الى كل من يهمة امر المقابلة.. ولكل من أجرى المقابله الشخصيه..هنا..

ياخواني هذا السفارة مو الوزارة وعندي خوش كلام لكن اسحابه من الان

اخوي ما سألوك عن العمل هل انك كنت تشتغل ولا لا ؟؟؟ يعني ما سألك مثلا هل انت الحين موضف ولا لا ؟؟
ارجو انك ترد اخوي الحين

اخوك العجمي

اول شي اسلم عليكم وانا ابغى اكتب هذا الموضوع عشان يستفيدون أخواني الي حيسوون المقابله بعدي

طبعا لمن أعلنو عن المواعيد انا كنت في ابها <<<< ياحليلي قاعد اتمشى أنا ووجهي :115:

وجري على طول على المطار ادور حجز واحجز انتظار والحمدلله سافرت على جده عشان آخذ اوراقي وحجزت على الرياض على 7.5 صباحا يوم الجمعه وسافرت واول ماوصلت انتم تعرفوني اعرف الرياض شارع شارع :105: ,,,,,,( طبعا في الأحلام :96: ) واول ما اوصل جاني واحد قال تبي سياره قلت لا لا انا باستأجر سياره :111: قالي بكيفك وعليه نظره زي الي يقول تعرفها يعطوك سياره :101:

وأجي على حقون الايجار اول ماوصلت قطعها الرجال من البدايه قال عندك بطاقة عمل قلت ها لا بس عندي بطاقة احوال ورخصه قال لا يالحبيب لازم معاك بطاقة عمل قلت مره قال مرتين

وانه خوينى الاول يطالع فيه ويقول ها ماتبغى سياره قلت مافي هنا فندق قريب قال الا بس غاليه قلت لا ابغى شي ماهو غالي مره قال مافي غير البطحه قلت قدام ويوديني على فندق البطحه وانه عنده الليله بـ 150 ريال ( مايعتبر غالي بالمقارنه انه خمس نجوم ) واسكن فيه واورح مقهي قريب وافتح على المنتدى والقى اسأله حاطينها الشباب على المقابله واورها واقعد طول الليل احفظها خايف انها تجي ( اشبها اسألة وزاره ) وما أنام غير الساعه 1 المهم صحيت بدري واتروش وازبط نفسي والبس ذاك الثوب والشماغ الاصفر الي يحبه قلبك وذيك الجزمه الايطاليه الله يكرمكم والسامعين المهم واطلع الساعه 8 ( طبع انا مقابلتي الساعه 10 ) بس قلت اروح بدري افضل المهم وانزل واصفي حسابي مع الفندق ويجيك البنقالي حق الفندق مسوي حق فزعات ياخذ الشنطه عني ويروح يناديلي تاكسي ولمن ركبت التاكسي قلت له شكرا صديق وانه لسه ماسك الباب ماهو راضي اني اقفله قلت شكرا شكرا صديق خلاص باي قال انت اول زبون عندي فهمت قصده انه يبي فلوس قلتله والله انا اول زبون قال ايوه قلت طيب سلام واقفل الباب وامشي وزي ماهو

المهم وصلت الفندق على 8.5 دخلت لقيت عند البوابه واقفين حقون الوزاره كل مايدخل واحد يعطونه ملف يحط فيه الطلبات حقتهم قالي انت موعدك متى قلت 10 قال اجل اقعد وبعدين نعطيك ملف قلت طيب واقعد الا جنبي شباب اثنين من الشرقيه قعدت ادردش معاهم شوي حتى قلتلهم على المنتدى ومدحت لهم فيه..... مسوي دعايات
( مشالله نسية واحد منهم 98.7 والقدرات 94 ) المهم ويجينه واحد شايب قال انتم ماخذتو ملف قلت لا قال هيا تعالو وخذو ورحنا واخذنا وحطينا فيها الاوراق وكلمت واحد من حقون الوزاره شكله طيب ياحليله اطالع فيه قاعد يبتسم قلت سلام عليكم قال وعليكم السلام وبالتوفيق انشالله قلت والله ياشيخ اني خايف من هذي المقابله قال لاتخاق ترى هذي المقابله بس للتعارف وانت ذحين بس تاخذ هذا الملف اعتبر نفسك مقبوووووووول قلت الله يبشرك بالخير وبعدين أخذنا ارقام عشان المقابله المهم انا اول ماخذت الرقم على طول جاى رقمي ودخلت الغرفه الا فيها دكتورين سلمت عليهم وجلست وهنا تبدأ المحادثه حقت المقابله :-
الدكاتره : اول شي عرفنا عن نفسك ؟

Cowboy: أنا .......... من جده متخرج هذي السنه والحمدلله نسبتي طيبه 97.78

الدكاتره : مشالله طيب............ قلنا يا Cowboy ليش اخترت امريكا انت عارف انه في بعثات لاكثر من دوله ؟

Cowboy: ايوه انا عارف انه في لاكثر من دوله لاكن انا اخترت أمريكا طبعا أول شي لانه جامعاتها قويه وبعدين عشان اللغه وبرضو عشان التخصص الي انا ابغاه قوي في أمريكا.

الدكاتره : طيب ايش التخصص الي تبغاه ؟

Cowboy: أنا والله رغبان في الهندسه .

الدكاتره : هندسة ايش لسه ماقررت ؟

Cowboy: الا انشالله هندسة نظم .

الدكاتره : طيب في في جامعاتنا هندسة نظم ليش تدرسه بره؟

Cowboy: وانت ايش دخل اهلك انا اختار التخصص الي ابغاه كانك دافع البعثه من جيبك ( طبعا هذا في قلبي ) لاكن الي قلته : لانه مافي هنسة النظم في جامعة ( عزوز) مافي غير في البترول وذكرت نفس الاسباب الي قلتها على اختياري امريكا .

الدكاتره : طيب ايش فكرتك عن امريكا ؟

Cowboy: طبعا اذا قصدك عن الشعب لانه الشعب غير الحكومه طبعا الشعب ودود وعنده حب للاستطلاع يعني لمن يعرف انك انت سعودي يحب يعرف كيف انتم عايشين وكيف تتصرفون والشعب اذا احترمته ومشيت معاهم ممتاز يعاملونك باحترام .

الدكاتره : طيب اذا جاك واحد وانت في سوبر ماركت ( هيا جات لاسئله الي تعصد الواحد ) ودفك وقال انتم السعوديين انتم الي تفجرون الناس انتم ******ين كيف تتعامل معاه؟


Cowboy: طبعا اضربه وافقع وجهه ويمكن افجره وخليه عبره لمن اعتبر ( طبعا هذا اذا انت بايعها وماتبغى بعثه ) قلتله : اول شي انا لو ضربته هذا يعتبر تاكيد لكلامه لاكن بالعكس احاول افهمه واوضح له الامر بطريقه تجذبه وتخليه يفهم حقيقتنا لانه احنا واجهه لبلدنا ولازم نوري الناس أخلاقنا الحميده ونوضح لهم الحقيقه .

الدكاتره : طيب اذا جيت من البعثه ايش بتشتغل ؟

Cowboy: ههه طبعا باشتغل مهندس !!

الدكاتره : لا قصدنا فين بتشتغل في الحكومه ولا في الخاص ولا فين ؟

Cowboy: اها والله انشالله انا ودي اني اشتغل في مدينة الملك عبدالله الاقتصاديه لانه الملك ما حط لنا هذي البعثات الا عشان نعمر هالمدينه ونرفع بلدنا فوق انشالله .

الدكاتره : باذن الله ترجعون بالشهادات وتفيدو نفسكم انشالله
طيب الوالد راضي انك تروح البعثه يعني ماعنده مانع ؟

Cowboy: الحمدلله الوالد يقولي روح الي انت رغبان فيه والافضل لك .

الدكاتره : يعني يبغاك تروح ؟

Cowboy: طبعا مافي أب في هالدنيا يبغى ولده يكون بعيد عنه لاكن برضو يبغى الافضل لولده والشي الافضل لازم تتعب فيه .

الدكاتره : طبعا لازم تكون عندك خلفيه عن المكان الي بتروحو وتعرف أفضل الجامعات ؟

Cowboy: انا الحمدلله قعدت أقرأ لمدة 4 شهور عن الولايات والجامعات والحمدلله استفدت فائده كبيره .

الدكاتره : ايش الجامعات الي تبغى تروحها ؟

Cowboy:والله كل واحد يبغى أفضل الجامعات لاكن الي يمنع الواحد هو المكافاه لانه الجامعات القويه تكون في مدينه غاليه ( قعدت اكلمهم عن الجامعات لين ادوشتهم حتى جبت لهم جامعات مايعرفونها انحرجو قالو والله ماعندنا خلفيه )

الدكاتره : طبعا احنا ابتعثنا زيكم أيام الثانويه بس ماكان أحد يوجهنا ويعلمنا واحنا مسووين هذي المقابله عشان نعطيكم توجيهات والنصائح الي تحتاجونها لمن توصلون امريكا وذحين ايش عندك استفسار تبغانى نجاوبك عنه ؟

Cowboy: والله انا محتار بين الجامعات الي أنا ابغى ادرس فيها فياريت تساعدوني في الاختيار ( وقعدو يوصفون بعض الجامعات ويمدحونها وعلى فكره مدحو ولاية بن سلفانيا وقالو انه الشعب فيها طيب والسكن مو غالي يالا افرح يا مبتعث ولاكن )

وآخر شي واحد منهم اعطاني موقع يقول يفيدك يعطيك معلومات عن الجامعات والولايات ونسبة البيض والسود والامريكان وغير الامريكان


وفي النهاية يا اخوان أبغى أوضح لكم حاجه واحده انه هذي المقابله بس للتعارف وعشان يعرفونك وينصحونك اذا شافو فيك بعض الاخطاء يعني لاتخافو خليكم على طبيعتكم والله انه قعدنا نضحك وطقيناها سوالف يعني الامر سهل مرررررررره وتقريبا الي رايح المقابله مقبول بنسبة 99.99% بس ممكن ما تنقبل اذا جيتهم وانت الحشيش في جيب والحبوب في جيب وقعدت تدخن قدامهم ذاك الحين في امل انك ماتنقبل

يعني اهم شي يكون عندك معلومات ......ايش؟....... معلووووووووووووماااااااااااااات

وبالتوفيق لكم ولكل من سوف يجري المقابله والامر سهاااااااااااااااااااااااااله

ويمكن في كلام ثاني نسيته لاكن تقريبا هذي الاشياء المهمه واذا في شي اتذكرتو على طول حاكتبو ومشكوووووووووورين


مع خالص تحيات أخوكم Cowboy :116:

يعطيك العافية اخووووي Cowboy وهذا ماكنت اتوقعة ان شاءالله الكل بيستفيد

مبروووك مبروووك يالغالي حقيقة فرحنالك ,,, والله يوفقك وتبتعث ونشوفك مهندس أد الدنيا

الله يوفقك يا Cowboy ...

الله يوفقكم جميعا

السلام عليكم ....أنا عندي سؤال كيف أعرف موعد تقديم الأوراق للوزارة .....والله يوفق الجميع....مع العلم انه رقمي 1767.....وشكرا

مع العلم إني مقدمه على الماجستير