مدة صلاحية الفيزا قبل السفر لامريكا اول مرة

وعليكم السلام ورحمة الله وبركاته
يا أخي الفاضل بعض الردود بالأعلى غير صحيحة..
وإذا سألت السفارة بيقولون لك غير الفيزا وبيعقدون لك الأمور ، لأنهم رسمين بزيادة ، وهذا حصل معي شخصيا.
فيزتي صدرت في سبتمبر 2013م والآي توني اللي مسجل فيه المعهد القديم EF ورقم السيفيس القديم ألغوه المعهد EF لأن يشترطون ندفع لهم كامل المبلغ وطبعا ما دفعت فألغوا الآي تونتي وقالوا لي فيزتك ملغية.
فغيرت المعهد وطبعا طلع لي آي توني جديد للمعهد الجديد LSI وبرقم سيفيس مختلف.
وسألت كثير في المنتديات وخاصة هنا في ملتقى مبتعث وقالوا لازم أغير الفيزا ، وكان صادف ملتقى التعليم العالي بالرياض وتواجد موظفي القسم القنصلي للسفارة الأمريكية بالرياض وسألتهم كلهم واحد واحد وكانوا عددهم فوق الستة وكانت إجابتهم واحدة لازم أغير الفيزا لأن الفيزا تعتبر ملغية ما دام أن رقم السيفيس تغير قبل ما أدخل أمريكا لأول مرة ، وواحد منهم بس عطاني أمل ضعيف جدا وقال لي إحتمالية دخولي 1% وبالحظ و99% برجعوني بأقرب طيارة.
وبصراحة ركبت رأسي وقلت بتحدى الكل.
فكل اللي سويته أني حولت رسوم سداد السيفيس من الآي توني القديم للجديد برسالة إيميل بدون ما أدفع ولا ريال والفيزا نفسها ما غيرتها.
وتوكلت على الله وسافرت في شهر يونيو 2014م (بعد 10 شهور).
وأبشرك دخلت بكل سهولة وبدون أي مشاكل.
وبعد دخلت من ولاية نيويورك ومعهدي القديم EF في ولاية جورجيا ومعهدي الجديد LSI في ولاية كالفورنيا!!!
واللي أستنتجته أن أهم شيء يكون عندك فيزا سارية المفعول حتى لو باقي عليها يوم واحد ، ويكون عندك آي توني ساري المفعول عشان ما تواجه مشاكل بس ، لأن المهم صلاحية الفيزا لكن الآي توني مساعد فقط ، وسمعت أن فيه ناس دخلوا بدون آي توني.
والله أعلم.