حوار الى كل من هو خايف من المقابلة !! ادخل هنا *قصتي*

صراحه انا كنت مغشووش بالكلام حق السفاره و انها تعقيد و حالتهم صعبه
والله التعقيد عندنا بالاحوال المدنيه ولا الجوازات
انا موعدي كان الساعه 10 الصباح و صلت هناك الساعه تسع و ثلث جلست بالسياره شوي أراجع الأوراق اتأكد ان كل شي معي
( شوي و تتقطع الأوراق من كثر ما راجعتها اليوم بس راجعتها عشرين مره )
تسع و نص انا على باب السفاره و قدامي 3 بس دخلت عند العجوز و بغيت اخطبها صراحه من اخلاقها
دخلت بعدها السفاره و اخذت رقم 112 بعدين دققت اوراقي عند الأردني الشايب بعدين رحت الصاله و جاء رقمي عند الهندي ( شباك رقم 2 )
دخلت الصاله و كان الرقم 90 شوي يوم وصل رقمي اخذ مني الـ I20 و الجواز و السيفيس و سداد البنك الامريكي و و صفحة تأكيد الموعد

جلس يراجع البيانات حقت الـ DS-160 سألني سؤال واحد ( اسم الثانويه الي تخرجت منها)
بعدين قال لي بصم
صراحه اكتشفت ان عندي مهارات التبصيم بغيت اكسر الجهاز من قوة الضغط عليه هههههههههههههههههه
بعدين رحت الصاله الي فيها الخال الأسمر و كان الرقم الي ينادون عليه 82
انتظرت مدة 45 دقيقه لين وصل رقمي و رحت على شباك رقم 8 كان فيه واحد امريكي اشقر سلمته الجواز و سند سداد البنك الامريكي
سألني ليه رايح قلت له دراسه و طلب مني صورة الـ I20
من بيتكفل باقامتك هناك قلت له ابوي
قال لي ممكن كشف حسابه و سلمته كشف الحساب و الشهادة البنكيه و قلت له ان عندي انا كشف حساب خاص فيني
قلب فيهم شوي بعدين قال لي انت رايح تدرس لغه بس
قلت له ايه
قال لي و بعدين قلت له اذا حصلت على انضمام للبعثه كملت دراستي و لا رجعت للسعوديه من جديد

رجع لي اوراقي بكل ابتسامه و قال لي معك الباركود الي فيه منه نسخه على جوازك قلت له ايه

قال لي راجع فيدكس عشان الظرف و مبرووك حصلت على الفيزه توصلك عن طريقهم بأقرب وقت

و انا الي امشي اناقز هههههههههههههههههههههههههههههه

على فكره اذكر اخر رقم كان على الشاشه 125 و يوم جيت اطلع من السفاره كانت فاضيه تقريبا يعني خلصو من كل الطلبات

أعجبني الوقت ولا فيه تأخير

مثل ما قال الأخ bboy كل شي سهل و يمشي بسرعه انا دخلت الساعه تسع و نص و طلعت الساعه 11 ونص

معليش بتلقف و ارد عليك اخوي ابو الجوري

الله يحفظها لك و يخليها لك بالنسبه للأوراق صراحه ما ادري عنها لأني لحالي لكن راجع موقع السفاره فيه البيانات

بالنسبه للغاليه الجوري الله يحفظها لك يارب اليوم كان فيه واحد معه بنت صغيره ( رضيعه ) من دخلو لين طلعو و هي تصيح ما اسكتت ابد

صراحه كان ودي اقول لهم عطوني اياها اشيلها لكم شوي ( حسيت انهم تعبو منها حبتين )

<< يعشق البزارين

بس على فكره اذكر مكتوب ان شروط الحضور للمقابله للي اعمارهم من 14 إلى 79 سنه يعني الظاهر بنتك ما يحتاج تجيبها
بالنسبه للنموذج DS-160 انا طابعه ابيض و اسود ولا احد قال لي ثلث الثلاثه كم

على فكره ترا ما من خبره عندي بس حبيت اشاركم بالي صار معي و الله يوفقنا كلنا يارب

تحياتي

1- صفحة تأكيد الابلكيشن
أي أبليكيشن قصدك؟؟؟؟

2- صفحة تأكيد الموعد
هذي من وين أجيبها؟؟

3- ايصال سامبا
كمان حق ايش؟؟؟

4- الاي توني و ايصال السيفس اذا ما عندك مافي اي مشكلة
هذي فهمتها

7- كشف حساب لاخر 3 شهور
حتى اللي طالع على حساب الوزارة لازم يجيب كشف حساب و لا بس الضمان المالي؟؟

أسفة على الإطالة

الأبلكيشن الي هو نموذج DS-160 و هذا تعبينه عن طريق موقع السفارة على الرابط هذا

و فيه موضوع بالموقع يشرحه كامل

بصراحة انا عبيته عن طريق الموضوع هذا ألف شكر لصاحبته شفايف الله يجعله بموازين أعمالها

هذي تلقينها بمحلات أبو ريالين << برىىىىى

لا أمزح ( أكيد تمزح ) راح تحصلين شرح عليها بالموضوع الي فوق

انا ودي أعرف وين راحت الأرقام 5 و 6 أكلتيهم؟؟