المشاركة الأصلية كتبت بواسطة talbah
السلام عليكم
الله يسعدك سؤال مرره مهم الي هو انا الحمدلله جاني قبول اللغه في معهد تجاري وماشفت احد مدح التجاري واغلب الناس تقول اذا كملتي 3 او 4 شهور بالمعهد التجاري حولي على معهد جامعه كيف اجيب قبول في معهد جامعه ؟؟؟
السؤال الثاني : اذا ان شاء الله ربي يسر قبول اللغه في معهد جامعه الجامعه نفسها تضمن لي اول ماخلص اللغه ادخل عندهم تخصصي الي ابيه ؟؟
سؤال مهم : لغتي مهي قد كذه يعني عشره في الميه تهقى امشي بالبعثه والا يكرفسوني فاقرب صندوق وعلى السعوديه ؟؟
اسال الله العظيم ان ييسر امرك ويفرج همك ويجعل لك في كل خطوه سلامه ..
عليكم السلام ورحمة الله وبركاته
والله أختي عشان أكون صريح معك ومن واقع تجربة لأحد المعاهد التجارية
المعاهد التجارية عموما يكون همها الأول والأخير الربح المادي (الا من رحم ربي) وغالبا يعلقون الطالب في مستوى معين عشان يضطر يجلس سمستر زياده ويدفع مبلغ وقدره
لكن مو كل المعاهد التجارية سوا يعني احيان معاهد الجامعات يكون أغلى من المعهد التجاري يعني على سبيل المثال المعهد اللي انا فيه الحين ياخذ على الفرد 10 الآف دولار أو أكثر للسمستر والسمستر تقريبا 4 شهور والله مبلغ جآمد ومبالغ فيه بشكل والمشكله مدري على إيش (الحمدلله اني مبتعث)
عشان كذا الغالبية ينصحون انو المعهد يكون تبع الجامعه لأنه المعهد التابع يعرف الجامعه وش تبي ويعرف وش يركز عليه أكثر وطبعا المعهد التابع للجامعه يضمن لك دخول الجامعه أكثر من المعاهد التجارية
والقبول تجيبينه بنفسك يعني تتخاطبين معهم أو عن طريق أحد المكاتب اللي تجيب للطلاب قبولات جامعيه طبعا بمبلغ وقدره ....
طبعا اختي غالبا واللي أعرفه أنا أنو اذا جبتي قبول اللغه لازم يكون مرفق معه قبول الجامعه يعني تختارين التخصص اللي تبينه والمكتب يعلمك وش افضل الجامعات في التخصص هذا ويجيب لك قبول لغه في الجامعه اللي تبينها
وطبعا الجامعات تفرق وانتبهي للنقطه هذي في جامعات تشترط ان القبول يكون مشروط ب اختبار آيلتس أو جيمات أو توفل وفي جامعات لا ماعندها مشكله
يعني حاولي قد ماتقدري تكون جامعتك ماتشترط ايلتس او توفل لأنه جدآ صعب ومايجتازها الا واحد بفضل الله ثم بلغته القوية لازم يكون متمكن
أذكر بنت طرحت موضوع بالمنتدى انو درست وكان قبولها يشترط انها لازم تخلص اللغه في خمس أشهر او حاجه زي كذا والله نسيت الموضوع بالضبط لكن المسكينه والله توهقت ووقفو عليها المكافأه حتى ماعطوها تذاكر وتوهقت مرا والله
عشان كذا أهم شي تركزين على القبول وش نوعه ووش الجامعه وهل هي معتمده من التعليم العالي أو لا....
بالنسبة ل اللغه هذا يعتمد عليك أنتي
انا عندي قناعه وكثيرين ناقشتهم ويوافقون عليها انو المعهد يعطيك من 30 الى 40 ف المية والباقي عليك انت
يعني تجتهدين وتشدين حيلك وتحاولين قد ماتقدري تطورين لغتك سواءا بالممارسة انك تختلطي مع ناس اجانب يعني جارتك مثلا او اي احد وتسمعين الراديو او التلفزيون وزي كذا شغلات وتطورين لغتك قد ماتقدرين وبإذن الله راح تمشين وتتيسر أموركـ
طبعا عشان اعلمك حاجه
اذا انتي طلعتي مبتعثه ف نظام الدراسة حسب اللي اعرفه يكون سنة كامله يحق لك تدرسين لغه واذا ماخلصتي تقدرين تطالبين بتمديد ست شهور
في حالة انك ماانهيتي مرحلة اللغه في السنة ومددتي ست شهور وماخلصتي راح تضطرين تختارين يا اما انو يتساعد معك المعهد وتدخلين الجامعه وطبعا راح تتوهقين اذا لغتك ماتطورت
واما انو تنلغي بعثتك وترجعين السعوديه
طبعا قبل شهرين سمعت انو في تغيير في نظام التعليم العالي وانه راح ينحسب بالسمستر يعني يسمحون لك تدرسين سمسترين لغه وسمستر تمديد يعني تقريبا يكون المجموع سنه او سنه وشهرين ولاني متأكد من صحة المعلومه ...
على العموم أن شاء الله أكون أفدتك وآسف جدآ على الاطاله لكن حبيت أفيدك باللي عندي
واذا في استفسار ثاني او شي مافهمتيه اسألي أبد كلنا اخوان هنا وبنفيدك باللي نقدر عليه...
آمين يارب الله يجزاك بالجنه ويطول عمرك ويكتب لك الخير وين ماكان
تحياتي لكـ أختي
نورتي
رجهـ بس رزهـ January 1st, 2011, 06:10 AM
LinkBack URL
About LinkBacks
عليكم السلام ورحمة الله وبركاته
حياك الله ونورت الديرة والحمدلله على السلامه
ابشر نساعدك باللي نقدر عليه
ارسلي رسالة على الايميل وعلمني اذا طلعت جوال أو لا عشان اقدر اتواصل معك
azzooz_5 هوتميل
طبعا بنام الحين توني بنام وبصحى باذن الله الصبح واستنى منك رد خيو
والحمدلله على السلامة مره ثانيه