لو كنت مكاني ..!

قصة حزينة فعلا، وكان الله في عونك وكل من هو في وضعك

المهم اختي في حل سهل وان شاء الله يناسبك، بالنسبة للضمان المالي اقترح عليك ان الوالد - الله يحفظه - يقدم على قرض من بنك التسليف واتوقع يعطونه 45.000 خمسة واربعين الف ريال، والموضوع ما ياخذ وقت وطويل، اسبوع بالكثير والمبلغ عندك، والقسط جدا بسيط ممكن تسديده من مكافئة البعثة لانك الالتحاق غالبا بعد اربعة اشهر اذا كنت في امريكا.

هذا حل وفي حلول اخرى، لكن في نظري اذا تم لك هذا فهو افضل وانفع لك باذن الله!

اخي الكريم
خطر ببالي هالحل من زمان و لكن مقدرة الوالد الماديه ما تسمح انه يطلع قرض , هو لو تيسر الموضوع بيساعدني كل شهر بمبلغ امشي فيه حالي الين انضم للبعثه اكثر من كذا قرض و مدري ايش مو باستطاعته ,و كمان انا سمعت انه الشهاده البنكيه لازم تطلع على مبلغ و قدره يعني فوق 100 الف ريال , يعني 45 الف ما تنفع اتوقع ف إذا تكرمت قول كل الحلول الي في بالك اكون لك من الشاكرين .

لا مين قال انه مو لازم 100 الف ؟
حتى لو 45 الف ينفع يعني بالبداية شوفي لك احد يدينكم هالمبلغ بس حواله لحد ماتطلعين الشهاده البنكيه
وبعدها ترجعونه له ولحد يحبطك ويحسسك ان البعثه يبغى لها 50 او 60 الف ترا كلهم يبالغون بالمبالغ لانهم يبغون يعيشون الرفاهيه ومايقتصدون على نفسهم
وانتي كمان حاولي تروحين لدول مافيها طلاب سعوديين كثير مثل تركيا ايطاليا اليابان كوريا الصين وان شاء الله بتتدبر امورك ولا تخلين مجال للاحباط والشيطان يلعب براسك
بالبداية اجلسي مع نفسك وطمنيها ان الحياة حلوه بس تحتاج جهاد وصبر مافي شي يجي بالساهل
ثانيا اختاري دولة مناسبة لك وشوفي اسعار المعاهد فيها واسعار السكن مع العائلة او بالجامعه
سمعت ان في معاهد تجارية بامريكا الشهر 500 دولار او شي كذا
وكمان مدام صار لك 3 سنين اكيد استلمتي حافز لو تجمعين منه يطلع مبلغ كويس
وشوفي لك شغلانه لو تسوين بحوث والله مجالات الرزق بالتجاره كثيره لكن احنا يجي الاحباط بسرعه
طيب اللحين انتي لو قدرتي توفرين الشهاده البنكيه حتطلعين بعدين كيف ؟ يعني اقلها بالبداية لازم يكون معاك 20 او 25 الف حق السكن والمعهد وان شاء الله بعدها ربي يفرجها عليك
ادعي بقلب صادق ومؤمن ان ربي حيغير ظروفك للاحسن ادعي وانتي واثقه مو وانتي حزينه وخلاص فاقده الامل
وربي يفتحها علي وعليك وعلى جميع المسلمين

عزيزتي حسايف
حافز نزل بس سنه وحده يعني 24 الف 12 الف راحت لدورة حاسب كنت متامله انه مطلوبه طلع نظام التوظيف وسايط في وسايط و و الفين نثريات على نفسي و باقي الحين معاي 10 الاف ماسكه عليهم انا اقدراضغط على اهلي يدبرون لي 10 فوقها يتسلفوها و انا اردها بعدين , يعني كذا متوفر معاي 20 الف مبدئيا اتوقع تكفي حتى لو شهرين و بعدها اشوف حل ثاني من هناك , و زي ما قلت قبل كذا احنا في منطقه صغيره نظام البحوث و الاشياء هذه ما تكسب كل عائلة عندها انترنت و طابعه موفره هذا الشيء ,كل همي اوفر ذي الشهاده و ارتاح و على فكره انا ما سمعت من احد يبي يحبطني انه المبلغ كبير , انا اتصلت بنفسي على مكتب في الرياض كان من ضمن طلباته عشان يجيب لي القبول انه اوفر له الشهاده و السجل الاكاديمي و صوره من جواز السفر و شهاده بنكيه لحساب بمبلغ لا يقل عن 100 الف انصدمت بصراحه ساعتها من وين اجيب له مبلغ زي كذا الا عاد لو سرقت بنك >> براااااااااا
الله كريم يا صحبتي بس الظاهر مافي حل 3 سنين راحوا هدر و الباقي شكلوا مهدور ما منه امل .
جزاك الله كل خير على ردك الجميل , .
شكري يعانق السماء .

كان الله في عونك ويسر الله امرك
ولكن صدقيني يختي الابتعاث على الحساب الخاص كلف جدا يعني يبي لك اقل شي 50 الف الان جاهزه لان الانضمام الان يمكن يوصل 5 شهور والمصاريف في امريكا كثيره يعني احسبي على كل شهر بتجلسينه 10 الاف ريال

طيب ليش مكتب ؟؟؟ ترا كثير هما يجيبون قبولاتهم بنفسهم مايحتاج مكتب وغالبا المكاتب تصرف منك فلوس + طلباتهم كثيره
لو جلستي اسبوع كامل تتصفحين المواضيع بالمنتدى وتختارين الافضل وتدونين بنوته كيف التقديم والطلبات والمشاكل صدقيني انتي راح تتعاملين مع المعهد بنفسك
ترا مايحتاج لغة قوية والله يخلي مترجم قوقل كمان حتى لو في كلام صعب في ناس كثير حتساعدك بتويتر او بمنتديات الانجليزي
انتي الان رتبي نفسك .. اختاري دولة معينه وزي ماقلت لك مو شرط امريكا عندك نيوزلاندا مثلا او شرق اسيا سنغافوره ماليزيا اكيد حتلاقين معاهد رخيصه
بعد ماتختارين الدولة وتستخرين الله فيها وتشوفين وضعها الاقتصادي غاليه رخيصه نسبة الامان فيها بعدها تروحين تبحثين عن المعاهد والجامعات تشوفين ايش اللي اسعارها مناسبة مع السكن
بعدين تبداين تقرين بكيفية مراسلة المعهد والانترنت مثل ماقلت لك مليان مواضيع كيف تراسلين المعهد وتعبين الابلكيشين بس انتي ابحثي اكثر وكل شوي ذكري نفسك وشجعيها مافي شي يجي بالساهل ولاتسمعين كلام المحبطين ياما ناس كانت ظروفهم المادية مو مره تمام وطلعو وربي رزقهم بالبعثه واتيسرت امورهم
بعد ماتختارين المعهد ابداي بالمراسلة ولو ماعرفتي كيف نزلي موضوع هنا ماشاء الله كثير حيساعدونك
لاتقولين هدر ومافي امل ومدري ايش هالكلمات لو انتي جاده وتبغين تحسنين وضعك وماتكونين عاله على احد انسيها وامحيها من قاموسك
وانصحك هذي الفتره تتابعين برامج تششجعك وتغير من نفسسيتك مثل برنامج صلاح الراشد - قانون الجذب تلاقيه باليوتيوب
والله يسهلك امورك من حيث لاتحتسبين

ام سمر
انا عارفه مقدار صعوبة الامرغربه و هم و تقصير فلوس لكن شيء من جوايا يقول لي انت قويه و تقدري تتخطي كل المصاعب لا يوقف طموحك و تصيرين فاشله
3 سنين و انا ادور على حلول و كل ما القى حل يتطور الامر لامر اصعب و حل شبه مستحيل , و انا ما كتبت هنا الا و لما خلاص وقفت كل العراقيل بوجهي ما عاد القى حل
فمهما كان الامر صعب بحاول فيه للاخر حتى لو ظليت الباقي من عمري احاول اسمه عايشه لهدف .
جزاك الله كل خير على النصيحه القيمه ,,
دام لك الود .

انا دلوني على هالمكتب قالوا يجيب لك قبول معهد و جامعه و يجهز كل اوراقك و مدري ايش
المهم كلامك على عيني و راسي بس برضوا الشهاده البنكيه مهمة للفيزا و القبول و مدري ايش يعني يوقف عليها ورق
انا و ربي من كلامك احس اني ما اعرف شيء و لا عندي اي معلومات
و انا بحاول كثير اجرب الخطوات الي كتبتيها لي حتى لو جلست سنه كمان مب مشكله المهم اخطوا خطوه للامام
جل احترامي لشخصك الكريم .

شوفي الله يرضى عليك
ابشرح لك اكثر
بالنسبة لقرض بنك التسليف ما فيه كلافة ولا وتعقيد، انت اطلبي من الوالد - الله يحفظه- يقدم لك على القرض، او اي احد من اعمامك او اخوالك وتقدرين، و بالاضافة ان معاك عشرة الف ريال يكون الملبلغ كافي جدا جدا، وبتلتحقين بالبعثة والمبلغ ما خلص.
و في بنك التسليف يبدا السداد بعد 60 يوم من نزول القرض، يعني لو جهزت امورك وسافرت وخططت بدري يمديك تدرسين شهرين بدون ما تشلين هم الاقساط، هذا من ناحية،
ارخص معهد معتمد في امريكا معهد BIR في شيكاغو، معهد سئ جدا ولكن يمشي الحال الى حتى الالتحاق، يكلفك المعهد شهريا 400 دولار، ويطلبون ضمان مالي 12 الف ريال تقريبا.
ثم معهد سولكس، ايضا في شيكاغو وشهريا يختلف حسب المدة، ويطلبون ضمان مالك تقريبا 15 الف ريال.
فاذأ انت تقولين ان معاك عشرة الف وتقدرين تتسلفين عشرة بيصيرو عشرين، والمبلغ كافي لمصاريف المعهد والسكن، انا كنت ساكن في فندق "كارلتون" الشهر بـ 700 دولار، ثم نقلت لسكن الشهر بـ 400 دولار، ولو انه مشترك (( يعني الحمام، والمطبخ مشترك في كل قسم ولكن نظيف جدا وفيه عمال نظافة من الجنسين لكل قسم خاص)) لكن ارتحت فيه جدا، السكن ملك للسفارة السعودية، ومؤجر لامريكي مسلم، وفيه قسم للنساء و وقسم للرجال، وقسم للعوائل، وفيه داخله جامع، ومنطقة امنة جدا جدا، وتحسين انك ساكنة بين اهلك من زود ازعاج جيرانك المسلمين، في منهم عرب وغير عرب، بس كلهم مسلمين. وبتسانسين هناك وتتطور لغتك مع المخالطة وبتشكريني على النصيحة. هذا من ناحية.
اما القبول الجامعي، في مكتب اسمه الخطوة الذكية، اتصلي عليه واستفسري منه، وان شاء الله يساعدك، لان في من زملائي من يشكر فيه كثير، وانا اتصلت عليه والتمست منه الصدق.
سبق لي التعامل مع مكتب مستقبلي وما انصحك ابدا، واحذرك، يوجع القلب ويتاخر
ايضا مكتب اسمه اي تونتي غالي ويماطل كثير
ايضا مكتب في الرياض نسيت اسمه لهط من خوي 3000 ريال من سنة، وحتى الان لا قبول ولا رد المبلغ.


بالمناسبة
انت ايش تخصصك
وايش ناوية تكملين
اختي الفاضلة... ما اشوف في موضوع اي داعي للقلق، انت معاك عشرة وبتزدين عليها عشرة، وهذا كافي وعلي الضمان، اهم شي الفشخرة والمظاهر الخداعة اكثر ما تدمر الطلاب سواء المبتعث او الدراس على حسابه الخاص.
في ناحية ثانية... المواصلات في شيكاغو ممتازة.. تشترين بطاقة بـ 100 دولار لمدة شهر، تركبين الباصات والقطارات في اي وقت وباي عدد، والى اي مكان في شيكاغو، تتمشين وتستنشقين من هواها العليل باقل التكاليف.