تجمع المتقدمين على الخطوط الجوية السعودية وبعثتك 12

طبعًا بداية التقديم للاسف كنت ادور اي احد من الدفعة الماضيه هنا في المنتدى ما لقيت احد والكل انشغل بنفسه والله يوفقهم،، ما عدا شخص واحد الله يجزاه خير دخل معانا قروب ع الواتس

لذلك حبيت اكتب هالرد للفايدة لطلاب الدفعة القادمة عشان يكون عندهم تصور واضح للتقديم واليته والمفاضلة،، وان شاء الله راح احاول اكون موجود وقت التقديم

اول شيء احب اوضح اني مقدم على مرحلة دبلوم بعد البكالوريس.

اللي صار هو كالتالي:

1- فتح التقديم على الابتعاث 14 ديسمبر 2016 واستمر اتوقع الى ثلاث اسابيع. بعد كذا كان فيه اسبوع لمراجعة الطلبات وبعد كذا ظهرت نتايج المفاضلة الاولية وتم التحويل المقبولين للجهات الوظيفية لاجراء المفاضلة الخاصة بها.
2- المفاضلة تختلف من جهة لجهة، الخطوط السعودي كانت المفاضلة على اربع مراحل:
أ) اختبار الانجليزي: تم اتاحة حجز موعد الاختبار عن طريق موقع سفير من تاريخ 17 ابريل 2017، واختبرت الانجليزي يوم 23 ابريل. الاختبار كان موزع على ثلاث مناطق (جدة، الرياض، الدمام).
الاختبار بشكل عام كان بسيط جدًا جدًا جدًا،، يقيس من المستوى المبتدئ الى اقل من المتوسط (pre-intermediate) ، كان فيه اسئلة قرامر، واسئلة عن الوقت ومعاني كلمات. بس بشكل عام مثل ما قلت الاختبار كان بسيييط جدًا.
ب) اختبار القدرات: تم ارسال رسايل على الايميل بمواعيد اختبار القدرات ولم يتم الحجز من موقع سفير (يعني حالتنا في سفير لا زالت على حجز موعد اختبار الانجليزي وكان مكتوب حجز موعد المقابلة بس الحقيقة هو كان حجز لموعد الانجليزي)، كان الاختبار بتاريخ 7 مايو 2017. ونفس الشيء كان في جدة والدمام والرياض. الاختبار بشكل عام انا ما شفت انه قدرات الا جزء بسيط منه، اسئلة يجيب لك مجموعة اشكل ويسالك ايش الشكل المختلف او مجموعة اشكال وبعدين يسالك ايش الشكل التالي وزي كدا، وكان فيه اسئلة عن الخطوط السعودية. يعني انا شفت انه اختبار معلومات عامه صراحه مو قدرات. لكن الحمدلله عدّى ع خير وكان بسيط.
ج) المقابلة الشخصية: موعد المقابلة ايضًا تم ارسال مواعيده لنا ع الايميل ولم يتم الاختيار من موقع سفير وحالتنا لا زالت نفسها في موقع سفير حجز موعد المقابلة. تم عمل المقابلة يوم 14 مايو 2017 يعني بعد اسبوع من اختبار القدرات. المقابلة كانت خفيفة جدًا، كان فيه لجنتين كل لجنه فيها كابتن وموظف من الموارد البشرية. الاسئلة بالعربي وكانت (عرف عن نفسك، ليش غيرت تخصصك الى الطيران، ايش تعرف عن الطيران) بس. اخذت المقابلة تقريبًا 5 دقايق او اقل.
د) الفحص الطبي: وهو كان اخر مراحل المفاضلة وتم ارسال المواعيد بالايميل، كان موعد فحصي الطبي يوم 6 يونيو 2017 في الميديكال في جدة، طبعًا الفحص الطبي كان في جدة والرياض فقط. ونصيحتي للجميع يختار يسوي الفحص في جدة، لان الرياض يسوو الفحص هناك بعدين يرسلوه لجدة وجدة يرسلو الرد للرياض، يعني مشوار طويييل. ف الافضل تسويه في جدة. طبعًا فحصنا كان للطيارين الصيانه ماعرف كيف كان فحصهم، الفحص اول شيء دخلنا عند دكتور الاسنان يسوي فحص الاسنان، بعد كذا دخلنا عند دكتور النفسية يدردش معاك شويا خليك طبيعي وهادي ولا تتوتر وبيسألك اسئلة غريبه عادي جاوبه. وبعد كذا كان قسم التحاليل، التحليل عبارة عن دم وبول (اكرمكم الله) وبعدين دخلنا قسم تخطيط القلب اللي كان فيه تخطيط قلب واختبار النظر واختبار السمع واختبار عمى الالوان. واخر شيء اشعة للصدر. اللي احب انبه عليه واكثر سؤال كان يتكرر، النظارات ما تأثر ع فحصك المهم انك تكون تشوف بالنظارات 6/6. وبعد ما خلصنا جينا اليوم الثاني وندخل بالدور عند الدكتوره وتسويلك فحص سريري بسيط وبعدها تاخذ نتيجتك ع طول. هذا الشيء الكويس كان في جده، ان النتيجة تستلمها اليوم الثاني ع طول وتعرف انتا اجتزت الفحص او لا، بعكس الرياض معلقين ينتظروا الرد من جده.
3- هنا انتهت مراحل المفاضلة للخطوط وبدأت فترة الانتظار الممله اللي هي انتظار فتح حجز الملتقيات، طبعًا وقتها كان ملتقى الرياض انتهى ف كنا ننتظر ملتقى جدة او الدمام. واخيرًا تم فتح حجز الملتقيات لنا وحجزت موعد الملتقى يوم 25 و 26 اكتوبر 2017. يعني تقريبًا 4 شهور بين الفحص والملتقى.
4- بعد نهاية الملتقى باسبوع تقريبًا فتحت الخدمات الالكترونية، طبعًا انت كمقدم على الخطوط السعودية ما راح تستفيد من الخدمات الالكترونية في البداية، لان الخطوط هي اللي راح تجيب لك القبولات. تم ارسال اسماءنا الى ممثلي الخطوط السعودية في امريكا، تم تقسيمنا الى قسمين (الكل دبلوم طيران وبكالوريس طيران ودبلوم صيانه) طلاب في شرق امريكا ومسؤول عنهم الاستاذ نزار مهلهل، وطلاب غرب امريكا مسؤول عنهم الاستاذ حسين الاهدل.
5- الان جا موعد انتظار i-20. والحمدلله يوم 4 يناير تم استلام الاي توني حقي وبداية دراستي راح تكون يوم 19 فبراير في اكاديمية ايروسيم.
6- اللي احب انوه عليه ان الطلاب اللي ما يحتاجو لغه (خريجي امريكا واللي لغتهم كويسه) تم ارسالهم الى اكاديمية ايروسيم وعمل انترفيو بسيط عن طريق سكايب مع مسؤولة القبول هناك وبعدها ع طول تم اصدار i-20.
7- وشيء اخير، بخصوص البنات، تم اتاحة التقديم لهم لدراسة دبلوم طيران لخريجات البكالوريس، وكان على اساس لهم 20 مقعد ويدرسوا طيران ويكونوا طيارات، بس مدري ايش صار والخطوط غيرت رايها وحولتهم الى دبلومات واتوقع اللي معدلاتهم عاليه حولوهم ماجستير.
8- وبالنسبة للتقديم على دبلوم بعد البكالوريس (اولاد وبنات) لازم يكونوا خريجي كلية الهندسة او كلية الحاسبات او كلية العلوم.

وبالتوفيق للجميع والمعذره ع الاطالة

بسم الله نبدأ
التخصص :صيانه هياكل ومحركات الطائره
الدوله الوحيده امريكا

كنت علوم طيران ولم اجتاز الفحص الطبي ( الطول ) وحولوني عمليات مطارات وحتى الآن لم يتم تحويلي حيث ظهر بعد الملتقى علوم طيران . فهل أحد حدثت له مثل هذه المشكلة أو يعرف حلها