هذه قصتي في القنصلية اللي في الظهران....

March 22nd, 2009, 10:10 AM

بسم الله الرحمن الرحيم

اليوم كان موعدي في قنصلية الامريكية في الظهران
كان يوم حافل ...
اول شي اتجهت الى البوابه وقابلوني هنود لابسين ازرق
قلتلهم عندي موعد .
دخلت ووقفت السيارة في المواقف ونزلت
وفي ممر طويل اوله هندي لابس ازرق (ما عندهم الا هنود
قالي افصخ النظارة والساعه وطلع البوك والجوال حطه في السيارة
بعدين قال ارفع يدك ومرر عامود حق كشف الفلزات
وبعدين وقفنا في نهايه الممر ومكتوب ممنوع التجاوز حتى يأذن لك
وبعدين طلعلنا واحد معاه اوراق مسح صغيرة ويمسح اليدين
(يوم سألت عنها قالولي حقت كشف البارود)
وبعدين توجهت الى نافذه امامي فيها وحده سودانيه(زوله)
خذت ورقة الموعد وقالت ادخل دخلت والا غرفه صغيرة فيها مدخل
زي اللي في المطار حق التفتيش
المهم قالو المفاتيح ممنوعه حطها عند الامانات
وطلع مع الباب الي ورى والا ممرطويل بس ممرمحترم فيه زهور وحركات
المهم واخره فيه بوابه حديد فتحها لي ودخلت والا حديقه كبيرة وفي
مبنيين واحد حق الموظفين وواحد حق المراجعين
دخلنا حق المراجعين وفيه واحد خال قلتله (جود مورننج) قالي (هلا والله اسحب رقم واجلس)
قعدنا في الانتظار وكنت انا ثاني واحد انتظرت حوال نصف ساعه بعدين
نادو على رقمي وفيه اربع مسارات فيها حواجز زي اللي في البنك
وفيه وحده تتكلم انجليزي قالتلي عطني الاي تونتي وجوازك ورسوم التسديد
والفورمات (156و157و158) بعدين طالعتهم تتأكد منها وراحت خذت
نسخ منها وقالتلي اجلس حتى انادي عليك مره ثانيه وانظرنا 30 دقيقة
بعدين نادو علي في نفس المسار وفيه اله صغيرة حقت التبصيم
وتبصم اربع اصابع بعدين الابهام
وقالتي اجلس حتى ننادي عليك بعدين انتظرت 20 دقيقة
ونادا علي واحد رجال اخيرا :
ورحت في المسار المقابل وقالي هلو عبدالله
قالي بالعربي (انت تتكلم انجليزي كويس) قلتله مو مره
قالي اجل بتروح جامعه ميزوري قلت يس قال ليش
قلتله السبب .....
قالي الوالد وين يشتغل.....
وشاف الاوراق قال ليش رحت عمان في 2005
قلت سياحه مع الاهل قالم يضحك ويدردش كانها سوالف
وقالي في احد يقربلك في امريكا قلت لا
قالي شد حيلك في الدراسه...
لا تخاف ابعطيك الفيزا ...
وعطاني ورقة زرقـــــــــــــــاء...
وقال مر الكاونتر الصغير الي هناك حق الفيدكس
ورحت وعبيت بيانات ودفعت 65 ريال حق الفيديكس
وقالولي خلال 8 ايام بتكون جاهزه....

وهذه قصتي ...... معليش طولنا عليكم
بس حبيت اعطي نبذه عن القنصليه اللي ما عنده خبر
لا تبخلو علينا ياشباب بالمشاركه... *
موفق بإذن الله ... لك مني أجمل تحية .

• نشر عبر تويتر
• نشر عبر فيسبوك
• نشر عبر جوجل