صور من الطائف..بعدستي..

نبغى القصة..هذا من ضمن برنامج الترويج ..<< الله يستر ما يكون العكس بس..
أنا كنت أحسب إن القرود في الطريق بس..
و مرة بالشفا عجبتنا منطقة خطيرة ..ما أدري كيف أوصفها ..جبل منحدر البنات ما يقدروا ينزلوا منه ..و نزلوا الشباب و قعدنا إحنا فوق نصور ..سمعت البنات يصيحوا ..قرود.. قرود ..على بالي بعيد شوي ..و أنا أقولهم استنوا شوية بأصور..و ما ألاقي إلا الكل شردوا و أنا لوحدي و القرود صاروا قريبين ..ما شفتني وقتها ..كنت حأرمي الكاميرا ..كانت أول مرة أواجه القرود لوحدي ..

شكرا أسامة عالمرور و بانتظار القصة..

و الله ما أدري ..بس هي في البلد نفسها ..يعني في الطائف نفسها..
"مبتعث بإذن الله" يعطيك العافية عالمرور و التعليق..

الماجد
mobsahi
يعطيكم العافية عالمرور..

طيب يا طويلة العمر القصة و ما فيها اننا كنا ساكنين بفندق الشيراتون مدري انتر المهم اللي فوووووووووووق الجبل فووووووق بالهدا اعلى فندق بالعالم .....

و كان وقت العصر قلنا يلا نسبح و الله و شويه و ماخذين جو جا المصري حق المسبح قال يلا يا قماعة لو سمحتوا انتهى الوئت !

قلناله : تستهبل ؟

قال لا يافندم بس دي الوئتي وئت الاقانب ؟!؟!؟

و عارفة مين الاجانب يا حسرة ؟؟ ثلاث ارباعهم لبنانيين من اللي نشوفهم معانا و اثنين ثلاثة خواجات ... سياحة على مستوى يطرد السعودي عشين الاجنبي يتونس !

الموهيم قلنا مو مشكلة و قررنا نطلع استراحة بالشفا ... و طلعنا بالليل نشوي و قاعدين نصور بعض و شوية مع الضحك و الا التفت جمبي احصل عقرب !!

و عقرب ماخذ هرمونات نمو بعدين مو عقرب عادي يعنيXXL

المهم بعدين و بعد مشوار طويل عدنا الى الفندق و طلبت موية بالغرفة طلعت ب24 ريال !! >>> و الله لو بشرب بسويسرا

المهم اليوم اللي بعده كنا مخططين نطلع حديقة الحيوان يقولوا انها على مستوى عالمي >>> ايه هين

و كل واحد يتشيك و نلبس شورتات و قميص هاواي و لازم تحط شوية جل على الشعر و لا تقول سياح من فنزويلا

و نروح الحديقة و بس دخلنا حصلنا ما في الا واحد سوداني قاعد يدهن سندويتشات كرفت جمب القرد و قالنا : داير الحديغة من هنا ...

و نمشي طبعا الحديقة كأنها مقبرة امنا حوا

بس شفنا برحة كبيرة فيها فيلة ... اول ما شافنا الفيل كأنه يوووووووووووووووه من زمااااااان ما شاف ناس و يبغى يتونس معانا صحوبي

و الله و يقترب الفيل مني مدري لي احسه كان يقولي انقذني من اللي انا فيه

و شويه يمد خرطومه يبغى اكل المسكين باين عليه 7 سنوات ما اكلوه شي !

و بس افك علبتين بيبسي و افضيها بخرطومه على علبتين سبرايت على عصير الربيع >>> شويه و يصير مكينة عصيرات

و الله و خلاص حسيته يبغى يطير باذانيه من الفرحة و يبغى يحب على راسي ... بس مسكين ما شبع ... المهم لمن باقي الفيلة شافت هالمنظر تلمت علينا >>> و لا تقول مجاعة افريقيا

و خلصنا علب البيبسي كلها بخراطيمهم ... و فكينا علب برينقلز كاملة و فضينها بخراطيمهم ... و شوية برشومي برضو ... و اخويا الصغير الابله قاعد يكب شطه بخراطيمهم >>> حسيت عيونهم حمرا

المهم بعد ما خلصنا منهم الفيل ما يبغانا نمشي >>> مسكت معاه يقهوينا

هههه لا بس يعني شكر و امتنان لنا اننا فكينا ازمته ... يقولوا الفيل اوفى من الكلب ...



الموهيم انتقلنا من قفص لقفص ما في شي او حيوانات ميتة .. بعدين رحنا لقفص كلب ابيض بقيناه ماكل اخوه من الجوع ... يعني الكلب الثاني ميت و في دم على رقبته !

شويه لقينا ثور قاعد يبكي

و شويه خروف بثلاث رجول !!

و حالة الحيوانات تقول الرحمة يا عالم

و بس جاتني حالة اكتئاب لأني بصراحة حساس و قاعد افكر بالحيوانات طول الطريق

و بس رجعنا الفندق


مرة قاعدين اخواني يأذوا القرد ويسوا له حركات و الشباك كان مفتوح مافي الا شويه نقز القرد جوه السيارة و قاعد يقطع الكنب و ما تسمع غير الصراخ

على فكرة كنا مستأجرين جمس و فصلنا العداد حقه عشين لا يحسب علينا كثير >>> حركات سعوديين

عقرب!!!
لا أجل بلاش سياحة.. العمر مش بعزءة<< على قول المصريين
للقرد؟
طيب كويس..ولو يعمل له تشكيلة يكون أحسن..يوم كرفت يوم جبنة فرنسي ..مو كل يوم موزموز

شكرا أسامة على نقل الصورة..صراحة أنا ما قد رحت الحديقة..
تقول حالة الحيوانات تجيب الاكتئاب..
فين الكتاب والإعلام عن حقوق الحيوان..بدل ما هم شاغلين نفسهم في قضايا فاضية..
و يا ليت المسؤولين يهتموا شوية..
بس مو لدرجة يأكلوهم برنجلز..إحنا الآدميين ما نحصله إلا في المناسبات << من الممنوعات

شكرا أسامة على القصة ..ترويج سياحي ما حصلش