البعثة إلى أمريكا .. الوصول إلى مقر البعثة والتجهيزات للمعهد

أول شي .. ايش رأيكم في اسم الموضوع بالله .. متعووب عليه !!!


بسم الله الرحمن الرحيم


اللي ما يعرفني .. أنا رواء فلمبان

مبتعثة من المرحلة السابعة

مرحلة بكالوريوس ومقر دراستي للغة في فيرجينيا - أمريكا

أنا وصلت لأمريكا يوم 18 يناير 2012

يعني بالزبط 30 يوم من اليــوم

بكتب الموضوع دا عشان أعطيكم كل معلوماتي وخبرتي اللي قدرت اجمعها في الكم يووم دول



أول شي قرار الابتعاث وأمر الإركاب

بما إني بكالوريوس .. عرفته أنو جات فترة قالو فيها إنه طلبة البكالوريوس ما يقدرو يطلعوا إلا بقبول جامعة

ما أعرف إيش صار في الموضوع دا .. لكني من أوائل الطلاب اللي طلعلهم قرار الابتعاث بعد صدوور دا الأمر (ما يطلع القرار إلا بقبول جامعة)

أعتقد والله اعلم إنه الموضوع دا اتلغى .. وإذا لآ ..

اللي عملته أنا هوا إني رسلت بالايميل اوراقي كلها مع الاستمارة يوم الاربعاء أوووووووووووول ما جاتني الفيزا

وفي نفس اليوم قبل ما أرجع البيت من مكتب فيديكس .. رسلت الاوراق كلها بالبريد الممتاز

لــكن .. انا رسلت مع الاوراق خطاااب أطلب فيه تجاوز شرط وجود قبول الجامعة

بعد ما رسلت اوراقي بالايميل .. بعدها بـ 15 دقيقة جاني الرفض ..

رجعت راسلت الموظفة قلتلها ابا الخطاب يوصل للدكتور الحربي

قالتلي اوك انا احاول .. رجعت رسلتلها تاني قالتلي انا كلمت قسم الرجال وشرحتلهم وضعك

كان نفسي اقووم عليها اقلها ابا الخكاب يوصلو بنفسه ويقراه

لكن قلت حسبي الله ونعم الوكيل وسكت

قلت لازم دحين أجييب قبول جامعة من أي جامعة في اي حتة في امريكا ان شاء الله الاسكا

وفعلا .. بعد سهر الليالي لقيت جامعة تجبلي قبول مشرووط من غير توفل ولا شي

المفاجأة هيا .. يوم السبت الصباح .. رن جوالي

رفعت السماعة وطلع واحد موظف من الوزارة .. قلت اكيييد جا الرفض

قلي انتي مقدمة بكالوريوس .. قلت ايوا

قللي ما جبتي قبول جامعة .. قلت لأ

جاية ابا اتضارب معاه اقله انتو وانتو ... سكتني وقلي .. جانا خطابك ..

قرينااه واعطينااه الدكتور.. ووافق يطلع قرارك

طبعا دا كلللله وانا ساااكتة لا حس ولا نفس ..

زعقت شويتين في ادن الراجل وقاعدة انطنط مع صحبتي (كنا بنتفرج بريكينغ دون)

والحمدلله .. ما صدقت ارجع البيت عشان اقوول لماما وبابا انو قراري طلع

فعلا كان شي يفرح بعد مرمطة 4 شهوووور

واووووول رحلة عالرياض عشان أمر الاركاب

أمر الاركاب ما كان في اسهل منه

دخلت قسم السيدات .. كان فاضي !!!

قصدي في موظفات لكن ابدا مو زحمة

رحت عند موظفة قلتلها ابااطلع امر الاركاب

اعطيتها اوراقي .. الموضوع ما اخد 5 دقايق

اعطتني رقم وقالتلي روحي عن اللفة مكتب الطيار

والحمدلله .. حجزت اول رحلة على واشنطن بعد 4 ايام بالزبط


في موضوع التجهيزات وهجولة اخر لحظة والرحلة على الخطووط القطرية لكن ما أظن ليها داعي !!!


نروح عالمهم .. الوصول لواشنطن ومقر الدراسة

الرحلة الحمدلله كانت سهاالة ومافيها مشاكل

وصلنا المطاار .. وكنت خااااايفة من التفتيش .. يعني مو برجع بس قلقاانة منه

بعد ما اخدنا شنطنا ومشينا للبوابة .. مشينا مشينا مشينا

ولقينا نفسنا في الشارع

حتى ما مسكوا الشنطة ولا طلبو نفتحها !!!!!

ولا اللاب توب شافوووه ولا هم يحزنون

ما كان في الجهاز الضخم حق التفتييش .. دا بس للناس اللي هما شبهو او الليي يجيبو شبهة لنفسهم !!

أوك .. الصراحة انا رسلت للملحقية انهم ياخدونا في المطار

وفعلا كان في احد هناك

لكن مشينا من جنبه المسكيين

قولو لييش .. اوك هنا تبدأ النصائح .. نصيحة #1 صح انو كويس انه الملحقية راح تاخدكم وتوصلكم للفندق

لكن الشي الوحيد اللي راح تستفيدو منه .. انه بدل التاكسي واللي ممكن يطلع 90-140 دولار

وطبعا لو كنتو شايلين شنط كبيرة وكتيرة راح تتضطروا تاخدو تاكسي فان كبيير .. يعني فلوس اكتر

اللي ابا اقلكم اياه .. استأجروا سيارة بـ جي بي اس .. من المطار في باص يوصلكم ببلاش عند المكان اللي يأجر سيارات

دا بإفتراض انكم حاجزين فندق من السعودية

وقولوو ليش كدا احسن .. اوك .. لو استأجرتو سيارة .. راح توصلو نفسكم للفندق اللي تبغووه من غير ضيعان ولا شي .. وانتو اصلا راح تحتاجو السيارة بعدييين !!!!
يعني مره وحده مشوار واحد

واحسن والله تعتمدوا على نفسكم نمن البداية .. لسه قدامكم سنييين لحالكم .. ابدؤووها من البداية

وكمان .. لو اخدتو الفنادق اللي تحطكم فيها الملحقية .. راح تصرفو حوالي 120 دولار في الليلة

انتو من اصله احجزوا فندق اي كلام .. مو معفن يعني انما حق النووم بس .. وصدقووني ما راح تقعدوا فيالفندق طوول اليوم .. يا دووب ترجعو عشان تنامو !!

كمان .. لمن تحجزو فندق .. لا تحجزووه قريب من الملحقية .. الملحقية مررررررررره مالها داعي في الفترة ديكا

احجزوه قريب من المكان اللي تبو تدورو سكن فيه .. او قريب من المعهد اذا راح تبدأ دراستكم قريب

والنصيحة #2 لا تتعبو نفسكم وتروحو الملحقية !!!!!!!!!!!!!!!!!!!!! لا تروحو الملحقية .. لا تروحو الملحقية

في نفس الفندق اللي انتو فيه .. روحو الفرونت ديسك وقولهم ابا استخدم السكانر والكمبيوتر

وعادة يكون واحد موجود للزوار اصلا

ارفعو الملفاات كاااااااااااملة وبعدين اعمله تسليم

لا تتوقعو انو يجيكم الموافقة في لحظتها .. اعطوهم يوم يوميين .. وطبعا لا تحسبو الويك اندز

ووقت ما تستنوهم يفتحو ملف .. لا تقعدو كده من غير ولا شي .. تستنو فرج الله وما تعملو حاجة

بسم الله ابدؤوا تدوير على شقق

طبعا البحث عن الشقق دي حكايتها حكاااااااااااية .. موضوع ومجلد اخر

طبعا ما تقدروا تعملو عقد إلا بعد ما تفتحوا الملف وتجيبو ورقة اثبات

بس غير كده الحمدلله سههاااااااالة

نجي عالمعهد

الظاره انو المفروض اول ما توصلو البلد ترسله للمعهد انكم وصلتو عشان يسجلوكم في الترم

باختصاار .. تروحو أول يووم

وتقولولهم انه انتو من البعثة وتجيبو الاي تونتي والجواز حقكم

ببساطة يسجلولكم ويقولوكم خدو الكتب .. المفرووض ما تدفعو ولا نص دولار على الكتب

وممكن او يووم يختبروكم اختبار تحديد مستوى ..

بس غير كده كل شي حلو وميسر

بس دا اللي عندي .. ان شاء الله اكوون افدتكم

اللي عنده اي استفسار انا موجودة