قصة (قبول فـ موعد فـ لقاء) من الألف إلى الياء

سلام عليكم

بصراحة أحب أشكر القائمين على إدارة هذا المنتدى وكافة الأعضاء المشاركين إللي استفدنا من تجاربهم كثيراً
وهنا حبيت أن أنضم إليكم للمشاركة بتجربتي للإفادة

قصة (قبول فـ موعد فـ لقاء) من الألف إلى الياء:96:

سيناريو وحوار : المبتعث SheGoYa
تدقيق: الوزارة والسفارة
كتابة:مبتعث
ألحان: مبتعث .... ( نسيت إنها قصة مو أغنية هههه )
ومن إخراج

الممثلين:

بطولة
المبتعث SheGoYa

ممثل من الوزارة
ممثل من السفارة

بداية القصة:

الفصل الأول

في يوم الأربعاء الموافق 18/4/2007 خرجت من بيتي في تمام الساعة 8:45صباحاً متجهاً إلى عملي ( ترى كنت صاحي متأخر ) من كتر التفكير في البعثة وعن مستقبلي ( منوال كل يوم )
فتحت الـ MBC FM زي كل يوم على صباح الخير يا جدة
( مع إني مدري ايش كانوا يقولوا لأني كنت مسرح )
في تمام الساعة10:04 صباحاً دق الجوال منذراً بقدوم رسالة ، غالباً أطنش لأني متعود على رسائل الاتصالات حقت الفواتير وبما اني مفلس فـ من الأفضل إني أطنش رسايلهم

وفجأة حصل مالم يكن في الحسبان...رسالة أخرى قادمة وقتها قلت مو معقول فاتورتين في نفس الوقت ولسا ما انتهى الشهر ههههه

أفتح الجوال إلا وألقي رسالتين من صاحبنا محيي ( على قول واحد من أصحابي .. كل ما زوجته اخدت جواله قالتله صاحبك محيي ارسلك مسج ) مع انه ما نعرف احد اسمه محيي
إلا محيي الدين صالح كامل ( بس معقولة مسج منه .. يمكن يرسله نتائج المباريات ولا شي ههههه )

المهم خرجنا عن الموضوع. الرسالة فعلاً كانت من محيي MOHE بس حق نتائج البعثات مو المباريات
تفيد الرسالة بأن اروح الوزارة لإستلام قبولي من الساعة 5 إلى 7 مساءاً

يوووووووه هيا متى أحجز دحين وأبغى اوصل عندهم بدري وكيف أروح يعني آخر حووسه وعارفهم إللي بالوزارة خاصة يوم الأربعاء ربع دوام .. يروحوا يصلوا الظهر جماعة وبعدها بيتك بيتك

قلت خلاص احجز على السبت و...........؟؟؟؟؟؟

الفصل الثاني

كانت الثواني والدقائق والساعات تمر ببطء شديد وكانت اصعب لحظات تمر في حياة المبتعث SheGoYa
أول مررره أحس الويك إند Weekend طوييل نفسي يخلص بسرعة، من لحظة وصول رسالة محيي MOHE وأنا بالي مشغوول أبغى أعرف في أي ولاية حطوني وايش الجامعة..
المهم جلست الويك إند في البيت لا خرجة ولا طلعة مع انه كان عندي طلعة بحر مع الشباب بس أعطيتهم أشكل . لوول

جا يوم السبت ورحت المطار بدري رحلتي كانت على 12 ظهراً ، ووصلت الرياض على 1:15 تقريباً على ما أستأجرت سيارة وكدا سارت الساعة 2 ( ترى سرت حركات من كتر ما أطلع الرياض حفظت شوارعها من كتر الفررره (مدري إذا النطق صحيح ولا لا )
مصطلح: الفررره يعني دوران ولفلفة في القاموس الحجازي مو فرفيييره

خرجت من مواقف المطار بإتجاه شارع المعذر ( حفظت الشارع من كتر ما اتصل على الوزارة ) لمن يرد اللي يقول دبليو دبليو دبليو ( شكله يحلم بـ BMW ) >>> موقع الوزارة تقاطع شارع المعذر مع الشارع التاني مدري ايش اسمه نسيت

وصلت على الوزارة الساعة 3 تقريباً قلت يمكن احصل احد، لقيت الشارع فااااااااضي ولا سيارة نزلت أسأل السيكيورتي قالي الدكاترة حقون مركز القبول يجوا على 5 العصر .
همممم هيا فين أروح دحين والدنيا حر.. يالله قلت أصلي الظهر والعصر في مسجد واتغدى إلين تجي الساعة 5
وفعلاً صليت ورحت على فدركرز عشان اتغدى ( طبعاً ضيعولي Weekend وعشوة في جدة قلت أعوض نفسي في فدركرز فرع الرياض) وقتها اتصل على واحد من أصحابي المبتعثين بس لسا ما جا قبوله وقالي ترى في اشاعة تقول انه اترسلت مسجات بالغلط لمبتعثي أمريكا والقبولات لسا ما جات
قلتله يبو الشباب انا في الرياض خلاص يعني ياصابت يا خابت

وصلت على الوزارة وألقي بشر يادوب لقيت موقف عند الباب. دخلت لقيت شباب متجمعين عند أوراق معلقة على الباب باللي وصلتهم قبولات .. الحمدلله لقيت اسمى بس زعلت شويه لأني لقيت مقابل اسمى جامعة في ولاية تكساس .. قلت يالله خييره مع انه كان نفسي في كالفورنيا

دخلنا على صالة مركز القبول ونستنى . ... المسؤليين كانوا ينادوا على اللي من مبتعثي الصين أو نيوزيلاندا وأغلبية اللي بالصالة شباب على أمريكا

جا الدكتور المسؤول عن قبولات أمريكا ومرر علينا لستة الأسماء كل واحد يشيك على اسمه عشان يجيبوا القبول من الغرفة الثانية

بدأوا البعض بإستلام القبول إلين أذن المغرب ورحنا صلينا ورجعنا
نادى على اسمى واعطاني القبول والمفاجأة إنه موعد الدراسة بعد شهر
قلي لازم تجيب الفيزا بسرعة وتجي تستلم التذاكر وخطاب الابتعاث ولا تقعد دقيقة في البلد

بعدها اتصلت على أهلي أبشرهم..و ......؟؟؟؟؟؟

الفصل الثالث

بعد عناء كبيير في البحث والتحري والتحقيق حول هوية جامعتي والولاية اللي رايحها قلت خلاص أمري لله ...صليت الخيره وقلت إذا ربنا كتبلي أروح أكيد حيكون فيها خير

بس قلت أتوكل وأعمل موعد للسفارة .. وسبحان الله لقيت موعد قريب في نفس الأسبوع ( يوم الثلاثاء 24April2007)
تاني يوم قمت ورحت عل بنك وسددت رسوم الفيزا وأكملت الاستمارات الثلاثة وجهزت نفسي

وحجزت على آخر رحلة في يوم الاثنين من جدة إلى الرياض ونفس المنوال إستأجرت سيارة وقعدت ألفلف إلين دخت مافي مخلوق في الشارع كانت حوالي الساعة 3 بالليل
استنيت إلين أذن الفجر ورحت صليت ودعيت ربنا يوفقني
بعدها دقيت سلف على حي السفارات كانت حوالي الساعة 5:10 .. وقفني العسكري

قال : على وين
قلت:موعد في السفارة
قال:توه بدري ما افتحو
قلت: أدري بس السرا فتح
قال: ممنوع الدخول لين الساعة 6:30
قلت: والله عارف بس أنا ليا 4 ساعات ألف بشوارع الرياض وأخاف أروح ماعرف أرجع، تسمح لي أوقف هنا إلين يجي الموعد
قال: طيب صف الناحية الثانية وإذا جا الموعد أرجع ري وس

استنيت شوية إلين بدأوا الشباب يجوا ..واتعرفت على شباب من المدينة والشرقية، المهم دخلنا على الساعة 6 وكان السرا فيه ناس مدري من فين دخلوا . انتظرنا إلين 7:50 وجات وحده تشيك على الأوراق وتطلب صورة وحدة تدبسها في الأبليكيشن DS-156

تجي مرحلة الـ Security طلب مني الجواز وشيك في ورقة عنده وسألني إذا عندي جوال أو مفاتيح ريموت كنترول. أخدها حطها في ظرف وأعطاني رقم
جات مرحلة التفتيش .. وصراحة تفتيش عادي جداً زي في المطار

دخلت على ساحة كبيرة إلين وصلت بوابة المبنى وهنا كمان عديت من ممر تفتيش على خفيف
بعدها أخدت رقم و دخلنا على غرفة صغيرة فيها ثلاث كاونترات .. جا دوري وطلبت مني الأوراق كاملة ( ثلاث إستمارات + إيصال سامبا + القبول + إيصال الـSEVIS + الجواز ) ختمت على ورقة ولفتهم بمطاط وقالتلي Take a number & go to the next window جيت عند واحد أخد مني الأوراق الملفوفة بالمطاط مع الجواز وقالي خلاص خد رقم وروح الصالة التانية

قعدت مع الشباب اللي اتعرفت عليهم وقعدنا نتكلم إلين جا دوري عند شباك 7

واحد أمريكي شباب بدقن رفيعة على الموضة ( شكله فللله ) وبدأ الحوار التالي بالـ English

( For Arabic, please dail 9..LoOoOoL ) لا تخافوا ترى لعيييب انجليزي وبلهجة أمريكية كمان :113:

الحوار من ترجمة SheGoYa

قال: ممكن تحط يدك على الجهاز لأخذ البصمات
قلت:طيب
قال: ارفع السماعة اللي بالجنب

( بصراحة حسيت نفسي كأني في فلم في لقطة اللي يكون واحد مسجون وتجيله زيارة يقوم يكلمه من سماعة وبينهم عازل زجاجي)

سألني: واضح انك كنت بأمريكا قبل كدا ( حسب اللي كاتبه في الاستماره )
قلت: ايوا زرت أمريكا للسياحة مرتين ، وسبق ودرست فيها ثلاث سنوات
قال: ممكن جوازك القديم
قلت:أكيد ، أعطيته ، شافه ورجعلي هوا
قال: متى تخرجت ؟
قلت: FALL 2005
قال: واضح أنك موظف ، كم سنه لك؟
قلت:سنتين منها فترة خلال دراستي Part Time
قال: وإيش ناوي تدرس
قلت: ماجستير E-Commerce
قال: ليش اخترت هذا التخصص؟
قلت: تخصص جديد ، ومن إحتياجات سوق العمل لدينا
قال: Sounds Reasonable ...وقعد يدق على الكيبورد
سألني: تقدر تستلم جوازك بعد أسبوعين من الآن، كيف تحب تستلمه، نرسله لك FIDEX ولا تستلمه من عندنا ؟
فكرت شويه وقلتله أجيكم استلمه
( صراحة ماكان عندي فلوس وقتها ، وقلت أصلاً كدا كدا لازم أطلع الرياض عشان آخده وأروح الوزارة لإستلام قرار الابتعاث والتذاكر)

أعطاني كعب ورقة مكتوب فيها Collect Passport وفيها تاريخ اليوم وقال Good Luck !

الحمد لله وقتها أرتحت وانزاح هم جبل من على قلبي ودعيت الله يسهلها على الجميع زي ما سهلها عليا

وفي الختام أدعوا الله العلي القدير أن يوفقنا جميعاً وأن يفتح علينا أبواب الرزق والعلم ، ويصبرنا في غربتنا ويرجعنا لبلدنا سالمين غانمين ، متسلحين بسلاح العلم والمعرفة. إنه على كل شي قدير

أخوكم

المبتعث SheGoYa