بحكم خبرتك..ماهو افضل شراب كحولي شربته؟؟

لحظة..لحظة لا تستعجل يا مراقب وتحذف الموضوع... حاشا وكلا ان انزل موضوع تافه مثل هذا.
سؤالي هل بيجي يوم وراح يكون هذا السؤال عادي.. سؤال مر على بالي وانا اتابع الحلقة السادسة (هذا حنا) من طاش 15 واللي يحكي با ختصار ان كثر الطق يرخي الحديد!! يعني مجتمعنا حطهم عند الامر الواقع.. راح يعارضون بس راح يرضون يعني يتعودن. نعطيكم امثلة:
بداية ظهور الراديو ومعارضة الناس له, لدرجة ان اللي عنده رادو يعتبرونه فاسق او زكرتي على قولتهم. حتى انهم يقاطعونه الى ان جاء التلفزيون وصار اللي عنده راديو يا حليله وصار السربوت اللي عنده تلفزيون. حورب التلفزيون ووجد معارضة شديدة لدرجة ان بعض المتشددين بغو يفجرون مبنى التلفزيون او ما افتتح. في النهاية راح فقيد الامة الملك فيصل بن عبدالعزيز الله يرحمه بسبب ذلك. كذلك تعليم البنات وجد معارضة شديدة فكيف البنت تطلع من بيتهم عشان تدرس!! البنت مكانها البيت.. لكن الفكره مشت وبناتنا الان فيهم المدرسة والدكتوره والمهندسة و عمار يا سعوديه.
بعد عقود جانا الدش فترة حرب الخليج الثانية بقناة سي ان ان.. وقالوا وقالوا واذكر شخصيا ولد عمتي عنده سي ان ان وكان ابوي وكم واحد من جماعتنا مستنقدين وحاطينه اكبر سربوت لدرجة يقولون سي ان ان تجيب افلام تحت السره . ايضا جدي كان(كان) حالف يمين مايدخل بيت اي ناس عندهم منكر اللي هو الدش. و طبعا من ينسى المطاوعه بالساكتوون يصيدون روؤس الدش واعتبروا كل راس يسقط فكأنها جهاد في سبيل الله . بعد دخول القنوات في بيوتنا وكثرت, صار الدش عادي حتى المطوع صار يركب دش اسلامي. ابوي الل يحفظه اللي كان ينقد على ولد اخته صرت لا اتخيل حياته يدون دش لدرجة الريموت لا يطيح من يده. وجدي كفر عن ذنوبه وصار مع جدتي يتابعون الدش بس قنوات علميه واسلاميه. بالاخير صار اللي ما عنده الا تلفزيون وقنوات عربية هو الصالح, وصار اللي قالوا عنه سربوت قبل 35 سنة على قولتهم ( صال الله الجنة) وما هو القادم؟؟!!
جوال ابو كاميرا وسالفته سالفة لدرجة انه حرموه وحتى اول مانزل صار ينباع بالخفى مثل الدش اول ظهوروه. انا من نفسي يوم سمعت ان فيه جوال فيه كاميرا استنكرت قبل لا اشوفه قلت افا والله راحوا فيها حريمنا وكلن بيشوفهن لا في الزواجات ولا في غيره.. وتمر الايام بعد الايام .. صار كل الناس عندهم جوال كاميرا ,ومن اللي ماعنده جوال ابو كاميرا طبعا الناس ليش مشى عليهم .. بعد ظهور الاتصال بالفيديو لذا صار اللي قبله اهون.. موقع يوتيوب يوفر لك مشاهد من كاميرا الفيديو يعني الناس صارت هي اللي تصور نفسها وتحط وشوفوني.

العباية والغطاء وتدرجاتها عبر العصور حريم اول الغطاء 5 طروق وتطق السر من طولها ستر وعفاف. مع الايام تطورت مرورا بالعباية على الكتف, والله من بنت طردوها رجال الحسبة من الاسواق بسبب العباية على الكتف . مرت الايام اللين وصلت الى العباية المخصرة واللي اعتبرها فستان سهره اسود. وملون بعد.وصار رجال الحسبة يطاردون المخصرة وصارت اللي ام عباية كتف مظلومه لان من نظري كلما طلع شي العن صار اللي قبله اهون ( نظريتي).
الغطاء نفس الشي تدرج من الشيلة ام 5 طبقات والذي مازالت جدتي متمسكة به الله الى ان توفاها الله, بعدها خصوصا في نهاية السبعينات صارن يعض حريمنا يستخدمون العباية الصغير ام لمعه ومعه شيله الى الذقت وطبعا الشيله مرشوش عليها مريتو اللي طلعت عظم همت تلف الشيلة اللين يطلع فوق عرف ديك خخخخخ مدري اظن بعضكم شافهن.. المهم بعدها طلع النقاب وتدرج الى اللثمة همن رجعوا للغطاء بس خفيف مره وتسمى طرحه. بعدها شالوا الغطاء وصار حجاب مع ظهور الوجه وصاروا رجال الحسبة يخلون السابق ذكرهم ويقولون تغطن. وماهو القادم؟؟!!

سواقة المرأة و توفير دور للسينما كلها عايشين الجزر والمد فيها واتوقع ان بيجي يوم ويصير عادي والله يستر ولا ودي اخوض في نقاشات عنها لان الناس اسهبوا في ذكرها . ومن رأيي ان حنا اذا ضخمنا اي موضوع راح يمشي علينا لاننا اشهرناه وعودنا مسامعنا ومجالسنا عليه اللي صار جزء لا يتجزأ من حياتنا مثلا ماسبق وذكرت من الامثال السابقة.
لما كنت بالسعوديه اذا شفت بنت ما تتغطى .... لانها غير انها ما التزمت بدينها.. لم تحترم اهلها ولا الناس
لكن... لكن.. لان كثر الدق يرخي الحديد.. ها انا في امريكا وارتخى الحديد وصرت الان في امريكا اذا شفت بنت لابسه بلوزه وبنطلون و متحجبة اقول في نفسي : ما شاء الله عليها اللي حافظه حجابها.. برجع للسعودية قريب (ويا خوفي ان ارتخائي يزيد)

بعد هذا قلت اذا ربعنا كثر الدق فيهم يجيب نتيجة فهل بيجي يوم وتصير الخمور مسألة شخصية؟؟ يمكن ليش لا فكثر الدق يرخي الحديد.


رابط الحلقة للي ماشافها