| . . تجربتك الخاصة في مقابلتك الشخصية في السفارات الأمريكية. . |

أتشرف بطرح تجربتي في هذا المنتدى الرائع ..

التأشيرة الدراسية لـ دولة: أمريكا

القنصلية: جدة

النوع: (جديد )

التاريخ: 10 / 02 / 2015

اسئلة المقابلة مع الاجوبة: سيتم شرحها بالأسفل

الاوراق التي تم طلبها منك: سيتم شرحها بالأسفل

هل تم حصولك على التأشيرة؟ تم تقديم الطلب جديد ..

ملاحظات أخرى:

تم الذهاب للسفارة في تمام الساعة 8 ووصلت عندهم تقريبا 8:15ص , طبعا ما فيه مواقف عند قنصلية جدة الا في مستشفى فقيه وراء ..

المهم :

وصلت ودخلنا وصفينا طابور تقريبا 20 دقيقة لحد ما وصلت عند موظفه طلبت منا الأوراق تظبطها وكانت :

الجواز وداخله الـ I-20 + السيفس + DS-160 + ورقة المقابلة

بعدها بـ خمس دقايق في نفس الطابور كان في موظفة ثانية سألتنا عن الجوال واعطتنا ظرف نحط الجوال فيه ..

بعدها ننتظر في الطابور واحد واحد لحد ما نوصل الى باب الدخول الأولي وندخل واحد واحد كل واحد يتفتش ويدخل واللي بعده يدخل وهكذا وفي جزء التفتيشش تعطيهم جوالكـ ويعطونك رقم علشان تأخذ الجوال وانت راجع ..

بعدها تطلع من باب وفيه سهوم في الارض تمشي عليها لحد ما توصل للمكان المقابلات والفيزا ..

ندخل ونأخذ رقم ونجلس وطبعا كان فيه 8 شبابيك 3 مقابلات اولية و4 النهائية تقريبا ..

طبعا الكل داخل ورقمي كان بعيد وكأني اشوف ناس يأخذون منهم الشهادات وانا ما جبتها معي وتقروشت وصرت متوتر بشكل مو طبيعي انتظر دوري بس يجي والله يحلها ..

وصل رقمي ورحلت للشباكـ اخذ أوراقي وسألني :

1- جيت أمريكا قبل كذا ؟!
لا

2- وش الفيزا المقدم عليها .!
طالب

اخذ اوراقي وطقطق شوي وقال أستريح لحد ما ينادونك برقمك قلت اوكي ..

ما امداني اروح اجلس كان فيه موظفه مهتمة بالتنظيم قالت خلصت من هنا قلت ايه قلت صف هنا طبعا للشبابيك الاربعة الاخيرة وكان قدامي 7 تقريبا ..

طبعا اللي قابلني المرة الاولى عربي واسئلته عربية والشبابيك الاربعة الاخيرة تقريبا فيهم ثنين عربي وثنتين يتكلمون انجليزي ..

المهم جاء دوري ورحت لموظفة امريكية ومرتبكـ ..

المهم سألتني :

Have you been to the States ? [ جيت أمريكا قبل كذا ]

لا

Where are you traveling ? [ وين رايح يعني اي ولاية ]
أريزونا

What is your major ? [ وش تخصصك ]
نظم معلومات ادارية

oh you have bachelor degree ? [ اها عندك بكالوريوس ]
ايه

thanks faris you will have your visa in 3 days [ شكرا فارس بتحصل على فيزتك خلال 3 ايام ]
انا منخرش قلت بس كذا قالت بس كذا قلت شكرا لكـ

وانتهينا وطلعت المقابلة وكل شىء مر بسلام وراحة ولله الحمد والمنه والفضل لله ثم لهذا المنتدى الرائع اللي ساعدنا خطوة خطوة ..

شكرا لكـم

ترى الموضوع اسهل مما تتصور ، و وقت المقابلة ما تاخذ من وقت دقيقة


قول لهم جمعت مبلغ يغطي تكاليف دراستي واذا قال من وين قول كنت موظف وقدم استقالتي

يا شباب بالنسبه للضمان المالي ينفع اعطيهم كشف الحساب لثلاث شهور ?? طبعا بطلع على حسابي

أنا بروح احتمال الإسبوع الجاي بقولهم ناويه أدرس هناك الله لايعوقني بشر

والله ييسر أمر حضورنا

اخر ماسافرت الاردن وسوريا 1429 هــ ومرتين فقط خلال5 ايام

هل هناك مشكله ؟؟؟؟؟


وبعدها بسنتين سافرت البحرين


ولآن جوزاي منتهي ولازم اجدده قبل اروح اسوي مقابله


فماذا تنصحوني ؟

الله يوفقكم

ان شاء الله سهلات واحد من الشباب نفس وضعك اهم شي لا تلف وتدور معه بيقول ليش رايح قل سياحة

الله يوفقنا وإياك وجميع المسلمين

- التأشيرة الدراسية لدولة :
امريكآ 🇺🇸
- القنصلية :
الظهرآن
- النوع :
فيزة درآسية F1 - جديده
فيزة سياحية B2 - جديدة > للوالد ❤️
- التاريخ :
موعد المقابلة / 19 فبرآير - الساعة 9 ص
استلآم الفيزة / 24 فبرآير من آرآميكس الخبر

- اجرآءآت المقابلة :
كانت روتينية و سهله الحمدلله و ما فيه اي تعقيد ، دخلنا بممر طويل ع الهواء الطلق 😌 طبعا كنا في طابور مرتبين واحد واحد يمشي ، جا دوري مع الوالد و طلب مننا السكيورتي مدري الشرطي الزبده طلب مننا ورقة الموعد + الجوازات ، سألنا اذا معنا مفاتيح او اجهزه او اي شي فيه حديد !
قلنا له ما عندنا شي غير اوراقنا و مفاتيح السيارة ، خذا المفتاح و حطه لنا بكيس و خلانا نمر من تحت الجهاز . ثم قالنا امشوا سيده و وقفوا عند الخط الاصفر اللي ع الارض ، قدامنا شوي كان فيه دريشه عليها واحد امريكي ياخذ الاوراق ، خلصوا الناس اللي قدامنا و مشينا للدريشه و طلب مننا الجوازات و ايصال سامبا و نموذج DS160 ، عطيناه و قعد يطقطق شوي ع الكمبيوتر ثم عطانا اوراقنا و لفها لنا بمطاط و قالنا ندخل من الباب اللي جنب الدريشة ..
دخلنا و مره ثانيه فتشونا ثم دخلنا داخل و كان فيه ٣ مباني و رحنا ع مبنى الجوازات و التأشيرات ، اول ما دخلنا نادتنا وحده من جنسية عربيه و طلبت الجوازات و DS160 و ورقة تسديد السيفس و ايصال سامبا و I20 ، هنا قالت لي عطيني الاصل و قلت لها ما عندي الا صوره قالت مو مشكلة عطيني بس وين الاصل ؟ قلت لها بالبيت . لاني قريت ان مستحيل اقدر اعدي المطار بأمريكا بدون I20 الاصل ..
عاد عطتنا ورقة فيها رقم الدور و قالت لنا نجلس نستنى يجي دورنا ، كان قدامنا ٥ درايش ثنتين منهم ياخذون الاوراق و ثلاث درايش يسوون عندها المقابلة >> طبعا انا فكرت انهم يسوون المقابلة بغرفة مظلمة زي اللي بالتحقيقات اللي بالافلام 😂😂 ، و فعلا شوي و جا دورنا و رحنا عند الدريشة 1 و كان عليها امريكي و خذا اوراقنا ( نفس الاوراق اللي طلبتها الحرمه ) ثم خذا بصمات اصابعنا كلها بالجهاز و سأل ابوي اذا كان بيقعد معاي كل المدة و كم المدة تقريبا ..
خلصنا و قال ارجعوا استنوا دوركم في المقابلة ، وفعلا 20 دقيقة و جا دورنا و كان اللي يسوي لنا المقابلة حرمة امريكية بس تتقن العربية و من اول ما شافتنا قالت السلام عليكم كيف حالكم و سلمنا عليها ( كانت مبتسمه و تضحك و هذا الشي ريحنا مره ) و سألتني كم سؤال :
في اي ولاية و اي مدينة بتدرسين ؟
وين سافرتي خلال الخمس سنوات الماضية ؟
ثم اخذت بصمات يدي كلها ، و جا دور ابوي طبعا كلنا مع بعض و سألته :
كم المدة اللي بتقعد فيها هناك ؟
هل بتسكن مع البنت او لحالك ؟
و بكذا انتهينا و كانت فيزتنا مقبولة و لله الحمد ، عطتنا الورقة الخضرا و قالت لنا 5 ايام و توصل فيزتكم ع اراميكس الخبر و انتبهوا ع I20 الاصل لان ما تقدرون تدخلون امريكا بدون الاصل و بس 😊👌 ..
- تعاملهم :
كانوا محترمين و بشوشين و ابدا ما واجهنا اي صعوبات معهم الحمدلله لذلك لا تخافون و خلكم واثقين من اجوبتكم و تراهم يعرفون يتكلمون عربي احسن مني بعد 😂😂

و اي سؤال انا حاضرة و بجاوب باللي اقدر عليه ، و ع فكرة ما طلبوا الضمان المالي و الشهادة البنكية ابد ..

شكراً لك اخت سمسمية

يا شباب هل الشهاده البنكيه الي تطلبها السفاره لها مده أو عادي اطلع شهاده من الحين وشكراااا لكم

يا شباب هل الشهاده البنكيه لها مده معينه عشان ابي اطلعها الحين وموعدي ب السفاره بعد شهر