[فجأه ! صيفــي و دراستي بلنــدن! ]

ونعووود مرتن اخرى .. لعيون ابو حميد ههههههه

المهم يا جماعة الخير بديكم قصتي مع الانجليزي واللغه .. انا شاب عادي جداً لغتي على قد حالى ..
من الافلام والاغاني والمسلسلات <--- بما انى محب كبير لبريزون بريك وهيروز ولوست وديكستر وسوبرناتشورال و فامباير دايريز إلخ إلخ خخخخخ
فاللغه على قد الحال .. يعني افك شوويا انقلش خخخخ بس طبعا قرامر ومدري مين 0 مرره يعني كنت ادرس انقلش
واحفط وطبق القاعده وامسح من المخ خخخخ ... هنا واجهت اول مشكله !!
رحت بطلع شريحه وبسوي بطاقة الباص والمواصلات يعني .. وعلى اساس انى معتمد على انقليزيتي
وانا احب التحدي قلت يا ولد ما يهزك ريح ودووس يا خنفووس <!!
والله واروح للمركز قريب من بيتنا تعلمت على الباص من اول يوم .. واروح للكاشير واقولها ابغى شريحه
ولا ترد عليا !! وانا منى فاهم حرف !! اقوول واات ؟؟ !! وترجع تتكلم وتطلع شرايح ومدري ايش
وانا كيف !! ياهو دا انقليزي !! ولا مييين .. المهم اخدت المنشورات وقعدت اقرى واخد إللى يناسبني
شريحة شحن فودا فون وسويت بطاقتي زي ما فهموني العيله .. اكتشفت بعدين انه اللغه إللى كلمتنى فيها الانجليزي
ولكن باللكنه البريطانيه الممقوته إللى يكلو نص الحروف وكل الوجه يتحرك مع الكلمه خخخخ مثلا وات ما تنقال كذا
تنقال واااء كككك !!<-- بط بط حشى مو لغة اوادم
زبطت اموري .. ونمت وصحيت ووصلتنى الحرمه على المعهد وعلى بالى بدخل معهد جبار وصالات انتظار
وحركات .. ولا ادخل عماره وفيها دور هذا المعهد فيها ثلاثه غرف ومكتب وصاله صغيره خخخخ
المهم جاني المسئول حق المعهد وطلع سوري .. بس قالى عشانك اول يوم بفهمك بالعربي
واعطاني الورقه وقالى ادخل اختبر !! وانا والله مدري ايش الطبخه وادخل اختبر ومعايا بنتين
وجاوب من هنا من هنا .. ابغا اغش الاسبانيه تدس ورقتها طبعا مافي مراقب خخخخ
قلت آآه لو كدا نظامنا خخخ والله رحليت .. وجيت عند السؤال العظيم .. الرايتنغ
يقولك تكلم عن نفسك في القطعه إللى بتكتبها .. والله وقلت هادي لعبتي يا حبيبي ..
وماي نيم از .. وماي فريندز .. وماي لايف .. وماي براذر .. وآي ستدي .. واعطيهم كلام في الصميم
وخلصت .. ولا جا التيتشر .. ونادى اسمى بيعمل انتر فيو .. والله وادخل وكلى ثقه اسلم عليه
وقعد يسالنى .. إيش اسمك .. وكم عمرك ؟؟ وايش تدرس ؟؟ بعدها جاب لي صور ..
وقالى هاذي ايش ؟؟ وهاذي ايش .. كانت صور بسيطه خيمه .. سحب .. نار .. ارض .. سرير وكدا
بعد ما خلصت .. قالى شووف سبيكنغ عندك ممتاز يا انى جعصت خخخ
رايتنغ عندك اكسلنت بس خطك تعبااان !! تقدر تعبر !! قلت حلو بيدنا ايها الصليبي !..
قلي الليسنغ عندك ممتاز !! قلت يجي <-- خخخخ
واعطاني قطعه وقالى اقرا .. وقالى الريدينغ عندك اكسلنت !! القرامر !!
عندك وييييييييييييك .. ضعييييييف خخخخخخ .. قالى انا محتار فين احطك .. بس بحطك معايا في كلاسين
وبعدين قولى لو ناسبك او لأ .. الكلاس الاول .. هاي انترميديت" متوسط مرتفع " .. والتاني انترميديت " متوسط " ..
طبعا لانه المعهد تجاري مو اكاديمي بحت زي مثلا معاهد الجامعات .. فنظامهم كان كذا
Beginner <-- مبتدئين يدرسوو ون تو ثررري فوور
pre-intermediate<-- قبل المتوسط يعني يدرسون تولف إلفن والايام والشهور وتركيب الجمل
intermediate<-- متوسط وكنا ندرس قرامر واشياء مهمه شويه
high intermediate<-- متوسط مرتفع وكان اصعب من إللى قبله في القرامر وكل شي
advanced<-- متقدمين .. عاد هدوول محترفين .. وكلاسهم ممل

المهم دخلت اول كلاس .. على طول بعد الأنترفيو .. واتفرج على زملائي خخخخ
إلا قالى روح جنب ستيفاني بنت كولومبيه .. صراحه يا عالم احراج .. طول وقتي وانا ادرس
جنب سليمان .. وحمزه .. وعلي وتجي تقولى ستيفاني وكولمبيه ولبسها فاضح !!
بس قلت توكلنا وجلست جنبها وادانا تمرين وانا زي الاطرش في الزفه ويس نو ياه وهيك !!
وخلص الكلاس الاول وجينا للثاني وكان زحمه شويه من كولمبيين واسبان .. وايطاليين وفنزويليين
وكل شي .. وطبيت جنب منغوليه عاطله وهامله وفله .. وكانت بتضيع مستقبلي .. وبديت آخد على الروتين والوضع
وصرنا نغش انا وهيا ونحل التمارين بالغش وكدا خخخخ .. في موقف في بداية الكلاس الثاني
كان فيه يمكن ثلاثه طلاب معايا .. وطبعا بما اننا جدد لازم نعرف نفسنا قدام البقيه وفعلا كان موقف صعب
وجدا كنت محرج شوي بس الحمدلله رميت من هنا ومن هنا ... وسلكت ..
طيب بقولكم شي ...
بالنسبة للرايتنغ وخصوصا لما الواحد يتكلم عن نفسه !! انا والله قبل ما اسافر كنت دايما اتمرن
واقعد اكتب قطع عن نفسي بالانجليزي واجيب افكار وكدا .. فعشان كدا كان السؤال لعبتي !!
وبالنسبه للتعريف بالنفس .. نفس الشي كنت دايما وانا لحالى اقعد اتكلم مع نفسي <-- صاحي ورب النعمه مو مجنون
بالانجليزي واعرف عن نفسي .. مثلا
My name is microbiologist , i am in 23 years old , i got my bachelor's
degree in general microbiology .. i am planing to complete my education i want to get the masters degree .. um i love to watching tv series my favrite tv show is dexter .. etc ...
يعني هنا انا كتبتها ارتجاليه وبسررعه فسامحووني بس مثلا اقول فيها انا اسمى مايكرو بيولوجست عمري 23 سنه .. حصلت على درجة البكالوريوس في الأحياء الدقيقه العامه .. انا مخطط اكمل تعليمي واحصل على درجة الماستر .. احب اتفرج على المسلسلات وبرنامجي المفضل هو دكستر ...
يعني الزبد قبل لا تعبر بالانقلش عبر بالعربي إيش بتقول وحولها بالانقلش وتتحول صدقني بدون ما تستخدم كلمات صعبه ! يعني ركب الجمل في راسك والفكره واكتبها .. بس لا تكتبها بنفس قواعد اللغه العربيه انتبه !!
انا اقصد الفكره فقط تكون مرتبه !! وتتنتبه للقواعد بطريقه مستساغه ... وان شاء الله بشرح لكم قصة السمع
مع ترتيب الجمله بدون قاعده !!

وبس كان هذا اول يوم ليا بالمعهد .. وخلصت وخرجت .. وعلى الباص على البيت واكلت وقعدت على النت ونمت خخخخ

يتبع ،،

في آلية التدريس في المعهد والحصص تتكلم عن إيش !! .. هل بقعد على روتيني كل يوم ؟؟ !!