تقرير يوميات مبتعث لفلاق ستاف (طآزه) خخخخخ

يؤ
والله انتبهوا من هالامور وحاولو تطنشون اي احد زي كذا وقول له مانتكلم انقليزي وابعدوا عنه
انا قريت ردك وبعد يوم او يومين كلمني واحد من الشباب قال لي نفس الكلام قال ان اهلي ومعهم بنات كانو يمشون وجا واحد يمشي جنبهم ويكلمهم ويسألهم وقال لهم اسامه بن لادن
يعني انتبهو منهم والله ولاتدخلون في اي نقاش واتركوهم

الله يعينكم يارب ويحفظكم ويخليكم لاهلكم ولكل عين ترجيكم ويوفقكم يارب ويرزقكم من فضله ويبعد عنكم عيال الحرام ويكتب لكم الخير وين ماكنتو

تحياتي لك اختي

ههههههههههه
يبوي تبي تجيب لها العيد ههههههههههههه
لا والله فكو انفسكم من المشاكل ماعليكم من احد

الحمدلله تونا بادين دراسه الاسبوع الماضي
ان شاء الله بركز فيها لكن برضو خدمة الناس شي يجري في دمي ياوخيتي
وان شاء الله ربي بيوفقني واقدر اجمع بينهم
تحياتي لك اختي شاكر لك حرضك واهتمامك الله يطول لي عمرك
نورتي

الله يبشرك بالخير وعساك تبشر بالجنة يارب
الله يوفقك ويرزقك من فضله وييسر امورك كلها ويرحم والديك ويكتب لك الخير وين ماكنت يارب ياكريم
ولي الشرف والله بمعرفتك واشكرك على اخلاقك العاليه وروحك المرحة وحرصك واهتمامك وتواجدك بالموضوع طال عمرك
وان شاء الله اذا كنت هنا بفلاقستاف وقت جيتك ابشر باللي ان شاء الله يخدمك
لكن اذا ماكنت فيه ف العذر والسموحه لاني ناوي ان شاء الله انزل السعودية برمضان
وان شاء الله اشوفك على خير
تحياتي لك
نورت خيو

^^^^^^^^^^^^^^
ماعليه يا رجه ازهلها بسنع اموري قبل لا اوصل بأذن الله

وراح نشوف بعض بأذن الله اذا رجعت من السعودية بالسلامة

الله يسهل امورك ياخوك
باذن الله تعالى لازم نتشاوف
مااقول الا الله يوفقك يارب ويرزقك من فضله وييسر امورك ويسهلها ويكتب لك الخير وين ماكنت
تحياتي لك خيو

السلام عليكم ورحمة الله وبركاته
يالله حيهم ويالله حيني بينهم كالعاده






اسبوعين تقريبا كانو متعبين جدآ بالنسبة لي ولكن في الوقت نفسه كانو روعه الصراحه
احب الاجواء هذي
تستقبل ناس من المطارات تشوف النظرات في عيونهم بعضها نظرات اعجاب في المدينة وبعضها استغراب وبعضها .... الخ
اطباعهم تختلف .... اخلاقهم برضو تختلف ... منهم اللي تحس انه جاد شوي ... بعضهم تعبان او مرهق ... بعضهم حزين لفراق اهله ... بعضهم مبسوط انه بيجرب حياة جديدة ... بعضهم شايل هم مايعلم به الا الله ...
بعضهم معتمد على الله سبحانه وتعالى ثم على الشخص اللي بيستقبله ... بعضهم يقول لو مالقيت احد يستقبلني يمكن اضيع ... بعضهم ماعنده مشكله قدر يدبر اموره لأن معه لغة تساعده ..
اكون صريح والله العظيم حبيت الاجواء هذي
البحث عن الموتيل المناسب والشقق وتنزيل الشناط وترتيبهم وقومة الصبح مع اني اكره قومة الصبح لكن هالمره غير
ماادري ليه يمكن لان اغلب اللي جو عوائل ويوم شفتهم حسيت بالشوق لاهلي !
او يمكن لأن معهم اطفال ووحشوني الاطفال !<< والله ياجماعه الخير لهم وحشه ماتتصورون
او لأني حاس بمعاناتهم مدري والله

المهم
اسبوعين كانو بالنسبة لي قمة التعب وقمة الفرح والوناسه << والله العظيم مايعرف طعمها الا اللي جرب
لما تسمعهم يدعون لك وتدري ان الدعاء من قلب كأنك ملكت الدنيا
فعلا والله العظيم سبحان الله لما تسوي الشي لوجه الله وقسمن الله له طعم ثاني
يمكن بعضكم من كلامي يقول هذا شايف نفسه والا يتمنن والا والا والا ... لا والله بلاكم ماتحسون باللي احس فيه ... وانا اقول جربو وبتعرفون
ولعل الموضوع وكلامي ذا يكون سنة حسنة اخذ اجرها يارب


بذكر بعض المواقف ..




تذكرون سالفة خوينا التحفة راعي الشنطه اللي خلاها بالمطار وجو الشرطه !!
ايوه هو
قال لي عن امور بس نسيت تفاصيلها بالضبط وان شاء الله انه يدخل ويكتبها بنفسه
قال لي ان في واشنطن تقدر تركب الباص والتراين وتروح لمنطقة الداون تاون وفيها اسواق الظاهر ومطاعم وبمبلغ رمزي الصراحه
لأن الغالبية يركبون تاكسي من مكان لمكان اذا كانو بيتمشون في واشنطن وهذا يكلفهم مبالغ صراخه خرافيه
لكن بالباص والتراين توفر يمكن ثلاث ارباع المبلغ تقريبا وان شاء الله اساله عن الطريقة واطرحها هنا...






واحد من الشباب ياحبي له الصراحه عانى في المطار معاناة غريبه من نوعها وأول مره تمر علي ...
طبعا الرجال جاي هو ومعه زوجته
وصلو واشنطن وخلصو امورهم وكانت تساهيل يالله من فضلك
جو يطلعون من واشنطن راحو المطار وصفو طابور مع العالم عشان البوردينغ
طبعا هم معهم امر اركاب ومكتب الطيار قص لهم التذاكر من السعودية الى واسنطن الى فينيكس الى فلاقستاف اخر محطه لهم
المهم انهم راحو المطار يوم جو للبوردينغ قالت لهم الموظفه انو مالكم تذاكر !!
وشيكو كم مرة مالقو لهم تذاكر
دق علي الرجال قال لي بالله كلمها ترى لحست مخي كلمتها قالت لي ان مالهم تذاكر قلت شلون مالهم تذاكر وهم حاجزين من السعودية وهذي رقم الرحله قالت والله ماادري ملك الا تكلم المكتب الرئيسي
وطبعا رحلتهم الساعه عشر ونص صباحا والساعه كانت الظاهر تسع وشوي يعني باقي على الرحله حدود ساعه
دقيت على الشركه نفسها اللي هي يو اس ايروايس U S Airways
سلام وعليكم السلام طيبين قلت انا عندي اخوي في المطار الحين وقالو له ان ماله رقم تذكره مع انه حاجز من السعودية وكل اموره تمام
قالو عطنا اسمه ورقم الرحله وكذا وفعلا شيكو عليه قالو ماله تذكره قلت شلون كذا !
قالت ان مكتب الطيار جعله ريح ابو حمد ما أكد الحجز !
وان المكتب حجز لهم فعلا لكن مااكد الحجز ولادفع المبلغ لهم عشان كذا الغينا الحجز وبعنا التذاكر لناس ثانيين !!
قلت اهاا طيبين ان شاء الله ... طيب وش الحل يابنت الناس ؟
قالت وحده من ثنتين يا انه يشتري تذاكر بنفسه والتذكره الوحد ب 750 ويلحق الحين على رحلة عشر ونص او يشتري على رحلة خمس العصر
او انه يكلم الطيار يشوفون له حل
قلت مافي حل ثاني شي شيات يركب الحين وتكلمون الطيار اي شي يعني قالت نو
قلت طيب
كلمت الرجال علمته بالوضع قال خلاص بشتري التذاكر
قلت وين يبوي ليه انت اللي تشتري التذاكر !!
هذي غلطة الطيار ليه تتحملها انت يعني بتشتري تذكرتين كل وحده ب 750 دولار يعني حدود 5000 سعودي !
قال وش اسوي قلت اصبر ندق على الطيار ونشوف اذا قالو اشتر تذاكر وبنعوضك اوك اشتر وطبعا لازم يرسلون ايميل بالكلام هذا عشان يصير عندك شي يثبت انهم بيعوضونك
او نشوف وش يقولون
كلمنا الطيار اللي بامريكا ورد المجيب الآلي ان المكتب يفتح الساعه عشر ويبقى على الرحله نص ساعه
كلمنا اللي بالسعودية اللي بالتعليم وللي بالمطار واللي بمنفوحه واللي بقلعة وادرين محد منهم يرد
قلت له اصبر الين عشر مافي الا كذا
يوم جت الساعه عشر دقينا على الطيار ورد علينا واحد سوداني شرحت له الوضع وعلمته قال استنى اكلم المشرف وحطني انتظار ابو عشر دقايق يمكن الين جا المشرف وعلمته بالوضع
طبعا فيه وحده اسمها مديحة الظاهر دقت على الرجال خوينا اللي بالمطار وخذت العلوم منه وقالت له ارسل لي اوراقك صور الجوازات والتذاكر وكل شي على الايميل
ورد علي المشرف وقال لي نفس الكلام قلت اوكيه وسكرت من عنده
دق علي خوينا قال لي انهم طلبو مني اوراق والجوازات وبرسلها لك ببرنامج الوات ساب وانت ارسلها لهم قلت اوكيه
وفعلا صور اوراقه بالجوال وارسلها لي وارسلتها لهم طلع فيه مشكله بالايميل حقهم
كل ماارسلت لهم ايميل يرجع لي الايميل يقول لايمكن تسليم الرساله
حاولت ارسلها من ايميلي الثاني ومن ايميل الجامعه وعيت تنرسل
دقيت عليهم طعش الف مره وبالموت ردو طبعا الساعه الحين يمكن 11 يعني راحت الرحله قلت لهم ان الايميل عيا ينرسل فيه مشكله بايميلكم وعطوني ايميل ثاني ونفس الكلام عيا ينرسل
اخر شي دقو عليه وقالو له ارسلهم فاكس ومن حسن حظه انه كان فيه فاكس بالمطار وارسلها لهم والحمدلله وصلت لهم
طبعا حجزوا له على رحلة الساعه خمس من واشنطن الى فينيكس
وتبهذل ذاك اليوم يعني باقي على الرحله 6 ساعات وكان بالمطار الظاهر او انه رجع الفندق والله نسيت وش سوى بالضبط المهم انه أكلو علقة محترمه هههههههه
سوري والله ياخوك بس وقتها ياحبي لك كنت متحمس انت تقول لي شكلي بحجز تراني طفشت ههههههه
والحمدلله وصلو وعينو من الله خير والحين امورهم يالله لك الحمد ماشية ومتيسرة بفضل الله سبحانه ياربي لك الحمد...


باقي مواقف ان شاء الله في الحلقة الجايه من عزيز الصياد الصغير خخخخ

تحياتي لكم ..

الله زماااااااااااااااااااان عن قصصك يا رجه استمر وياليت تقدر تعطينا عن احوال الطقس عندكم في الايام هذي+صور(اذا ماعليك امر طبعآ)

روعــــــــه موضوعك ... وعساك ع القوة في مساعدة الغير ... وجعله الله في موازين حسناتك
من اول نستناك تكمل موضوعك حسبتك بطلت بس الحمدالله رجعت ^_^

في انتظار البقية من"عزيز الصياد الصغير"