عاجل جدًا: استفسارات عن(المؤتمر الدولي للتعليم العالي 6-9جمادى الآخرة 1434) - الرياض

النايف وباقي الأخوة الكرام

* أمس كنت في المعرض واليوم ( دار راسي يعني :) ) بكتب لكم مختصر مفيد

* من الأفضل جدًا أنك تاخذ معك مستنداتك ( صورة من الجواز / الترانسكربت مترجم + نسخة من العربي / 2-3 توصيات بالانكليزي طبعاً)
* الجامعة اللي تريحك من ناحية البرنامج الدراسي + طبيعة المدينة ...توكل على الله و أستسفسر منهم أكثر وقدّم عليها ( راح تدقع رسوم التسجيل غالباً, وهي غير قابله للاسترجاع)
* أنا قدّمت على جامعة وحده/ ويارب بأذن الله يجيني منها قبول
* واحتمال بكرة أقدم على وحده 2 ( يعني وحده في امريكا ووحده في كندا)
* سالفة المعادلة يا النايف لا تعيقك عن روحة المعرض, روح للجامعة اللي تبيها وعطهم اللي قلته سابقا,واذا بغوا منك شي بيعطونك التعليمات.
* اللي يقول فيه مترجمين,في اغلب الجامعات,يقصد طلاب او طالبات سعوديين
* الجامعات الهولندية والالمانية والشلة الباقية الاوروبية ماشفت مترجمين. الملحقية في المانيا فيها عربية.
* اكتشفت اكتشاف جديد بالنسبة لي: الا وهو ان السويد / هولندا / النمسا ( يتحدثون اللغة الانكليزية كلغة ثانية !) كنت افكر بس لغتهم الاصليه او الالمانية فقط!
* الماجستير في جامعة ماسترخت الهولندية بالانكليزي وفي بعض البرامج بالهولندي أو الفرنسي.
* الماجستير في النمسا بالانكليزي
* شدّتني الجامعة الاسلامية في المدينة المنورة من بين الجامعات السعودية,وولا فيها قسم طالبات للآن الفكرة موجودة لكن للآن.
* ترجمت الترانسركبت اليوم,في مكتب في النسيم,عند شارع العمال على قولتهم. وطلع لي بعد كم ساعة ( يعني لا تيأس ممكن تخلص في كم ساعة)
* من المفيد أنك تمرّ على كشك الBritish council تسأل عن اختبار الielts لان فيه عرض مدري هو جديد ولا من اول.بعد ما تدفع الرسوم ال850 يعطونك 30 ساعة اونلاين تدريب على تقنيات الاختبار ((مايقوي الانكليزي ولكن يعلمك عن الاختبار)).
* من المفيد انك تمر على كشك اسمة IELTS يا في القسم البريطاني يا القسم الاسترالي واحد منهم. والسيدة اللي هناك (وهي كبيرة في السن) متعاونه. لدرجة اني خليتها تشرح لي قسم الwriting كله التاسك 1 والتاسك2 اي سؤال يخطر في بالك عن الاختبار هي راح تفيدك
* الجامعة اللي انت مهتم فيها,او تعرف احد من اصدقائك او اقربائك مهتم فيها,جيب له البروشورات والكتيبات الموجودة.
* فيه تمر للتوزيع عند ركن الاستعلامات اذا تبون يعطيكم طاقة << :)) ويرفع معنوياتكم شوي
* فيه لوحات فنية في الممر. بس ماكنت مروّقة ابدا ابدا اني اتفرج عليها واصورها . ممكن بكره في الصباح اتأملهم : ) واصوّر اللي يعجبني منهم.
* فيه ورشات. اللي تهمك منهم روح لها من بدري عشان تحصل مقعد. وهي مجانية.
* لاتنسى تاخذ الدليل وتشوف اللوحة الحائطية عند مدخل القاعة. لأنها مرقمة.
* لو تذكرت شي او استجد عندي شي برجع اكتبه لكم
* في آخر هذا الرد, دعواتكم لي التوفيق وتساهيل الأمور.
* ولكم مثله إن شاء الله.

انا اتفق مع كلام راقي من خلال تجربتي في الثلاث ايام اللي راحت

انا بتكلم عن الجامعات الاسترالية اوك حصلت اجانب يمثلون الجامعة نفسها
بس مو طول الوقت يكونو موجودين يكون مكانهم اشخاص سعودين او عرب تبع (مكاتب قبولااات) ويقولون لك اذا تبي تقدم ع الجامعة راح نجيب لك قبول انا اول شي فكرتهم تبع الجامعه بس طلع ماعندهم سالفة وتحسفت اني عطيتهم رقمي وايميلي
بعدين حصلتهم معطيني الكرت حق المكتب لا والمشكله تحصل نفس الشخص اللي تبع مكتب في كذا جامعة يعني اليوم في جامعة معينه بكرى في جامعة ثانيه انا استغرب هم متفقين مع الجامعات او ليش يخلونهم ع راحتهم !!

وبعدها بيوم جيت حصلت واحد من طرف الجامعة اجنبي مدير الطلاب الاجانب اتوقع جلست اسولف معه واسئله
قال لي انا ماقدر اساعدك اني اجيب لك قبول ولكن تقدر تقدم اونلاين او تتواصل مع مكاتب وجاء بيعطيني
كرت مكتب قلت له لا شكراً انا راح اقدم من نفسي اونلاين احسن قال اوك براحتك بس انا ماقدر اساعدك في القبول

اللي استفدت من المؤتمر انه شفت التخصص اللي ابي عند كذا جامعة افضل بكثير من اني اجلس احوس في مواقعهم ع النت
وتكلمت مع اللي يمثلون الجامعات وسئلتهم اسئله عن الجامعة واخذت بروشرات موجود فيها تفاصيل عن الجامعات

وللأمانة في طلاب سعودين متخرجين من الجامعات واتوقع انهم طلبو منهم جامعاتهم انهم يمثلونهم في المؤتمر واستفدت منهم
كثير يعني مو مثل اللي تبع المكاتب

وايضاً ورش العمل كانت جيدة جداً وامس استفسرت من واحد هل موجود تسجيل فيديو للورش اقدر اطلبه ؟
قال لي تعال بكرى اللي هو اليوم الجمعة وانشاءلله تحصل التسجيل حق الورش وبعد راح تحصله في اليوتيوب

وبالتوفيق للجميع...

الأخ اللي قبلي:


إذا فيه تلاعب, وفيه أشخاص يسوقون لمكاتب يعملون فيها, ماعليك منهم. مع أني ماشفت ولا واحد.
كل الموجودين ممثلين الجامعة من قسم (القبول والتسجيل للطلاب الدوليين / وبعض الجامعات يكون موجود المسؤل عن تخصص معين ) يعني جامعة دورَم/بريطانيا, كان فيه سعوديه مترجمة ومسؤلة القبولات,والمشرف على قسم الترجمة (عربي -انكليزي) يعني اللي يدخل هالتخصص,(اللي هو الترجمة لبرنامج الماجستير,راح يستفيد إستفاده كبيرة)

* أمر آخر
من قال أن المعرض يعطي قبولات؟
في البداية,فتحت هالموضوع أستفسر عن هالنقطة.
* واللي حاصل, بعد ماتختار الجامعة اللي تبيها والبرنامج اللي تبيه تعطيهم مستنداتك, وتتنتظر رد القسم المعني, لأن اللي احنا مسلمينهم الورق ماهم الا قسم التسجيل في الجامعة نفسها وولا في يدهم لا فك ولا عقد. لكنهم ممكن يقدمون لك نصايح.
إذا مثلاً كنت تبي تقدم على برنامج وهم يعرفون ان فرصة قبولك فيه ضعيفه يقولون لك غيّر التخصص. مايخلونك نتتظر ثم يجيك الرفض.



/

/

و خلص المعرض : )


هل من تجارب جديدة ؟

ايه انا قلت انه تجربتي كانت في جامعات استراليا اللي كلها كذا ممكن كم جامعة ماشفت فيها اشخاص تبع مكاتب بس اتوقع انه مسموح لهم يسوقون لمكتبهم ويقولون لك من دون رسوم نقدم لك
وينشبون لك عشان تسجل رقمك وايميلك وهم يتواصلون معك المكتب

بالنسبة للقبولات انا اول مادخلت الموضوع بعد كنت استفسر وابي اعرف هل هم يعطون قبولات او لا
واللي عرفت مثل ماقلت ان الاشخاص اللي تبع الجامعه قالو مانقدر نقدم لك او ناخذ اوراقك انت قدم اونلاين او عن طريق مكتب هم فقط مثل ماقلتي ممكن يفيدونك ويعطونك نصائح وشروط القبول في التخصص (هذا في جامعات استراليا ) وماعندي خلفيه هل جامعات بريطانيا ممكن يقدمون لك او لا

واستفدت من المعرض كثير وتكلمت مع الاشخاص اللي يمثلون الجامعات وناقشتهم افضل من انك تدخل على موقع الجامعة وتنتظر الرد
وبالتوفيق للجميع في اختيار الجامعة والقبول ..