ابشركم سويت احصائية للشعب السعودي.. باركوا لي.. اكثر شعب مكشر في العالم !!

April 30th, 2008, 11:30 AM

<< هذي وش هي ؟؟

هذي ابتسامة .. وش هي ؟؟ ابتساااااامة


<< وهذي وش هي ؟؟

ابتسامة عريضة .. ابتسامة ايش ؟؟ عريييييضة!


ابتسموا يا عالم!! والله البسمة بلاااااش


اطلع من البيت بروح مشوار..

من باب بيتنا الى السيارة .. امر بـ (على اقل تقدير) ثلاث اشخاص..

اثنين سعوديين وواحد اجنبي..

السعوديين كل واحد فيهم ماد بوووزة شبرين ومكشر وانواع الاكتئاب وضيقة النفس تشوفها في وجهه..

والاجنبي يبتسم .. ويسلم بعد .. وهو واقف .. وطبعاً اتكلم عن الاجنبي اللي كل يوم اشوفه..

اسمه ابو الكلام .. باكستاني الجنسية ..

اركب السيارة واروح سوبر ماركت او بقالة مثلاً..

ونفس الموال ..

اسلم وتبدا انواع الابتسامات من الاجانب ..

والله انهم حبيبين ..

تبتسم له ويبتسم وينبسط .. وترتاح نفسياً .. اما السعودي تبتسم له يطالع فيك بكل استغراب ؟؟

يفكرك " تسـخر " منه او تغازله مثلاً ؟؟ مادري وش سالفتهم ؟؟


يا عالم اضحكوا .. ابتسموا

والله تسدون النفس

رحت المطعم اليوم انا واخوي

مطعم ابو زيد .. نفطر فتة وفول ومعصوب

واطالع في الشعب السعودي وهو مرتص على الكراسي وكأنهم اصنام
كل واحد مبرطم واذا طالعت فيه تحسه وده ياكلك ههههههههههه

ياهووووووه وش السالفة ؟؟

ليش الشعب السعودي بالذات محارب الابتسامة ؟؟

وحتى لو كان يضحك وطالعت فيه تشوفه يبرطم .. وتختفي الابتسامة!!

يعني لو كانت دولتنا سبق واستعمرت او احتلت او مرينا بحرب طاحنة ..

كان ممكن نقول معقدين بسبب الحرب مثلاً ؟؟ << يحاول يطلع مبرر بالقوة

لكن الارض الوحيدة تقريباً اللي ما سبق واحتلت هي ارض الحرمين ؟؟

لو قلنا مثلاً الفقر والحاجة ؟؟ كان اقول لك بكل بساطة روح دول شرق وجنوب اسيا

واولها الصين .. الفقر لاعب فيهم لعب ..

ومع ذلك والله يالابتسامة هذي عندهم انها شي ضروووووري ومقدس

واذا ابتسمت لواحد تشوووف كيف يرد بابتسامة ودك تطق لك بصورة جنبها


طيب وش السبب ؟؟

وش اللي معقد السعوديين من الابتسامة ؟؟ بالذات في الاماكن العامة ؟؟

يعني نفسي اعرف وش اللي يدور في بال الشخص اللي مكشر للناس دائماً اذا خرج من البيت وماد بوزه متر ولاهو طايق احد .. ولا يبي يبتسم ..

يعني مافيه ناس يبتسمون بكثرة تقريباً الا المطاوعة الله يجزاهم خير..

والله اني ارتاح لهم ..

وما اصدق اشوف واحد منهم عشان اسلم وابتسم .. واستمتع بالرد.. ابتسامة تطلع من قلبه وربي
والله انكم حبيبين يالمطاوعة

لكن مادري وش عند هالشباب .. لا تكون موضه ؟ والله ماهي بعيدة

موضة التكشير

او يعني برستيج واتيكيت ومادري وشو ههههههههههههه

ياخي والله انك تطلع تدور لك مكان توسع صدرك فيه وترجع ونفسك مسدودة

من وجيه القفلة اللي شفتها !!


الله يرحم والديـــــكم

ابتسموووووا

واضحكوووووا

ترى الدنيا تقدر تغيرها في عيونك

لكن تحرك انت وابدا

سو شي

ابتسم والله تشوف كل شي يبتسم لك


اذا كانت اسنانك " فضيحة "

وتنحرج تبتسم قدام الناس..

عادي ياخي.. رح سو لها تلبيس عند اقرب عيادة اسنان
واستمتع بالابتسامة.. ونتايجها؟

المهم ابتسم !!!



وهاااااك << مع اني ماطيق هالوجه ابو برطم مشقوق لكن مافيه الا هو وش نسوي




وعذراً على الاطالة وشكراً ..

• نشر عبر تويتر
• نشر عبر فيسبوك
• نشر عبر جوجل