ابو نواس والانتقام!!

قصة ابو نواس المحتال

ابو نواس هذا كان شاب يتيم الاب ويعيش لوحده مع امه بس مشكلته انه دلخ (سامحني يا ابو نواس)..
في يوم من الايام امه قالت له روح يا ولدي خذ الثور حقنا وبعه في السوق..
قال طيب مثل ما تامرين..
الرجال خذ الثور وهو في طريقه للسوق لقى ثلاث رجال طابين فيه:
هلا والله يا ابو نواس اخبارك؟ ان شاء الله طيب؟ والوالده بخير ان شاء الله؟
قال الحمد لله طيبين.. قالوا له:
ما شاء الله على هالثور وش رايك تعطينا الثور ترى حنا من خوالك ومحتاجين الثور..
قال تم, وعطاهم الثور
رجع البيت وقال لامه السالفه وامه عرفت انهم نصابين بس سكتت وما قالت شي..
من بكره عطته امه الناقه حقتهم وقالت له نفس الشي..
وهو في الطريق حصل نفس الشي اللي حصل بالامس..
رجع للبيت وخبر امه السالفه ولكن هذه المره قالت:
يا ولدي هذولي نصابين نصبوا عليك وانت على نياتك...
حينها شعر ابو نواس بالمذله.... وقرر ان ينتقم منهم.... ويا له من انتقام...
في الصباح التالي راح ابو نواس يشتغل في مزرعه لهم يحفر ويسقي.. بس وش كان يحفر ويزرع ويسقي؟
رووس, ارجول , عيون , عظام ووو للحيوانات الداجنه.. البقر, الغنم, الابل, الماعز..
المهم مر الثلاثه من جنب المزرعه وشافوه.. قالوا:وش ذا الخبل (المجنون) يسوي؟؟
يا ابو نواس! وش قاعد تسوي مجنون انت؟
قال ابو نواس: مجنون هاه, طيب انتظروا بس لبكره عشان تشوفون الخير اذا نبت.. المهم راحوا وتركوه..
وفي الليل وتحت الظلام الدامس.. ادخل ابو نواس مجموعه كبيره من تلك الحيوانات التي زرع اعضائها لداخل المزرعه..
ومن الغد المحتالين رأوا ابو نواس وهو يقود المواشي والانعام واستغربوا
يا ابونواس من وين هالحلال والخير كله ؟؟ قال: ما قلت لكم امس؟؟؟
قالوا: وش رايك تبيعنا المزرعه؟ قال تم ومشت عليهم
زرعوا وحصدوا ولكن ما حولك احد..
قالوا الرجال نصب علينا لازم نؤدبه..
طبعا ابو نواس عارف انهم راح يجون عشان كذا قال لامه: اي شي اقولك قولي لا.. وراح ربط (المرئ) حق الذبيحه حول رقبة والدته وملأه دم
الرجال جاوا للبيت واول ما ابونواس فتح الباب مسكوه وقالوا انت اليوم منتهي يعني منتهي..
قال يا شباب صلوا على النبي وخلونا ندخل نتقهوى.... المهم وافقوا يدخلون..
قال ابو نواس لامه سوي لنا قهوه قالت لا قال سوي قهوه والا ذبحتك قالت لا قام راح واخذ السكين والثلاثه قاعدين وقطع المرئ.. طبعا طلع دم وامه سوت نفسها ماتت..
قالوا: المجنون ذبح امه.. قال لا تخافون بتحيا الحين.. وقام نادى الهر حقه بعباره غريبه لا تحضرني الآن.. الهر لحس الدم وامه فزت على طول..
قالوا: يا ابو نواس كيف؟ وشلون؟ وش رايك تبيعنا الهر؟ قال ابو نواس: والله.. قالوا يا رجال قل تم بس قال تم..
وراح كل واحد وذبح زوجته ويا هر ويا مدري وشو.. ما حولك احد...
راحوا لابو نواس ومسكوه وحطوه في قفص ويبون يرمونه في البحر وقالوا نهايتك حلت..
يوم هموا يرمونه قال واحد منهم: وش رايكم نروح نتغدى ونرتاح ونرميه بعدين وين بيروح؟؟ المهم راحوا..
وبينما ابو نواس في القفص مر عليه رجل بدوي معه غنم وابو نواس قاعد ياكل تمر قال البدوي: وش قاعد تاكل في هالقفص؟؟ قال ابو نواس: تمر (رجيز) تجرب؟
البدوي قال يا ليت واعطاه ابو نواس والبدوي مره اعجبه التمر قال ابو نواس: وش رايك اعطيك التمر كله؟ طبعا البدوي وافق.. قال ابو نواس :بس تفتح لي القفص.. قال تم
البدوي فتح القفص وابو نواس بحركه سريعه خرج و البدوي دخل يبي يشيل التمر.. حبسه ابو نواس في القفص وطبعا اخذ الغنم والحلال كله..
الشباب جاوا ورموا القفص ولا هم عارفين اللي فيه.. وهم راجعين من شافوا؟؟؟
طبعا ابو نواس ومعه الحلال.. قالوا: يا ابو نواس كيف وشلون؟؟!!! تونا رميناك!!!!! وهالحلال؟؟؟
قال:ههههههههه, شفتوا يوم رميتينوا في البحر حصلت حلال وخير وطلعت باللي تشوفونه..
قالوا: اكيد يا ابو نواس هالكلام؟؟ قال: ما انتوا مصدقين شوفوا بنفسكم..
قالوا اكيد بنشوف بنفسنا ياللا مشينا..
وياللا, ابو نواس يقول: من يبي الخير والحلال؟؟ يقول: انا, ويرميه في البحر..
وهكذا دواليك لين قضى عليهم كلهم...
اتمنى ان القصه اعجبتكم..
تقبلوا تحياتي............