استفسار عن معهد ILI بواشنطن

اتمنى من اللي عندهـ خبر يفيدنــا ..

معهد ILI ذكره لي غير واحد بأنه جيّد مقارنة بالمعهدين الأخرين. اذا أردت مساعدة بشأن القبول في هذا المعهد فأخبرني.

انا جربت ال آي ال آي و لقيته بايخ من جد
بالنسبه لي لغتي كويسه و سمعت ان النوفا احلى

اتوقع انك هناك الحين ,,, فياليت تعطينا تجربتك ..

انا على فكره في مستوى تحظير التوفل ,, و طاقم التدريس مره من جمبها
احس المعهد يطقها و يلحقها
بس ميزته انه رخيص و معترف به
نوفا اغلى شوي و معترف به و شكلي بروح له الترم الجاي او الكثولك يونيفرستي

أفضل اللي ذكرتها نوفا ..
و الله يوفقك

شكراً سلطان .. انا اوافق بأن نوفا افضل من الاي ال اي بكثير

و للمعلوميه انا جربت الاي ال اي و هو عباره عن طابقين تم استأجارها و لها غرف صغيره (يفتخرون بها) على اساس انها لا تحوي الكثير من الطلاب و لكن الواقع انهم يكدسون الطلاب كتفاً بكتف النساء و الرجال كما انه يحتوي على طاقم تدريس سيء جداً غير محترف ولا يستطيع السيطره على الفصل (الصغير) من حيث ان الطلاب يستخدمون الايباد و الايفون و ما لذ و طاب من الاجهزه كما وصلت الوقاحه باحد الفتيات الافريقيات بأن قامت بأخذ الصور المضحكه (بالايباد!!) و المدرس(ه) لم تنظر الى ذلك ... و عند استخدامي للمترجم اطلس المملكه يبدأ المدرس بالكلام على ذلك !! شر البلية ما يضحك ,,

كما ان هناك مدرس اسمه (جم) ذو صلعة ملساء و يختص بتدريس التوفل و احسبه من اسوأ المدرسين. يزدريء الطلاب و يسخر منهم باسم التدريس و يستعمل علاجات نفسيه الله لا يبلانا.


زبدة الكلام ان هذا المعهد قصده تجاري و يعتمد على (الايحاء) بان اسعارهم رخيصه لأنهم يستخدمون طريقة الدفع شهريّاً (دون حساب كلفة الكتب)

ملحوظه كبر طويق : كان تحتهم مرقص خلاعه في الدور الثاني و كان يوجد به ممارسات غير شرعيه (لا اسلامياً ولا امريكيّاً) و لكنه تم اقفاله ... والآن يوجد محل مساج و تدليك سمعت بأنه غير سليم و لكن الله اعلم... اصلاً لو فيهم خير كان جابو صور للمعهد حقهم في موقعهم و لكنهم اكتفو بصورة البيت الابيض :| سلامات بيدرسوننا هناك عل غفله ؟
و يكفي ايضاً ان اسم المعهد على لوحة الاعلانات الخاصه بالعماره مكتوب : international lancuace institute
فما هذا المعهد الذي يريد ان يدرس شيئاً لا يعرفه ؟

للابراء الذمه فقط: استطيع القول بأن هناك قله معدوده من المدرسين الذين يستحقون الشكر,,, و لكن اللذي يدمي القلب بأن تراهم يحظرون للمحاظره القادمه في وقت الفراغ اي انهم لا يعلمون ماذا سوف يدرسون او عنوان الدرس او اي شي من هذا القبيل ...

انما هي شهادة في عنقي احببت ان اوصلها لمن يهمه الامر من طالب و مسئول,,,
والله على ما اقول شهيد ...

عموماً موقع النوفا هو :
Northern Virginia Community College

^^^^^^^

تحطييييييييييييييييييييييم توني جبت قبول منه

لان هو الوحيد الي كان بالقائمه في واشنطن دي سي


طقتني الغلللقه

الشباب اللي في الـ ili قبل حوالي الشهر
توجهوا بشكوى للملحقية عن سوء تعامل المدرسين و سوء المعهد ..
و تقدم الدكتور الفريحي -من الملحقية- بزيارة للمعهد و قابل الطلاب و إستمع لشكواهم .. و إجتمع بإدارة المعهد ..
هذا ما وصلني من أحد طلاب المعهد .. و لم أخذ منه التفاصيل كامله .. و ماذا حدث بعد ذلك ..

إذا تبين قبول في النوفا عطيني خبر ..
و بالتوفيق ي رب

لا ولا تحطيم ولا شي ,,,
هو عالعموم اللي مقبول حولها عندك كابلان و عندك نوفا ... كابلان اللي سمعته انه مو كويس و لكن السبب هو انهم مظبوطين و بعض الطلبه الله يهديهم ما يحبون الانظباط بينما الاي ال اي فشل في فسل ,,, مجرد ديكور معايير يحطونها كذا و يطبقونها اذا جاهم احد يزور ...
ولا انظمتهم تسد النفس ,,, بريك ربع ساعه !!! وش بسوي في ربع ساعه يعني ,,, لا و المدرس ياخذ من ذالبريك خمس دقايق و يحتريك تتأخر عشان يبغون يحسسونك بالذنب ... انا و لله الحمد اول ما جيت قال لي احد المدرسين الرايقين ( و اسمه مارك) له شعر طويل ,,, يقول لي حطمت الرقم القياسي فالحظور لوحده يابانيه !! و ما لقيت من باقي المدرسين الا العداوه و التحريش ليه ما ادري ,,,
بس اتوقع انه اذا صار الواحد مبزوط يحسون انهم يقدرون يتحكمون فيه من ناحيه انهم يهددونك بانذار او شي زي كذا ,,,

و سمعت اشياء صراحه تدمي العين من الكلاسات الباقيه زي وحده سعوديه مسيكينه دايم تناقر المدرس تقول له اكتب واظح ما فهمت ابغى اتعلم انا يا استاذ ارجوك!! (يعني وش تقدر تستنتج من ذالكلام؟؟)

عموماً الناس حبوه و ممدحوه صراحه عشانه متسيب ,,, هذا اللي شفته بعيني ,,, ولا قبل ما اجي كنت حاط امل كبير من خلال اللي سمعته بس للأسف ...
عموماً اسعارهم رفعوها ابتداءً من السنه الجايه ,, يعني خلاص حتى اللي كان ناوي يروح عشان الرخص ما راح حتى يلاقي الرخص ...

و خل اكلمكم عن معاناة الهوم ستي (السكن مع عائله ) ,,, اذا شافوك سعودي يحطونك مع اخيس ناس و اذا سألتهم ليش يقولون لك حنا نعرفكم يالسعوديين ما تحبون النظام ...
انا شخصيّاً سكنوني مع واحد شايب عمره فوق الستين ,,, يعني بلله هذا كيف بيطبخ ؟ عشان السكن مع عائله يلزم العائله انها تقدم لك وجبات ,,, و ذالشايب اللي سكنت معاه كان بيته مش بطّال ,,,, الغرفه اللي سكنني فيها كبر حمام بيت سعودي بس قلنا ما يخالف ,,, بس يوم جيت للمطبخ انصدمت صراحه ,,, ما يعرف يغسل المواعين و ما عنده غساله كهرب فوش يسوي؟ يروح يغسل الكاس بمويه و خلاص .... تلاقي باقي قهوه في اخر الكاس اقول له الكاس وصخ يقول لي هذا ما يروح ... قلت له الا و غسلته له بمويه حاره ,, قال اجل خلاص انت غشل المواعين وانا بطبخ ... قلت له معصي قمت و خليت لي مواعين خاصه فيني قلت له لا تلمسها لا اقطع يدك .. و صرت اغسل مواعيني و هو يقول ياكل بشوكه و سكاكين عليهن باقي اكل قبل سنه الله يقلعه ...
واللي يزود الطين بلله ( و هذا اللي ما خلاني اعاونه على تغسيل الصحون) ان مطبخه مليااااااااااااااان صراصير ... و يا ليتها صراصير زي اللي عندنا تشوفك و تنحاش!!! لا ,, صوارير اليفه :|
و ابو الشباب يفغص الصارور بيده و يقول (موت يابن الكلب!) و يكمل يطبخ ...............................

يكفي انه مره طبخ همبرقر و لقيت معاه رجل صرصار الله يكرمكم ... لا و يخزن المواعين الكبار في الدالوب اللي تحت المجلا !!!! اخبر ذاك الدالوب حق منظفات ولا زبايل الله يكرمكم ... و اقول له يقول لا هذا مكانها ولا تحركها ... جيت مره بصلح بيض و خذت مقلا لونه اسود ... يوم ابد جيت بحط البيض و الاقي روس صراصير و جنحان و رجول عليه ,,, و عنننننندي صوره للي مو مصدق .... بس ابشركم فكني الله منه و الخافي اعظم ... ابو الشباب اول ما جيته جيته متحمس قلت له اي قوانين عندك قولها لي عشان ما اظايقك .... قال ما عندي الا نظامين ... لا تمد يدك عالاكل الا لين اقرا صلاتي عليه قلنا ما يخالف يالظال .... الثانيه وشهي؟
قال انا امشي فالبيت مفصخ ربي كما خلقتني ولا تقدر تغير ذالنظام مهما تحاول .... و قال يعلل انه ينام عريان و ( لو ) جاه بول الله يكرمكم موب فاظي يلبس ثم يروح الحمام ثم يفصخ ثاني مره ,,, قلنا ما يخالف فالليل بس اللهم صبرك يا روح ,,,
ابو الشباب خذاها حلا صار كل الوقت عريان ,,, و عادي يقعد فالصاله و الرايح و الجاي يشوفونه !!!!
اقسم بالله معاناة بس عدت و لله الحمد
هذي معاناتي و ما قلت لكم القصص الباقيه بس خل هذي تكفي ....

اللي بيروح لذاك المعهد لا يلوم الا نفسه هذا اللي اقول ,,,,
تحياتي للجميع و اتمنى لي و لكم التوفيق ...