أي سؤال عن BOWLING GREEG أنا حاضر

أخوي بدر حبيت أسألك انت ساكن في الريجستري ؟

وياريت اذا عندك أي معلومة عن الريجستري زي كم يبعد عن الجامعة وهل موجود فيه أماكن شاغرة ولا زحمة عليه ولازم أحجز من بدري وهل هو عبارة عن مجمع بداخله عمارات ولا ايش بالضبط وهل يوجد فيه نادي رياضي ومسابح وايش مميزاته وياريت اذا عندك موقع لهم أو رقم تعطيني هو

وبالنسبة للشقق انا سألت أخوي بليغ وقالي انه مستأجر بـ 500 وشويه فما أدري اذا هذي شاملة الكهرباء والموية والنت ولا مفصوله عنها

وبالنسبة للكوليج سويت ياريت تذكر لي مميزاته وهل في حل غير اني ادفع قيمة الإيجار سنة كاملة

وياريت تكتبلي تجاربك في السكن لاني أنا ان شاء الله جايكم على السميستر الجاي والله يعطيك العافية

أخوي kentucky انت جاي على 27 ذي الحجة لاني انا جاي على هذا اليوم ؟

كاوبوي ... ماش اء الله تبارك الله مبروك ان شاء الله اجراءات مع السفاره تسهلت اخيره الحمد لله رب العالمين واتمنى لك رحله علميه موفقه وكلها انجازات .
هذي باقة ورود ورده لك بهالمناسبه :133::133::133::133:

نجي لأسئلتك ...
ما شاء الله عليك الريجستري وكلج سويك .. كأنك معنا هنا في بولنج جرين ...
انا فعلا ساكن في الريجستري .. شقه فيها اربع غرف انا ماخذ غرفه وفيه واحد والروم ميت ماخذ غرفه .. طبعا الغرفه بـ 395 والعقدد الجديد الى شهر مايو او الى شهر يوليو حسب رغبت!!


الكامبوس حق الجامعه (الحرم الجامعي) مررره كبير وازيدك من الشعر بيت الجامعه كلها على جبل كبير << هذا وصف قراوا بس والله دقيق خخ
عموما الريجستري ما بينه وبين الكامبوس الا انك تقطع الشارع بس .. ولكن بما ان الكامبوس كبير احنا نمشي من الغرفه الى القاعه في المعهد حوالي 10 دقايق كلها طبعا داخل الكامبوس .. عموما من الريجستري الى آخر الكامبوس او الى ابعد نقطه في الجامعه منك تاخذ 10 دقايق او حولها ... المقصود ان الرجيستر هو اقرب سكن الى الجامعه .. ممكن فيه من الجهه المقابله بعد الشقق اللي ممكن تستاجرها تكون اقرب ولككن الرجيستري عباره عن عماير تقريبا سبع او ثمان في بينها مواقف وسيعه اللي يميز هذا السكن انه قريب من الجامعه وكل الخدمات شامله العقد .. المويه والكهرب .. غساله الملابس والنشاف من افضل الانواع ومتوفره في كل شقه .. الشقق نظافتها انا اقيسها بـ70% ولكن تبقى نظيفه .. الازعاج بنسبه قليله يعني السكن حي ويونس شوي ... مافيه زحمه كثير على السكن وحسب علمي السكن متوفر دائما للمستأجرين الجدد..
فيه غرفه لياقه متوفره ولكن صغيره وانا من رأيي ما في أصلا احد وبيروحل وبيترك نادي الجامعه لأنه شي متعوب عليه .. طبعا لو الواحد يسكن في شقه خاصه فيه هذا شي طيب ولكن عناء الفرش والتأثيث ودفع الفواتير للخدمات شوي مرهق خاصة وان الطالب مرتبط بمحاظرات يوميا وجديد في المدينه .. لذا انا اقول الريجستري ظريف ..

وبالنسبة للشقق انا سألت أخوي بليغ وقالي انه مستأجر بـ 500 وشويه فما أدري اذا هذي شاملة الكهرباء والموية والنت ولا مفصوله عنه

ا

ابسأل بليغ والله ما أدري اذا قالك سعر الاجار او قدرلك معه المصاريف والخدمات ..

وبالنسبة للكوليج سويت ياريت تذكر لي مميزاته وهل في حل غير اني ادفع قيمة الإيجار سنة كامله

ما اتوقع ان فيه حل آخر غير انك تدفع زي ما يطلبون ولكني ما ادري ايش نظامهم ولكن السكن يحتاج سياره لأنه بعيد عن الكامبوس حوالي خمس دقايق من السكن..
الكوليج سويت فيه نفس المميزات اللي في الريجستري بس اقدور اقول انه شوي ارقى من الرجيستري .. ولكن المشاكل كثيره وكل يوم اسمع عنه مشاكل وقبل كم يوم مكتوب في جريده الجامعه ان فيه جريمه صارت فيه .. مع ان هذي اول مره اسمع فيه جريمه اصلا في المدينه ... عموما السكن جيد فيه حفلات كثير في الويك اند وفيه حنه ورنه وفيه صاله كبيره للياقه وفيه مسبح مكشوف وفيه مواقف حلوه وفيه عماير اكثر بكثير من الريجستري .. فيه باص ياخذ من السكن للجامعه وقت الدوام ورايح جاي كل ساعه من الكامبوس للسكن والعكس ...

وياريت تكتبلي تجاربك في السكن لاني أنا ان شاء الله جايكم على السميستر الجاي والله يعطيك العافيه

والله يا كاوبوي انا جدا مرتاح في السكن الحمدد لله .. ولكن انا اوصيك انك تختار روميتك عشان ترتاح لأن كل مشاكل الشباب السعوديين وغيرهم من الروم ميت لأنه هو اللي بيصير في وجهك دايم ... السكن جيد ومكانه حلو لأنه قريب من الكامبوس واذا جيت تروح للمكتبه او الماس ميديا(مبنى كل ابو كمبيوترات العالم فيه تقدر تستخدم الانترنت والطابعات وتذاكر ) تقدر اي وقت تروح ما تتباعد الموضوع ..
وهذا موقع الريجستري ...
http://www.livetheregistry.com
على فكره تواهم توهم موزعين على السكان IPOD مجانا كانوا مواعدينا فيه من اول السمستر لكن على قول المثل شعرة من جلد الخنزير فايده خخخخ

اسأل ونحن نجين ياحبيب قلبي ترا والله ياكاوبوي خيرك سابق ...
يمكن نسيت بعض اللقطات لكن نبهني وانا ازيدك من الشعر بيت ..

حبيب قلبي كنتاكي ترا والله ما نسيتك اليوم قابلت الرجال أو أقصد امس ولكن كات معه عائلته ولاسألته ولكن ان غد لناظره لقريب ...

تحياتي واشواقي ياجماعه توصلون بخير ان شاء الله ...

مشكووووور أخوي بدر والله يعطيك العافية وماقصرت الصراحة وباذن الله على الريجستري رايحين

بس بالنسبة للرماميت < جمع روميت كيف أقدر أختار يعني مافهمت هم يقولون جيب لك روميت معاك ولا يقولون هذا الموجود وانت طب وتخير وبعدين هم أغلبيتهم أمريكان ولا في مشكلين
وبالنسبة للريجستيري هل هو مؤثث وايش الأشياء اللي راح اشتريها يعني مثلا طقم الفراش حق السرير وزي كذا
صح في حاجة مهمة جدا نسيت اقولك عليها ذحين مو النظام في الجامعة اللي اقل من 21 سنة يا يدفع 1000$ ويسكن برى الجامعة أو ينثبر في الجامعة طيب أنا دقيت على كاري ستيورت اعتقد انها سكرتيرة حق القبول مدري المعهد حاجه زي كذا المهم سألتها عن الهرجه هذي قالت لي اذا كنت جاي في البداية بتاخذ كورس في اللغة فما عليك شي وانت حر نفسك تسكن في الجامعة ولا ان شاء الله تحت الكوبري بس اذا بدات تدرس في الجامعة عاد ياتدفع الالف وتفارقنا او تتكي عندنا في الجامعة طبعا عن السكن تتكلم فما أدري أبغى أتاكد أنا أكثر هل كلامها صح ؟

ومشكور يالغالي ومعليش كثرت عليك في الأسئلة وأنا عارف انكم مشغولين في الدراسة ومتى فضيت رد براحتك وبالتوفيق لكم أجمعين

هلا أخوي كوبوي
ماشاء الله أجل جاي عندنا قريب
بجاوب على أسئلتك بدل حبيب ألبي بدر
بالنسبة لليجستري ما يحتاج تجيب معك روميت الظاهر أنك تقدر تختار روميتك إذا كان فيه أكثر من غرفه موجوده وبدر ممكن يفيدك أكثر
والريجستري مؤثث بس تحتاج الظاهر بطانيتك وفراشك .
وبالنسبه لي سكن الجامعة إذا بتدرس في المعهد ما يحتاج تسكن في الجامعة أو تدفع 1000 دولار ألا إذا بديت تدرس في الجامعة .

وأي خدمات حنا حاضرين

السلام عليكم أخوي كنتاكي ...
بالنسبه لمدارس العيال ... مافيه في بولنج جرين الا طفلين الله يخليهم لأهلهم هم السعوديين الوحيدين (السعوديان الوحيدان خخ ) المهم .. واحد في الابتدائي والثاني في الروضه .. كلهم في مدرسه امريكيه الكبير على حساب الملحقيه والصغير على حساب اهله في الاسبوع 65 دولار تقريبا ...
بالنسبه للاختبارات طبعا يفترض ايام الاختبارات ان الملحقيه ترسل ادفايزر يختبرهم لأن مافيه مدارس سعوديه في المدينه ولكن لقلة الطلاب في المدينه ردوا الملحقه بأن الطلاب هم اللي بيروحون لواشنطن للملحقيه .. لعل ابناءك يكونون سبب لأقنااع الملحقيه بارسال الادفايزر (Advisor ) >> تونا ماخذينها لووول ...
المعلومات اعلاه نقلا عن فلان عن المصدر لذلك يمكن ماهي دقيقه ميه بالميه لكن تعطي فكره عن الموضوع ...

بالنسبه للحضانات ياليت تعيدلي السؤال لأني ما فهمتك اي حضانات تقصد وكم عمر الولد وليه تبي حضنه خخخ (أسألني ؟؟ )
<<< ما فهم

زين ما اخترت والله ... وما سوينا الا أقل من الواجب وترانا معاك لحد ما تستقر في البلد ان شاء الله وترتاح ...

الرماميت طال عمرك ... انا ودي اقولكك شي قبل ما ارد عليك انت لا تشيل هم الا شياء هذي كلها والتفاصيل الدقيقه لأنك اذا جيت ان شاء الله زي ما قال لك موادع راح ناخذك في لفه على كل الخيارات المتاحه وتشوف بنفسك وتختار اللي ترتاح له نفسك ...
بالنسبه للريجيستري طال عمرك اللي بيصير كالتالي ..
-- توصل بالسلامه ان شاء الله .
-- نروح لمكتبهم (الاداره ) ونقول هذا الشاب اللطيف وصل ونبي له شقه يرتاح فيها ..
-- نعبي لك ابليكيشن فيه كل معلوماتك والاشياء اللي تفضلها مثل .. ازعاج هدوء .. روميت مواصفاته وصخ ولا نضيف .. واحد ولا وحده .. ومن الاشياء هذي ومواصفاتك مثلا .. هل انت ذكر او انثى او بين وبين خخخ موجود والله الخيار .. (آسف لكن لتوضيح الصوره أكثر ) ..
-- قبل لا نسلمهم الابلكيشن نقول نبي نشوف الشقه ..
-- نروح نشوف الشقه النموذج اللي مأثثينها الاداره .
-- نرجع للمكتب ونقول طيب نبي روم ميت كذا كذا كذا مواصفاته ..
-- بالعاده يقولون فيه لكن بعد كذا يوم مثلا ..
-- نقول اوكيه ..
-- نعطيهم الا بلكيشن وقيمه رسوم الابلكيشن والتأمين 150 دولار .. والاجار الى نهاية الشهر ..
-- نتوكل على الله ونشوفلك مكان ترتاح فيه حتى يجهز سكنك في الريجستري .. وغالبا اسبوع في اسوء اسوء اسوء الاحوال ..
بالمختصر راح نقعدلهم حتى نطلع منهم روم ميت انت مرتاح له ..
....


الغرفه فيها سرير ومكتب وكرسي .. وانت يبيلك الفراش والمخدات والبطانيه والغطا .. ويبيلك اثاث المكتب يعني تبي لمبه قراءه حركات ملفات اوراق اقلام حاملات اي شي دباسات خرامات طابعه توصيلات لوحات .. يبيلك اثاث للحمام الله يكرمك وستاره للحمام .. بس خخخخ
طبعا لا تشيل هم بنطامر(يعني نناقز يعني مافيه مشاكل وين يبغى يروح احنا فيه ودي طال عمرك خخخ ) معك في كذا سوبر ماركت ونحط كل الخيارات المتاحه قدامك حتى تختار وترتاح خخخ .... الله يعينك علينا خخخ


صح ؟؟
لكن اذا جيت نروح ونتفاهم معهم وجه لوجه يكون افضل .. لحد ما نوصل لحل ان شاء الله ..

ماسوينا شي .. وتجي بالسلامه .. والامور سهااااالات ان شاء الله .. انا اقول سهالات وانا اعنيها ..
تحت أمرك ..
وربي يوفقنا ان شاء الله ونرجع لأهالينا مرفوعين الراس ان شاء الله ...

اسأل بعد ماعندك مشاكل ..

مشكور أخوي أحمد وأخوي بدر على المعلومات القيمة

والله يعطيكم ألف عافية وماقصرتم والله أبدا

هـــلا أخـــــــــوي مـــــــــــــكاويـــ ..... و حياك الله

حقيقه يا خوي أنا عندي أستفسار عن الجامعه .... لأني ناوي و الله أقدم عليها
أنا الآن في مرحلة اللغه و على وشك الإنتهاء منها .... بس عندي أستفسار مهم
و هو بخصوص معادلة الساعات أنا يا خوي عندي دبلوم محاسبه من الكليلة التقنية و لله الحمد المعدل طيب 4.93 من 5 بفضل الله ....
بس ما أعرف هل يعادلون لي ساعات الدبلوم و كم بيعادلون و إذا تعرف أحد من الطلاب السابقين الذين يحملون دبلوم هل عادلوا لهم أم لا ....
و هل دراسة المحاسبه في الجامعه سهله أو معقده
و إذا كانت الأمور طيبه يمكن أحول و أكمل دراسة اللغه في الجامعه إذا كان المعهد طيب

و لك كل تقديري

و فقك الله لما يحب و يرضى