فيرجينيا

السلام عليكم ..
أتوقع إن ردي متأخر شوي .. لكن إذا تبغى نصيحتي أخوي ابعد عن فرجينيا ههههههههه

لي سنتين بفرجينيا .. لكن ما أقول إلا الله يفرجها ههههههه


لي عودة إذا تحتاج التفاصيل ..

أجمل تحية

أخوي دي سي وش السبب
لا تروعنا من الحين
ممكن تقولي باي مدينه

أخوي استفهامات .. إنت ما عليك خوف .. ديرتك حلوة .. وبعيدة عن المدن اللي فيها عرب كثير .. أقصد ابعد عن .. .. fairfax , vienna , alexanderia ..

دي سي

ممكن تذكرلنا ايش عيوبها فيرجينيا (فيرفاكس-فيننا) .. ...ليه ما تنصح فيها

(العيوب واذا عندك مميزات)
عشان الكل يستفيد

أختي الكريمة ana angel

حاب أشكرك على طرح هالموضوع .. اللي ممكن يفيدك ويفيد الغير وهذا هو الهدف من هالمنتدى الرائع ..

فرجينيا .. ولاية كبيرة .. وتختلف من منطقة إلى منطقة .. المناطق اللي أتكلم عنها هي مناطق شمال فرجينيا .. زي اللي ذكرتها ..الا وهي .. فيرفاكس وفيينا واليكسانديرا ..

هذي المناطق الثلاث .. أو بالأحرى المدن الثلاث .. لها مميزات ولها إيجابيات ..

بأبدأ بالمميزات عشان تتحمسون .. بعدين أحطمكم بالسلبيات ههههههههههههههههههه

من مميزاتها أولاً جمال الطبيعة .. والمعروف إن فرجينا من الولايات اللي بإمكانك مشاهدة الفصول الأربعة فيها .. ثانياً الموقع .. تمتاز بالقرب من واشنطن دي سي .. اللي فيها الملحقية الثقافية .. والسفارة .. والعديد من الجامعات العريقة .. القرب من نيويورك .. المشوار إلى نيويورك ما ياخذ 5 ساعات بالسيارة .. وكذلك البحر موجود على بعد 4 ساعات تقريباً للي يبي يسبح .. ثالثاً توفر المطاعم العربية .. وبكثرة .. هذا للي مشتاق للكبسة ويبي يعبي الكرشة ..

السلبيات .. المثل يقول .. (( الجنة من غير ناس .. ما تنداس )) وهذي من أهم السلبيات بفرجينيا .. سكان فرجينيا أغلبهم غير أمريكان .. يعني .. لما أمشي بسيارتي بالشارع .. لما أطالع السيارة اللي عاليمين ألقى مكسيكي .. السيارة اللي عاليسار .. صيني .. اطالع اللي وراي بالمراية القاها عجوز كورية .. واللي يساقطون علي ولا يمديني أشوفهم أدري إنهم عرب ...
وياليتهم شعب فرندلي .. كل واحد نفسه بخشمه ..
العرب بفرجينيا واجد .. وبشكل خاص السعوديين .. نظراً لقرب السفارة والملحقية .. والأكاديمية الإسلامية السعودية .. أحياناً إحس إني بالسعودية مشغلين راشد الماجد ونتمشى لول ..
ما أقول فيهم شي .. إلا والله البعض فيه الخير والبركة .. لكن البيئة ما تهيئ لدراسة اللغة أبداً .. وأكبر مثال .. واحد من الشباب.. الله يستر عليه .. له 8 سنوات في فرجينيا .. وتوه يخلص لغة
من السلبيات اللي تعتبر من الدرجة الثانية .. غلاء الأسعار .. يعني شقة بغرفتين .. مستحيل تلقاها بأقل من 1300 .. والأسعار توصل إلى 1800 وأكثر لبعض المناطق ..

عالعموم هذا رأي شخصي .. واللي يبي يجي حياه .. عين فراش وعين غطا .. وإعذرونا عالقصور .. وأجمل تحية للجميع ..

أخوكم دي سي <==<< متعقد من فرجينيا عشان كذا كاتب دي سي .. والا هو ساكن بفرجينيا هههههههههههه

اخوي دي سي، اشكرك على التعليق وبما انك من سكان فرجينيا اكيد انك عارف عنها الكثير لكن اعتقد ان دراسة اللغه ترجع للشخص، يعني في كل ولايه فيه سعوديين يدرسون لغه، فاعتقد حتى ولو كانوا قليل راح ياثرون على تعلم اللغه، عشان كذا هذا يرجع للشخص، واذا بيسكن مع عائله ويقلل الاحتكاك مع العرب اعتقد بيستفيد كثير

وعندي سؤال ايضاُ للاخ دي سي والاخرين، ماهو تقييمكم لمعهد اللغه في George Mason Uni ؟ وللجامعه ككل من ناحية دراسات عليا وترتيبها بين الجامعات الاخرى؟؟ وايضا تقييمكم للسكن مع عائله في fairfax؟

أخوي Emigre ..

جامعة جورج ميسون معروفة جداً على نطاق فرجينيا .. وأتوقع إنها أقوى جامعة في فرجينيا في مجال علوم الحاسب وغيره ..

معهد اللغة قوي.. لكن راح ياخذ منك الكثير من الوقت .. حيث إنه عندهم 8 مستويات .. واذا راح تبدأ من البداية .. راح تاخذ منك بالقليل أربع سنوات .. نظراُ لوجود الجانب الإستغلالي في المعهد .. ومحاولة الحفاظ على الطالب السعودي .. أو بالأحرى الحفاظ على تكاليف الدراسة اللي تدفعها الملحقية ههههههههه

أغلب الشباب اللي أعرفهم ما يمدحونه .. لصعوبته في الدرجة الأولى ..

بالنسبة لمنطقة فيرفاكس .. السكن مع عائلة فكرة جيدة .. لكن مع الوقت (أتوقع) راح تصير كل طلعاتك وجياتك مع السعوديين .. نظراً لتوافرهم بكثرة في هالمنطقة ..

إلا إذا عندك رأي ثاني ..

تقبل مودتي أخي الكريم .. وأنا حاضر إذا عندك أي إستفسارات أخرى

ابي اسالكم يا اخووان وش افضل فلوريدا تامبا ولا فيرجينيا ابي جوااب ع السرريع لاني بقدم على معهد لغه هاليومين ان شاااء الله

انتظر الردود ومشكووورين مسبقا

العفو أخوي midocash

أنا أقول فلوريدا تامبا .. وما جاك علي ..

وللمعلومية .. ترا ما فيه وجه مقارنة



توكل على الله .. أنا كنت بفلوريدا بعطلة الربيع .. وأنا راجع لفرجينا خنقتني العبرات.. من روعة فلوريدا ..



اجمل تحية ..