تقرير يوميات مبتعث لفلاق ستاف (طآزه) خخخخخ

العفو يالغلا والله
اللهم لك الحمد يارب انك استفدت من الموضوع
ماشاء الله يلا الله يكتب لك الخير وتنضم للبعثه
كويس الحمدلله مسنع امور سكنك بتطيح عنك اشياااااااء وااااااااااجد والله
هههههه ان شا ءالله اذا الله كتب بنزورك

الله يوفقك وييسر اموريك وتوصل ان شاء الله سالم غانم وتجيب شهادة ترفع الراس
تحياتي لك
نورت

بآكـ
طبعا ماعندي اي موضوع على فكرهـ
لكن بأخترع لكم موضوع خخ


اي تذكرت


ياطويلين العمر زي ماقلت لكم قبل انو كل واحد لازم يصير عنده ايميل خاص بالجامعه
عشان يعني التنبيهات واخبار الجامعه والواجبات وكل شي يتعلق بوضعك في المعهد او الجامعه

المهم جتني رساله انه فيه رحلة لمدينة فونكس او بالاصح (فينيكس)
من الساعه ثمان الصبح الين الساعه ثمان المساء يوم السبت

صراحه تأخرنا في التسجيل قلت ان نزلت المكافأة قبل السبت بنروح وان مانزلت مو لازم نروح
المهم الحمدلله نزلت المكافآت الجمعه بالليل
رحنا من بكرا عقب صلاة الجمعه للمكتب حق المعهد وقلنا لهم نبي نروح لفونكس
قالو نشوف اذا فيه اماكن
والحمدلله طلع فيه اماكن وسجلنا اسامينا
قالو لازم تجون بكرا الصبح على الساعه ثمان لأن الساعه ثمان ونص بنمشي...


جا من بكرا الصبح قمنا وتوجهنا للمعهد في الوقت المطلوب
ومخصصين كانو ثلاث سيارات (فآن)
طبعا الموجودين كلهم سعوديين وصينيين خخخخخ

توكلنا على الله ومسكنا خط فينيكس
ساعتين تقريبا ووصلنا بحمدلله

كانت الرحله طبعآ عبارة عن شوبينق(تسوق) يعني بيودوننا ل كم مول على كم سوق مواد غذائيه وهيك شغلات


طبعآ أول مول دخلناه كان قبل فينيكس ب 33 ميل..
مجمع كله ماركات
كالفين كلاين..وريبوك..وماركات واجد

المهم نزلنا عطونا ساعه ونص تقريبا نحوس بالمجمع
دخلنا كم محل بعدين رحنا للمطاعم أفطرنا مدري تغدينا خخخخ
بعدها رحنا لكالفين كلاين وشرينا لنا كم قطعه واللي صراحه كانت اسعاره مره حلوه وتخفيضات توصل 45 بالميه

جينا نحاسب عطونا بطاقات قالو سجلو عن طريق النت وكذا
وكل بطاقه فيها خصم 10 بالميه
وكل ماشريت ب 250 دولار يعطونك الظاهر 25 دولار تقدر تشتري بهم من كالفين كلاين
طبعا ال 250 دولار مو شرط انك تشتري دفعه وحده
كل ماشريت منهم طلع بطاقتك للمحاسب ويسوي لها سكان وتجمع فيها نقاط وكذا
طبعا هي مره حلوه للي يحبون هالماركه ...


المهم بعد كذا كانت الوجهه ل مول اسمه اريزونا ميلز
طبعا لاننسى نحسب 45 دقيقه تقريبا من المجمع الاول الى المجمع الثاني

طبعا فينيكس مرا كبيرررره
يعني صراحه اقارنها بثلاث ارباع حجم مدينة الرياض
كبيرة مره صراحه ومنظمه وكل شي
وفيها جامع خرافي على الدايري حقهم
أقرب ماله جامع الراجحي اللي بمخرج 15

المهم وصلنا للمجمع واللي صراحه شوية عليه كلمة ضخم
كبير مره عبارة عن خمس مجمعات ضخمه

المهم نزلنا وتواعدنا نجتمع بعد ساعتين اتوقع
دخلنا المجمع واللي صراحه كان مره مرتب
اول مادخلنا في على اليسار مطعم صراحه الجو حقه غيررررر
يعني تخيلو الجلسات فوقها زي الاشجار وفيها مجسمات حيوانات تتمرجح ومدري وشلون يعني صراحه بطل

بعد كذا رحنا للمحلات اللي جوا نشتري ملابس
صراحه يعني لقينا اشياء حلوه ومرا اسعارها مناسبة ارخص من فلاق ستاف

شرينا ملابس وكثرنا من البلوفرات او زي مايسمونها (جمبر) التيشيرتات الثقيله ام سحاب وطربوش وبعضهم مو شرط يكون فيها سحاب وبعضهم يكون فيها مخابي <<<ابوك يالتعريف خخخ
طبعا تفرق المسميات من شخص لشخص


المهم تسوقنا وخذينا لنا كوفي وطلعنا للسيارة



بعد كذا توجهنا لسوق اسمه لي ليز lee lees
طبعا من اسمه نعرف انه صيني خخخخ
طبعا هو عباره عن سوق زي العثيم كذا حق مواد غذائيه
بيني وبينكم ماكان عندي نيه ادخل
بس قلت ياولد خلنا ندخل نحوس ونشوف
لما دخلنا لقينا فيه قسم مكتوب عليه قسم المواد العربية او الشرق الاوسط
بيني وبينكم ماصدقت عيوني خخخخ
اول مادخلنا شفت الفيمتو ههههههههه
وجنبه ماجي ومعمول تمر واشياء كثيرة والله
قلت اوخص يالسعوديين ههههههههه
والله كثيرين خذو فيمتو واللي خذا معمول واللي خذا مدري وش
طبعا رحنا للثلاجات وبالصدفه لقينا جبنة بوك وجبنة كيري
لقطنا اللي نقدر عليه خخخ
طبعا فيه كثيرين مو من عشاق الجبن السايل لكن سبحان الله يوم مالقوه في فلاق ستاف اشتاقو له هههههه
المهم شرينا قراشيع وزي كذا
شفت الشباب كل واحد معه كرتون اندومي او كرتونين خخخخ
واروح للكاونتر قلت له باللهي ابي كرتونين اندومي
انا من عشاق الاندومي صراحه هههههههه
وجابو لنا كرتونين وحاسبنا الاغراض وتوكلنا على الله للسيارة

اخر محل رحناه هو زبدة اليوم كله
بقالة او سوبر ماركت بالأصح (عـــربــــي)
والله كانك داخل ركن العثيم خخخخخ
وش تبي او وش في بالك تلقاه

رحنا اول شي توجهنا للثلاجه واخذنا لنا كم حبة جبن سايل على كم حبة كيري
واخذنآ لبنة أولكر التركية..

مافي شي نفسنا فيه الا اخذناه
وش رايكم اني ماخذ عجين سمبوسه ههههههههههه
ولقيمات مع اني ماعرف اصلحها بس كذا اخذتها وبعلمكم سالفتها وشلون زينتها خخخخ
وكريم كراميل
وخبز مفرود
وحب(فصفص) ومكسرات
وزمزمية قهوه
وأشيآء أبو كثيرررر خخخخخخ
نص الميزانية راحت في هالبقاله هههههههه
وبهارات ومكرونات وكل مالذ وطاب ياربي لك الحمد
اي صح وحليب نيدو ههههههههه<<حن للطفولة خخخخ

طبعا جوا الماركت فيه ركن زي المطعم فيه شاورما وفطاير وكباب وخرابيط
بيني وبينكم انا عن نفسي كنت شبعان ومااشتهيتها..
وفيه برضو شيشه ومعسلات وكل شي تبيه...


المهم عقب كذا خلصنا امورنا على خير رحنا السيارة وتوجهنا لمدينتنا العزيزه...فلآق ستآف...


طبعا برضو ساعتين في الخط خخخخ


وصلنا فلاستاف بالسلامه وتوجهنا للجامعه اول شي عشان ينزلون اللي ساكنين بسكن الجامعه
كلن خذا عفشه والقراشيع اللي شراها ونزلو
باقي احنا 4 سعوديين
وكلنا ساكنين حول بعض في نفس المنطقه
طبعا انا شلت الاغراض حقتنا من ورا وحطيتها جنبي عشان نفتك من الزحمه اللي ورا وخليت كرتونين الاندومي ورا

المهم اللي قبلنا نزل بيتهم
باقي انا واخوي وواحد ساكن حولنا
المهم نزلنا لشقتنا ونزلنا الاغراض وراحو هم


يوم دخلنا الاغراض بالثلاجه ووزعناهم ورتبناهم جلست ادور كراتين الاندومي هههههه
مالقيتهم خخخ
نسيناهم بالسيارة هههههه

على طول دقيت على المدرسة اللي كنا راكبين معها قلت لها انو احنا ناسين كرتونين بالسيارة
قالت انا الحين وصلت المعهد بدورها لكم واحطها عندي بالمكتب واذا جيتو الاثنين خذوهم من المكب
قلت اوكيه


شوي دقت علينا قالت ترى مالقيت شي بالسيارة خخخخ
ياهوه غيري بدلي قالت مافي شي بالسيارة
قلت اوكيه جل اكيد اخر واحد من العيال نزلهم معه
وفعلا يوم جا يوم الاثنين جاني قال انت ناسي شي بالسيارة قلت اي والله ناي كرتونين اندومي اهم شي هم زبدة الرحله خخخخخ

قال اي تراهم عندي في البيت قلت اوكيه بجي ان شاء الله اخذهم
عاد والله الين اليوم مارحت اخذهم خخخ

ان شاء الله قريب بجيبهم...


اتمنى تستمعون معنا بالرحله خخخ

تحياتي لكم

الايام اللي راحت كلها برد وامطار ومدري وشلون مشوار اروح اجيبها خخخخ

هههههههههههههههههه بالعاافيه علييكم الاندومي
اهم شي يكون في جبنه كرفت السايله اذا مافي يمكن الغي رحلتي خخخ

ولكموووووووووو رجهـ


هع كالعآده ممتع وشيق اسلوبك رائع


واصل يابطل






اهم شي الفيمتو خخخخخخخخخخخخ

هلا وااااااااااااااااااااااالله بأهل الأندومي والمولات والتمشيه

يسلمواا يصقيقي الغالي

امتعتني وعيشتني جو الرحله ولكن يا عزووووز ما تعبت رجولكم من هالمشاور كلها ... وبالنسبه للخذاء اكرمك الله وش تنصحني جزمه رياضيه وال إيش تنصحني فيه لأن عندكم ما فيه إلا قوة (خطوط) مشي .

يسلموووو بالغالي وزي ما جاك لاتخاف من الرقم >>>> ههههههههههههه

ههههههههههههههههههههههههه
ذكرتني يوم سافرنا ماليزيا على اساس نتعلم انقلش

كان لي يمكن شهر ونص قبل ما الاقي في شارع العرب في كولالامبور بقالة عربية
يالله الجبن شيدر واندومي وبسبوسة ونكهة معسلات و عيش لبناني مسويها راعي المحل كان سوري وابوكاس رز وحاجات كثيره منها الاندومي والديو اول ماشفتو في التلاجه علقت قزازتين
الحنين لمنتجات البلد

شكله كان فيه كليجا ام صالح
هههههههههههههه
متابعينك معاك والقلب داعيلك

وينك يالدب لاتبطي علينا انتظر يومياتك ..............تصدق ان العيال بالاستراحة خربتهم من شان يقروا يومياتك وهم ماقد تعدوا مصر...


تحياتي لك وجهز السكن من الان انا والمعزبة جايك

يعطيييك العاااااااااااااافيه ومنجد شوووقتنا للدوله بس ياااارب تهووون وننظم بسررررعه

اخووووي عزووووووووووووز ابشرك طلع قبول الأهل ولي يومين ما نتمت من الفرحه ولكن المشكله الآن ان متوهق قبولي جاء لأمريكا وتخطيطي لأمريكا ولكـن الأخوان والأهل يقولون ما راح ترتاح هناك من ناحية أهلي والحجاب والله انهم لخبطوا مخي يقولوا المطارات يشرشحون المتحجبات ويخلونهم يكشفوا قدام الناس ومن هالقبيل .... بليز ساعدني حط نفسك مكاني بالأمانه كندا او امريكا .