حجم التضحية المقدمة من دارس الماستر (تركه لوظيفته الشاغرة)

و عليكم السلام

اخوي يوجد مرحلة ١١ لانه مددوا البعثة لخمس سنوات إضافية
و هنا المصدر
بس الأفضل تتطلع على الشروط بعد
http://www.mohe.gov.sa/ar/news/Pages/news-2-4-1434.aspx

بالنسبة لقرارك صعبة الواحد يقولك هذا قرار لازم انت تتخذه و تشوفه من جميع الجهات بايجابياته و سلبياته

و الكثير تنازلوا عن اشياء عشان يبتعثوا و كثير تنازلوا عن البعثة عشان يقعدوا لأسباب

في النهاية لازم تشوف وش اللي انت مستعد تتنازل عنه مقابل الشي الثاني

و احيانا الواحد يتردد في قراراته بس سبحان الله اذا هالشي مكتوب له و فيه خير الله بيسهل عليه و يوفقه.

القرار صعب و مرات كثيرة الناس يأثروا على قرارك
بس بالنهاية القرار انت اللي بتتخذه

انا مرحلة بكالوريوس فمالي علم بالموقف اللي انت فيه ( بين وظيفة و ابتعاث) بس حاول تكتب الإيجابيات و السلبيات لكل واحد منهم و تقارن بينهم

الله يوفق الجميع و يسهل عليهم

أنصحك بالاستخارة فاالله وحده سبحانه يعلم الخير .. وتوكل على الله .. والله يوفقك مهما كان اختيارك

مريت بمثل هالموقف قبلك، عليك بالإستخارة ثم الاستخارة..

مافيه أحد يقدر يقول لك اي القرارين أفضل، القرار اللي تتخذه وترتاح له ويناسب ظروفك توكل على الله وشد حيلك فيه.
بكل الحالتين اذا وصلت لقرار وظيفة او ابتعاث، لاتحاول ولا لحظة انك ترجع تفكر او تسمع من اللي حولك وتندم عليه.
شي أنت مرتاح له ومستخير قبل تسويه فهو خيره لك بإذن الله.

الله يوفقنا واياك ويسهل عليك ويكتب لنا الخير جميعًا..

اولا الاستخااره. واسأل الله يهديك للصواب والخير .. حتى لا تندم


- هل الوظيفه الي انت فيها هي رغبتك ..؟!
- مجال العمل مايعطيك اجازه او ابتعاث من عندهم - حاول تكلم الاداره ؟
-لو اخترت الابتعاث هل تخصصك مرغوب فيه وفيه فرص عمل ؟

حاول تقيم الامور وضعك الان وبعد الابتعاث
واتخذ القرار بعد الاستخاره والمشوره

والله يوفقك الجميع

نصيحه لصاحب الموضوع

اترك الوظيفة يا رجال! , إلي عندك ما هي آخر وظيفة في الدنيا و الرزق موجود "اسعى ياعبدي وانا اسعى معاك"....روح شوف الدنيا و أتعلم التعليم الصح و إذا لقيت وظيفة اهناك أحسن بعد , اهناك أحسن من اهني و إذا رجعت بكون عندك شهادة من بره....شي يميزك عن غيرك و بيعطيك وظيفة أحسن

إذا كنت تفكر إن راتب 20-25 بعد 10 سنوات شي زين فأنت غلطان....شكلها وظيفتك حكومة , روح و ارجع بشهادة محترمة و القطاع الخاص رح يركض وراك , يا رجال أنا توي متخرج من كندا و متوظف صار لي 4 شهور و راتبي 19500 ريال و هذا بدايتي بعد....وأنا أقول لك أنا قدمت على الماجستير و بروح

نجاحك ليس بالتفكير إن راتبك يوصل 25 ألف في 10 سنوات , النجاح هو كيف توصل إلى هذا الراتب في أقصر وقت ممكن و أول خطوة إلى هذا هو الشهادة من الخارج.

شخصياً تركت وظيفتي لـ الإبتعاث ،
وظيفه ف ارامكو ، ونفس وضعك بعد عشر سنوات الراتب بيكون اعلى من 20 ألف بعد ..
لكن العبره مو ف الراتب ،
كل شخص له اولويات ف حياته ،
الدراسه ايش تعني له ،
التخصص الي يحبه ايش يعني له
مايكون عبد لـ الراتب ولـ الوظيفه ايش يعني له
السفر والاحتكاك بـ أعضاء هيئة تدريس بـ مستوى عالي و بثقافات اخرى وتعلم بطريقه اخرى ايش يعني له
مسألة " الحياة مره واحد وانا لازم اعيشها مثل ما ابي واسوي كل الي ابي واحقق اهدافي واحلامي " ايش يعني له

اما بخصوص الرزق والوظيفه والراتب قال النبي صلى الله عليه وسلم : { لو توكلتم على الله حق توكله لرزقكم ، كما يرزق الطير ، تغدو خماصا ، وتروح بطانا } .
حكمه إلهيه ، اسعى ياعبدي ولكل مجتهد نصيب ،


اتمنى لك التوفيق ف قرارك سواء الاستمرار ف الوظيفه اوا لسفر للدراسه

انت محتار بين امرين كلهم فيهم خير باذن الله
ولو اخترت احدهم ما راح يضيع مستقبلك باذن الله

بس اسمحلي بعقب على كلامك وانا اخوك,, واعتبره تعقيب شخص محب
في كتابتك نظرتك كانت تشاؤميه من ناحية الابتعاث,, ما حسبتها بمفهوم اخر
اذا بتشوف السلبيات قبل الايجابيات فما راح تقدر تتقدم ولا خطوة
وحتى لو اخترت البعثه وجت الامور السلبية اللي ذكرتها ,, الامان الوظيفي حاليا بالشهادة بعد الله مب بالوظيفة ( العسكري والمعلم هم من تنطبق عليهم مقولة الامان الوظيفي بالوظيفة ).
انت مب طالب ثانوي ما معك شهادة ,, انت الحمد لله معك بكالوريوس,, لو تدهورت الامور,, بترجع وتدور وظيفة ولغتك وقتها بتكون افضل لو ما معك لغة حاليا.

انظرلها وانا اخوك نظره مستقبلية
شخص عنده 19 سنه خبره وبكالوريوس بتخصص معين
وشخص عنده 16 سنه خبره وماجستير بنفس التخصص ( بالاضافة الى لغة ممتازة لو لغتك الحاليه غير جيده)
فمن راح يكون افضل برأيك
-
نصيحة لا تستشير غير اهل الاختصاص.. اللي جالس بالسعودية وما جرب البعثه مستحيل يعطيك معلومه صحيحه,, لانه ما عاشها
-
اسئل من جرب البعثه
انا جربت الابتعاث قبل ست سنوات ولو عاد الامر من جديد فراح اختار الابتعاث وما راح افكر ولا تفكير بسيط بأني افوت الفرصه
خصوصا اننا مقبلين على جيل اكثرهم شهاداتهم عاليه..
-
انا عندي ماجستير وبكالوريوس بالاضافة الى خبرة عملية 9 سنوات
للامانة لما اخترت اكمل دراستي,, ما أيدني ولا شخص اعرفه، اقاربي وربعي وزملائي كلهم كانت نظرتهم تشاؤمية ,, كانوا يقولوا كيف بتترك وظيفتك وراتبك كان جدا عالي.
كانت قناعتي عاليه جدا بالابتعاث،، استخرت ربي واستأذنت الوالد والوالدة واخترت البعثه
وحاليا الفوائد اللي جنيتها بعد الابتعاث
1- بالوظيفة: وضعي افضل بكثيييير الحمد لله من قبل وصارت وظيفتي افضل من كل من كان في مستواي الوظيفي
2- لغتي اصبحت افضل بمراحل من قبل
3- زوجتي صار عندها لغة انجليزية ممتازه
4- خلال فترة ابتعاثي وكثرة اوقات الفراغ وقتها قدرت افتح لي بزنس بالانترنت والحمد لله الان اسمي معروف في سوق الانترنت وصار دخلي الشهري اضعاف دخل الوظيفية

-
فرصة الابتعاث بنظري اكبر فرصة قد تكون بتاريخ شباب السعودية,
الفايده ما تنحصر بس لامور الوظيفة ,, الفايدة باذن الله راح تكون على مستوى الوظيفة ومستوى حياتك
-
وبالاخير انصحك توكل على الله ( وما خاف من استخار الله سبحانه )

اذا كنت موظف حكومي,,, ف صحيح انه لازم تختار ترك الوظيفة او البعثة, واذا كنت في القطاع الخاص انا انصحك باخذ اجازة استثنائية ( المعروفة ب الاجازة من غير راتب) عشان تمسك الوظيفه ...و في النهاية انت راح تعتمد على وضعك الحالي في العمل, وايش مسار المستقبل الوظيفي فيها مثلا بعد 5 -10-20 سنة , ولا تنسى انه بعد فترة من سنين الابتعاث حيكون مستوى شهادات الشعب الماجستير كأقل مؤهل, لانه في منافسه عالية في هذا الشي, وفي نفس الوقت خذ بالاعتبار لو كانت معاك الان حاليا الماستر الي انت ناوي تبتعث عشانه, كيف طلب سوق العمل لك, هل تخصصك مطلوب ؟مرغوب؟ قطاعات العمل فيه واسعه ؟ وفي اي مدينة في المملكة الشي هذا مهم اذا كنت ماتبغى تتغرب عن المدينة الام, وبالتوفيق ان شالله , ولاتنسى تستخير في الاول والاخير.

انت محتار بين أمرين كلها خير ونعمه استخير ربك ثم اتبع ما يرغبه قلبك