ماحدث لي اليوم في الوزارة ..

October 15th, 2012, 01:50 PM

السلام عليكم ورحمة الله وبركاته ..

كيف حالكم ...؟ ان شاء الله بخير وصحة وسلامة ..

طبعًا مثل ماذكرت سابقًا لي عودة للوزارة عشان اقابل مدير البرنامج .. وبالفعل رحت .. لكن المشكلة هالمرة أن د. ماجد الحربي مو موجود ..

وصلت الساعة 10 وسحبت رقم .. وجلست انتظر شوي .. جاء رقمي وجلست مع الموظف (سامي السيف) .. طبعا ماكنت ناوي اسأله لاني وقتها انتظر الدكتور ماجد للإجابة على استفسارات عامة ..

قلت له متى ينزل الضمان المالي قالي هالأسبوع ان شاء الله قلت ممكن يتأخر .. قال ممكن بنسبة ضئيلة وقال : (بس انا عن نفسي (توقع شخصي) الأربعاء بتنزل ..) !!

يوم السبت لما جيته وسألته كان يقول انه سمع الدكتور ماجد يقوله لأحد الطلاب قبل مايروح للإجتماع وان الضمانات وصلت لقسم الاي تي ومنها راح يتم ارسال الضمانات على البريد ..

طبعًا ماننسى كلام الدكتور ماجد انه الضمان المالي بعد الترشيح النهائي (قالي هالنقطة قبل التقديم وكذلك قبل 3 اسابيع من الان) واكد هالشيء عدد من الطلاب اللي سألوه بعدي .. وفي منكم اكيد سأل كذلك في هالناحية ..

جلست انتظر وطول الدكتور ماجد مانزل المفروض 11 يكون موجود فسألت عنه قال انه مسافر !!!!!!!!! قلت طيب من يجي بداله قال مدري يمكن الحضيف ولا الزهراني ولا المستشار الثالث (قالي اسمه مااذكر اسمه بالضبط)

انتظرت شوي وجاء الثالث ..وكان فيه قبلي ناس .. وانتظرت لين جاء دوري يوم شاف الاوراق اللي معي وهي اوراق الاسئلة قلت له انا من منتدى مبتعث وكثير بيقرأ الرد .. وقالي مايمديني اجاوب على كل استفساراتك وراك ناس والوقت ضيق قلت طيب بس هذي .. الضمان المالي بيرسل لنا ... قال حط لي هالأسئلة في خطاب رسمي وتضاف للأسئلة الشائعة فيما لو كان الأمر عام .. قلت طيب بس نقطة الضمان قال لسا الموضوع ملخبط .. اصبروا بينزل بها أمر في الأيام القادمة .. قلت طيب البكالوريوس غير الطب يكفيهم قبول المعهد قال ايه .. والبكالوريوس الطب في كل الأحوال مايختارون قبولاتهم

المشكلة أنه حتى من يذهب للوزارة يواجه بهذي الحوسة .. وحتى المستشار مو راضي يصرح بشيء ...

فلذلك احبتي الكرام اعلموا ان هناك اقوال متضاربة ستأتي سواءًا في البريد وانتم شاهدتم تناقض ردود الوزارة في ايميلاتكم بخصوص الضمان المالي .. وكذلك وضحت لكم هنا ماحصل معي ومن اختلاف كلام المستشارين والمدراء قبل الموظفين .. وهناك من الموظفين من له اسبوعين واخر كم شهر توه جاي .. فلذلك اذا رحت لهم وماعرفوا بيقولون لك رح لسامي ..

انا كنت متأمل ان اليوم اواجه د. ماجد الحربي لأنه هو لو سأله أحد ماراح يخليه يطلع إلا فاهم جزاه الله خير .. لكن للأسف ماكان موجود ...

أنا عن نفسي بانتظر اذا جاني اي ضمان مالي على الايميل لين يوم الأربعاء الحمد لله راسلت به واذا لا بطلع شهادة بنكية من حسابي واراسل ..

• نشر عبر تويتر
• نشر عبر فيسبوك
• نشر عبر جوجل