استفسار أحتاج أعرف كيف سياسة الماجستير

السلام عليكم و رحمة الله و بركاته

كل عام و أنتو بخير جميعا
الله يتقبل مننا و يجعلنا من العتقاء من النار و يوفقنا جميعا دنيا و آخره ,,, يــــــــــآرب

سامحوني في حالة كان الموضوع عديم الجدوى أو في غير محله بس أتمنى تساعدوني و تردوا على إستفساراتي الكتيره
محتاجه منكم أعرف كيف سياسة الماجستير

فمثلا أنا تخصصي تقنية معلومات ,, لو قدمت في جامعة على ماجستير علوم حاسبات هل معناه أني لما أخلص عندي ماجستير في علوم الحاسبات ؟؟
ايوا هذا معناه

طب لو أنا مثلا أبغ يكون الماجستير حقي في إدارة الشبكات هل لازم يكون اسم التخصص في الجامعه إدارة شبكات ؟؟ ولا حيكون علوم حاسبات و بعدها حأتخصص أكتر في الشبكات ؟؟
ايوا على حسب اسم التخصص راح ينكتب في شهادتك تماما زي البكالوريوس.
يعني لما تجي تشوفي برنامج الماستر على موقع الجامعة ،، لنفترض مثلا Master's Degree in Information Systems ..
راح يكون فالشهادة .. ماستر في نظم المعلومات .. بغض النظر هو تحت كلية الحاسبات او كلية الطحالب البحريه

مررره مو فاهمه هادي النقطه

***

كمان عندي استفسارات كتيره عن طريقة القبول في الجامعه و إختيار معهد اللغه ^^"

1> في حالة كانت شروط القبول في الجامعه أني يكون عندي درجة محدده في التوفل و ال GRE ,, هل معناه أني لما أختار معهد اللغة لازم يتوفر في المعهد كورسات انجليزي و GRE ??
لا مو شرط .. بس هو الافضل علشان يهيأك و يعطيكي خلفية كبيرة عنه .. مو اكثر .. في ناس تدرس من نفسها وتجتهد.. لكن الافضل لو لقيتي شي يهيأك للاختبارات هذه

2> كمان كيف يكون الإستعداد لل GRE ؟؟
بصراحه أنا خايفه منه أكتر من الانجليزي لانو يقولوا زي إختبار القياس التعجيزي الي عندنا في السعوديه >_<
و الله يقولو .. لكن انتي شوفي لك جامعات تطلب درجات مو مره عاليه و هذا راح يكون ببحثك في الجامعات الموصى بها على موقع الوزارة
انا ما أأيد انك تشوفي جامعة قوييية جدا و راح اذكرر في السؤال الجاي.

3> و هل لو كانت نسبتي في التوفل عاليه و لكن في ال GRE منخفضه معناها الدنيا اتقفلت في وجهي و مافي جامعة حتقبلني ؟؟
علما بأني بإذن الله حتكون بعثتي على بوسطن يقولوا القبول فيها صعب و الله أعلم +_+
اللي اعرف ان ماسيشوستس ولاية دوافير و جامعاتها قوية .. كلنا عندنا طموح و نتمنى نكون شي عالي
لكن كل واحد ادرى بقدرات نفسه .. ان تشوفي انك قدها و راح تقابلي عالم امخاااخ فـ اتوكلي ع الله
و ان تشوفي انك هه بين و بين انا اقولك شوفي لك جامعات حلوة مستواها عالي بس مو معقدة
سواء في قبولها او دراستها .. اهم شي الراحة النفسية علشان تقدري تنتجي

4> كمان هل المعاهد الي بتكون على اسم الجامعه و تابعه لنفس الجامعه معناها حتوفر ليا إلتحاق بالجامعة مباشرة ؟؟
و المعاهد الي زي ELS و EC لو درست فيها ما حألاقي قبول سريع في الجامعات ؟
بعض الجامعات (مو كلها) لو التحقتي بـ معهدها و وصلتي مستوى معين من اللغة راح تعفيكي من شرط التوفل او الايتلس
لا مو معناه ما تنقبلي بسرعه .. لو حققتي شرط التوفل او الايتلس ان شاء الله تلاقي قبول

5> و يا ترى كيف أعرف أسماء المعاهد لاني كم مره دخلت على موقع الملحقيه السعوديه في امريكا و لكن ما شفت اسماء معاهد
فهمت من كلام الناس هنا انو موجود لائحه بالاسماء لكنها غير محدثه ,, لكن للاسف انا ما لقيت مكان اللائحه دي فين
هذا ملف الـ pdf .. و اخر تحديث كان من شهرين الا اسبوع
http://www.sacm.org/pdf/ApprovedESLProgram.pdf

6> كمان هل يكون مكتوب في موقع الملحقيه إذا المعهد متكدس أو لا و كيف تنصحوا تكون طريقة إختيار المعهد على أي أساس ؟؟
استني لين تصدر قائمة المعاهد و راح يبان المعاهد المتاحة من المتكدسة
انصحك تختاريه قريب من الجامعة اللي فيها تخصصك .. علشان تفتكي من حوسة النقل و غيره بعد ما تخلصي اللغة
ادخلي على موقع الجامعات الموصى بها هنـا

و اختاري امريكا .. ثم تخصصك بالانجليزي بحروف صحيحة .. المرحلة ماجستير .. وسوي بحث
وشوفي قائمة الجامعات و شوفي اللي يناسبك منها.

أخر سؤالين الحمد لله هم

7> هل أقدم للمعهد الان قبل الملتقى ولا اترك الوزاره تختارلي و تقدم لي فيه بعد الملتقى ؟؟
ما أبغ أتأخر في إجراءات البعثه حابه أبدأ في مارس إن شاء الله
انتي حره كل الخيارات متاحة لكي .. و الافضل زي ما ذكرت لك سابقا شوفي لك ولاية مناسبة لكي لطبيعتك
فيها الجامعة اللي ممكن تلتحقي فيها ان شاء الله .. و اختاري المعهد على هذا الاساس .. او لو حبيتي المعهد في ولاية
و الجامعة في ولاية تانية برضو شي راجعلك.

8> و هل ينفع كمان من الان اراسل الجامعه ادور على قبول فيها و انا ما عندي لا توفل ولا GRE ??
ما توقع راح تلاقي جامعات تعطي قبول ماستر مشروط لين تخلصي توفل و GRE .. خصوصا GRE
عمموما .. انا ماشوف الجامعة هم كبير بقدر انك تحققي المتطلبااات و هي التوفل و الـ GRE و اي اختبار يحدده القسم

مررره سامحوني على استفساراتي الكتيره
يارب الاقي اجابات لاستفساراتي هنا

و الله يخليكم يا إدارة المنتدى لو كان موضوعي مخالف و حيغلق
ياريت توجهوني لجهه أو تقولوا لي مين ممكن يجاوب على استفساراتي دي لأني ما عندي أحد يوجهني غير ربنا ثم أنتو ^_^


في أمان الله و توفيقه للجميع إن شاء الله