حكايتي مع السفارة الامريكية للفائده

August 9th, 2008, 03:52 PM

السلام عليكم ورحمة الله وبركاته
الحمدلله رب العالمين والصلاة والسلام على اشرف الانبياء والمرسلين سيدنا محمد وعلى آله وصحبه أجمعين أما بعد
فاستعرض لكم قصتي مع السفارة لكي تستفيدو وتتعلموا منها على الأقل مع رجائي ممن يملك اي نصيحة أن يبديها مشكورا .
أنا مبتعث لامريكا من العام الماضي وحصلت على تأشيرة مع عيالي لمدة سنة اتممت سنة اللغة هناك وحصلت على القبو ل الجامعي للدراسة في بداية سبتمبر
كنت قد حجزت موعدا في السادس من اغسطس 2008 . طبعا جهزت جميع اوراقي وهي:
1- جميع النماذج معبأة 156 و 157 و 158
2- ايصالات لعمليات سداد رسوم الفيزا وتسديد السيفس .
3- الاي توني الجديد من الجامعة.
4- الجوازات طبعا.
5- أصل كشف سجل الدرجات من المعهد (الترانسكربت) + التوصية من المعهد.
6- الجوازات القديمه ( هذه راس النكبه وتجيكم السالفه بعد شوي) . الجوازات القديمه هذه ماذكرتها الا ليلة الموعد وانا قاعد اتصفح الطلبات في المنتديات لقيت الشبا ب كاتبين ممكن يطلبونها منك وانا كنت ماخذها من الجوازات العام الماضي ولاسألوني عنها.
7- جميع اصول مستنداتي الرسميه مع صور منها.
أخوكم في الله انطلق لموعده بعد ماصلى الفجر وهو والزوجه طبعا.
دخلنا الحي الدبلوماسي قبل الساعه السادسه صباحا ولقينا قدامنا حوالي سته اشخاص والله وجلسنا ننتظر الين فتحوا تقريبا الساعه السابعه والنصف.
دخلنا في اجراء التشييك الى ان وصلنا لداخل الصالة وجيت عند اللبنانية اللي في شباك 2 وقالتلي ليش ماكتبت اخوانك وامك وابوك خذ ورقه وعبء. والله واعبئ بدون نفس وارجعلها وتاخذ الاوراق اللي في البنود من 1-5 وقالت خذ رقم للمقابله واسترح في الصاله الثانيه.
رحنا للصالة الثانية وانتظرنا قرابة الساعه بعد ذلك تم استدعاء رقمنا عند شباك 12 الا ذاك الامريكية المتحفظة أخذت بصمات ايدينا ثم اخذت تسالني:
1- درست هناك ؟ نعم
2- درجاتك ممتازه؟ شكرا
3- معك ضمان مالي ؟ نعم واعطيتاها اياه ( طبعا علشان مايتلخبطون اخواننا الجدد هذا الضمان اللي صادر من الملحقيه للجامعه وجبت لهم صورته. لكن حسب معلوماتي الجدد مايحتاجون ضمان يكفي ايميل الوزاره والله أعلم).
4- سافرت للكويت ؟ نعم اشوف الجواز القديم؟ ( أنا كان معي جوازين اقدم من الحالي ) عطيتها الأقدم
5- قالتلي:هل الكويت ماتحتاج جواز؟ قلت الا.
6- قالت وين الختم والله و تلخبطت لاني ناسي فيه ختم والا الا المهم وراحت وجات.
7- قالت الاسم متغير ؟ قلت علشان الشهاده واوريها الشهاده .بعدين تذكرت ان الجواز اللي معها الاقدم واعطيها اللي بعده .
8- قالت طيب سافرت لسوريا والاردن وين الختوم ؟ قلت موجوده قالت لا وهي تدور في الجواز المهم انحست مدري وش اقول. وهي تمطرني بالاسئله انسرق جوازك. ..................وانا اقول لا................لا
9- قالت متى سافرت؟ قلت 2003 قالت هذا يغطي من 2001 قلت اشوف. اعطتني الجواز وقالت باجيب لك ورقه تجيب تاريخ اسفارك من الجوازات.
10- وانا اتصفح الجواز تذكرت أنه جوازي في ذيك الفتره كان العادي اللي قبل المقرؤ واعلنوا تغييره بنفس المده فالختوم راحت فالاول . المهم قعدت اشرحلها قالت اسمع لا اشوفك توطوط عند باب السفاره تدور الفيزا . وخذ الاي توني حقك رجعه للجامعه. قلت اقدم ثاني مره قالت راح يرفضونك زملائي.
لملمت اوراقي وجيت طالع وقعدت اضرب اخماس باسداس قلت والله سبب الاخطاء الجوازات ولذلك ماراح يخلوني راح يعطوني تقرير يشرح التفاصيل المقنعه خصوصا انها مافيها اخطاء مني الا اني ماحضرت جيدا للمقابله.
المهم حجزت موعد على الاسبوع الجاي ورحت للجوازات وقلت يالربع قصتي انا جوازي الاول طلعته وسجلت شهادتي بنفس الاسبلنق وطلعتولي اللي بعده باسبلنق مختلف ورجعت عدلته فالاخيرات نفس القديم فسبب لي مشكله فالسفاره هذا بالاضافه الى انكم يوم غيرتوا الجواز العادي بالمقروء جددتوه بنفس المده والختوم راحت فالاول وهذا سبب مشكله ثانيه .
قالوا لي لك عندنا نعطيك برنت بسفرياتك وبرنت بارقام الجوازات غيرها مانعطيك شئ تبي اهلا وسهلا قلت هاتوا شئ احسن من لاشئ. عطوني وطلعت النكبه الجديده فيه بلدان اصلا انا ماسافرت لها والله وسالت الموظف قلت ياخوي هذي البلدان ماسافرت لها . رد بكل برود عادي هذي اخطاء يدخل الموظف الكود خطأ . قلت انا ابيكم تكحلونها وعميتوها الحين خلونا نعدل هذي الاخطاء قال: هذي تبيلها شغله طويله عريضه.
والله بصراحه احبطت وحسيت ان السفاره الامريكيه فيها امل اكثر من الجوازات .
سحبت نفسي قلت خلني اروح لوزارة التعليم العالي لعلهم يفيدوني اكثر . والله واجي عند الامن قال رح جب لنا ورقه من عند قسم المراجعين . رحت لقسم المراجعين قالوا رح للبوابه الغربيه رحت للبوابه الغربية قالوا انتظر . انتظرت ساعه قالوا رح من جوا من عند الامن رحت للامن قال جب ورقه من المراجعين المهم اخذت اللفه هذي ثلاث مرات الين اخيرا قالوا لي موضوعك عند ناصر الفوزان الا الله جايب واحد يبي نفس المكتب عند الفوزان وعطونا ورقه وحده للامن ( صايرين قرين الربع).
رحت للدكتور ناصر قاللي : رح لموعدك الاسبوع الجاي وان ماتيسرت نحولك لاي بلد . قلت عطوني ورقه للجوازات بشرح اسباب الخطأ قال مانقدر . اخذتها من قاصر ومشيت.
الان ابيكم تتسفيدون من الاتي:
1- كل كلمه تكتبها في الابليكيشنات حقة السفارة توقع جميع الاسئله عليها وكل جواب تخطط له شف وش ممكن يجر عليك من اسئله. وثق ان المعلومه التي ليس لها برهان ضررها اكثر من نفعها فلاتدون المعلومة من غير مصدر.
2- لاتشيل معك اوراق وانت ماتعرف وش فيها لانك بتصير مثل اللي يشيل الخرج والخرج فيه حيه. وتركها لين يطلبونها وتوفيرها لهم افضل من احضار مصادر معلومات كثيره بدون تحضير لإجابات الاسئلة المتوقعة عليها.
3- لاتتخذ خبرتك السابقة في السفارة كمقياس بل عليك التحضير من جديد.
اما الاشياء التي اطمع ان اعرفها من االخبراء والقادرين على النصح فهي:
1- انا سددت رسوم الفيزا واخذوها لكن عندي نسخ اصليه نفس التي سلمتها لهم من الموقع فهل التقديم الجديد يلزمني التسديد من جديد ام اكتفي بالقديم واقدم الايصالات فقط. ونفس الوضع السيفس.
2- الترانسكربت الاصلي حق المعهد اخذوه فهل اطلب جديد والا اكتفي بصوره موجوده عندي.
3- هل تتوقعون انني باحصل على الفيزا ام سيرفضون خصوصا انه سيكون بين التقديمين اقل من اسبوعين.
4- هل هناك حالات مشابهه سمعتم بها او جربتوها.
أخيرا احب اطمن الجميع ان ثقتي بالله كبيره وان ماحصل فيه خيرا وخيرة لايعلمها الا الله وستتبين خلال الايام القادمه اقلها نفعي للطيبين امثالكم لاخذ الحيطة والحذر . وساكون راضيا تمام الرضاء بمايقسمه الله سواء بالعودة لامريكا او التحويل لبلد اخر او التقديم على وظيفه او اي امر كان فالخيرة فيما يختاره الله والحمدلله على قضاءه وقدره الجميل حيث هو من بفضله حصلنا على هذه البعثه وهو القائل: " وَعَسَى أَن تَكْرَهُواْ شَيْئًا وَهُوَ خَيْرٌ لَّكُمْ وَعَسَى أَن تُحِبُّواْ شَيْئًا وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ" (216, البقرة).
وتقبلوا تحياتي ولاتنسونا من الدعاء.

أخوكم : المتفائـــــــل

• نشر عبر تويتر
• نشر عبر فيسبوك
• نشر عبر جوجل