تجمع طلاب جونسبورو

ان شاء الله انا مسافر بس متى؟ الله اعلم لحد الان ماحجزت

على البركة ياشباب .... والله يكتب لكم كل ما به خير ...

بس حبيت استفسر كم المدة تقريبا من ارسال الأوراق للجامعة حتى وصول القبول ؟؟

وهل الجامعة متساهلة في القبول .... وتتجاوز في المعدل .

اهلين اخوووي اهم شيئين الحجز ومواعيد السفارة انا من كم يوم ابحجز على 1/1 قالي مقفلة الرحلة
الخطوط السعودية
x5 مسافر لنفس الديرة جونس بورو ...؟!

بالنسبه ليا انا يا ميدو

ما ستر اداره اعمال من اول ما رسلت الاوراق فيدكس لمن استلمتها 7 ايام بالتمام

واي مساعده انا حاضر

حياك ربي بين اخوانك ورفقاء دربك ان شاء الله ...
بالنسبه للسكن انا اشوف الشباب ما ركزو عليه وانا عن نفسي اول ما اوصل بحجز فندق لين احصل سكن على رواقه وسمعت ان اذا كان معهد تسكن بالسكن الجامعي
وياشباب خلونا نركز على السكن تراه جد مهم خلونا اقل شي ناخذ فكره عن الاسعار وعن النظافه وطريقتهم بأحتساب الظرايب والرسوم للسكن والكهرب والتلفزيون والماء والنت وغيرهـ

نصيحه ياخوي لا تتهاون بالحجز بعيدن تبتلش ماتحصل طيران انا اقول اول احجز عن طريق موقع الخطوط السعوديه بعد ماتسجل لك يوزر عندهم والحجز مجاني لا تشيل هم اذا توفقت وتيسرت امورك اوك واذا ما اراد الله لك الروحه خلاص انت مادفعت شي

المعذره اخوي صمت ما قدرت ارد عليك خاص لان ميزه الرسايل الخاصه موب عندي وتراي ما انتبهت لسئؤالك

بالنبسه للديره جميييع المعلومات اللي عندي كانت نتيجه بحث شخصي وما سبق اني طبيتها ولا شفتها

بحثت في المنتديات عنها وكان كل واحد يكتب عنها سطر ولا سطرين وتحس انها معلومات عن انطباعه الشخصي

انا مصدري كان منتديات يكتب فيها امريكان واهل ديره جونسبورو وشوي قوقل على شوي موقع الجامعه وهلم جرى

الاراء عن هذي المدينه كانت متباينه جدا جدا ، فيه الي يسب ابوها ويلعن اليوم الي طبها وفيه الي يمدحها وطبعا اغلبهم اهل الديره ( مافي احد يسب ديرته )

طبعا الي يسبون كان اغلب اسبابهم انها مدينه DRY يعني جافه ، يعني بالعربي مافيها فله ووناسه وانهم فيهم شويه عنصريه ( لاحظ الي يتكلم امريكان ) ، بالأضافه ان الكحول فيها اظن وحسب ما فهمته انه يباع في اماكن معينه ، مو في كل مكان تجده زي الولايات الثانيه

والصنف الاخر يمدحونها ويقولون لا والله صح جونسبورو كانت مدينه ممله بس بعد 2007 فتح مولات ومطاعم كثيره وصارت الان مدينه حلوه وتستاهل العيش فيها على الاقل بسبب رخصها

الشي الي اتفق عليه الجميع انها مدينه نواميس لانها محاطه بمزارع رز ، لكن اغلب البيوت فيها شبوك وتقدر تاخذ احتياطك

فيه شخص امريكي صار بيني وبينه حوار وقلت له اني احتمال اروح هناك وكش بوجهه وتعرف تعابير واحد متقرف ، قلت ليش طيب ، قال اركنساس ولايه مافيها ابد وناسه وهي من ضمن ولايات تسمى الحزام المسيحي هي وتكساس وولايه ثالثه مدري وشي ، لان فيها متدينين كثير ، واذا شفت فلم YES MAN حق جيم كاري يوم يطب في اركانساس اظن بتعرف كيف نظره الامريكان لها الولايه

نجي للواقع ،، هدفنا الأول والأخير جميعا الدراسه والعوده بشهاده ، فأنا أشوف مسئله انك تحط الوناسه والفله هدف رقم واحد انصحك انك تقعد في الرياض وتفلها في الثمامه ، لا بأس ان الواحد يبحث عن الترفيه والمكان الحلو ، بس اذا وقف مستقبلك عليها فلازم تبدي مستقبلك وتحط هدف واضح انك جاي امركيا ترجع بشهاده تبيض الوجه ، الصوره الي حاطينها في روسنا ان امريكا موستنق ودزني لاند وهارد روك وبدوايزر لازم نشيلها ونحط الشهاده اولا واخيرا

استغربت ان عدد السعوديين الي يدرسون فعليا في الولايه قليل مع انهم كثير مقبلوين فيها ، وسئلت واحد هناك يقول انهم اكثرهم يدرسون الانقيليزي ويحولون ولايه ثانيه للدراسه الفعليه ، فعشان كذا عددهم قليل نسبيا ، المعلومه هذي قديمه شوي من كم شهر يمكن تغير الوضع

بالنسبه لي انا عندي قبول في اربع جامعات ، 2 منهم متروووسه سعوديين وانا مالي في الغثا والمناظر الي تسد النفس ، لحد يجي مطفي النور ويقول السعوديين مافي زيهم وانت متبري منهم ، انا ما قلت شي بس انا انسان حساس لو كلهم كويسيين واشوف واحد منهم جاي المحاضره مأجر الدور وجاي انا بصدق اقولها ياليتني قعدت السعوديه ولا شفت هالمنظر


بقي لي خيارين جونسبورو وهارتفورد في كونيتكت وللحين ما قررت اي وحده اروح ويعتمد قراري على اشياء اكاديميه بحته لأن ممكن وحده تكون مده الماستر فيها اكثر من الثانيه ، يعني جونسبورو خيار قائم وبقوه ولا فكرت ابدا في عيوبها ولا مميزاتها لانها بالعربي ما همتني ، غير كذا المدينه جدا قريبه من ممفيس وهي مدينه كويسه للترفيه في الويك اند

معليش طولت في كلامي بس زبده الموضوع حلو انك تاخذ معلومات من هنا وهنا بس ما يحك جلدك مثل ظفرك ( احسه انسب مثال ) يعني مافيه زي انك تجي بنفسك وتزور المدينه وتعرف كل شي عنها

بالنسبه للي يسئلون عن السكن في الغالب اذا انت اول سنه وبكالرويس فانت مجبور انك تسكن في سكن الجامعه ، سكن حلو وعماره جديده وأمن وأكل وكل شي

متوفر سكن للعوائل في الجامعه وبسعر جدا معقول ، راجعو موقع الجامعه يا شباب كل شي موجود فيه ترى ما جبت شي من مخي

حتى الاستقبال من المطار لا تاخذ تكسي ابدا لانك بتنصلخ ، فيه فورم تعبيه من موقعهم وتكتب فيه معلومات رحلتك ويجون ياخذونك من مطار ممفيس ويوصلونك ببلاش الى الجامعه او المدينه

بالنبسه للاورنينتشين الي في 4 يناير مهم جدا جدا يا شباب تحضرونه للي يسئلون ، لو تقرى ورقه القبول الي معك فيها ورقه يقول وش تسوي وما تيوس وكاتبين بالخط العريض انه مهم حضورك عشان تعرف وش السالفه ، حط في بالك انك ممكن ما تلاقي احد قدامك ولازم تعتمد على نفسك ، حتى لو بتكونون 4 او 5 مع بعض مالها داعي تدربون روسكم ما تدرون وين تروحون واحد منكم لازم يكون عارف وش السالفه ( معليش على الكلام هذا بس هذي نصيحه مجرب ياما تسحبت في امريكا حتى السعوديين قسم بلله بعضهم ما ينفعك حاول تنفع نفسك بنفسك ) فأرجع واقول حاول ترتبون اموركم وتجون بدري

وبالتوفيق للجميع

^^^^^
كلام في الصميم ، الله يعطيك العافية يافارما

أنا إن شاء الله دراستي مع بداية العام الميلادي القادم

شكراً على الملعومات الثمينه جداً من جد ملعومات ورد متعوب عليه
بس انت قلت يا pharma ان لازم نجي قبل الدراسه بفتره طيب كم تتوقع المده الكافيه ؟
يعني حنا نبداء بيوم اربعه متى نكون بالمدينه بعد ما نخلص من الملحقيه ؟
وكم تتوقع ياخذ يوم اجراءات الملحقيه بواشنطون ؟

ايميلي aaa445 آت جيميل دوت كوم

ياليت نتواصل معكم