تجمع المقبولين لدرجة الدكتوراة الابتعاث المباشر.

أقصى مدة للاجازة الاستثنائية بدون راتب ستة أشهر فقط..وحتى لو أخذت إجازة هل الوزارة بتصدر لي قرار ابتعاث والملحقية بتفتح لي ملف طالب وانا مسجل كموظف بالتأمينات؟؟؟؟

حاولت والله لكن ماش منهم....
أصلا الكلام عند الرئيس التنفيذي ونائب الموارد البشرية..والدخول عليهم صعب جدا جدا جدا..

والايميلات لاتجد إجابة عليها...

يبغالك ياغالي تحدد الهدف من دراستك للدكتوراه وبناء عليه تقدر تقرر
لأن بصراحة وبصدق الوظائف شحيحة جدا في الوضع الراهن
وانت متزوج وعندك عيال
لازم القرار يكون مدروس قبل اتخاذه

وبالتوفيق

وجهة نظري انها راح تكون مغامره كبيره جدًا لو تخليت عن وظيفتك خصوصًا ان معاك عايله،، بسبب بسيط ان خبرتك غير تخصصك نهائيًا

ولو وفقك الله وبعد ما رجعت توظفت راح تكون بين حالتين، يا انك بترجع تشتغل نفس شغلتك بسبب الخبره اللي معاك، او انه راح يكون صعب عليك تلقى وظيفه بتخصصك بسبب انك overqualified

ف نصيحتي لك والقرار الاخير لك انك تفكر اكثر في الموضوع ويمكن انك تستمر بوظيفتك خيار منطقي اكثر

،،،

طبعًا الا في حالة انك قدرت تقنع شركتك انك تكمل الدراسة وترجع معاهم بأي طريقة

وبالتوفيق لك

اللي عندة وظيفة انصحة يتمسك فيها لان الخبرة اهم من الشهادة خصوصا في سوق العمل عندنا في السعودية.
انا ماجستير ادارة اعمال من امريكا بتقدير ممتاز وعندي خبرة قبل الماجستير سبع سنوات ايضا في ادارة الاعمال ولي الان ثلاث سنوات ما لقيت عمل
نصيحتي لك خلك في عملك خصوصا ان شهادتك غير مجال خبرتك و هذا راح يتعبك لما ترجع تبحث عن عمل

انا راح اقدم على كندا اش اسم الجامعه اللي راح تقدم عليها و هل تطلب جيمات

السلام عليكم ورحمة الله محدثكم من بلد الابتعاث وكله من فضل الله سبحانه .. حبيته اشاركم بعض الملاحظات المهمه من اصدار قرار الابتعاث حتى وصول دولة الابتعاث وفتح الملف الى ان تصبح جاهز للدراسة فقط اريد دعواتكم عسى الله ينفع بنا لما فيه خير ،، هذا المكان اعطانا الكثير وأفادنا فمن باب رد الجميل وجب علي فعل هذا .. بسم الله :

اولاً احضرت قبول معهد اكاديمي لغه في جانيوري 16 بمأني مبتعث دكتوراة ولغه انهيت اجراءات الفيزه في اسبوع ثم وبعد الاستخاره تقدمت بالاستقاله قبل اصدار القرار بشهر من وظيفه حكوميه خدمت فيها 10 سنوات أو اكثر كله من اجل الدراسة والوصول الى سقف الطموح ! والبحث عن الافضل وهذا كان خياري بناءاً على ظروفي الخاصه ولكل شخص ظروف وحسبته الخاصة ، عدلت الى متسبب وتوكلت على الله واصدرت القرار، هل تم التشيك في الخدمه المدنية لا اعلم ولم اسأل عن ذلك .. طلبت اصدار القرار حسب ما شرحوا الاخوان هنا في مبتعث جزاهم الله خير،وفي نفس اليوم رفض بحجة توقيع تعهد بأنك مسار مباشر وليس منتهي بالتوظيف ارفقت الاستماره بنفس اليوم وتم قبول الطلب في نهاية اليوم وتم اصدار القرار"الاستمار موجوده في غوغل فقط اكتب استمارة تعهد بعدم المطالبه بالتوظيف " وهذي خيره لنا في هذا المسار سأتكلم عنها لاحقاً.
ثانياً طلبت اصدار تذاكر ليس عن طريق البوابه ولكن بمراسلة مكتب الطيران حيث تم الرد بأنه يتوجب علي اصدار امر الاركاب وشرح لي الطريقه سهله وبسيطه اخذت يومين فقط
كالتالي
هي خيارين اما تصدر عن طريق الخدمات الالكترونيه
لم استخدمها ،او تراسل الطيار وهو بيشرح لك الطريقه على هالايميل
mohe.students@altayyargroup.com

حدد ايامك وتوكل على الله يرسلون لك حجز مبدئي اذا اعتمدته يحجزون ويرسلون التذاكر ايميل ،، لم تستغرق يومين لاني بدون مرافقين ..
ثالثاً زبطنا العفش مسموح لك شنطتين كبيره شحن وحده بيدك في الطايره والخطوط السعوديه ماركزت معي متساهلين النقطه الصعبه كانت في ان رحلتي كانت من مطار محلي الى مطار الرياض وبعدها رحلتي الى واشنطن من مطار الديره رفضوا شحن العفش الى واشنطن دايركت كان يتوجب استلامه وتشيكه مره اخرى من مطار الرياض لان الاجراءت تختلف في الرحلات الى امريكا عموما نزلت فصاله 5 الجديده فمطار الملك خالد وخذلك تسحيب شناط وانتظار الباص اللي يوديك للصاله 2 الدوليه ،الفرق بين الرحلتين كان ساعتين ونص ويادوب كفت وصلت وشيكت الشنط واخذت البوردنق.. الزبده الى مراح يطير من الرياض او اي مطار دولي مباشره يحسب حساب هالنقطه .. وللعلم اصبح مسموح حمل الابتوب معك للطايره بس يشيكون شغال اولا...

ثالثاً مدري رابعاً المهم
وصلت امريكا للامانه مش اول مره اجي امريكا بس كانت اجراءات الدخول في مطار دي سي اسهل من انك تطلب من استار بوكس ههه بفضل الله حتى النموذج اللي تعبيه في الطايره شيك عليه ورجعه قال خلاص تفضل ..

اننتهينا من فصل وبدينا في المهم الشغل مع الملحقيه

وصلت وريحت كان ويكند بعدين بديت يالدخول الى سفير فتح ملف طالب في امريكا
ماهو بشرط يكون معك رقم امريكي او حساب في بنك لان فتح الملف يتم بادخال رقم البطاقه بعدها تجيك رسالة التاكيد على ايميلك المسجل في سفير التقديم وتكمل اجراءاتك بتعبية البيانات اول باول وارفاق المطلوب بكل سهوله وترفع الطلب يوم الى يومين ونص يجيك القبول على الايميل برقم الطالب في الملحقيه
تروح لسفير وتسوي دخول لاول مره وتتبع الخطوات السهله وبكذا ينفتح ملفك وتقدر تضيف رقم الحساب والجوال وتعدل اي شي من البيانات ..
بعدها بيرحب فيك مشرفك الدراسي على الايميل ثم بيجيك ايقاف صرف هههه حتى ترفع مباشرتك من المعهد او الجامعه اللي هي ورقة الانرولمنت ترفعها بعد ماتجي معهدك وبيروح عن الايقاف المحدد بيوم معين.. وكلها لاتتطلب انك تتعب وتجي الملحقيه ..

النقطه المهمه جداً احتفضوا بايصال اصدار الفيزا والسفس لكي يتم ارفاقها وطلب تعويض مالي عن طريق بوابتك في سفير بعد فتح الملف ،الملحقيه تعوضك وهذا من فضل ربي علينا له الحمد والمنه ثم فضل دولتنا وحكامنا .. هذي هي القصه بختصار..

ارجع للابتعاث المباشر هو زي ايام الملك عبدالله رحمه الله مرن وبامكانك تخليص اي اجراء بسرعه على عكس من هو مرتبط مع جهه لان اي تعديل بسيط كان اوكبير يتوجب مخاطبة جهتك وخذلك وقت وانتظار على عكسنا نحن وهذا شاهدته بنفسي في بعض الزملاء هنا المرتبطين بجهة توظيف .. وفي النهاية لاندري ماهي الخيره !

كل التوفيق لكم اخواني واخر ما اقوله الفرص لاتتكرر والعذر على الاطاله !


دعواتكم

ربي يوفقك بصراحه مبسوطه لك وعقبالنا يارب
انا فعلا اتفق مع كلامك مليون بالمية
والحمدلله الاسبوع الي راح استقلت وطلعت من التامينات
واليوم قدمت على قرار الابتعاث يارب تتسهل لاني على اعصابي ابغى افرح بالقرار واطمئن

السلام عليكم
اخوي العزيز ابي اتواصل معكم ضروري , عن طريق الجوال او الايميل لاني ما قدرت اتواصل معم هنا .
bifon2009@gmail.com

هذا ايميلي

يا جماعة الخير كيف اقدر اطلب ضمان مالي عام غير محدد الدولة او الجامعة

كل ما اسوي طلب ضمان مالي لمن يهمه الامر واختار لغة ودرجة علمية تفتح ضرورة اختيار جهة التعليم ( مع العلم كل جهات التعليم الموجودة في الخيار في امريكا وانا ابغى اغير الدولة )

ولما اطلب ضمان مالي موجه لمن يهمه الامر لدرجة علمية فقط جاني الرفض بحجة يجب ارفاق شاهدة الايلس او اللغة

ارسلت اكثر من 4 استفسارات بخصوص هذه المشكلة وللاسف كل مرة يعطوني اجابة غير كافية وغير مجدية

فياليت اللي قدر يصدر ضمان مالي للغة والدرجة العلمية لمن يهمه الامر ( غيرر محدد الدولة ولا جهة التعليم ) يفدني الله يرضى عليه