الورقة الوردية من السفارة الامريكية .

انت وحظك مالهم وقت محدد فيه ناس اخذوها بعد اسبوعين وناس شهر وناس شهرين....وناس4 شهور مالك الا الصبر والدعاء

طبعا مالها وقت محدد لكن إن شاء الله إن وضعك بسيط لأن انا قدمت عالفيزا قريب وكانت مشكلتي كبيرة نوعا ما لأني عملت مخالفة في نظام الهجرة و قعدت في امريكا فوق المدة القانونية وحصلي موال طويل. الشاهد إنهم وضعوا طلب الفيزا الجديدة تحت الإجراءات الإدارية لكن الحمد لله بعد ثلاث أسابيع أتصلوا بي وطلبوا من الجواز و أصدروه لي. فأمرك بسيط إن شاء الله، الغرض هو فقط مراجعة ملفاتك مع ادارة الهجرة الأمريكية، لو كل شي سليم إن شاء الله بيردوا عليك قريب.

ايش صار معاك اخوي هل اصدرت لك الفيزا ولا لا

السلام عليكم ورحمة الله وبركاته
هذه أول مشاركة لي بهذا الملتقى الجميل

أخواني ... أود طرح ما في جعبتي
وهل أعتبرها مشكلة أم أنه إجراء روتيني

تم ترشيحي من قبل عملي لدراسة اللغة الإنجليزية لأمريكا وأنهيت جميع الإجراءات من قبول المعهد I20 ولعائلتي F2 والضمان المالي ودفعت مبلغ التأشيرة وإيصالاتها معي وأخذت موعد المقابلة للقنصلية الأمريكية بجدة .
وحضرت الموعد بالسفارة
وكنت واثقاً بأني سأتحصل على الفيزا وكانت إجاباتي محددة على حسب السؤال بالإضافة إلى زوجتي وأبنائي .
ولكن تفاجأت بأنهم أعطوني الورقة الوردية ومطلوب فيها مزيد من الإجراءات الإدارية والتي ممكن أن تستمر ل ٦ شهور ولم يأخذوا جوازي ولا حتى جوازات عائلتي .
وسألت الموظفة التي أجرت لي المقابلة هل هذا يعني مشكلة .. فقالت لا لا مشكلة وإنما لتزويدنا بالمعلومات أكثر .. سنرسل لك إيميل بالمعلومات المطلوبة وبعدها نتصل عليك لإرسال الجوازات .
ولكن ربما سيأخذ وقت ربما شهر أو شهرين
كانت المقابلة يوم الخميس ١١ يناير ٢٠١٨
وصار لي أسبوع كامل وأنا وأدخل لموقع السفارة بجدة وأدخل رقم التعريف تبعي لطلبي ويطلع ١٧ يناير ٢٠١٨

تخضع حالة التأشيرة حالياً للمعالجة الإدارية اللازمة ، وقد تستغرق عملية المعالجة هذه عدة أسابيع ، إذا كانت هناك حاجه لمزيد من المعلومات سيتم الإتصال بك ، وإذا تمت الموافقه على طلب التأشيرة الخاصة بك فإنه سيتم معالجتها في غضون يومي عمل .

أرجو من الأخوان الذين مرت عليهم التجربة أن يفيدوني .
مع شكري وتقديري لكم

انا صار معي نفس ما صار معاكم في قنصليه جدة ..... انتظرت حوالي شهرين بعد ما ارسلت لهم كل اللي طالبينه من معلومات زيادة ارسلوها لي ع الايميل استمارة اخذت مني يومين عشان اعبيها وارسلتها مره ثانيه بس ما اخذوا جوازاتي .......اللي حصل اني بعد شهرين من التواصل معهم دون جدوى .... سويت موعد جديد في الرياض ودفعت رسوم جديدة عبيت فورمات DS جديده وكل شي جديد كاني مقدم اول مره ..... ورحت الرياض الموعد مع اولادي وسوينا المقابله اخذوا الجوازات مني المره هذي وقال يجيك فورم ع الايميل تعبيه .... الصراحه انا غسلت يدي وخرجت ع وزارة التعليم وغيرت دوله الابتعاث .... طبعا رديت ع الايميل حق السفارة بنفس الاستمارة اللي عبيتها في جدة وجوازاتي عندهم .... بعد اسبوعين جاني رسالة ع الجوال انه اصدرت الفيزا ... والحمدلله ع كل حال . الرسالة اللي بوصلها ان الشغله مزااااج حسب القنصل اللي سوا لك المقابله بغى يمشك تمشي ما بغى ما راح تمشي ... والشباب اللي معاهم جوازاتهم افضل لهم يقدموا في الظهران او الرياض لان اغلب المشاكل هذي من جدة وتحديدا من حرمه شعرها قصير .
هذي تجربتي وتحياتي

انا نفس الحكاية لكن بطلع فيزا سياحية. و الحرمة شعرها قصير رجهتلي جوازي مع الورقة الوردية! و سفري بعد شهرين و 3 اسابيع. ما الحل هل اقدم مرة اخرى في الرياض? او مدينة اخرى او استنى شوية كمان.

^^^

دام إن شعرها قصير!
ستخلص بوقت قصير!! ههههه
====

إستنى وفي ذلك الأمر خير.

شكرا اخوي
بس المشكله انو يقولون مايمدي تقدم من جديد الا بعد ماتعدي 6شهور او سنه من المقابله صحيح هالكلام او لا

يا اخي الكريم ... انا قدمت في الرياض بعد شهرين من تقديمي بجدة ومشي الحال ... وترا الامور سهالات .... اهم شي تعبي كل شي جديد وتسدد رسوم جديده وحتى الصور غيرها والمعلومات والايميلات وكل شي ... وترا مافيه ربط او مركزيه بالمعلومات عندهم يعني بالعامي اللي في الرياض ما يدري عن اللي بجدة واللي بجدة ما يدري عن اللي بالظهران .... وانت حر . وانا اقول تعطيهم فرصه شهرين او ثلاثة افضل ... بس دام عطوك جوازك ترا مالهم نيه يشتغلون . اللي يبي يشتغل ياخذ جوازك منك حتى لو فيه نقص يقولك كمله بالايميل او اوراق ناقصه ترسلها لهم ... لكن اللي ما يبغى يشتغل يرد لك جوازك ويتحجج باي عذر ... انا قالوا لي في الرياض اجراءات اداريه كمان مثل جدة لكن اخذ الجوازات وقالي رد ع الايميل اللي يجيك باسرع وقت وبالفعل خرجت من السفارة وانا في المواقف جا الايميل ورديت عليه اسبوعين وصدرت الفيزا.