لمن يرغب مشاركتي في سكني الحالي ببوسطن

الله يسهل أمرك أخي ..وتجد الشخص اللي يشاركك السكن ..بالنسبة لي أنا جايه بوسطن قريباً وحابه اعرف أسعار الشقق هناك لأني سمعت أنها غالية .


( تمت المشاركة باستخدام تطبيق مبتعث )

شكرا أختي، والله مايهمني كثير اذا فيه أحد رغب في السكن معي .. ولكن لأني شفت الشقه كبيره علي فقلت لعل فيه أحد مزنوق على قولتهم ويبي فزعه..

بالنسبه لسؤالك فالسكن هنا غالي بصراحه وخاصة ماعندك الا مكافأتك! وغالب الطلاب يسكنو مع بعض أو يسكنو مع عائله.. وأعتقد بحكم تجربتي البسيطه ان ايجار أي شقه مقبوله لا يقل عن 1500-1600 الى عدة آلاف بحسب مكان الشقه ونظافتها.. وطبعا معظم الشقق هنا غير مؤثثه فالله يعينك على الأثاث والخدمات الأخرى.. فيه عدة مواضيع في المنتدى عن السكن في بوسطن ممكن تفيدك أكثر مني لأني أمضيت مايقارب الشهر أبحث عن سكن جديد أو مجدد بسعر مناسب وقريب من الجامعه.. وكثير من الشقق يعلن عنها باستخدام صور قديمه يوم ان الشقه باقي جديده بينما الشقه صارت قديمه ومعدومه وأحيانا تكون في عماره موبوءه بالفئران أو يكون الحي اللي هي فيه بعيد جدا أو غير آمن!

لذا أنصحك بالتالي:
يا اما تجين قبل بداية دراستك بشهر على الأقل وتسكنين في سكن مؤقت وتبحثين عن الشقه اللي تناسبك..
أو تبحثين عن عن احدى الأخوات المبتعثات اللي ترغب بروم ميت..

وعموما من أشهر المواقع اللي تعرض شقق للايجار craiglist
وعشان تشوفين الشقه قبل تستأجرينها لابد تسوين موعد مع مالك الشقه أو مكتب التأجير فلابد تكونين هنا! ولاتنسي انه راح تدفعين ايجار أول شهر مع تأمين ورسوم لمكتب العقار وغالبا المجموع عباره عن ايجار الشقه مضروب في ثلاثه..

الله يسهل أمرك
تحياتي

مشكور فهد ربي يسعدك ماقصرت ...فعلاً الشقة وهم تأثيثها ان شاء الله بخلص منه قبل الدراسة خاصة ان البحث يبيله وقت وتفرغ .ربنا يسهل أمورنا جميعاً.