التجارب مع مراكز مطابقة الوثائق - [ المرحلة العاشرة ]

أنصح أنكم تجون قبل الموعد .. انا موعدي الساعه 6 رحت لهم الساعه 5 ما رضوا أوقف في الصف لاني قبل موعدي .. بس عطوني ورقة اعبيها وطلبوا مني ارتب الأوراق حسب الترتيب اللي في الورقه .. قالوا اذا ناقصك شء صوري بس اذا مسكتي الصف و قالوا تبغى صورة بترجعين البداية... أنا مسكت الصف حق الاستقبال الساعه 5 ونص. .ونص ماخلصت من كل شء إلا الساعة 7 ..بس الموضوع مرتب. . وإذا تبغون تسألون اسألوا الموظفات اللي بعد الاستقبال لأنهم من الوزارة... فيه وحدة بالاستقبال ترتب الصف كمان اسألوها...ترى موظفة الاستقبال ماسالتني عن أوراق المحرم مع أنه مطلوب الجواز انا قلت لها تحطه بالملف. .

الحمدلله الذي بحمده تتم الصالحات

و خلصنا التطبيق و لله الحمد .
الامور جدا سهالات
النظام ماشاء الله كويس تنظيمهم ممتاز مافيه حوسه
اول ماتدخلون بيطلبون منكم ورقة الموعد مصيحه وفروها من الحين طريقتها تفتحون موقع وزارة التعليم العالي ثم المرحله العاشره ثم متابعة طلبات ثم تدخلون اسم الطلب و الباسورد و كلك يمين ثم طباعه .

بعد كذا :
تعطيكم استماره على حسب المرحله الي انتي فيها و تعبينها يدويا فقط معلوماتك الشخصيه الجدول ماتعلمون فيه شي ، ثم اخر شي اسمك و توقيعك، و ترتبين الاوراق على نفس المطلوب بالاستماره اصل و صوره كان المطلوب لمرحلة الماجستير ( هويتك او بطاقة العايله / جواز السفر و لازم صورتك تكون موجوده في النسخه / شهادتك / سجلك الاكاديمي / ورقة الموافقه ) فقط

بعد كذا تجلسون بكراسي بالترتيب كل ماقامت وحده تجلسين بعدها لين توصلين للموظفات .
بيعطونك ملف فيه بركود عليه اسمك و فيه الاوراق المطلوبه .


بعد كذا :
تدخلين القاعه جوا فيه مطابقه ١ اذا خلصتي منها طبعا تشيك الاوراق و تشوف الاصول و كذا و تسال عن جواز المحرم و صوره منه و سالت عن الهويه قلت ماعندي الا صوره منها قالت مايحتاج خلاص و رحت للي بعدها مطابقه ٢ قسم الماجستير و طابقت و شيكت من جديد و قلت لها خلاص اموري تمام قالت ايه ❤️

و الحمدلله تساهييل .

ماشاء الله عليهم الأخوان والأخوات ماقصروا عرضوا الخطوات بالتفصيل
تماماً مثل ما قالوا الخطوات سلسة وسهله ان شاء الله

بس فيه نقطة بسيطة وأعطوها أهمية كبيييييرة بالتدقيق بالنسبة للشباب
لازم انك تكون لابس الزي السعودي الرسمي
البس ثوب (ولو بدون شماغ) قبل تروح لهم، أما انك تكون لابس بدلة الدوام أو جينز كله ممنوع

اليوم طلعت لهم من الدوام وقال لي الموظف لازم تلبس ثوب، اضطريت اني أرجع البيت ألبس وأجيهم
عمومًا بالتوفيق للجميع بس حبيت أنبّه لهالنقطة عشان ماترجعون

الحمد لله تمت المطابقة اليوم والأمور كانت مرتبة وسلسة والأخوات هناك فعلا ماقصروا من ناحية التنظيم وسرعة الإجراءات

ما راح أزيد تفاصيل لان اللي قبلي ماقصروا .. بس اول شي لاحظته انهم كانوا فعلا مرنين بالنسبة للمواعيد .. أنا كان موعدي 8 بس طلعت من دوامي ووصلت عندهم 5:30 وبعد ما لاحظوا انه اللي مواعيدهم متأخرة جايين بدري بينما اللي قبلهم ما وصلوا فقرروا يمشون البنات وعن نفسي خلصت وطلعت 6:15 تقريبا .. يعني اذا وصلتي بدري راح تخلصين بدري حتى لو كان قبل موعدك ..

ومثل ما ذكروا اللي قبلي لا تشيلون هم الطباعة والتصوير لأنهم مجهزين كل شي وأي شي نسيتوه تقدرون تطبعونه أو تسوون منه نسخ ..

النقطة الاخيرة اللي حابة أنبه عليها اي شي متعلق بالمحرم مو اجباري .. يعني الأخوات اللي خايفين تسقط أسمائهم من الترشيح بسبب هوية المحرم او جوازه هالشي بإذن الله مارح يصير لانه التدقيق عبارة عن التأكد من تحقيقك لشروط المرحلة العاشرة وعدم وجود اي نوع من انواع التزوير في الشهادات أو إثبات الهوية .. وكون الشخص حقق هالاشياء فإسقاط ترشيحه بسبب هوية محرم او صك وكالة غير منطقي .. شفت قدامي بنات ماعندهم إلا شهاداتهم واثبات الهوية والجواز الخاص فيهم فقط وسألوهم عن أوراق المحرم والبنات ذكروا انهم راح يوفرونها في وقت ثاني لظروف والأمور مشت بكل سهولة .. هم صح انهم يسألون عن أوراق المحرم من وكالة وهوية وجواز ولكن فقط من باب تسهيل الإجراءات ..وإذا اي موظفة طالبت فيها فاستمارة البيانات اللي بيدك هي الفاصل
بالتالي لو كانت أوراق المحرم متوفرة معاك خير وبركة و لو ماهي معاك ممكن توفرينها قبل إصدار القرار.. لآني شفت كذا وحدة هنا مرشحة و تفكر تسحب على التدقيق بسبة هالاشياء و الموضوع فعلا بسيط وما يستدعي كل هالتوتر.

ولو رحتوا ودققتوا راح تكتشفون هالشي بأنفسكم .. وكلوا أمركم لله وما راح يصير إلا كل خير


وبالتوفيق للجميع يارب

الحمدلله رحتلهم المغرب ماقعدت ولا ١٠ دقايق يشكرون على المجهود

امس كان موعدي 7 ووصلت 6:20 ودخلت على طول ماكان فيه أي زحمة , أول ماوصلت عطوني نموذج اعبيه واول ماخلصته عطيته الموظف الأول وكمل اجراءات المطابقة.


في الحالة الوظيفية تركتها فاضية ويوم جيت عنده قلت له انا موظف لازم أعبي الخانة هذي قال لي انت موظف وين ؟ قلت له بشركة سابك .. قال خلاص راح يلغى طلبك ( قالها مازحاً طبعاً) وقال لي لا مايحتاج اتركها فاضية.


بعدها دخلت على المطابقة الثانية واخذت رقم ولاجلست على طول طلع رقمي بالشاشة ورحت للموظف الثاني وكمل اجراءات المطابقة , سئلته عن الملتقيات قال لي أتوقع بعد 3 اسابيع يعني ببداية شهر ديسمبر , وبعدها رحت للموظف الأخير واكمل الاجراءات بكل يسر وسهولة. يعني باختصار موعدي الساعة 7 ووصلت الساعة 6:20 وطلعت الساعة 6:45

يوم خلصت سئلت أحد المسئولين عن امكانية تغيير مدينة الملتقى , لأني باكون متواجد خارج المملكة بالاسبوع الاخير من ديسمبر وخايف انه يصادف الملتقى بالرياض . فقال لي ممكن تغير بس يبغالك تمر مقر الوزارة وتتأكد منهم

أنا جيت٦وماطلعت الأ الساعه٩ونص أتنقل من كرسي لكرسي لحد ماطابقت

طابقت اليوم، خلصت خلال ١٥ دقيقة، او اقل.
طبعا ما كان معي بطاقة احوال، لكن معي ورقة من الأحوال المدنية تقول: انه هذا الانسان طالب بطاقة بدل فاقد، مشوها لي.
قلت لهن انا موظف بقطاع حكومي، عقد لمدة سنه، وش وضعي، قال ما عليك، لا تفصل الا بعد إصدار قرار الابتعاث !!!!!! عجيبين كل يوم فكره

الحمدلله تمت المطابقه المكان جميل وهادي والتعامل ولا اروع موعدي الساعه ٧ وجيتهم ٦وخلصت ٦.٣٠ والاوراق المطلوبه نفس ماذكرو الاخوان سابقا مع ملاحظة: الصور للوثيقه والسجل الاكاديمي مو لازم تكون مختومه طبق الاصل صوره عاديه سألتهم عن الملتقى قالو ماندري يمكن شهر او اكثر وكمان سألتهم عن القبول الجامعي قالو مالنا دخل وسلامتكم ربي يوفقنا جميع يارب وييسر امرنا

مساء الخير جميعاً ... موفقين يارب..


الحمد لله خلصت موعدي .. الوضع منظم ومرتب جداً.. ماخذ مني ١٥ د.. والاوراق نفس المطلوب.. لكن حبيت أنوه للوكالة؛ ماسألوا عنها مع ان المرافق اخوي وليس الوالد..

لكن عندي استفسار للي طابقوا وخلصوا ! هل اخذوا منكم استمارة طلب الابتعاث ؟! لانهم رجعوا استمارتي !! او نسيووهاا مادري.. لكن ضيق صدري الموضوع اخاف يأثر على القرار لاحقاً ....