الحمد لله 12 يوم والفيزا عندي ( طللللللعت الفيزااا )

June 1st, 2011, 02:29 AM

بسم الله الرحمن الرحيم

الحمد لله والصلاة والسلام على اشرف خلق الله نبينا محمد صلى الله عليه وسلم .

انا قدمت على الفيزا واجريت المقابلة بتآريخ 18 مايو ..
والحمد لله الأمور مشت عال العال .. ما تعرضت لأي موقف محرج مثل ما الأخوان هنا الله يسعدهم ^_^
بلعكس طول وقت الانتظار في السفارة كنت بين 2 شباب عسل قضينا وقت الانتظار ضحك وتعليقات على الموظفين الي هناك ... خخخخخ ( فيه واحد كان خاق مع اللبنانية ام حجاب ) << يع ! ام نفس شيينه هههههههه

مقابلتي كان عند شباك 11 والي اجرى معي المقابلة .. مزه فلبينية عسل عسل .. بالبداية كانت تتكلم معي انقلش فقلت لها كلميني عربي
والمضحك بالموضوع اني جاوبتها كل اسألتها بالانقليزي ( كنت خايف ارتبك او تسال سؤال ما اعرف اجاوبها زين ) بس كل الأسئلة بسيطة ولغتي الحمد لله ساعدتني بما اني طالب بجامعة الامام تخصصي ادب انقليزي ،

أسألتها كانت بسيطة وكالتالي/

اول شيء طلبت مني الجواز + صفحة تأكيد dc-160
بعدها قالتلي انت رايح سياحة ؟
قلت: ايه ودراسة بنفس الوقت . بعدها عطتني نظرة حسيت اني جبت العيد وما راح اخذ الفيزا ولا بعد سنتين ههههههههه
فعلطول تداركت الموضوع ، وقلتلها اني بروح لكورس صيفي مدته 3 شهور والمعهد هناك قالي انو اقدر اقدم على فيزا سياحية اختصار للوقت والمال للكورس الي تكون فيها عدد الساعات بالاسبوع اقل من 16 ساعه ( الحمد لله شرحتلها هالكلام بطلاقة وبلغة انقليزية ) بعدها قدمت لها قبولي بالمعهد بالدورة هذي + نظام التأشيرة السياحية الي يسمح بإستخراج الفيزا السياحية والألتحاق بدورة صيفية عدد ساعات الدراسة بالاسبوع فيها 16 ساعه .

>>> فاصل
تنبيه للي يبي يروح مثلي دورة كم شهر ويرجع : في الورق والاشياء الرسمية انت طالب كورس صيفي عدد ساعات دراستك 16 ساعه بالاسبوع البعض يشوف انها قليلة لكن ! ، المعهد يتيح انك تدرس يوم الجمعة مقدار 4 ساعات اضافية بإختيارك .. تقدر تحضر وتقدر تسحب ان جيت جيت لمصلحتك وان سحبت ما حيضرك شيء وبرضوا حتآخذ شهادتك
عدنا <<<

بعد ما قدمت لها القبول وشرحت لها الموقف .. عطتني ابتسامة ورجع قلبي يدق دقاته الطبيعية وقامت تقلب بالقبول وتطقطق بالكمبيوتر طوووووووووولت .. قعدت يمكن 10 دقايق تطقطق بالكمبيوتر وتشوف بالقبول .
بعدها قالت: ليه تبي تروح لأمريكا ؟ هذي اول مرة ؟
قلتلها: لاني احب الثقافة الامريكية وعندي اعتقاد بأنها افضل مكان اقدر ادرس فيه اللغة بتمكن وهذي اول مرة اروح.
قالت: وش الدول الي سافرت لها بآخر 5 سنوات ؟
قلت: بس البحرين
قالت: من الي راح يتكفل بسفرتك ؟
قلت: الوالد - الله يحفظه -
قالت: عطني كشف الحساب
اعطيتها كشف الحساب والشهادة البنكية

طالعت بكشف الحساب بعدين رجعته لي ورجعت لي قبول المعهد بعدها بدقيقتين قالت : فيزتك مكبولة < مقبولة خخخخخ وروح سدد لفيدكس

لما قالت لي هالكلام بصراحة ما فرحت مرة وتشققت عادي يعني .. لاني اتابع مبتعث واعرف ناس متنقعين ينتظرون بال3 شهور وال 4 شهور فرحت سددت وطلعت .. علطول لساحة الكيندي ( خويي ينتظرني هناك ومتواعدين نفطر ) <<< وش علينا منك ^_^


طبعاً زي ما قلتلكم الكلام هذا كان يوم الربوع 18 مايو .. في بداية الايام كنت اشيك كل يوم على جوالي واشوف اذا جاتني رساله ولا لا وبعدين بديت اطنش انشغلت بالجامعة .. وسافرت للبحرين يعني نسيت موضوع الفيزا مررررا لين امس .. رحت لفيدكس قلتلهم ما جاكم شيء ؟ قالوا انت شحنتك موجودة بفيدكس حي السفارات وبكرة بتجينا ! قلت غريبة وش هالصدفة ! حسيت انهم يسلكون قلتلهم طيب تقدرون تشوفون التتبع ؟ ابغى اعرف اذا جوازي راح لواشنطن ولا لا قالولي لا بس تعالنا بكرة وبيكون عندنا اكيد .

اليوم قمت قبل المغرب والقى رسالة من فيدكس واقول والله ما كذب ابو هنود .. واروح لهم واستلم شحنتي وما انتظرت لين وصلت البيت فتحت الظرف زي الوحش الكاسر وادور بالجواز والقى المزيونه على احد صفحات الجواز وصورتي تلق عليها ،، والتأشيره ( 5 سنوات )

الحمد لله .. والله كنت شايل هم انها بتقعد 4 او 5 شهور خصوصاً اني مقدم متأخر ومآخذ فيزا سياحية وانا ابي دراسة وموعد مقابلتي عقب وقت دراستي ب3 ايام يعني الوضع حوسة ، بس جت في 12 يوم الحمد لللللللللله

دراستي ان شاء الله بتكون في كاليفورنيا لونق بيتش وآسعار التذاكر نآآآآآآآر مدري وش اسوي !
ما تخبرون باص راعيه اجودي ما يسرع ولا يشغل الا محمد عبده علشان نروح معه ؟



حبيت اقولكم تجربتي وابشركم ان الأمور تسآهيل لاننا من زمان ما شفنا مواضيع عن ناس اخذو فيزهم وانا اعرف ان هالمواضيع تعطي نوع من الأمل لكل واحد ينتظر ... واتمنى ان هالموضوع يكون فال خير للجميع ويمتلي القسم بمواضيع الفيزا الي وصلت لأصحابها ..


اي استفسار انا تحت امركم وآسف على الأطالة

• نشر عبر تويتر
• نشر عبر فيسبوك
• نشر عبر جوجل