ابي مساعدتكم و الله اني بمعضله ، الله يلهمني و اياكم الصواب المصدر: http://www.mbt3t

November 19th, 2011, 05:13 PM

هلا فيكم كلكم
((اللي ما عنده وقت يقرا كل الموضوع يشوف اخر سطرين فيهن الزبده))

انا كتبت هالموضوع لاني محتار حيره لا يعلم بها الا الله و استخرت الله كثير و شاورت كثير لكن ما قدرت اتخذ قرار.
اللي مسبب الحيره هو التالي :
انا مهندس متخرج من سنة تقريبا و متوظف في قطاع شبه حكومي العمل متوسط يعني لا ضغط مره مره و لا راحه مره مره براتب الحمد لله جدا جدا ممتاز و بنفس المنطقة اللي ساكنها ، المكان اللي انا فيه يعتبر المهندس له نصيب الاسد من المناصب و الدورات و النفوذ و ما الى ذلك يعني اكثر من 90% من رؤساء الاقسام و المدراء العامين و النواب مهندسين ، بالعربي المهندس هو الموظف رقم 1 .

قبلت كمعيد بكلية الهندسة بالجامعه و طبعا المعيد لازم يطلع يكمل ماستر و دكتوراه بعد سنه كحد اقصى من توظيفه ، الحيره جايه من اني ارغب الوضع المادي الممتاز في مكاني الحالي مع وجود فرصة ممتازة للحصول على مكان جيد بعد كم سنه ، و بنفس الوقت ودي بالشهادات بس الوضع المادي للمعيد او عضو هيئة التدريس بشكل عام سيئ الصراحه ! ابعطيكم مقارنة بالوضع المادي الحالي و وضع المعيد او الدكتور بالمستقبل :
راتبي الاساسي الحالي حول 10500 و مع بعض البدلات يوصل لاكثر من 11500 الصافي ، العلاوة السنوية 640 ريال
اسكن ببيت الاهل يعني اوفر مبلغ كبير يساعد على امتلاك بيت ولو دور صغير (خصوصا اننا في محافظة صغيرة نوعا ما يعني العقار و البناء رخيص مقارنة بالمدن) ثم الزواج و كل هذا بظرف 3 سنوات من الان ان يسر الله.
رحت اشوف اوضاع المعيد و المحاضر و الاستاذ المساعد المادية حصلت الوضع ما يشجع على التعب بصراحة ، يعني المعيد يبدا 7000 تقريبا و ما راح نحسب البدلات لان اغلبها مؤقته مثل جامعه ناشئة و ندرة و غيره ، المحاضر 9000 تقريبا ، الاستاذ المساعد بعد عناء 8 سنوات تقريباً يبدا بـ 13000 راتب اساسي و علاوه 570 يعني اقل من علاوتي الان و انا توني متوظف يعني بذاك الوقت بتكون علاوتي وصلت 750 او اكثر وراتبي الاساسي يكون صار اكثر من 16 الف! اعرف انه مع البدلات يوصل الاستاذ المساعد 20 و اكثر ممكن بس حنا نتكلم على الاساسي اللي راح يتقاعد عليه الواحد واللي مافيه منه على قولتهم مضمون و بعدين بدلات الجامعات كثير منها يروح مع الوقت و كل شوي ناطين الحين يبي يدرسون تقليص بدلات اعضاء هيئة التدريس بالجامعات!
الزبده اني محتار بين الشهادات و المادة و الاستقرار بدري.

لا احد يقول الدراسه ما تبي واحد يفكر بالفلوس و من هالكلام لان مهما كان الواحد بيرجع دكتور و تعبان بس يبي وضع مادي مرتاح برضه يعني هو ياخذ راتب و مكافأه اثناء الدراسه من هنا و يصرفها على سكن و اكل و شرب و حضانات و سفر من هنا يعني التوفير على ما اعتقد معدوم او شبه معدوم خاصه و ان الجامعه جزاهم الله خير يشيلون البدلات و يشيلون نص الراتب لا و ياخذون التقاعد كامل من النص الباقي (لو ياخذونه كله اريح ) وصحيح ان المكافأة تزيد بعد الزواج و بعد انجاب اولاد لكن الصرف يزيد برضه و المسؤليات تزيد مثل واحد يقولي مكافأة ولدي 1000 ريال تقريبا و انا وزوجتي ندرس لذلك نحط على الالف 500 و نعطيها الحضانه .

شاورت ناس كثير و استخرت الله لكن عجزت اتخذ قرار ، من اراء اللي شاورتهم :
رح و ادرس و اذا رجعت اسكن اجارات 6 او 7 سنوات و عبر امورك لين تنفرج و تقدر تملك بيت (يكون عمري وقتها 40 او اكثر )
أجل الدراسه بعد كم سنه اذا أسست نفسك صح و ارتحت من كل شي يعني لا هم بيت و لا زواج و لاشي حتى لو تدرس بجامعه محليه و تاخذ ماستر على الاقل.
خلك بوظيفتك و ابلع العافيه و يكفيك لقب مهندس اللي يفرط بوظيفة حلوه و يروح يتعب برا اللي يبي لقب و انت عندك (هذا وجهة نظرة جايه من عند الالقاب )
طبعا فيه احد يعطيك راي بدون تبرير مثل ناس قالو اقضب ارضك و ناس قالت رح و انت مغمض .

طولت عليكم لكن والله من مابي من حيره و هم ، بالنهايه ابي منكم امرين الله يجزاكم كل خير :

- للمجربين ، هل التوفير للمبتعث المتزوج ممكن؟ يعني بعد ما اخلص ماستر و دكتوراه برجع و معي مبلغ كويس و لا برجع على الحديده و اجلس اشق طريقي مره ثانية؟ (طبعا تختلف الدول و الولايات لكن اتكلم عن المتوسط يعني بولايه متوسطة الاسعار و صرف متوسط لا بذخ و لا شح يعني بالمعقول كل شي)
- الامر الثاني ابي شوركم و تصويتكم الله يجزاكم كل خير على المساعده و لكم كل التقدير و الاحترام.

• نشر عبر تويتر
• نشر عبر فيسبوك
• نشر عبر جوجل