لمبتعثين الماستر لوقبلت ماستر داخلي جامعه حكوميه هل تفضلها ام تفضل الابتعاث

طبعاً الافضل من وجهة نظري البعثه ، اولاً تتقن اللغة ، و ثانياً تتعلم صح و تتخرج من جامعات قوية عالمية

طبعاً لازلت للآن استغرب ممن يبحثون عن جامعات في البعثه تكون اي كلام ! وش بتستفيد ! ماني مستوعب للآن ، ارى ان من يبي بعثه ثم يروح جامعه اي كلام انه جالس يضيع وقته بالفاضي و يتغرب على لاشيء

يعطيك العافيه على الرد السريع

والله بالنسبه لي افضل الماستر بدول غير عربيه بشكل عام لسبب ... نوعية الدكاتره ! المشكلة في اغلب الدكاترة السعوديين والدكاتره العرب بشكل عام يناظر الطلاب نظره دونية ... وموب احد يقول هالحكي انا جربت بنفسي .. برضو دكاترة وصلت فيهم البجاحه انه يعطونا نسوي دراسه ويقول بالفم المليان موب لسواد عيونك معطيك اياه انا جالس اجهز بحث واحتاج للدراسه ذي !! يعني حتى الذوق اختفى ... وطبعا بغض النظر عن مزاجية الدكتور ينجح اللي يبي ويرسب اللي يبي ... واحيان تاخذ اكثر من حقك وانت ماقدمت شي اصلا واحيان يهضم حقك وانت مقدم كثير ! بس الخارجي حقك بتاخذه وحسب ماتعطي بتلقى... وخلنا من هذا كله ! المناقشه وهي المناقشه طالب يناقش دكتوره يبي يفهم نقطه غامضه لكن عشان الدكتور زي ماتقول دكتور اي كلام ومايتنزل للمناقشه اللي ممكن توضح ان الطالب اذكى من الدكتور يصير الدكتور يستقعد له ! تخيل ! طيب انت دكتوري انت معلمي ! نجاحي من نجاحك ! لكن وش تقول اما الخارجي غير ! بالعكس يحرص انه يفهمك صح وانه يكشف عن الغموض كامل لسبب انه يشوفك صورته بكره لما تتخرج وتنجح بحياتك وتوصل مواصيل كبيره يقول هذا احد طلابي يعني مثل التاجر اللي يفرح ببضاعته عالية الجوده ومثل المزارع اللي يفرح بمحصوله الممتاز ... الداخلي الدكتور مايعلمك يتحداك تاخذ المعلومه ! طول الترم وهو يتحدا طلبته ويركز في تقييمهم في مواطن ضعفهم ! اما الخارجي لئ يعلمك ويعلمك ويبين لك ضعفك ويخليك تركز عليه ويساعدك في تقويته ثم يقيمك على كل شي ضعفك وقوتك ... وللاسف اغلب اللي يتخرجون من جامعاتنا يايتخرج بالبركه ! او يتخرج مظلوم ومهضوم حقه
الجامعات الخارجيه فيه امكانيه انك تبرز وتطور نفسك وبالعكس لو الله معطيك موهبه في تخصصك مثلا بيساعدونك فيها ويطورونها لك ... الجامعات الداخليه بكل بساطه " ركز عاللي تنعطيك بس ومالك شغل بالباقي" هههههههه

طولت بالحكي لاني والله مقهور من جامعتنا يشيخ مريت عند دكاتره يستغل سلطته والمشكلة مريت عليهم اخر اترام لي بالجامعه يعني مضطر اسكت واقول يالله سلم بس قربت النهايه ...لكن والله انها امور تفقع الضغط مع ان جامعاتنا والله لها انجازات وعندها امكانيات وفيها موارد سواء من هيئة التدريس او الطلاب مع كذا هيئة التدريس فيها اغلبيه هم سبب تخلف هالجامعه .. وللأسف ان هالاغلبيه كلهم خريجين امريكا وبريطانيا وانتي جاي ومفروض يكونون اكثر تحضر لكن للاسف هم اكثر تخلف .


وبالاخير انا ماعممت وبرضو مريت بدكاتره عسل تحطهم على راسك والله بس للاسف قله ! وانا كل اللي ذكرته مريت به شخصيا او اعرف احد معرفه شخصيه استشارني وش يسوي بموقفه .. يعني موب سمعت فلان قال وعلان ماقال والا يقولون


الله يوفقنا جميع ويصلح حالنا وحال المسلمين اجمعين

شوفي يابنتي .. اسمحي لي اقول ان عذرك مخيس جداً لماذا ؟

لان وحده مثلك متعلمه وماشاء الله درجاتها ترفع الراس وعندها طموح في مواصلة الدراسه وتحقيق حلمها وتسئل سؤال مخيس ...

لانو ماكان وش الدول اللي مافيها جيمات ؟ ولا كان وش الدوله اللي دراستها سهله مقارنه بباقي الدول ؟ ولا كان وش افضل الدراسه داخلياً او خارجياً ؟ ... الخ من الأسئله المعقوله ...

بعد السؤال المخيس ... خوفك من شي بايخ ... من فشل ! سبق وقال لي احد اساتذتي في الحياة يوم كنت انا وياه نشتغل على مشروع مهم قلت يوه تخيل عاد يفشل المشروع قال لي " لو مافشلت كيف تبي تتعلم !"

كل شي بهالدنيا له ثمن وكل ماكان الثمن غالي معناته الشي اللي انت جالس تسعى له شي عظيم عشان كذا ثمنه غالي .. فكري وش زود اللي طلعو ماستر ونجحو وكملو دكتوراه ورجعو عنك ؟ وش عندهم ينقصك !؟

بعدو خوفك البايخ من كلام الناس ! .. معليش الناس لو نجحتي فرحو لك شوي وخلاص انتهى وان فشلتي حزنو عليك شوي وانتهى ولكن الامر الاخير هو نفسك ..

رضاك عن نفسك انك حققتي شي طمحتي له او اكتشفتي ضعف لك من خلال فشل محاوله و تتجاوزينه مره ثانيه او تقوين هالضعف يعني ماطلعتي بخساره في كلا الامرين

فيه حكيم انجليزي بترجم كلامه عاد ان اخطيت في القواعد العربيه اوب مشكلتي هههههه

يقول " من الذي يهتم برأي الاخرين ؟! انظر في قلبك فقط وافعل الشي الذي يجعلك سعيداً"

بعد خوفك البايخ .. نظرتك اللي مافي كويس .. ليه النظره السلبيه ! كيف نجحتي في الجامعه بتقدير مشرف ! وليه حاطه ببالك انك بتفشلين اصلاً .. من كلام بنات اعمامك واخوالك المحبط ؟! خوفك من كلام الناس ؟ بالعكس انتي ذكيه

مفروض تحولين الشي هذا لدافع لك انك تجتازينها وبامتياز بعد عشان تثبتين ان نظرتهم لك غلط ! واصلا منتي بحاجه انك تثبتين شي لاحد غير انك تحققين شي تطمحين له وانو انجاز حققتيه لنفسك

قلتي وش تنصحون فيه انا انصحك بالتالي ...

استخيري الله اولاً واخيراً اذا كان عندك مرافق وامورك تمام ورغبتك تدرسين برا السعوديه وشفتي انك بعد الاستخاره مرتاحه توكلي على الله ...

ونفس الشي للدراسه الداخليه اذا ماتوفر لك محرم والا مارتحتي بعد الاستخاره لدراسة خارج السعوديه ومرتاحه للداخليه توكلي على الله ...

خليك من كلام الناس وفلان وعلان وبنت خالي وبنت عمي وبنت اخوي وبنت جدي وبنت جيراننا وبنت بطتنا تقدر بطتكم تجيب بنت بطه زي بنت بطتنا ...

كلاً له ظروفه ونظرته ظروفك انتي ونظرتك غير حتى النظره تختلف من اخو واخ وهم اخوان وطالعين من بطن واحد ! تختلف نظراتهم

وبالنسبه لخوفك من الفشل فيه حكمه انجليزيه مادري اذا ترجمتها بتكون مفهومه او لا لكن عاد انتي وحظك مثل الترجمه الاولى ههههههه

" في حياتنا نريد أخذ الطريق السهل بسبب مخاوفنا ,!
اننا اذا فشلنا يلقى اللوم علينا ! , الحياة مخيفة لنعتاد على ذلك !
لاتوجد حلول سحريه الأمر كله متروك لك , لذا ابداء بالعمل من الان ! ,
واذا كان ذلك صعب تذكر (ان لاشيء في هذا العالم يأتي بسهوله) "

وأفضل من كلامي كله كلام الله عز وجل في الحديث القدسي عن النبي صلى الله عليه وسلم فيما معنى الحديث
" انا عند حسن ظن عبدي بي ان ظن بي خيراً كان خيراً له وان ظن بي شراً فكان شراً له " او كما قال عليه الصلاه والسلام ...


ف الان الخيار لك .. ميلوك و نظرتك ... استخارتك .. توكلك على الله ثم البدء في اتخاذ قرارك والعمل ..


وشكراً لك

السلام عليكم ....

صراحة كلامكم في الصميم .... وانا امر في نفس الموقف الان
والله ماني عارف وش اسوي .... لكن مالنا الا الاستخاره ... وان شاء الله يقدم لنا اللي فيه الخير


بس ياليت الواحد يوضح لنا الفروقات من ناحية الدراسة ....
يعني الكلاسات المواد والمكتبات خطة الدراسة ... الخ ... ياليت احد يتكلم من تجربه

تمنياتي للجميع بالتوفيق

كما ذكر اخي من قبل ، ثم كيف عرف لان جامعاتنا مسويه فيها هارفارد و ما تقبل الا معدلات عاليه جداً و بعد اختبارات و قلق

طبعاً الجيمات مو مطلوب لكل التخصصات لكنه غالباً مطلوب للتخصصات الادارية مقابل الجي ار اي للتخصصات الهندسية ، و يمكن تلاقين جامعات ما تشترط

عندك في كندا مثلاً ماجستير ادارة الاعمال اغلب الجامعات تشترط خبره لا تقل عن سنتين ، و فيه كم من جامعه ما تشترط الخبره

فلا تضعين اي اختبار عائق لك ، بجانب ان لكل اختبار دورات "و اظن" الملحقية تعوضك عنها ، فأمر الاختبارات سهل و بسيط جداً بإذن الله بس يبيله تعب

لن تنال المجد حتى تلعق الصبرا ، و بإذن الله انك تتفوقين انتي و غيرك و انا و كلنا و نرفع رأس اهلنا و بلدنا اللي ابتعثنا و ما وظفنا للاسف الشديد

انا عرفت معدلك عالي من خلال ارتباكك في الكتابه واسمك وامور كثيره " صورة واحد يكبّس بعيونه وهو يتكلم يعنني سحر هههههه "

لان من خلال كتابتك والفرصه اللي تهيأت لك ماشاء الله واضح انها كانت عن جهد لأن غالبا لو معدلك موب زين وانك ممشيه حياتك العلميه بالواسطه فأنتي تعرفين وش جالسه تسعين له

عالعموم بالتوفيق لك يارب في حياتك والله ينفع بك الاسلام والمسلمين

وشكراً عالدعوه