المشاركة الأصلية كتبت بواسطة Dietitian-ahmed
أخوي .. أنا توني متخرج تخصص علوم الأغذية وتغذية الإنسان / بكالوريوس بتقدير جيد معدلي 3.67 من 5
قدمت في جميع المستشفيات وماحصل نصيب اتوظف فقلت اطلع للغة وبعدها اخذ الماستر .. واحول على البعثه بعد اللغة ,
انا ابغى ابيع سيارتي ممكن تجيب 30 إلي 35 الف ريال .. وبطلع فيها لأمريكا ادرس لغة .. صراحه ما احب الجلسة بالبيت انتظر لين الوظيفه تجي فقلت اطلع ادرس لغة على حسابي ثم احول بعثه وبعدها ادرس ماستر ان امكن ..
عموما انا اول مره اطلع برى السعودية .. حتى الدول العربية ما سافرت .. فأليت تنصحوني ( وتساعدوني لوجه الله تعالى ) وبدعيلكم بظهر الغيب ..
أولآ :- ابغى اول شي اسوية حتى إلي الوصول الي امريكا .. ( يعني من ( أ ) إلي ( ي ) ) ابغى اعرف كل شي .. بصراحه بحث بالنت قبل اكتب هالموضوع وتعبت راسي انفجر من الكلام ولا قدرت اجمع .. لان بصراحه كل واحد يكتب على ذوقه ومادري ايش الي يناسبني ... وبحثت عن تخصصي ولا حلصت ..
الي ابغاه 1- كيفية تقديم على المعهد واستخراج الفيزا + كيفية ادفع الفلوس للمعهد اذا وصلت امريكا او الحين + الابلكيشن كيف وضعها + ابغى اعرف سيارتي تجيب 30 الف ماعندي غيرها هل اقدر اجيب فيها للغه قبول ولالا ؟؟ مع المصاريف والسكن وكل ابو شي
بعد اذنكم بكتب اسئله وجاوبوني عليه حتى الاسئله الي فوق لا تنسونها بليزز
السؤال الاول : ايش افضل ولاية في امريكا والمدينة .. مع مراعاه الاسعار تكون متوسطه واقل من المتوسط رخيصه وتكون نفس الشي حلوة وجوها حلو والسكان يكونون كويسيين ؟
السؤال الثاني : ايش افضل معهد في هالولايه الي تقول عنها كويسه واهلها طيبيين وكم سعرها؟؟ ( تراني مره سئي بالانجليزي ) وبسبب الانجليزي ماتوظفت
السؤال الثالث : كم اسعار العائلة الامريكية .. ويكونون ناطقين باللغة الانجليزية .. مع وجبتين اساسيتين .. وسمعت انو في عوائل شينين .. يقولون لي الشباب لاتاخذ من المكتب لان ممكن يكونون شينين ؟ طيب والحل وش اسوي ؟؟
السؤال الرابع : كيف اتنقل من المعهد للبيت ؟؟ هل باص او قطار او كيف بيكون وكم اسعاره ؟
السؤال الخامس : بحدود كم تكون ميزانيتي للصرف الشخصي .. ( تراني انا من النوع الي متوسط الصرف مو مررره )
السؤال السادس : الكتب الدراسية هل انا اشتريها او هم يعطوني اياها ؟ وكم اسعارها
السؤال السابع : الانترانت متوفر في العائلة الامريكية او لا ؟ وكم سعره اذا مو موجود .. والشريحه الاتصال بكم سعرها
السؤال الثامن : المعهد الي تقول عنه كويس السعوديين فيه كثار او بالاصح العرب ؟؟ يعني سمعت انو في معاهد تكون جودتها قويه وكويسه بحيث انها متقبل اكثر من 3 طلاب يتكلمون نفس اللغة سوا عربي او اي لغة ثانيه عشان تضمن انو الدراسه باللغه الانجليزية تكون كويسة ولها جوده عالية
السؤال التاسع : انا ميزانيتي كلها 30 الف ريال ماعندي غيرها هل هذي كافيه انها تطلعني لمده 3 شهور ثم بعدين احول على حساب البعثه او لا ؟؟ لان بصراحه ماقدر ازيد هالمبلغ بسبب الظروف الي اعيشها
السؤال العاشر : انا اتصلت على مكتب وكلمته بخصوص هالموضوع وقالي انو في ولاية اسمها اريزونا ( معهد اريزونا ) يقول انها كويسة واسعاره المعهد لمدة 3 شهور مكثفه مع سكن عائلة امريكية ووجبيتين اساسية بحدود ال20 الف ريال ولما بحثت بالنت ييقولون انها الولايه هذي ماهي زينه وانها صحراوية وكثيرين السعودييين ؟؟
هل هالكلام صح ؟
السؤال الحادي عشر : انا تخصصي علوم الاغذية وتغذية الانسان ابغى ماستر بتخصص تغذية علاجية .. او تغذية سريرية , وش الجامعات الي تدرس هالتخصص ماستر ؟ وهل في القبول مشروط او غير مشروط
السؤال الثاني عشر : ابغى قبول للمعهد كيف يكون .. كذلك قريت بالنت من الاخوان ان ماتنضم للبعثه الا اذا عندك قبول من جامعة للتخصصك .. يعني انا ابغى قبول من معهد وقبول للجامعة بتخصصي تغذية علاجية او تغذية سريرية .. وكذلك سمعت انو في شروط لبعض الجامعات عند القبول ومن ضمنها التوفل؟ انا ابغى بدون شروط لتخصصي هل في جامعة تقبل هالتخصص غير مشروط
بصراحه فيني طموووح وابغى اتعلم اللغة الانجليزية بطلاقه .. الله يسعدكم دلوني على افضل معهد وافضل ولاية ومدينة .. من جميع النواحي ( الدراسية والسياحه والاختلاط بالناس ) والاهم انها تكفي ميزانيتي الي هي 30 الف .. شامله المعهد والدراسة والسكن وكل شي
لاتبخلون علي بأي ابداء رائي و اي معلومة تفيدني .. إول مره اخرج برى السعودية ,, كل شي يفيدني ..
في انتظاركم .. الله يعطيكم الف عافية ويسعدكم يارب ,
أخوك / أحمد
اهلين اخوي نسخت ردي لك الي رديته للرجال الي بعدك بس عموما اذا ميزانيتك 30 الف فقط راح تجمل معاك 4 شهور بس بعد الاربع شهور ايش بتسوي ؟؟؟؟
ترا الالحاق بالبعثه سار يتأخر فانا انصحك اذا ما عندك 50 وحصلت معهد ومدينة رخيصه جدا ﻻ تجي وتخسر نفسك ع الفاضي واذا تبي مدينة رخيصه اتعب في المنتدى وابحث وراح تطلع بنتيجة ادخل قسم الولايات الشمالية والولايات الجنوبية وابحث الين تحصل الشي الي يناسبك وهذا ردي لهم
1- اول خطوة تعدلو اساميكم بالشهادات حسب اسماكيم بالجواز وتترجم شهادة الثانوي اذا كانت ماهي مترجمه والافضل تمر وزارة التربيه والتعليم تستفسر منهم اذا يترجمون وﻻ تترجم برا وهم يصدقونها وتصورلك عشر نسخ وﻻ حسب ما تبي وتصدقها طبق الاصل والجواز ايضا صوره عشر نسخ بيفيدك كثير
2- اذا كان عندك بكالريوس تشوف الجامعات الي تدرس امتداد تخصصك بموقع وزارة التعليم العالي وتبحث عن كل جامعة وعن المدينة الي فيها الجامعة نفسها
3-اذا في بالك مدينة محددة نبحث عنها وعن المعاهد الي فيها وانا انصحك بمعهد جامعة يكون افضل وتشوفي المعهد من قائمة العاهد الموصى بها في امريكا واخر تحديث لها كان 2013/ سبتمبر وركز ﻻنه في النت في اكثر من قائمة ﻻكن انت اذا فتحت القائمة الي مرتبه شوي بتحصلي التحديث فوق
4- تتشاور انت والمدام طال عمرك ع المدينة الي استقريتو عليها وتشوفون ايجابياتها وسلبياتها واذا قررتو تبدا تراسل المعهد والجامعة وتسوي شهادة بنيكة من البنك وسوها كذا نسخه بعد اذا حاط في بالك انك بتراسل اكثر من معهد ﻻن بعضهم يكتفي بالايميل وبعضهم يطلب منك ترسل له اوراقك
5- اذا وصلك قبول معهد اللفة تقدر تقدم ع السفاره والافضل انك تجيب قبول معهد وجامعة وتقدم ع السفاره
6- بعد المقابلة روح سوي الكشف الطبي للدارس ع الحساب الخاص تفتح موقع وزارة التعليم العابي وبتحصل النموذج في فتح ملف دارس ع الحساب الخاص تطبعه وتروح لمستشفى حكومي الضاهر وتحلل
7- اذا صدرت الفيزا واخدذت نتيجة الكشف الطبي تغتح ملف دارس ع الحساب الخاص
8- يومييا تابع موقع وزارة التعليم العالي بينزلون اعلان تسجيل في ملقتى اعداد الدارسين ع الحساب الخاص سجل فيه واحضره
اذا صدرت الفيزا تقدر تحجز تذكرة وما تقدر تدخل امريكا قبل الدراسه باكثر من شهر
واذا اخترت مدينة وما حصلت معلومات عنها او مواضيع ادخل النادي السعودي لكل مدينة ع الفيس بوك
واتمنى شرحي واضح وبالتوفيق وﻻ تنسانا من دعواتك
وﻻ تنسى بعد المدينة الي تقرر عليها تحسب حساب السكن والمصاريف والمعهد لفترة 10 شهور عني انا مسوي كذا لانه طلبات الالحاق سارت تتاخر فاحسب حسابك لمدة 8 او 10 شهور
والشهادة البنكية ﻻزم اسمك يكون فيها مثل الجواز خذ الجواز معك وسوها ع نفس اسمك
( تمت المشاركة باستخدام تطبيق مبتعث )
بندر بن عبدالعزيز February 27th, 2014, 10:50 AM
LinkBack URL
About LinkBacks
اهلين ﻻ ما اتوقع انه موضوعك صعب .. انا زميلي هنا زوجته مبتعثه وهو مرافق وزوجته دارسه بكالريوس لغة عربية والان تدرس ماستر اجتماعيات تقريبا وراح استفسر منه واردلك الخبر الاكيد وانا متاكد انها تدرس اجتماعيات
بالتوفيق يارب
( تمت المشاركة باستخدام تطبيق مبتعث )