شرح الفيـــزا الأمريكيــة

السلام عليكم ورحمة الله وبركاته

حبايبي انا بس بقلكم الخطوات اللي عملتها عشان اطلّع الفيزا الأمريكية

أول شي وأهم شي .. انتو المسؤولين انكم تطلعوها مو الوزارة

وعشان اللي يسأل .. أنا كان موعدي أول أمس يوم الاحد 13 نوفمبر

والحمدلله والشكر لله .. اليوم دقوا عليا فيدكس يقولولي عندنا الجواز حقك .. يعني يومين بالزبط

أوك بسم الله نبدأ

#1 .. احجزوا موعد من دحين .. وخلوه مثلا بعد اسبوعين .. حسب توقعاتكم متى راح يوصل الاي تونتي

حتى لو ما وصلت .. عندكم فرصتين تغيروا الموعد

نصيحة لوجه الله: لا تروحوا المقابلة الا واوراقكم كاملة ..

وحاجة اضيفها .. ما ادري في المقابلة ممكن يسألوكم عن بطاقة الملتقى

هل لازم بطاقة الملتقى او لا .. بليز راسلو الوزارة

صح يمديكم تروحوا وتكملو الباقي بعدين .. بس دا يؤدي إنو الفيزا تطوووووووووووووووووول

الحجز ما ينفع إلا بعد ما تكونوا عبيتو نموذج DS-160

ودا النموذج في الموقع دا

https://ceac.state.gov/genniv/

راح يجيكم اختيارات .. اللي ما عنده انجليزي كويس

يختار عربي .. وحيلاقي عند كل جملة انجليزية تجرمتها بالعربي

طبعا تختاروا نوع الفيزا F1

واللي ما عنده اي تونتي لسه .. لمن يوصل مكان رقم السيفس .. يحط N0000000000

وتكملوا عادي

لو سألوكم اعطونا عنوان احد في امريكا

افتحوا موقع المعهد وحتلاقو تحت مررررا عنوان المعهد

حطوه وحطوا رقمهم

اوك .. وطبعا لازم ترفعوا صورة ليهم ومكتوبة شروط الصور في اول صفحة

لمن تخلصوا احفظوا النموذج .. وتجيكم صفحة

confirmation

دي لازم تطبعوها عشان المقابلة


خلصنــا الـ DS-160


نروح للموعد .. طبعا سووا النموذج والموعد اليوم قبل بكرا .. نصيحة تانية

موقع الموعد هوا دا

https://ksa.us-visaservices.com/Form...GroupUser.aspx

هنا لازم يكون عندكم فيزا او ماستر كارد

لازم تشتري زي الكود


حيكون باسمك وعشان تحجز .. وما تقدر تحجز من غيروا

طبعا هنا راح يسألوك إذا كان عندك اي تونتي او لا

اذا ما كان عندك لسه .. اضغط على انك ما عندك اياه

بس لازم تجيبوووه وقت المقابلة

وهادا موضوع كيف بالزبط تحجز موعد

http://www.mbt3th.us/vb/forum16/thread3264.html


طبعا ما تجي السفارة إلا وانت دافع السيفس

وطنّش اللي يقلك لا تدفع السيفس

ما تبو توقعوا نفسكم في مشاكل انتم في غنى عنها

وان شاء الله الوزارة راح تعوض تكاليف الفيزا والسيفس

http://www.mbt3th.us/vb/forum16/thread552.html

وكمانا شوياا شاء الله راح اكتب ايش سار في موعدي في السفارة بالزبط

اوك .. حكايتي مع السفارة

أول شي انا حجزت موعد من السفارة قبل اجازة الحج

وخليتو يوم 13 نوفمبر .. يوم الأحد الساعة 7:30 صباحا بجدة

صحينا انا وبابا يوم الاحد الساعة 6 ومشينا عالسفارة

السفارة جنب مستشفى فقيه

وصلنا الساعة 6:45 .. فاضيين رحنا جبنا عيش وقاعدين نأكل الحمام

المهم . دخلت ومشييت في الممر الطويل

كان في صف وقفت فيه

كان قبلي في حوالي 7 اشخاص .. و4 منهم كانوا طلاب .. باين عليهم ما رحت سألتهم واحد واحد

الرجّال عند الباب سأل عن جوازي عشان يشوف اذا عندي موعد او لا

لقي انو موعدي 7:30 وقدّمني قدام الصف

لمن يجي دوري الرجّال اللي عند الباب دخلّني ومشيت عند تفتيش .. حطيت ملفي جوا السلة ومشيت عبر الشي داكا اللي يطوط

ما طوط عليا .. قدامي كانت في حرمتين .. وحدا اخدتني وقفلت ستارة وفتشتني

واخدوا جوالي واعطوني رقم عشان الجوال

قالولي اخرجي من هنا

عند الباب اللي فتحلي الرجّال

قلّي امشي على الخط الأبيض

وأنا ماشية بالززبببببببببببط في النص

>>> ماشية عالقوانين :P

دخلت مبنى تاني وعلى يميني كان في رجّال اعطاني رقم عشان استنى دوري

لقيت جوا ممكن 9 اشخاص

المكان هاديييييييي يجيب الطفش

كانت دوبها الساعة 7:40


قاعدة استنى .. كان رقمي 522 والرقم اللي موجود 516

قعدت اقرا الكتاب اللي كان معايا

واخدت من عند الباب كتيب عن الـ SAT حزاكر منو :P

المهم .. جا رقمي ورحت عند شباك 6

الرجال قلي اعطيني ورقة النموذج DS-160

والاي تونتي والجواز

اعطيتو اياه .. وبصمت اربعة اصابيع يمين وشمال

وابهامين

وقلي ارجعي ودحين نناديكي تاني

رجعنا تاني .. من الطفش رحت رتبتلهم المنشورات وزبطتها ورجعت مكاني تاني

نادوني من المايك اللي في الغرفة

rawaa felemban .. window 4

رحت على شباك اربعة

جابولي واحد خواجة اشقراني .. قلت في نفسي راح اطفش منهم قريب ان شاء الله

سألني رايحة دراسة ... ايوا

فين ... اورلاندو ، فلوريدا

متى اتخرجتي .... 3 سنين

اشتغلتي ولا درستي .... ايوا

فين ... جامعة الملك عبدالعزيز

ايش .... طب

طبعا مو مهتمين ايش الجواب ..المهم انو يسمع جواب

قلي اعطيه كشف درجاتي حقت الثانوي والجامعة

وكشف الحساب

قاعد يضغّط على الكمبيوتر

قلي شكرا واداني كل اوراقي .. ورورحي ادفعي فلوس فيدكس .. وراح تجيكي بعد 4 - 5 أيام

طبعا فلوس فيدكس عشان السفارة ترسل الجواز لبيتك بعد ما يخلص

65 ريال اذا في نفس المدينة

165 اظن لخارج المدينة

وبس .. الحمدلله ولا يومين وخلوا الفيزا
ربنــا يوفقكم في كل خطوة

وان شاء الله كل أموركم تتسهل


(( http://www.mbt3th.us/vb/forum16/thread22277.html ))