ماهي مواصفات البنت الأكثر جاذبية للشباب؟؟ والعكس .. أرجوا المشاركة من الجميع

والله قلبت المواجع , انا شايله موضوع الزواج من دماغي نهائيا واحد الاسباب هو الخوف من ماهية الطرف التاني .
لكن لو لا قدر الله فكرت اتزوج او تخلصت من تصوراتي السلبية حول الزواج , نفسي باشياء معينه تكون في سعيد الحظ
بتفصيل ممل

بجانب الطلبات المعتادة دين اخلاق .... ألخ

1- مربي لنفسه ولي ولاولاده , واب لاولاده , رزين عاقل متفهم متوسط اللين والشدة , محسن الظن , يسير غير عسير .
2- كريم , عقلاني واقتصادي بحدود , ونفسي نفسي بكون مخه تجاري زيي
3- طيب ويحب الخير للغير ومعطااااء ويساعد حتى عدوه , بالعربي كريم الاطباع.
4- مايحكي في الناس , يتدخل في الناس بالموعظة الحسنة وبس , ويفهم ان ذنبهم على جنبهم
وعند ربهم وانو قبل مايحكي في اي انسان يعرف انه بشر وممكن الخطأ اللي استنكره من فلان و علان يقع هو نفسه فيه يعني مايشمت .
5- طفولي ودمه خفيف ويحب جو العيله والطلعات والتماشي والهباله والضحك .
6- مايتحكم فيا < فيس يبكي , يفهم اني انسانه حالي حاله , يفهم طبيعه الرجل والمرأه وان الاختلاف بينهم مش في نقص الحقوق للرجل او المرأه
انما الاختلاف في التكوين النفسي والجسدي بس , ويفهم انو لو احد تحكم فيا واخد حقي لو شعره بس يعتبر امر حساس عندي جدا .
7- يعرف ايش المعنى العميق للزواج والاسرة والاطفال والتربية .
8- تكون عيلته كبيررررررررررررا ومتشعبين ولو كانوا بكتر قبيله .
9- يعرف دين الله ويطبقه بأتزان لا افراط ولا تفريط , ياخد الدين كله ويدخل في السلم كافه , مش اللي عجبه ياخده والي ماعجبه ماياخده
تخلف وهمجيه واستصغار للناس او الاجانب او الاقل شهادة لااا , غير عنصري , يعني متواضع .
10- مرن , يسامح , يتفهم , يتقبل النقاش , يعطيني حرية الاختلاف معه , يسمع مني , نتشارك حياتنا بالنص .
11- يضحي , مااحب الراجل اللي يتعامل مع المرأه معامله شركة او مؤسسه , ان كان له مصلحة عمل الشيء اللي تبغاه وان لم يكن له رفض ,
نهائيا مش علاقه موده ورحمه .
12- يتفهم الاخطاء , الحاجات البشرية والضعف البشري , يفهم انو فيا عيوب وهو فيلو عيوب , ونحنا مكملين لبعض وستر وغطا
ونحنا نتحمل بعض , ان كان بيوم زعلان وزعق عليا لاني ستره رح اتحمله , وهو كذلك , انسان زي النسمه للي حوله ان مانفعهم مااذاهم .
13- باررر بوالديه واهله , ويزورهم على طووووول ويقدم امه وابوه عليا .
14- الصراحة ثم الصراحة , لانها صفاء الحياة زعلت منه اصارحة بكل شيء هو زعل مني يكلمني عن كل شيء غلطت بحقه او غلط بشيء من ورايا نتصارح وبعدها نتسامح .
15- يحب العلم , متفائل , ايجابي , يقدس الحب والعائلة , مشاكلنا ماتتعدى حدود بيتنا .
16- يعرف انو الحياة عقبات وانو مش كل ماصارت مشكلة قلنا طلاق ولا بروح بيت اهلي , يعرف انو الحياة زي البحر موجها كتير وانو هدي طبيعه الحيااة
والمشاكل ملحها , بكدا يكون عندنا قدرة اكبر على تفهم المشاكل وحلها .
17- متعلق بالقران سواء قراءة او تفسير , لان اللي يتمعن في القران يعلمه الله من علمه ويعطيه من حكمته ويعطيه اداب مايملكها الا المتعلقون بالقران .
18- خياله واسع لمن نسولف ونضحك مع اولادنا ونشبه وننكت يتماشى معانا ونتخيل اشياء مستحيله ماتصير الا في افلام الكرتون وهبالات اطفال نلقاه عالخط معانا.
19- يعرف كيف يحقق القوامة الصحيحه باسلوبها الدقيق في البيت مو بالاسلوب الخطأ اللي الناس فاهمته دحين .
20- عصري , ينسجم مع التطورات التغيرات , واذواق اطفالنا لمن يكبروا , غير متحجر التفكير , يعني يواكب عصره .
21- نشترك انا وياه في تجارتناااا .
22- لبق في الكلام , لسانه يقطر عسل , يكون على شخصيته الحقيقه , نشيط يحب الرياضة بمختلف انواعها , ملتزم بجدول نحطه في كل اسبوع يشمل
جميع امور حياتنا , غير فوضوي , ويحب النظااافه والترتيب .
23- نتفهم ونوظف اختلافاتنا في الافكار والشخصية والعادات بشكل ايجابي , لحتى ننسجم ونصير متل الشخص الواحد .
24- مو زي مجتمعنا الان , اتمنى يكون عادل عادل عادل , ويعطي حرية لكل افراد البيت , ومايتجبر علينا , ولا يحس انه ادا سمح لنا بشيء معين
انو من عليا او تكرم به لنا < فيس يبكي بقوة .
25 - ابو فزعات بإتزان , فيه شويه من البداوة يحب النار والحطب والبر بس مو مره , يحب يفحط بالدباب في البر ويخليني افحط < فيس يبكي
26- يحب المقالب والمفاجأت بإتزان , هزلي وقت الهزل وجدي وقت الجد .
27- يثق بنفسه وبعاداته وتقاليده الحسنة ومايغيرها لانه انحرج او انكسف , صريح بذوق مع الكل .
28- يهتم بنفسه وشياكته بشكل غير مبالغ فيه .
29 - سوبر مان مايخااااااااف , واهم شيء مايخاف من الجن بسم الله الرحمن الرحيم .
30- يحب المطر , ويحب الشعر , ويحب التأمل .
31 - يقدر مشاعر الناس ايا كانوا , ويمتص غضب اللي حوله , ومحاور جيد , مثقف .
32- يكون له علاقات عمل مرا كتير في اكتر من مجال , ويكون صادق مع نفسه قبل مايكون صادق مع الكل .
33- قنوع وفي نفس الوقت يسعى للتحسين , وفي , عيونه على حدود بيتنا .
34- حاسم نص ونص , عصبي في اوقات معينه , هيبه .
35- له هدف بحياته , قلبه عالمسلمين , يثبت هويته الاسلامية .

خلاص خلصت تفصل التوب هههههه

ممكن تكون امنياتي مرا كتيرر بس ماهي مستحيل انها تكون صفات داخل شخص ما , لانها امور سهله ولانه المفترض الانسان يكون ممتلئ
اكتر مما انه يكون فارغ , ويعيش الحياة يبني نفسه ويتعمق فيها مش يسيبها سطحية .
وطبعا لابد من وجود الاختلافات والنقائص بين الزوجين لحتى تحلو العلاقه , وكمان لازم انا اكون بقدر الصفات اللي انكتبت في الاعلى حتى اتمنى منه يكون كدا .

وفي النهاية تعيش العزوبية , بعبشوا اهلي , يعيش النوم , يعيش الراتب هههههههه .