تقرير معاهد ولاية جورجيا ..... GEORGIA STET

السلام عليكم
مشكووور اخوي على مجهودك وحابه اشارك معك بالراي انا درست بمعهد التابع لجورجيا ستيت وبصرااحه
المعهد له ميزات كثيره وحلووه يعنو بالاضافه الى الكلاسات العاديه في مركز لتعليم الخصوصي ولمساعده الطلاب في اي مشاكل بواجهوها دراسيا مثلا مهارات الاستماع او الكتابه او حتى لتدريب اختبار التوفل والايلتس
طبعا معهد جورجيا الترم فيه عاده يكون اربع اشهر وبالصيف شهرين ونص . خمسه مستويات تتقسم على تدريبك المهارات كلها بالاضافه ان كل مستوى يتطلب منك عمل مقابلات او اعمال تطوعيه خارج الجامعه مع الامريكان وهدا اللي قوى مهارات اغلبنا
بالاضافه عندهم نشاط انو يسجلون الطلاب مع طالب امريكي بحيث كلا الطرفين يستفيد المطلوب من هدا النشاط انك تسولف معه فقط ووتعرف ومن خلال النشاط تكون تعودت تتكلم تاخد وتعطي وتتعلم اشياء جديده والطالب الامريكي يكون اخد فكره للبحث اللي يكون عنك او شي
مدرسين بالمعهد مررررررره جناان ومعتمدين اتدكر واحد منهم كان كاتب بجريده مشهوره وله الفضل اني قادره اكتب بحث يوصل 18 صفحه واكثر طبعا في الكثير منهم وكلا له اسلووبه
ولاننسى ان المعهد مجهز بتقنيات اغلب الكلاسات كل طالب طاولته بها جهاز كمبيوتر وجميع الكلاسات مجهزه بجهاز بروجكتر وجهاز يقرب ويبعد الصوره على السبوره
ومايخلا اي معهد من المتعه والرحلات الشيقه معهد جورجيا ستيت اسبوعيا رحله ونشاطات مثل الايس ice وهو عباره عن تجمع لجميع طلاب المعهد من جميع المستويات للمحادثه او مسابقه
ومن الميزات الاب وهو مركز مجهز بكمبيوترات وبها برامج تساعدك باللغه وكمان عشان الواجبات لانو يطلب من الطلاب تسجيل اصواتهم دائما والمكتبه وهي تجمع الطلاب لدراسه او لشان يعملون جلسات دراسيه انا كنت اجمع الطلاب الضعيفين بالاداء وادرسهم لان يساعدني اقوى لغتي . الكتبه فيها افلام وكتب وكمبوترات وكافيه ومشرفين يساعدونك تلاقي الكتب او اي شي تحتاجه وفيها غرف خاصه ممكن تحجزها قبل او تجي تاخد غرفه اذا لقيت
وحاجه حلوووه مانسيتها كانت في مدرسه اسمها دارا وحاليا استقالت كانت تصور الطلاب فيديو في اثنااء اداء البرزنيشن وترسل لمقاطع لهم ولزملائهم كانت من اقضل الطرق لتدريبنا على اغلاطنا (الصوت تعابير الوجه حركات اليدين النطق ...الخ)
وميزه اخرى انو يكون لجميع الطلاب ايميل تابع للجامعه وفيه يوصلك كل شي عن المعهد ورسائل من المدرسين في حال الطالب ماحضر يرسلون الواجب وعرض باوربوينت لدرس وكمان عشان الطالب لايتحجج يوم اللي مايحضر لازم يرسل الواجب او يسكنه ولا ياخد نص العلامه اليوم الثاني
المدرسين يستخدمون طريقتين لشان الطلاب يكونوا على علم بمستواهم ulearn &engrade ويكون لطالب حساب يفتحه من خلالهم ويطلع على درجات الواجبات والاختبارات عاده اغلب المدرسين اذا كان في بحث يخلونك ترجع تعدله اكثر من مره بمساعده المدرس الخصوصي او حتى لو بعد الكلاس مع المدرس نفسه واحيان يخلونك تستخدم مترجم انجلش انجلش بنص الامتحان
احد مناهجهم انو يعطوك كتاب تقرا طوول فتره الترم وهدا شي ممتع لانو الكتاب يجذبك وبالكلاس تتناقش مع زملائك يعنو مثل نادي كتاب وايضا تاخد جميع الكلمات او العبارات اللي ماتعرفها وتناقشها الكلاس كله وماخبي عليكم كانت اوقات عبارات عاميه وليست اكادميه فقط
المعهد بتدريسه يضم التعليم الاكاديمي وجزء من العامي ويهيئك للعالم وخصوصا الجامعه لان قبل تتخرج لازم يخلوك تحضر كلاسين ثلاثه بالجامعه وتكون مثل الملاحظ تكتب ملاحظات وتكتب مع الطلاب الدرس ههههههههه

الله يعطيكم العافية وما قصرتوا ،، انا باذن الله راح ابدأ في المعهد في السمر سمستر ..

عندي سؤال بخصوص السكن انا افكر اخذ سكن الجامعة وما ادري كيف اقدم عليه ..


واذا تنصحوني في سكن افضل ما اقول لا

ياشباب
انا ان شاء الله راح اكون في جورجيا بتاريخ ٦ مارس

في معهد جورجيا تيك

ابغى اسئل هل يعيق سكن الطلاب السعوديين مع بعض
تعلم اللغه ام لا

يعطيكم العافية على المعلومات

انا باذن الله با انتظر رد المعهد على قبول اللغة

و حابه اكون فكرة مبدئية عن المدينة والدراسة

السكن مع طلاب سعوديين حلو عشان ماتحس بالغربه و السكن مع اجانب برضو حلو يقوي لغتك ..

فانت اذا دمك بارد و ناشف و ماعليك من هم الغربه خلك مع اجانب .. اما اذا تبي احد معك يسولف معك و يعطيك وجه خلك مع سعوديين

و بالنسبه لي انصح انك تقعد مع ربعك احسن لك .. وتدريب اللغه تقدر كل شي هنا راح يعلمك شي جديد بس بشرط ماتعتمد على احد يعني حتى سداد فاتورة الجوال انت تتصل و تسدد مو تقول لخويك يسدد لك .. وطلبك بالمطعم انت تطلب .. لاتقول مامنها فايده بالعكس كل ماتكلمت كل ماصرت فصيح بالكلام .. بالبدايه ماتدري ايش تقول مع انك عندك كم هائل من الكلمات بس ماتعرف كيف تركبها بس مع الخبصه و التعلم و الطلب و التعود بتصير شي ثاني انت ماكنت تتخيل انك حتكون كذا ..


وشف جامعتك وش تعطيك مجاني ولا تخليه سجل فيه ..

مثلا بجورجيا ستيت .. يعطونا مدرس خصوصي يسمونه توتر .. هذا مسموح لك تاخذه فقط مرتين بالاسبوع .. انا اخذه مره بالاسبوع حتى لو ماعندي اي شي بس اروح اطقطق عليه و اراجع معه الواجبات و اجيب كتبي كلها وانشب بحلقه لين يخلص وقتي و مايصدق يفتك مني ..

و فيه برضو يعطونك ورقه تعبيها و تختار بارتنر اللي هو شخص تتحدث معه باي شي .. انا ماخذ واحد نتكلم عن اي شي اخر مره تكلمنا عن الثقافات و اللي قبلها عن الكوره .. و اللي قبلها عن الطلاق في امريكا ومواضيع مال ام امها داعي بس عشان تتحادث و تقدر تقول له تقدر تساعدني باي شي و حيساعدك .. الشعب الامريكي فرندلي و يحب المساعده .. بس لاتطلبه يحاسب عنك بيدخل بعيونك .. و قد عزمته مره ببيتي بس جاب العيد جاب خويته و قلت له ترى عندنا ماتقدر تقعد تبوس قدامنا لارحت لحالك انت وياها سو اللي تبي .. و احترم الشي هذا و بالعكس اعجبه و بدا يحترم الدين الاسلامي بشكل عجيب .. بس برضو خل له حد و انت لك حد في الكلام معه لاتعطيه وجه مره

وبالتوفيق للكل

الله يعطيك الف عافية اخوي مازن مشاركاتك افادتني بشكل كبير بعد الله عن جامعة جورجيا ستيت ..

استفسار اخير :

انا وصلني اي توني لمعهد جورجيا ستيت بس باقي ما قدمت للجامعة نفسها والملحقية تطلب قبول جامعي وما ادري الجامعة تعطي قبول مشروط او لا ؟

ليه شاغل بالك بتقديم الجامعه ؟

باقي بدري عالتقديم .. اول ماتوصل انت تقرر تبي تكمل الجامعه هنا او تدرس بس لغه هنا ..

انا تخصصي حاسب وجورجيا ستيت مو مره بالحاسب بعكس جورجيا تك .. اللحين بدرس لغه هنا وبعدين احول الماستر بجورجيا تك .. فلا تتعب من اللحين بالجامعه شوي وتعرف ايش اللي يناسبك لمن تعيش الوضع مستحيل اقول لك هذا احسن و هذا مو احسن لان كل واحد وله وجهة نظره

اما الملحقية ماتطلب منك قبول جامعه مشروط او غير مشروط الا بعد سنه وثمانيه شهور اذا شملك التمديد .. فانت تعال و ادرس اللغه و اذا وصلت لفل 3 او قعدت هنا اكثر من 5 شهور ابدا اختبر اختبارات ايلتس او توفل .. لانو لمن اول ماتوصل و تختبر حتجيب العيد وتروح من غير فايده .. لكن تعلم عن طريقتهم الاكاديميه و التعليمية اول بعدين روح اختبر و حتلاحظ انك باول اختبار ماجبت درجه بس تعرف انت في ايش غلطت وايش الخلل عندك وتكون فاهم اكثر وتستفيد اكثر