تجمع الراغبات في التحويل إلى دولة مغلقة

December 14th, 2013, 01:36 PM

السلام عليكم ورحمة الله وبركاتة

أسعد الله مسائكم جميعا

بحمد الله تم ترشيحي للمرحلة التاسعة من البرنامج لمرحلة الدكتوراة لأمريكا وهنا تكمن المشكلة...

لما جيت ادقق اوراقي في بداية التقديم سألت موظفات الوزارة عن التحويل قالولي الموضوع سهل جدا جيبي اثبات ان اخوك هناك ونحولك على طول وبناءا على كلامهم انا بنيت طموح وقرأت عن بريطانيا وعن الولايات والجو المعيشه وكل شي وطريقة التقديم والفيزا يعني باختصار كأني بكرة بسافر ولما جات الملتقيات رفعت اوراقي وانا كنت في ملتقى جده يعني اول ملتقى وانتظرت الرد اسبوع واسبوعين ومامن مجيب وراسلت كل الايميلات بالاخير ردت علي الاستاذه الهنوف السلامه وطلبت مني ارسلها اوراقي وقالت بترفعها للجنة وقلت الحمد الله لعلها بشرى خير وانتظرت بعدها اسبوع وشوي تقريبا وارسلتلها قالت انتظري الرد واليوم الثاني اتصلت على الوزارة طلبت منهم تحويلي للدكتور الفوزان يحولوني وماحد يرد ورجعت اتصلت وحكيت لهم مشكلتي وحولوني للهنوف وكلمتها وقالت انا رفعت اوراقكم وننتظر الرد من الفوزان قلتلها يعني اطلع الفيزا قالت لا انتم بالاساس مرفوضين انا هنا انصدمت قلت يمكن تصرفني لأن الفوزان بنفسه قال في ملتقى جده ان البنت اللي محرمها في دولة مغلقة لها استثناء

ويوم الخميس 1435/2/9جاني الرد المؤلم رسالة على الإيميل برفض التحويل لأنها ليست من الدول المدرجة ضمن المرحلة التاسعة!!!

طيب ليش كذا!! انا اعرف انها ليست من ضمن الدول لكن كلامكم كان يقول اني اقدر احول... حسبي الله فيهم

وبعد ماجاني الايميل بشوي اتصل علي واحد من الوزارة وقال انتي طالبة تحويل قلتله ايه قال معليش ي أختي احنا مانرسل بريطانيا الا اذا جبتي قبول اكاديمي اما لغة لا... قلتله انا اعرف وحده شخصيا حولتوها العام بس عشان كان محرمها موجود في بريطانيا قال مو صحيح اصلا بريطانيا ماتستقبل سعوديين في اللغة قلتله اخواني اثنين يدرسون لغة قال لا شوي ويدخل فعيني من جد قهررررني حاولت فيه قال مافي الا انك تدرسي في امركيا لغة وتطلبي تحويل واحنا بنتابع موضوعك ونحولك ... كأن مافي عندهم الا انا. بالمختصر كان يصرفني..

المهم انا ماراح اسكت لهم لأن لو عندي احد يروح معاي امريكا ماكان طلبت التحويل بس حرام عليهم يسوون كذا واحنا بنات مابيدنا حيلة...

انا سويت هذا التجمع عشان نتعاون ويشوفون لنا حل وانا كمان مسوية قروب بالواتس اللي نفس حالتنا ترسل رقمها خاص وشكراااا...

• نشر عبر تويتر
• نشر عبر فيسبوك
• نشر عبر جوجل