تقرير يوميات مبتعث لفلاق ستاف (طآزه) خخخخخ

^^^^^^^^^^
اخت سوسو انا راح اجي في رمضان بأذن الله

وانا عرفت اشياء كثيره من الموضوع هذا بأمكانك تقرين الموضوع من بدايته وتعرفين

لكن انا راح اقولك

الي عرفته أن الجامعة معترف فيها طبعآ وقوية في تخصص الادارة والبزنس

والمعهد جيد جدآ

ومن كلام المكتب أن السعوديين مهب واجد

وهذا الي قدرت عليه

الصفحه هذي راح تكون مررجع بإذن الله مستقبلا لأي استفسار مشابه .





هلابك والله وسهلا ومرحبتين ونورت
احبك الله الذي احببتني فيه

اشوف الجنس انثى وكلامك ذكر احترت صراحه لكن دامك قلت احبك في الله ف بعاملك انك شخص وليس شخصه <<كيف الاسلوب خخخ

انا اسف على الكلام اللي بقوله لك والعذر والسموحه والله انه مو قصدي اني اغلط عليك او على غيرك لكن عشان اوضح لك وللجميع
ياجماعة الخير خافو الله فينا والله العظيم حرام عليكم
الحين الموضوع فيه 45 صفحه ثمانين بالميه من هالصفحات استفسار عن جو المدينة وجامعتها وكل شي فيها
مو معقول صراحه
شرحت تقريبا كل شي اكثر من مية مره
اقسم بالله العظيم تجيني رسايل خاصه وتجيني ايميلات وتجيني رسايل على الفيس بوك اغلبها نفس الاسئلة كيف جو المدينة فيها ثلوج والا لا الجامعه فيها سعوديين والا لا هل المدينة كبيره والا صغيره باردة والا حارة فيها مواصلات والا مافيها فيها اماكن ترفيه فيها عوائل كم اسعار الشقق وكلها نفس الاسئلة
وانا جاي على وجهي مااحب ارد احد ابدا واحاول قدر المستطاع اخدم ونزلت موضوع اني مستعد اخدم الطلاب الجدد ابحث لهم عن سكن واستقبلهم في المطار واي شي لوجه الله تعالى
وتدرون وش كان جزاي من البعض !!
تجيني ايميلات اللي يقول شكلك زي هالسعوديين اللي يستغلون ويحرص عشان يخصمون له في السكن وعشان البنك يعطيك على كل حساب مبلغ ومدري ايش
كلام اقسم بالله العظيم مو بس يجرح الا يقتل يدمي القلب.
والله العظيم ان كل اللي كلموني يبون سكن ادور لهم سكن بمجمعات ثانيهغير اللي ساكن فيه واحط السكن حقنا اخر حل عشان محد يجي بكرا يقول رجه سوا واستغلنا ومدري ايش.
وبعضهم والله مدري وش اقول بس خلوها مستورة
اقسم بالله العظيم اني مااتكلم مدح في نفسي والا اتمنن بشي ويشهد الله على كلامي
لكن والله العظيم من القهر والغبنة
انا كنت اتمنى يوم اني وصلت هنا ان فيه احد استقبلنا في المطار وشاف لنا سكن وسهل امورنا بعد الله سبحانه والله لأكافئه واعطيه عمولة من جيبي زود على اللي بيعطونه السكن والبنك وادعي له ليل نهار .
لكن ناس اقسم بالله ماتحشم ولاتستاهل من يحشمها ويخدمها .
وفيه ناس بارك الله فيهم ورحم الله والديهم وبيض الله وجيههم والله يجزاهم بالجنه
بعضهم والله العظيم يتصل بس يتطمن واحد كنت اسولف معه وسالني عن صحتي وكذا قلت له عندي موعد بعد يكم يوم في المستشفى
والله انه داق علي يسالني رحت المستشفى ووش قالو لك وكذا داق بس يتطمن
هذا اللي تسميه رجال وهذا اللي تخدمه وتحشمه وتسعى انك تخدمه بكل ماتقدر
وغيره كثير يتصل ويسال ويتطمن واخلاقه حلوه ويسولف ويضحك كانه يعرفك من سنين الله يجزاهم خير ويكثر من امثالهم ..





على العموم اللي ابي اقوله ياجماعة الخير الله يرحم والدينا ووالديكم قبل ماتستفسر عن شي اقرأ واذا مالقيت اللي تبيه اسال وان شاء الله نخدم ونجاوب باللي نقدر عليه.
بعض الناس وبعض اصحاب المواضيع خاصه اذا شاف استفسار كذا على طول يقوله اقرا الموضوع من البداية والا يحط له رابط وصلى الله وسلم
وبعض اللي قروا اليوميات من اخوياي هنا بنفس المدينة والله احيان يقولون لي ياخي انت مدري وشلون ترد على استفسارات قد رديت عليها مية مره اي واحد يسالك ياخي ازبد له والا قله اقرا الموضوع من البداية والا طنشه وكذا .
واحد وقسمن بالله لما شاف استفسار واحد الله يستر عليه يسال عن المدينة والاجواء قال لي بالله خلني ارد عليه انا اتفاهم معه واخليه يعرف شلون يستفسر !
قلت له لا والله مو اخلاقي اني ارد بهالاسلوب والا اقول له اقرا الموضوع وكذا
انا انسان احب ارد باللي اقدر عليه حتى لو السؤال متكرر .


نرجع لاستفساراتك خيو

وراح ارد واخلي هالصفحه مرجع لاي احد يستفسر عن الجو وعن المدينة بشكل عام..


فلاقستاف مدينة تقع في ولاية اريزونا وتعتبر تقريبا ابرد مدينة في الولاية بحكم ارتفاعها الشاهق عن مستوى سطح البحر.
جوها بارد جدا في الشتاء وحلو في الصيف
طبعا في الشتاء توصل الى 28 تحت الصفر وخاصة بعد نزول الثلوج لكن الحمدلله بردهم مو ناشف مو زي برد الرياض اللي يدخل بالعظم
الصيف تكون فيه امطار وبالنسبه لك بحكم انك بتجي في رمضان باذن الله راح يكون فيه امطار.
المدينة صغيره وهادئة يعني مدينة دراسية
الحمدلله آمنة جدا وكثيرين من الشباب يطلعون ويتركون شققهم مفتوحه مايقفلونها والحمدلله ماشية امورهم لكن انا من الناس اللي ماارتاح الين اقفلها.
فيها مول كبير تقريبا يسمى فلاقستاف مول .
فيه اسواق كبيرة زي العثيم وبنده . طبعا الاسواق فيه سوق يسمى سيف واي وفيه والمارت وفيه تارقت وغيرها .
طبعا لاتوجد مساجد ولامحلات عربية . الجمعه نصلي في احد فصول المعهد.
المواصلات متوفرة فيه باصات وتكاسي ومااعرف نظام الباصات صراحه .
السكن يعتبر غالي بحكم صغر المدينة وكثرة الاقبال عليها . طبعا يختلف السعر بحكم القرب والبعد من الجامعه وحجم السكن ونظافته وهل هو قديم او جديد والخدمات اللي فيه .
فيه سكن الجامعه وانا صراحه اعتذر من الجميع لاني اخطيت فيه قبل فتره وطلع سكن الجامعه انواع فيه غرف وفيه شقق حسب اللي تبي .
احد الشباب كان سكنهم عباره عن غرف وكل غرفه فيها سريرين كانك داخل سجن والحمام طبعا خارجي ومشترك.
واحد الشباب ساكن بشقه فيها اربع غرف وكل غرفه فيها شخصين وطبعا الشقه فيها صالة وحمامات ومطبخ .
وفيه سكن شقق بعد بالجامعه والشقه فيها غرف ويكون لك غرفه مستقله لكن الصاله مشتركه والحمامت والمطبخ برضو.


السكن خارج الجامعه :
طبعا زي ماقلت السكن يفرق حسب البعد وكم غرفه والنظافه والخدمات وهيك شغلات
الاستديو في المتوسط يبدا من 700 تقريبا شهريا
والغرفه مع صاله تبدا من 800 الى 1050
الغرفتين تبدا من 850 الى 1300 حسب المجمع اللي بتسكن فيه .
لان فيه بعض المجمعات الشقه مايكون فيها غساله ملابس ولا غساله صحون ويكون فيها تدفئة بدون تبريد وكذا وغالبا يكون سعرها رخيص شوي .
فيه سكن يكون متوفر فيها غساله ونشاف وسعرها حلو لكن المبنى قديم شوي ويكون بعيد شوي عن الجامعه وسعره يكون معقول
بالنسبة للسكن حقنا فيه مكيف تبريد وتدفئة وغساله ونشاف وغسالة صحون ومواقف مظلله<< وهذي مهمة جدا في حالة انه نزلت الثلوج.... والمجمع يعتبر تقريبا اجدد مجمع سكني وموقعه حلو وقريب من الجامعه عشان كذا سعره مرتفع ساكنين احنا ب 1300 شهريا.

الموتيلات اسعارها برضو تختلف حسب نظافة الموتيل وقربه وبعده من الجامعه يعني يمكن تسكن بموتيل يوميته 30 او 40 الى 70 او 80
وفيه موتيلات يتعاقد معك تدفع له اسبوعيا 160 دولار بس بشرط تسكن لمدة شهر مثلا وفيه موتيل نفس المبلغ ومو لازم تسكن شهر لكن المشكله انه بعيد ..
وطبعا الناس اذواق بعضهم يعجبه وبعضهم لا.
وفيه برضو تقدر تستاجر بيت مثلا ويكون سعره حلو ورخيص لكن ماعندي فكره عن نظام البيوت .


المعهد :
طبعا المدينة حاليا زاد عدد السعوديين والخليجيين بشكل كبير جدا يعني صراحه المعهد ماتوقعو هالعدد بيجي .
يعني المعهد عباره عن مبنى فيه يمكن ست كلاسات وماتكفي
ف الحل انهم غيرو توقيت الكلاسات ووزعو بعض الكلاسات على الجامعه
يعني انا كانت كلاساتي بمبنى وسط الجامعه والمعهد مااجيه الا كلاس الكمبيوتر .
لكن ان شاء الله على السمستر القادم راح يكون فيه مبنى جديد وكبير وان شاء الله انه يشيل هالعدد.

طبعا المعهد فيه خمس ليفيلات (مستويات) اول مستوى اسمه بري اكاديميك واللي بعده اسمه اي بي سي واللي بعده ليفيل ون وبعده ليفيل تو وبعده ليفيل اسمه بريدج اللي هو خامس وآخر مستوى .
كل مستوى يأهلك تدخل الجامعه على قولتهم
يعني نهايةكل مستوى يكون فيه اختبار شبيه باختبار الايلتس وهالاختبار تحديد مستوى ودرجاتك تحدد مستواك يعني يمكن تكون في مستوى اي بي سي وتجيب درجات حلوة في هالاختبار ويرقونك ل ليفيل تو او بريدج .
وممكن تكون ب ليفيل ون وتجيب نتيجه حلوه وتدخل الجامعه .

المعهد جيد جدا وتدريسه حلو وطبعا فيه ضغط كبير صراحه وخاصه ب ليفيل ون وتو وبريدج .
طبعا اخر مستوى اللي هو بريدج فيه مادة تدرسها بالجامعه وانت بالمعهد هالمادة اسمها 105
هالمادة لازم تاخذها اذا مااخذتها في البريدج تاخذها لادخلت الجامعه والماده عباره عن مهارات الكتابه ويقولون انها متعبه جدا جدا لكنها مفيدة بشكل خرافي.

الجامعه تعتبر قوية وخاصه في مجال الادارة والبزنس .
الجامعه كبيرة وفيها باصات مجانية للتنقل داخلها .
فيها مطعمين رئيسيين (حسب اللي اعرفه ) وهالمطعمين نظامهم زي البوفيه تقريبا ومقسم لاقسام
فيه قسم بيتزا وقسم برجر وقسم مكرونه وهيك شغلات .
طبعا مواقف الجامعه انواع وتاخذ تصريح مواقف من قسم المواقف بالجامعه او تسويه اونلاين ويرسلون لك التصريح على البريد .
طبعا تعتبر غاليه شوي يعني السمستر ب 280 دولار تقريبا ولاتقدر توقف في اي مكان لازم توقف في القسم اللي مخصص لك حسب التصريح.

طبعا الكويس في الامر كله ان اغلب امورك تسويها اونلاين وهذا يريحك بشكل كبير لكن لازم تعرف وتتعلم نظام الاونلاين عشان تريح راسك من امور واجد .
طبعا او مايجي الطالب جديد لازم يطلع بطاقه جامعيه ورقمها راح يكون في الاي توينتي .
بعد مايطلع البطاقة راح يعطونك رمز ورقم جامعي تدخل على موقع الجامعه بهالرقم ويصير لك ايميل قوقل (جيميل) يتواصلون معك عن طريق هالايميل سواءا المدرسين او ادارة المعهد او ادارة الجامعه والانترناشيونال اوفيس اللي مكتب الطلاب اللي جايين من برا امريكا (اجانب زينا بالعربي خخخخخ ).
التخصصات واجد ومااعرفهم كلهم لكن اللي اعرفه ان مافي تخصص صيدله وكثيرين سألوني عن الصيدله واقول للمره الثانيه ترى مافيه صيدله .

بالنسبة للبنات الحمدلله يارب المدينة تراها امنه وتقدرين تتغطين غطا كامل وتتحجبين براحتك وماعليك من احد ولا احد عليه منك . لكن البنات اللي اشوفهم عباياتهم تكون ملونه مو سوداء يعني بنية او بيج او رصاصي وكذا .
طبعا البنات انواع وكلهم مانقول فيهم شي مانقول الا والنعم فيهم كلهم . اللي اشوفهم انا صراحه فيه المتغطيه وفيه اللي متحجبه وتلبس عبايه وفيه المتحجبه بدون عبايه وفيه اللي ابد لاعباية ولاغطا وفيه اللي الله يستر عليهم ماودي احكي عنهم اللي اسال الله سبحانه انه يهديهم ويستر عليهم .



بالنسبة للسيارات :
السيارات ياجماعة الخير اسعارها فيه الرخيص وفيه الغالي وفيه الوسط وفيه الزين والشين .
بالنسبة لفلاقستاف الدفع الرباعي والدفع الامامي افضل بكثير من الدفع الخلفي . لان الثلج لما ينزل بعد فتره تتكون طبقه جليديه يسمونها هنا بلاك آيس (يعني الجليد الاسود ) وهذا خطر صراحه لان السيارات تزلق فيه . ف الدفع الرباع والامامي اهون من الخلفي بكثير
انا شريت موتر دفع خلفي والحمدلله شريته بعد ماانتهى الثلج لكن يوم من الايام قمت وكان ثلج وصراحه بالموت قدرت اسوق لانه يزلق الموتر .
رحت لفينيكس (طبعا فينيكس مدينة تبعد عن فلاقستاف 140 ميل تقريبا يعني حوالي 200كيلو او 200 وشوي يعني ساعة ونص الى ساعتين سواقه وفيهامحلات عربية ومطاعم عربية ومساجد واسواق وكلام كبير ) طبعا وانا رايح فينيكس كان ثلج وشفت كم سيارة مزحلقة وطابة على الردمية بين الطريقين الرايح والجاي
عشان كذا في الثلوج الواحد لازم ينتبه ويمشي باقل سرعه ممكنة عسى الله يحفظنا واياكم .
وطبعا برضو اللي يروح مشي للجامعه او اي مكان لازم ينتبه كويس وهو يمشي ويحاول قد مايقدر انه مايمشي على الجليد ويحاول يشتري جزم الله يكرمكم خاصه بالثلوج .

بالنسبة للرخصه والهوية :
طبعا تقدر تطلع رخصه وبطاقية هوية تغنيك عن الجواز وسعرها رمزي يعني الرخصه ب 10 دولار والبطاقه ان ماخاب ظني ب 12 دولار او حاجه زي كذا
الرخصه فيه كتيب تنزله من النت او تمر عليهم وتاخذه وتقراه وتاخذ منه معلومات عن الانظمة والقوانين المرورية وتروح تختبر كمبيوتر واذا نجحت ان شاء الله تختبر قياده واذا عديت يعطونك الرخصه بنفس الوقت .
...





بالنسبة لباقي الاستفسارات

المعيشة متوسطه وحلوة نسبيا ... طبعا زي ماقلت اللي ممكن يتعب ميزانيتك السكن والكهرب والنت طبعا حسب السكن بعض المجمعات الكهرب عليهم او تدفع مبلغ رمزي وبعض المجمعات الكهرب عليك.
المكافاه 1847 تقريبا ..


بالنسبة للعوائل تعتبر نادرة واعرف كثيرين سكنو مع عوائل وتبهذلو صراحه وكلن له اسبابه اللي يقول العائلة مرا بعيده واللي يقول تعاملهم مو كويس واللي يقول وكذا يعني وانا ماعندي خلفية عن هالموضوع بشكل كبير لكن متأكد مليون بالمية انه من الصعب تحصل عائلة. وبالنسبة كيف تقدر تسكن مع عائلة والله ماادري الافضل انك تسأل المكتب اللي جبت منه القبول .. وفيه نقطة مهمه جدا جدا جدا ( بعض اصحاب مكاتب القبولات اقسم بالله نصابين ... بعض الشباب هنا يتشكى منهم يقول لما جبت القبول يقولون لي ان المدينة مافيها سعوديين ابد مافيها الا خمسة او ستة ويقول جيت هنا تفاجات ان فيها اكثر من 300 !! وبعضهم يقول العوائل بالهبل يدورونك دوارة وجيت هنا والى يومك مالقيت عائلة وغيرهم واجد .. ف الواحد لازم يدخل منتديات زي هذي ويسأل ويتأكد قبل مايجيب القبول عشان يعرف الوضع وماينصدم بشي ).

سكن الجامعه زي ماقلت لك نظامه ... والعوائل برضو علمتك وضعهم ... وانت اختر اللي يناسبك
وانا افضل انك تخالط امريكان سواءا بسكن الجامعه او مع العائلة او برا تتعرف على احد مثلا وتحاول تتكلم وتسولف وتاخذ وتعطي قد ماتقدر .



المعهد زي ماقلت لك ايحابيته انه قوي وبعض المدرسين عسسسل يفتح نفسك انك تتعلم اللغه .. وسلبياته المبنى واحيان يكون فيه ضغط كبير ( مع ان الضغط احيان يكون ايجابي واحيان سلبي) وسلبياته ان مافيه دوام ثابت يعني يوم يكون دوامك عشر ويوم ثمان ويوم 11 وزي كذا .
طبعا المواد تختلف على حسب المستوى اللي انت فيه . عشان كذا مااقدرؤ احدد لك كم ساعه يوميا يعني فيه يوم مثلا يكون دوامك خمس ساعات ويوم اربع ويوم ست وزي كذا .



النادي الرياضي فيه بالجامعه وفيه باغلب المجمعات السكنية .. طبعا حق الجامعه مااعرف مكانه ولاقد رحت له ولااعرف نظامه .. بالنسبة للمجمعات غالبها يكون فيها نادي رياضي ومسبح وبعضها فيه ساونا وحمام بخار وجاكوزي .

السكان الحمدلله فريندلي على قولتهم وحبيبين وخدومين ... طبعا فيه نسبة كبيرة من المكسيك وفيه نسبة برضو من الامريكان الاصليين اللي هم الهنود الحمر ويسمونهم النيتف اميريكان يعني السكان الاصليين .. لكن عموما حاول ماتحتك فيهم واصلا مامنهم مضرة ولا شر والغالبية العظمى منهم حاله حال نفسه .
السعوديين والخليجيين زي ماقلت لك زادو بشكل كبييرررر اتوقع مع السمستر الجاي يوصلون ال 500.


بالنسبة للمطار اذا قصدك مطار فلاقستاف انا ماعندي مشكله استقبلك بإذن الله تعالى اذا اني موجود بالمدينة (لاني ان شاء الله ناوي اخذ صيفي وعقبها ارجع السعودية اجازة وبتوافق رمضان )
ف اذا بتجي برمضان ماراح اكون فيه لكن ان شاء الله القرب موعد رحلتك علمني واحاول انسق لك مع احد الشباب . او الجامعه تستقبلك الظاهر لكن ماعندي خلفيه وشلون يستقبلونك .
لكن على فكره ترى الدراسة راح تبدا ب اول يوم العيد او ثاني يوم مو برمضان .


بالنسبة لسهولة او صعوبة الجامعه مااقدر افتيك صراحه لكن حسب كلام الشباب انها متوسطه لاهي صعبة ولاسهله يعني يبي لك تشد حيلك وتتمكن من اللغه وان شاء الله تساهيل.


التوفل مو شرط بالنسبة للبكالوريوس اما الماستر والدكتوراه ماعندي خلفية عنها .
لكن الملحقية اشترطت ان كل ست شهور الظاهر في مرحلة اللغه لازم تختبر ايلتس او توفل وترفعه للملحقية .
لكن زي ماقلت لك هنا فيه اختبار تحديد مستوى اذا جيت ونهاية السمستر وتقريبا يغني عن التوفل والايلتس (ماني متأكد) لكن فيه ناس دخلت الجامعه بعد هالاختبار ولا اختبر ايلتس ولاتوفل.


العوائل وشقق الجامعه جاوبتك عليها.


المواصلات بالنسبة للتكااسي سعرها حلو تعتبر رخيصه لان المدينة صغيره ... والباصات تقدر تاخذ تذكرة يوم كامل بدولارين ونص يوديك وين ماتبي طبعا على حسب المسار المحدد للباص.


الله يعافيك ويبارك فيك ويسهل امورك ويوفقك وين ماكنت ويرزقك من حيث لاتحتسب ويكتب لك الخير .

خذ راحتك واذا فيه اي استفسار انا ان شاء الله حاضر

والعذر والسموحه على الكلام اللي في بداية الرد لكنه للتوضيح فقط لاغير.

تحياتي لك
نورت .

الله يسلمك ويعافيك ويبارك فيك وجمل الله حالك والله يطول بعمرك
امين حبيب قلبي ولامنك يالغلا.
ان شاء الله على خير .

والله ياخوك بالضبط ماادري متى بيبدا لكنه بيوافق اول او ثاني العيد .
يعني الظاهر الظاهر والله اعلم انه من 5 الى 9 سبتمبر هالحدود او يمكن قبل والله ماادري ياخوك بالضبط متى .

وانا اللي اسف على التاخير في الرد وتمون ياخوك اسال وانا تحت امرك .

تحياتي لك ولاخلاقك العاليه
الله يوفقك وييسر امورك ويطول بعمرك ويحفظك ويكتب لك الخير وين ماكنت ويرزقك من حيث لاتحتسب.
نورت.

عليكم السسلام ورحمة الله وبركاته
هلا وسهلا ومرحبتين اخوي طارق كيفك بشرني عنك
الله يطول عمرك والله يبييض وجهك ووفقك انت بعد وييسر امورك ويكتب لك الخير وين ماكنت
شاكر لك مداخلتك يالغلا
تحياتي لك

يعطيك العافيه يا"رجه بس رزة"

وبيض الله وجهك ...
والله لايحرمك الاجر..

والله رجه معناتك مع بعض الاعضاء وبعض الناس خصوصآ الي يشك فيك انك استغلالي او مادي والله حزت في خاطري الله يعينك

والله موضوع إستمتعت فيه
وبيض الله وجهك ويعطيك العآفيه
تقبل مروري

الله يعافيك اخوي
ووجهكـ يالغلا
اللهم آمين ولايحرمك الاجر

تحياتي لك
الله يوفقك يارب وييسر امورك ويكتب لك الخير وين ماكنت
نورت

الحمدلله على كل حال ياخوك
والاجر من الله سبحانه
وهذولي لهم رب كفيل فيهم واللي بيدور ويحاسب كل من اخطى عليه بيتعب..

شاكر لك اخوي مروروك وتعليقك وتعاطفك
بيض الله وجهك ورحم الله والديكـ

تحياتي لكـ
نورت ..

الحمدلله انك استمتعت اخوي وان شاء الله انك استفدت
ووجهكـ يالغلا وجعل ربي يعافيكـ
تحياتي لك
الله يوفقك يارب وييسر امورك ويجعل لك من كل ضيق مخرجآ
نورت..