تجمع طلاب و طالبات تخصص نظم المعلومات الإدارية - المرحلة العاشرة ( 10 )

غريبة مدينة وجامعة جالوي حصلت كثير يمدحونها .. لكن طالما أنت عشت فيها فترة أكيد كلامك من واقع بيكون
ودبلن فيها غلاء مبالغ شوي قريت .. بس هل فعلاً دبلن أفضل.؟ وإلا لهالدرجة جالوي مافيها شي .. مع إنه ما أخفيك ماشلت هم هالموضوع كثير المهم تكون مدينة جيدة وماراح تطلع أسوأ من شرق الرياض هههههه

بخصوص جامعة DePaul أخذت لي كذا لفه بموقعهم ماحصلت دسكربشن واضح لمدة الدراسة وكم مطلوب للتوفل .. اللهم حاطين المواد وعدد الساعات وماني عارف كيف حسبتهم
هذي صفحة كورس الماستر لتخصصنا .. على فضوتك وإذا وقتك يسمح أخوي إبراهيم تصفحها ممكن خبرتك بالبحث تكون أفضل مني وتفيدني مشكوراً
MS in Business Information Technology

ووش الجامعة اللي نويت عليها بإذن الله.؟
الله يوفقنا وإياك يارب

اذا كنت تبي مدينة دراسية بحت جالوي هي المكان الأنسب, بايرلندا عمومًا الطبيعة شيء جميل والحدائق والمنتزهات خيالية, بالذات اذا قارنتها بالرياض هههههههه
بس أقصد كنشاطات ونمط حياة يومي, دبلن أفضل حتى اني كنت أشوف الطلاب بكل ويكند يجون من جالوي لدبلن.. مشكلة دبلن غلاء الشقق يعني تحتاج روميت عشان توفر شوي. او انك تسكن بمدينة مينوث القريبة من دبلن ولو ان مافيها الا جامعة مينوث, ولاقريت عنها شي الصراحة..
الا اذا كنت تشوف ان الحياة الهادية تناسبك فجالوي حلوه ومايعيبها الا هالشيء
عمومًا ايرلندا كلها جميلة طبيعة وشعب ودود وقريبة, اذا عندك أي استفسار عنها أنا حاضر باللي أقدر عليه

أما بخصوص جامعة ديبول, انا مثلك ماشفت شي محدد بس مكتوب ان الماستر حق تخصصنا 52 ساعة, لو قسمتها على أربع أترام تقدر تخلصها بسنة, يعني سنة ونص بالكثير لو طولت بالك.

أنا ان شاء الله ناوي سياتل, قدمت على المعهد وجبت قبولين حمدلله, بس الجامعة باقي محتار بين سياتل بيسيفك أو غيرها
حاط ببالي كم جامعة بس بفترة اللغة اللي يحدد هو راحتي بالمعيشة في سياتل, ان شاء الله أكمل فيها

آميين الله يوفقك ويوفقنا جميعًا ويسهل خطوات الوزارة الباقي ويستعجلون قبل ننجلط

مرحبا
يا خوان الي متحمسين لسياتل الديره ديره مطر جوها ماتطلع فيه الشمس من المطر يسمونها the rainy city انتبهو من ذا النقطه اعرف وحده نقلت منها عشان كذا
وهذا بعد البحث والتحري
انا الحين متوهفه مدري وش اروح ابي مدينه جوها زي كالفورنيا وميب غاليه يعني وسط وميب كئيبه والوضع امان

ايوه صح مدينة مطر، بس يميزها الأمان والشعب الودود والقرب من فكتوريا وفانكوفر، والمواصلات العامة اللي تعتبر من الأفضل في الولايات الغربية
اذا تبين ولايات مب غالية وآمنه شوفي عن بنسلفينيا وابحثي عن مدينة قريبة للمدن الكبيرة بحيث انك تجمعين بين الغلاء المعقول والقرب للمدن اللي فيها حياة

جالوي أشوها كمدينة وجامعة ممتازة ومناسبة جداً لي وفق المعايير اللي أنا حاطها ، ولا يمنع الذهاب لدبلن وقت تغيير الجو ، وإذا طرأ ببالي شي بخصوص ايرلندا ماراح تقصر الله يعافيك

بخصوص ديبول سمعتها كمدينة (شيكاغو) وكمجامعة كويسة جداً ومتشددين بالدراسة وهذا شي أفضله ، أفكر جدياً أراسلهم علشان أتأكد بخصوص درجة اللغة المطلوبة ومدة الدراسة ، ومدري يوفرون لي هالمعلومات بدون مايطلبون الضمان المالي حاليا وإلا لازم يتوافر من البداية بالمراسلات. واللي أعرفه أمريكا أقل من أوربا يطلبون باللغة ، مثلا ايرلندا 6 ، واللي ناوي يجيبها هنا ويطلع مباشرة ماراح تكون سهلة خصوصاً لغتي متوسطة تحتاج شغل ، يمكن ديبول تطلب أقل ويكون ماستر سنة وهذي تفرق معي ، هذا مقصدي

وأنت ماشاء الله عليك ، واصل تخطيطك الله يوفقك يارب ، ورايي من رايك إنه تستقل بالمدينة وتدرس فيها لغة وتقدر تشوف الجامعات هناك بنفسك وممكن تغير المدينة كلها إذا ماارتحت لها وإن شاء الله ترتاح فيها

وتفضل هذي هدية بسيطة قبل تروح سياتل

جالوي مدينة ممتازة انا ابدًا ما اقول ان فيها عيب، واذا هذي معاييرك بترتاح فيها جدًا 😍

شيكاغو مشكلتها الغلاء، صح ان الجامعة حلوه بس يعني تخلي ببالك ان المدينة غالية نوعًا ما، وبالنسبة لللغة اللي أنا اعرف عكسك، اوربا شرط اللغة اسهل من امريكا، ايرلندا من 6 الى 6 ونص انت مقبول، اما امريكا بالغالب 7 وفوق، اتذكر هذا كلامهم ايام الملتقى حق الجامعات بالرياض بس لاتاخذ بكلامي تفضل هذا كرت احد اللي قابلتهم من منسوبي الجامعة تقدر تراسلها مباشرة:



هههههههههه شكرًا على المظلة يقولون اني بحتاجها كل الوقت
حاضر بأي شي اقدر عليه وموفق ان شاء الله بكل ماتخطط له 🙏

لمن يتحدث عن سياتل .. ( كنت فيها لمدة سنتين تقريباً ) .. صحيح انها تمطر في كثيرمن الأحيان .. بس عندك الصيف شهرين إلى ٣ اشهر تقريباً كلها شمس ... وحتى بالشتاء ماهو ٢٤ ساعه مطر!! يعني يجيك اسبوع مطر واسبوع لا .. هذي الحياة هنا وفي الكثير من المدن ..
ان حصلت لكم فرصة تروحون لسياتل .. صدقوني راح تنبسطون فيها ..ما سبق أعتبره ميزه وليس عيب !!!
لي فيها معارف كثير في الجامعات والمعاهد .. للي محتاج شيء ولاش ..

أنا عن نفسي مقتنع تمامًا بكلامك انها الأفضل وان هالأشياء مميزات لسياتل
ماتقصر الله يعافيك لو احتجت شي بجي اسألك علطول ونستفيد من خبرتك

ملاحظاتك باخذها بعين الاعتبار ياصديقي بخصوص درجة الاختبار المطلوبة وغلاء المدينة ، والأيام القريبة الجاية بحط الكثير من النقاط لأموري بإذن الله
وألف ألف شكر على الكرت راح يفيدني بحول الله .. ساعدتني وجاب الله لك أخونا يوفي يساعدك إن احتجت شي
والله يوفقكم يارب وتتسهل كل أمورنا والله يقدرنا نخدم بعض باللي نقدر عليه ياحلوين

السلام عليكم

ممكن احد يطلع لي على هذا الرابط ويقول لي متى بداية الدراسه بالنسبه لمعهد الجامعه
تخصصي نظم معلومات اداريه ماستر
ومعدلي مرتفع ولله الحمد
ايش شروط القبول بهذه الجامعه ؟

FIU - University Graduate School

شاكره لكم