تجربتي في السفارة الامريكية عائلة مكونة من زوجة و ثلاث اطفال

November 25th, 2012, 12:30 PM

السلام عليكم و رحمة الله و بركاته
اليوم كان موعدي بالسفارة الامريكية الساعة العاشرة ا
لمهم من كثر ما اقرأ مواضيع و تجارب الناس اللي راحوا للسفارة قبلي ما خليت و لا ورقة الا اخذتها معي حتى اني من اللخبطة اخذت استمارة السيارة معي <<< امزح معكم ما توصل لهالدرجة
المهم جيت انا و عيالي و مسكنا سرا عند البوابة و يوم جاء دورنا قالوا لي جهز الاوراق التالية لكل متقدم الجواز الاصل و صورة شخصية و الابلكيشن حق السفارة و ايصال سامبا وورقة الموعد و جهزتها
و يوم جيت للشباك فرزوها كال متقدم حطوا اوراقة لحالها و اخذوا مني جوالي و جوال زوجتي و حطوها بصندوق الامانات و قالوا ادخل داخل

و ادخل و احصل لبناني اخذ اوراقي اللي معي و دخلها بالسيستم عنده
و قال زود على كل متقدم ال I -20 تبعه و انت يالطالب زود عنهم السجل الاكاديمي و ايصال السيفيس و الضمان المالي
و جهزت اللي قال و اخذت رقم و انتظرت دوري و يوم جاء دوري جيت عند لبنانية تتكلم بالسبيكر و اخذت كل الاوراق و رجعت لي ورقة الموعد و الابلكيشن حق السفارة و خلتني ابصم و اهلي يبصموا و حطت اوراقنا كلها في ملف بلاستيك و قالت خلاص انتظروا دوركم عالمقابلة و شوي و يقولون لي يالله على المقابلة ( الي معه اولاد يمشونه قبل الكل ) و جيت عند واحد امريكي قال السلام عليكم قلت و عليكم السلام قال سياحة و الا دراسة قلت الا دراسة قال وين رايح قلت على اوهايو ان شاء الله قال وش التخصص قلت اللحين انجليزي و بعده مالية قال انت موظف قلت نعم قال وين قلت في الشركة السعودية للكهرباء قال وين سافرت قبل قلت ما سافرت لاي مكان قبل قال و لا الكويت و لا البحرين و لا قريب قريب قلت و لا الكويت و لا البحرين و لا قريب قريب قال خلاص و عطاني كل اوراقي و اخذ الجوازات و قال مبروك الفيزا مقبوله و روح للفيد اكس خذ لك ظرف واحد قلت متى تخلص قال بعد يومين ولا سألوا عن شهادات ميلاد للاطفال و لا عن كشف الحساب و لا شي طبعا رحت للفيد اكس و عطيتهم الابلكيشنات حقت السفارة و اخذ مني 85 ريال و قال وش اقرب فرع لك و علمته و قال اذا خلصت اتصلوا عليك او ارسلوا لك رسالة

ارجع و اعيد الشياء اللي لابد تكون معك :: الجوازات الاصل - صور شخصية ( صورة واحدة لكل متقدم ) - الابلكيشن حق السفارة - ايصال سامبا - ورقة الموعد - I-20 - السجل الاكاديمي - ايصال السيفيس - الضمان المالي فقط

و الامور سهالات المقابلة كلها على بعضها ما تجي 3 دقائق و الشغلة كلها تقريبا 45 دقيقة

بالتوفيق للجميع

• نشر عبر تويتر
• نشر عبر فيسبوك
• نشر عبر جوجل