تجمع طلاب وطالبات سان فرانسسكو

اكثرهم بامباسي

تيب مافي احد معي .. شكلي لحالي هع ,,,

الله يعافيك
اسعار الفنادق تختلف, فيه فنادق تبدأ أسعارها من 60 دولار باليوم, وطبعا كل ماتحجز بدري يقل السعر عليك
ماعدا في الإجازات, وبما إنك في أمريكا فخلي كل حجوزاتك بالنت أحسن وأرخص بكتييييير.

عوائل فيه, إدا بتاخدهم عن طريق المعهد حيكون أغلى شوي, لأن المعهد ياخد عمولك منك برضه, ممكن
ياخد 150 دولار او أكتر, بس الشي الحلو لما تاخد عائلة عن طريق المعهد إنك ماتظطر تدفع تأمين للعائلة.
الطريقة التانية, إنك تدور بالنت على ( roommate ) وفي مواقع للطريقة هادي, يعني نفس نظامي, إثنين عندهم شقة وكل واحد ساكن
بغرفة والغرفة الثالثة كانت فاضية فأنا جيت وأجرتها, الشي الوحيد اللي موحلو في الطريقة هدي إنو تقريبا كل المأجرين يبغوك توقع عقد أقل شي 6 أشهر وبعظهم يطلب سنة اعلى شي بس, والشي التاني إنك لازم تدفع تأمين, بس التأمين
يرجعلك لما تطلع من الشقة.

صح سان فرانسيسكو ثاني أغلى مدينة في أمريكا بس تقدر تعيش هنا براتب الملحقية, هادا إدا ماتصرف كتيير
وثانيا المدينة مرة حلوة, على الأقل بالنسبة ليه.

أنا حاظر إدا عندك أي إستفسار تاني.

ويسعدك يارب

الجو هنا زي مايقولو ( unpredictable weather ) ماأحد بيثق في الجو
الأيام هادي الجو كدا, الصبح شوية ضباب مع برد, الظهر شوية حر بس مو زي حرنا
العصر يرجع يبرد, وبالليل يكون برد.
طبعا أنا من جدة علشان كدا كان شوي صعب في البداية إني اتأقلم مع الجو بس دحين يعتبر عادي.
إدا إنتي من الرياض, فبرد سان فرانسيسكو ماحيضرك, برد الرياض أقوى بكتيييير.
بس دايما كل ماتطلعلي مكان, خدي جاكيت معك, حطيه في الشنطة إحتياطا.

إدا تبغو سكن بس مو عن طريق المعهد فهادي برضو سهله إن شاء الله بس لازم تكونو متواجدين هنا
لأن المأجرين يبغو يشوفو المستأجرين. وثانيا تختلف على عدد الغرف وإدا تبغو الشقة تكون في وسط البلد
حتكون أغلى شوي.

إدا تقدري ترسليلي كل المعلومات برسالة خاصة, مثلا كم حيكون راتبكم
كم تقدرو تصرفو, كم عدد الغرف اللي تبغوها, أقدر بإذن الله أساعدك أكتر.

تحياتي, وأي إستفسار تاني أنا مستعد.

لآ إنتي مو لوحدك بالCISL حيكونو معاكي إخواتي ال2
برضه تقريبا حيبدأو على جون إن شاء الله

بالتوفيق ليكم كلكم.

عن جد ,,, حمدلله

تيب اخوي احنا معهدا بشارع ماركت ستريت

الاسعار الشقق هناك كيف ,,,

معهدكم مرررررة كويس, على شارع ماركت وهو من أهم الشوارع بالمدينة
بالنسبة لأسعار الشقق بهاديك المنطقة فهي غالية شوي لأن هاديك هيا أهم منطقة بالمدينة.

تختلف الأسعار على عدد الغرف وإدا تبغي الشقة تكون في وسط البلد حتكون أغلى شوي
انا شخصيا حسكن إخواتي يا في سكن قريب شوية للمعهد, هما ال2 في غرفة وحدة
أو أشوفلهم عيلة بس مو عن طريق المعهد.

أقدر أديكي صورة أوضح عن الأسعار لو تديني صورة اوضح عن وضعك إش حيكون.
لاتترددي إدا عندك إستفسار.

وبالتوفيق.

حلو عند عائله روووعه جدا ,,

طبعا انا واخوي بس محتاره جدا هل اخد شقه لحالنا ولا ناخد عن عائله ...
وانا ودي قريب من المعهد ,,
اش المطلوب مني علشان اوضح لك اخوي

صحيح المعهد عنده عوائل.

من وجهة نظري, كل واحد يسكن بعيد عن التاني أفضل ليكم من حيث اللغة
أو تسكنو ال2 مع بعض بس مع روم مات أو عائلة مو لوحدكم علشان ماتتكلموا عربي على طول.
وفي إمكانية سكن قريب من المعهد بس لازم تدوري بمواقع عالنت وهادا اللي بسوييه مع اخواتي.

لو معتمدين أو حتعتمدو بس على راتب الملحقة حيختلف عن لو إنو حتجيكم فلوي من الأهل شهريا.

دورت اماكن سكن قريب حصلت شقق 1400 وطالع فيه بعضها قريب وبعضها بعيد

انا راح اعتمد على راتب الملحقيه خيوو