الظرف المسكر

السلام عليكم
الأخوة والأخوات الأعزاء...
بعض الجامعات الكندية عندها تشديد في أمور معينة مثل التوصيات أو الخبرة العملية وممكن الاتنين مع بعض لذلك يجب التنبه لذلك.

1- بالنسبة للتوصيات فالأفضل في نوعية التوصيات هي التوصيات التي تكون بطريقة العلامات يعني تكون كل نقطة مفصلة
مثال... القدرة ع الإبداع استثنائي - ممتاز - جيد - يمشي حالوا
والدكتور يحط العلامة وهي متوفرة باللغتين في جامعة الملك عبدالعزيز والمهم اللغة الانجليزية وابتعدوا عن التوصية المكتوبة بطريقة التعبير.

2- إذا تعاون معك الدكتور وإن شاء الله هم كذلك في تعبية الفورمة حق الجامعة الكندية فدي حاجة كويسة بس لاتغني عن أخد التوصيات حق الجامعة نفسها.

3- طبعا بعد كدا تختمها عند السكرتارية حقت الكلية وبعدين تصورها ماكتب الله لك يعني لاتقل عن 30 صورة لكل توصية وتروح عند عمادة القبول والتسجيل بالنسبة لطلاب جامعة الملك عبدالعزيز
ومعاك ((قلاب)) مليان ظرووووووف وتحت كل توصية في ظرف وتختم عند العمادة وهو بكل حب ودون أي اعتراض وليس من حقه التمنع عن التختيم لأن كل ماعليه إنو يطابق بين الأصل والصورة في كل ظرف وبعدين يختم الظرف (وما عليك بعد أول عشرين حيقول لك ترى الشغلة أمانة يلا قفل وأنا أختم بدون مايطابق).

4- من المهم إنو يكون معاك هذي الأشياء مصورة والأصل معاك (( شهادة التخرج , التوصيات)) وكلها مصورة وتجيب ظروف معاك عشان تحطها جوا الظرف وهاتك ياختم.

5- ((السجل الاكاديمي)) ولغير الناطقين بالعربية الترانس كربت تجيب الله لايهينك بطاقة الصراف وعند العمادة جهاز حق الشبكة السعودية وتطلب عشرين سجل أكاديمي بـ 200 ريال لأنو السجل بعشرة ريال ويعطيك سجل قشششششششطة ومختوم تأخد هادي العشرين وتحطها برضو في ظروووف وتختم ــ أبوها من تختيم ــ قلتلك جيب معاك قلاب ظرووووف.

6- وصايا عامة...
$ حاول مع الدكاترة إنو يساعدوك في تعبية الفورمات حقت الجامعات إللي بتقدم عليها ويختموها وإن لم يكن فالتوصيات حقت الجامعة إن شاء الله تقوم بالواجب إن شاء الله.

$ xXx لاتنسى تختم الأشياء دي التوصيات , الشهادة , السجل الأكاديمي وخلي الـ xXx شعارك لهذي الثلاثة عشان لاتنسى .

$ الختم يكون عند الاستقبال في عمادة القبول والتسجيل.