المشاركة الأصلية كتبت بواسطة رحال سعودي
السلام عليكم و رحمة الله و بركاته
صباح الخير للي عنده صباح و مساء الخير للي عنده مسا
تحية طيبة للجميع
أشكر إخواني و أخواتي المبتعثين و المبتعثات في مدينة جونسبورو و بالتحديد لجامعة ARKANSAS STATE UNIVERSITY و على رأسهم الأخ عزوز إللي _ الله يجزاه خير _ كان فاتحة خير لشباب المدينة هذه بالموضوع الأكثر من رائع و صمت الرمال و بندر الحربي و الروقي و . . . غيرهم كثير وش أذكر وش أخلي سؤالي لكم الله يطول بأعماركم و ينكم ماعاد سمعنا لكم لا حس ولا ونس عسى خير إن شاء الله طمنونا عنكم ترا مو بالضرورة يكون تواجدكم بالموضوع فقط للإجابة على إستفسارات الشباب هنا . أيضاً للتواصل فيما بيننا لخدمة بعضنا البعض و نحقق الإستفادة للجميع و نستانس و نتشرف بمعرفة الوجيه الطيبه هنا
أنا طالب إبتعاث لنفس الجامعة و المدينة طبعاً . درجة بكالوريوس تخصص CIT إختصاراً لـ Computer & Information Tech على حسابي الخاص عن طريق مكتب مراسلة و الحقيقه باشرت بإجراءات الطلب و أرسلت أوراقي لهم من تاريخ 2010/5/4 م و عرض علي المكتب مواعيد بداية دراسة معهد اللغة في شهر 5 و 8 و 10 ميلادي و طلبت 10 عشان يكون عندي متسع من الوقت أرتب أموري من بدري و صدر لي قبول مبدئي منهم حسب كلام موظف المكتب و أنا حالياً بإنتظار و صول الأوراق (القبول و الـ I20) عشان أباشر بتحديد موعدي مع السفاره و أرتب حجوزات الطيران و آخر إتصال لي مع المكتب اليوم قالي الموظف إنه خاطبهم و ردوا عليه إنهم رفعوا أوراقي للخارجية و في طريقها لي إن شاء الله بس يمكن يصير عليها تأخير شوي بسبب إنهم الآن عندهم إختبارات و من ذا القبيل
عندي مجموعة إستفسارات إللي يقدر يفيدني بها أكون له من الشاكرين :
1/ في البداية بالنسبة للتخصص أنا طلبت أول شي بكالوريوس قانون و التخصص موجود في الجامعة و معتمد من وزارة التعليم العالي و لكن موظف المكتب قالي إنه من غير الممكن إنه توافق عليه الجامعة لأسباب منها لازم تكون أمريكي الأصل أو من معه جنسية أمريكية أو إنك بعد ماتخلص ترم اللغة تطلب تحويل التخصص من الجامعة و هم يشوفون كيف راح يتصرفون معاك فالي أبغى أوصله هل الكلام ذا صحيح و إذا كان صحيح هل زي ماقال الموظف أقدر أحول تخصص بعد ترم اللغة ؟ 2/ التخصص إللي طلبته كيفه يعني وش وضعه أنا حسب ماسمعت من الموظف إنه جديد بس له مستقبل و الجامعات إللي تدرسه نادر في أمريكا بإختصار أقدر لو واصلت دراسة البكالوريوس أقدر منها أواصل على الماجستير ولا لأ ؟ و هل هو مرغوب في التوظيف ولا لأ ؟ 3/ بالنسبه لموعد السفاره لسه الجامعة ماأرسلت لي الـ I20 و طلبت من الموظف إنه يرسلونه له لو بالإيميل عشان أرسله للسفاره و أحدد موعد بأسرع وقت فهل ترون إنه لسه مازال عندي متسع من الوقت ولا أحاول أستعجل الأمور بأسرع وقت ممكن كذلك حجوزات الطيران ؟ 4/ أمر الإركاب كيف أستخرجه ؟ و لمين أروح ؟ و بعد أي خطوة أسويها ؟ (يعني أضبط حجوزات الطيران أول ثم أروح أستخرجه ولا العكس أستخرجه أول ثم أضبط حجوزاتي) ؟ 5/ بالنسبه لمن هم نفس حالتي و طالعين على حسابهم الخاص كم أشيل مبلغ نقدي معاي أول ما أسافر (10000 ريال) تكفي ولا لأ ؟ و إللي نصحونا ببطاقة فيزا الأهلي هي أنواع كثيره و كل وحده لها مميزاتها إيش إللي تنصحونا بها منهم كلهم ؟ و بإيش تنصحونا قبل لا أسافر أحول الدراهم إللي معي نقدي دولار من هنا ولا عادي لا وصلت هناك أحولها ؟
أدري كثر و طولت عليكم بالأسئله و آسف عل الإزعاج و لكن أتمنى أحد يجاوب على أسئلتي
و مشكورين الله لا يحرمنا منكم جميع يارب
# نقطه أخيره حابب أنبه لها # إللي طالع معاي في نفس الموعد بشهر 10 ميلادي أرجو و أتمنى ولا هو غصب ولكن للتكاتف و التعاون سوياً مع بعض في الغربه التنسيق معي مسبقاً على الخاص للذهاب سوياً و أنا أقولها من الآن أنا طالع من جده بمشيئة الله و إللي حابب يخاويني الله يحييه خط السير ما حددته إلى الآن . . و شكراً
مرحبا عزيزي
اسفين ع التاخير في الرد بس تعرف عندنا ضغط اخر الكورس :S
بحاول اجاوبك باللي اقدر عليه :
- بالنسبة لتخصص القانون: فاول مرة اسمع ان في امريكا تخصص بس لحاملي الجنسية الامريكية! اتوقع ان كلام المكتب مبالغ فيه ع العموم هذا رابط بالتخصصات الموجودة في الجامعة والشروط اللي يطلبونها :
تخصصات
- التخصص الثاني ماعندي خلفية عنه.
- بخصوص السفارة ضروري يكون معاك اصل I-20 لانك تحتاج لمعلومات فيه تعبيها في الابليكيشن، الموعد الوضع اللحين افضل بكثير من السابق مثلاً معي : وصلني الاي توني في شهر 2 وحصلت موعد في اسبوع بعد تقديمي، بعد المقابلة طلعت الفيزا في 10 ايام . اتوقع ان اللي في وضعك الوقت مازال معاه .
- امر الاركاب ماعندي خلفية كثيرة عنه. بس اللي سمعته انك اذا خلصت من الفيزا تقدم القبول لوكالة الابتعاث انهم يضمونك او يعطونك امر اركاب، وبعدها يحولونك لمكتب الطيار يضبطون لك الحجز . بس نصيحتي لك ضبط حجزك من بدري ولاتستعجل تقص التذكرة لين تشوف ايش يصير معاك مع الوزارة.
- الكاش : الافضل تكون معاك "فيزا" بس احرص ان تكون صورتك عليها او توقيعك نفس اللي في الجواز. ممكن يكون اللميد اللي فيها من 10،000 الى 15،000 ريال ، الكاش 1000$ كافيه، ولاتحرص ع الكاش الكثير.
المصروفات اللي بتدفعها اول ماتوصل :
* سكنك في موتيل6 لين تحصل سكن: تقريباً 200$ اذا بتجلس في حدود 4-5 ايام.
* دفعة سكنك اذا كان في القروف او في الجامعة في حدود 1000 - 1200$ . (القروف يشترط تدفع اول شهر واخر شهر من العقد).
طبعاً كل هذي الاشياء تدفعها بالفيزا افضل.
* اذا فتحت لك حساب في بنك امريكي تستلم بطاقة الصراف ع طول فالاحسن تودع الكاش اللي معاك وترتاح ولاتنسى لما تفتح الحساب تطلب يكون نوعه حساب طالب عشان ماياخذوا عليك فوائد. بعدها تسوي حوالة من حسابك في السعودية لحسابك الجديد باي مبلغ تحتاج (ياخذوا ع العملية الوحدة تقريبا 100 ريال).
* اذا استقريت في السكن تحتاج تروح للسوبر ماركت وتشتري لك الاغراض الاساسية اللي تحتاجها (فراش- ادوات نظافة- ادوات مطبخ- مقاضي اكل خفيفة ومعلبات) من 100 - 200$ ع حسب اغراضك.
* رسوم الدراسة في حدود 4000$ او اكثر شوي. تدفعها في ثالث اسبوع لك من الدراسة.
الكاش يكون في حال احتجت للتنقل اول ماتجي او اشياء سريعة مثل اكل في المطار او عفش زائد.
والاحسن تحولها معاك من السعودية لان سعر الصرف هنا اغلى شوي.
مهم : اذا معاك فيزا قلل جدا من الكاش اللي في يدك .
والله يوفقك ويسهل امرك ان شاء الله
نقطة اخيرة
بالنسبة للنقاش عن المعهد مابعد كلام اخوي دمورغان شي. بس بضيف كم شغلة:
- كثير من الاشياء اللي قريتها عن المعهد والمدينة في هذا الموضوع اكتشفت انه مبالغ فيها لما وصلت !
- نظام الدراسة في المعهد اكاديمي بحكم انه يتبع لجامعة بمعنى ان الدراسة فيه تقوم في الاول والخير ع الطالب نفسه، ومايصح انك تقارنة بالمعاهد التجارية اللي تعتمد ع التعليم بالترفيه!
- المعهد اعطيه تقريبا 7 من 10 ، وكويس للي توهم بادين في دراسة اللغة انهم يبدون في معاهد في المعدلات هذي واذا حس انه تأسس مضبوط ممكن ينقل لمعهد اقوى .
- كثرة السعودين في المعهد شي طبيعي بحكم وجود 60،000 مبتعث في امريكا لحالها، لكن سعودي عن سعودي في الدراسة يفرق، واكيد فيه المجتهد وفيه اللعاب، والموضوع بالاول والاخير بيد الطالب نفسه!
- مو مشكلة اذا كان كلاسك كله سعوديين، كلاسنا مثلا فيه 10 سعوديين وسعوديات وياويل اللي يتكلم عربي في الكلاس، ومعدلاتنا في نص الترم تقريبا اغلبنا A !
- استغربت من بعض اللي تكلموا في ان المعهد سيء انهم ماحضروا اختبار التوفل مع انه مجاني !
- المعهد قبل كم يوم طلب من جميع الطلاب تقيمهم للمعهد، ان شاء الله ان الجميع حط التقييم العادل، مع اني شفت ان السعوديين هم اول من يخلص التقييم !
- اللي بيسكن في القروف انصحه يختار روميت اجنبي قدر الامكان، واللي معاه عائلة احسن لهم مبنى 11 و5 و 6 بعيد عن الزحمة والازعاج.
والله يوفق الجميع ،،
LinkBack URL
About LinkBacks
بس هوا سؤال واحد يدور بخلدي ارجو الاجابه عليه
يعني انت الحين ما تروح المكتبه؟ واذا ما تروح ممكن تشرحلي ليش انت ما تروحها؟
ارجو الاجابه وبدون تجريح ولا استهزاء لانه موضوع جدي جدا