قيادة المرأة والحوار // هُنا "للجميع..

ياشباب
ادري ان فيه ايادي خبيثة تبي تستغل الوضع
وهي فعلا نجحت وجعلت قضية السواقة للمراة قضية وطن ولها مارب اخرى واكيد لها تبعات
وهذا اللي العلماء يتخوفون منه
لكن

انا في نظري والله السواقين اخطر واشد ضررا من سواقة المراة
انا عن نفسي كنت من الرافضين للفكرة
لكن رحت لمصر وشفت كيف الحريم يسوقن وبكل احترام
وهي لابسة نقابها وحتى كفوفها ما تبان يعني محتشمة


بعدين ياشباب ليه البعض شايف الشباب السعودي انهم وحوش وبس همهم الشهوة اعتقد في نوع من المبالغة في الموضوع
اكيد اذا شفنا بنت تسوق راح نوقف ونطالع لكن هي في اول شهر اول كم اسبوع لانو هذا جديد بالنسبة لنا
بعدها اعتقد عادي جدا لان سبحان الله كل شيء جديد يقابل بالرفض والاستنكار


اعتقد لا يوجد نص شرعي يمنع المراة من السواقة

الله يجزاك خير .. فعلا كلام صحيح.

الجميل في موضوع "حق قيادة المرأة السعودية لمركبتها " والذي يبعث على التفاؤل ان (المتدينين) في السعودية متباينين في ارائهم إلى حد كبير فمنهم من يرفضها بشدة ومنهم من يؤيدها بشدة ومنهم من يرى ان الموضوع برمته غير مهم .

والأجمل ان القيادة الحكيمة - وعلى رأسهم خادم الحرمين حفظه الله - يؤيدون هذا الحق ويقولون ان مسألة قيادة المرأة ترجع للمجتمع نفسه .

كل الاراء المعارضة أو المطالبة يجب ان تبقى في حدود جدال الأخوة في بينهم ومن الخطاء الفادح ان يتحول هذا الجدل الى تخوين اي طرف لاخر بأنه مشبوه ومدعوم من جهات خارجية !!

شكرا

اخي الكريم انشاء الله كلنا متدينين ومطاوعة لله عز وجل

انا اوافقك في الراي
وانت صنفت راي الشارع الى ثلاث وانا شخصيا الى اميل الى الراي الثالث ان الموضوع برمته غير مهم .

بارك الله فيك

أسمــح لي رأيــك ليــس له أي قيمــه في ظــل وجــود هيئــة كبــار العلمــاء..ووزارة الداخليــه...
وهي الجه المســؤوله في دراســة هــذا الأمــر..
الدراســه تشمـــل عدة نــواحي..وليس من منظور واحــد..مثالك عن مصــر ليس له اي قميه واستشهاد في غير محلـه في ظل أختلاف الثقافات والأعراف بين البلدين...كأني أقول في أوروبا المرأه تقود السياره ولا يوجد أي عائق لها!.! بغض النظر عن أختلاف الأديان..

الفرقعــات الفيسويــه والتويتريــه ومعها الأعــلام لا تحــرك ساكنــاً في بلــد يحكــم شرع الله...وجه مسؤوله بدراســة المــوضوع كاملاً ومن عدة نواحي..ليس من منظور البعض الضيق يفضل قيادة المرأه لسبب واحد أو سببين على عدة أسبــاب لا تظهر له..

في أمان الله..

طيب بس سؤال:
اذا بنشرت سيارة البنت وش تسوي ؟؟
هي ماراح تخلو من حالتين:
1- اما تشمر عن ساعديها
2- تطلب من الجنس الاخر انه يساعدها


اذا صدمت احد تتوقع ايش ردة الفعل:
جلهم اذا لم يكن كلهم راح تعطي صرخة مدوية يمكن الرجال اللي في السيارة الثانية تجيه سكته قلبية من صرختها(وسواقتهم في الدبابات وسيارات الكهرباء اللي في الملاهي النسائية خير برهان)


يمكن راح تفتح الاشارة خضراء والاخت مسنتره ماتحركت تتوقع ليش؟
تلقاها تحط روج او مسكره


الرياض على زحمته راح تصير زحمتين ؟؟
لان الحين بس شباب مرررررررررررررره زحمة كيف شبب وبنات ولاتنسى طريق العليا في الاربعاء والخميس


راح تهدر اموال الاباء وتلقى اغلبهم مفلسين تتوقع ليش ؟؟
البنت تلقاها كل سنة كاشخه بسيارة هذا اذا كان الدخل متوسط
اذا الدخل مرتفع تلقاها مطقمة مع بلوزتها كل يوم.



(تخيلات جتني وانا اقرأ كلامك ويمكن تصير حقيقة)
لكن اخوي تفكر في الموضوع زين

ماشاء الله عليك اختى د/منى

ابدعتي

اخي الكريم ومين قالك باني قارنت نفسي بهيئة كبار العلماء
اكيد رايي ما له قيمة بجانب علمائنا
لكن هي وجهة نظر قلتها والحمدلله لم اخالف نصا شرعيا
وموضوع مصر انا بس حبيت ابين انو مو شرط اللي تسوق سيارتها تتعرض للتحرش او تسبب مشاكل
لاني اعتقد اذا كانت محتشمة ومحافظة ع لبسها الشرعي لا اعتقد بان هناك من يتجرا ويتعرض لها
وحنا ملاحظين عند الاشاراة ياما شفنا سيارة فيها بنات معهم السواق حقهم
ويوم توقف السيارة عند الاشارة يجيك واحد يرمي لهم الرقم والثاني يتلفظ والثالث مدري وشهو
يعني التحرش والاعتداء موجود سواء كانت هي تسوق ولا السواق هو اللي يسوق

وبارك الله فيك وشكرا ع النصيحة

اما السلبيات اللي تكلمت عنها الاخت بنت الفوارس
اقول انا سبق وقلت بان العلماء شايفين بان للسواقة لها مساوي كثيرة وتبعات
متى ما زالت هذي العوائق فلا يوجد ما يحرم ع المراة سواقة السيارة
وهنا العلماء الشرعيون وايضا علماء الاجتماع هم من يحددون الاضرار



دمتم بخير

أختي الفاضلة الدكتورة منى جزاك ربي جنات النعيم على الموضوع القيم

والله أسال أن يحرمك على النار وجميع المسلمين

الحمدلله أراء عقول جديده نفتخر بها تريد التعلم وتريد المعرفة والتعليم والحرية وتريد لهذا الوطن

العدل بين أفراد مجتمعه وتريد أيضاً محاربة العادات والتقاليد المتخلفة التى لا تمد للدين بصله

وأهمس لهم بهمسه شقيق صغير ..... بأذن الله سوف ينجلي قريباً هذا التخلف بتكاتفنا ضد اصحاب العقول

المغبره والمصديه ...فهذا اليوم ليس بعيداً فأصبروا فأن الله مع الصابرين

أما العقول الأخرى فأكتفى بقولي لهم المرأه سوف تقود رضيتم أم أبيتهم ....طوطوطوووووووووط

أطيب تحياتي وتمنياتي لكم بوافر الصحة والعافية