد ما تجيه بيسألك بعض الأسئلة ويمكن يسألك هالأسئلة :
هذي زيارتك الأولى لأمريكا ؟
This your first visit to America?

كم معك كاش ؟
What amount of money with you

سبب زيارتك لأمريكا ؟
What is the reason for your visit to America

هل لديك عنوان ؟
Do you have an address

انت حط ببالك انك بتجاوب على قد السؤال وحاول ما تتكلم بكثره أو تعطيه تفصيل إلا للضرورة
اذا سألك عن العنوان قل له انك بتسكن بالجامعة وتوريه العنوان اللي بالـ I20

ملاحظه للي انجليزيتهم ضعيفه :

ترى جو قبلك آلاف وآلاف مثلك ويمكن اقل من مستواك بكثير والحين ان شاء الله ماشين
فأنت عادي لو ما تعرف قل له انا لا أتحدث الانجليزية بشكل جيد
I don't speak English well

وعادي لو تضطر انك تأشر بيدينك تشرح له واترك عنك الخجل او الإحراج تراك ببلد ثااااااني غير السعودية

بعد ما يسألك ويخلص بيوجهك إلى مكتب .. تروح للمكتب وتعطيه اوراقك بيقعدونك بزاويه ...

بالنسبه للمتزوج .. احب اريحك من الآن واقول لك وضعك بيكون في مطار واشنطن أريح من العزوبي
لأنهم يمشون العوائل بسرعه مو مثل العزاب

بصراحه الزاويه هذي اكثر الناس يشتكي منها وأنا اولهم
انا جلست فيها 7 ساعات لين نادو على اسمي ورحت لهم
توقعت بيفتشوني تفتيش خاص ويفتحون الشنطه

لكن بعد كل هالجلسه سألني كم سؤال وختم جوازي وقال خذ شناطك ..

بيصير لك مثل اللي صار لي ,, بتاخذ شناطك وتدخل غرفه تحط فيها شنطتك بالسير بعدين تاخذها

وأول ما تاخذها وتطلع لصالة الاستقبال بتلقى لوحة تابعة للملحقية الثقافية ( الله يجزاهم خير )
وقف عندها لين يجي موظف الملحقية .. اعتقد انه مصري اللي بيجيك
سجل اسمك عنده وبيدلك على الباص تنتظر الباص وياخذك الفندق ,,,

بعد الوصول إلى الفندق :

تأكد ياعزيزي الغالي ان الفندق سعره مخفض للطلاب السعوديين وفيه اكثر من فندق
انا سكنت بفندق ( دبل ثري ) وبصراحه رااااايق ونظيف
اليوم بـ 94 دولار

اول ما توصل اطلب نموذج حق الملحقيه عشان تسجل اسمك وتوقع على التعهدات
سجلها بعدين اتفق مع سائق الملحقيه على موعد ذهابك للملحقية

بهالحاله بيطلب منك :
صورة من الجواز
صورة من قرار الابتعاث
صورة من شهادة الثانوية < مهم تاخذ معك صورة من الشهادة الثانوية + صورة مترجمة

لما تقوم الصبح ان شاء الله وتروح الملحقيه بيعطونك ثلاث أوراق:

1- ضمان مالي
2- ورقة تأمين طبي
3- ورقة للدخل السنوي

بتحتاج لهم لما تفتح حساب او تروح لمعهد اللغه او تستأجر غرفه او رخصة القيادة او اي شي

بهالحاله تكون خلصت من شغلك بواشنطن وباقي لك تعيد ترتيب شنطتك عشان تروح المطار وتتوجه إلى مدينتك

التوجه إلى المطار :

عند التوجه إلى المطار جهز تذكرة السفر + جواز السفر والمسأله بسيطه
مجرد انك تعبي اوراقك بتوجهك الموظفة على بوابتك .. تحط الشناط بالسير وتروح إلى البوابه اللي بتطلع منها

قبل الدخول إلى منطقة البوابات بيكون التفتيش فيها شديد جداً لذلك اذا وصل دورك
عط الشرطي التذكره + الجواز .. بيوقع على التذكره وتروح للتفتيش

ولازم تسوي هالخطوات :
1-
اخلع الحذاء ( اجلك الله ) والحزام وضعهم بالصندوق
2- اذا الشنطه اللي معك فيها لاب توب طلعه وحطه بالصندوق
3- ضع جميع اغراضك بالصندوق وركز بالعلامات الموجوده بالأرض

بعد ذلك بيفتشونك تفتيش شخصي ثم تاخذ اغراضك وتتوجه للبوابه
ورحلة سعيدة إلى مدينتك

احب اذكركم خاصة اللي مدينته صغيره ترى المطارات بشكل عام مو كويسه .. كذلك الطيران
احتمال تنلغي رحلاتكم بأي وقت لكن تفائل بالخير

انصحك تحمل معك كتب تشتريها من الرياض تقضي وقتك بها
وبصراحه فيه كتاب يهم كل مبتعث اسمه : الدراسة في الخارج
للمؤلف : د. عبدالعزيز بن عبدالله بن طالب

كتاب قيم وبتستفيد منه خاصه المبتعث الجديد

بعد وصولك لمدينتك

حاول تفتح حساب بنكي + تتعرف على اقرب موتيل لمعهد اللغة عشان ترتاح

اما اذا عندك عائله بيكون من حظك

هذه خلاصة تجربتي للأيام الماضية واعذروني على التقصير
فأنا مثلكم حديث عهد بالولايات المتحدة وحاولت اني اعلمكم بالأمور اللي بتحصل لكم
وأهم شي تحسب حسابك لكل اللي قريته عشان ما تتورط !!

امور يجب عليك مراعاتها :
* الصلاة في وقتها ( حتى لو بالمطار ترى يتفهمون وضعك وما يقولون لك شي )
* المحافظة على الأذكار
* الثقه بالله عز وجل ثم بنفسك
* اقناع نفسك بأنك في بلد ثاني فيه عادات وتقاليد تختلف عن مجتمعك الحالي
*زرع الإبتسامه في داخلك ( انت بتقضي مده معينه بالمدينة ,, وسع صدرك ولا تتضايق وتتذكر الأهل والأحباب )

تذكر ثم تذكر ثم تذكر :

أنك سفير لبلدك ، وقبل ذلك سفير لدينك
الشر يعم والخير يخص .. كن خير من يمثل دينه ووطنه بالتعامل الطيب وحسن التدبير والمحافظة على
مواعيدك بالدراسة وعدم التأخر بتاتاً وأظهر لهم مدى طيبة الشعب العربي المسلم !!

هذا والله أعلم وصلى الله وسلم على نبينا محمد

محمد, الولايات المتحدة الأمريكية, نيو هافن
7-10-2010

آول حاجه مشكووووووووووووووووور يالغاااالي ومجهووود بطل وربي يجعله ف ميزان حسناتك

ثاني شي بما إنك آخوي بمدينه نيو هافن ممكن تخدمني وتفيدني عن معهد ELS وكم تقريبا يكلفني بالشهر وكيف قوة وسمعت المعهد الله لا هينك يالغالي

lemo0o

October 19th, 2010, 02:54 AM

رد مع اقتباس

7 "

حياك الله اخوي الغالي ,,

المدينه بشكل عام هادية + باردة + السكن فيها غالي

المعهد حلو لكن السعوديين تفاجأت بكثرتهم .. الكلاس اللي انا فيه عددنا 10 .. 8 سعوديين و2 صينيين

مميزات المدينه انها حول بعض المدن الرئيسية مثل نيويورك وبوسطن وواشنطن

تقربياً بالشهر ياخذون 1700 دولار بس مو متأكد .. تقدر تشيك على الرابط حق موقع المعهد :
Study English - New Haven, Connecticut