تقرير يوميات مبتعث لفلاق ستاف (طآزه) خخخخخ

العفو ولو
امين ويجزاك بالخير

اوكي اخوي وش قصدك يعني ايش الحل في ايش ؟
كثيرين اللي كانو معنا وراحو للملحقيه كانو على حسابهم الخاص بس مدري وش كانو يبون بصراحه
يمكن عشان تسجل جوازك بالسفارة او حاجه زي كذا والله ماادري بالضبط

على العموم حط سؤالك والشي اللي تبيه بالتفصيل وان شاء الله اسأل لك وارد لك خبر..

تحياتي لك
نورت

امين يارب وبالتوفيق لك وللجميع
والله تبي الصراحه يعني ان نسبتي ماكانت حلوه عرفت
ومافي الا هالجامعه هي المناسبه وهي اللي كان موعد دراستي فيها قريب
وبرضو جامعه فيها التخصص اللي يبيه اخوي يعني هيك شغلات
والمدينه صغيره وامنه وحلوه وبارده حسب ماقريت عنها


بالنسبه للجامعه والله ابشر جايتك المعلومات بالطريق خخخخخ
اصبر علي شوي بس وان شاء الله اشرح كل شي بالتفصيل
تحياتي لكـ
نورت حبيب قلبي

الله يسلمك ويعافيك من الشر خيتو
الحمدلله انو عجبكـ
تحياتي لك ومشكوره على مروركـ وتعليقكـ

نورتي

الله يسلمك ويعافيك يارب
امين يارب ياكريم ويوفقك والجميع يارب

تحياتي لك خيتو
اسعدني مرورك ودعواتك
نورتي

والله انا زيك ياوخيتي يعني انبسطت صراحه لما مافتشوني
لكن لما فتشوني بالاشعه حسيت اني من جد شبهه خخخخخ
والله انا ماادري وش الحكمه صراحه
لكن على قولتهم واثق الخطوة يمشي ملكآ


اشكر لك حماسك ومتابعتك وتعليقك
من جد اسعدني مرورك وتعليقك
تحياتي لكـ وبالتوفيق يارب
نورتي

الحمد لله ع السلامة وبالتوفيق ان شاء الله ( حسيت اني مسافر معكم)

باآآآآآآآآآآآآكـ


طبعا ياجماعة الخير لما رحنا نطلع شرايح قلنا بنروح لشركة AT&T
ورحنا لمهم وقلنا نبي شرايح بري بايد يعني زي ماهو معروف شرايح مسبقة الدفع
ف سالناهم عن ال بلان المتوفر قالو بالنسبه للشرايح المسبقة الدفع ماعندنا اي بلان لها ؟

طبعا ال بلان يعني الباقة اللي تبيها تكون على الشريحه
بعض الناس يطلب باقة مكالمات مجانيه او مفتوحه او انترنت ورسيال نصية او دقايق مجانيه


ف قالو لنا مافي اي بلان قلت طيب انا معاي جهاز بلاك بيري وابي هالشريحه عشان استخدم خدمة البي بي قالو مافيه لازم تشترك معانا ب كونتراكت(عقد)لمدة سنتين ؟؟

طبعا انا عارف ومتأكد ان عندهم كذا بلان متوفر ومقتنع برضو
لكن ماادري وش سالفة امهم رفضو يسوون لنا البلان اللي نبي
المهم مالكم بالطويلة قلنا اوك عطونا شرايح واخذنا شريحتين منهم
طبعا الشرايح مجانية لكن لازم اول مرا تشحنها اقل شي 15 دولار
وفعلا شحنا ب 15 دولار قلنا يعني الين عقب نعرف وش لنا ووش علينا ونحاول نشوف شركة ثانيه

اللي قهرني جد يعني اني لما ادق على احد ومارد علي ينخصم من رصيدي
وبرضو لما استقبل مكالمة برضو ينخصم علي
ولو ادق على احد لو رنة وحده ينخصم علي
مدري وش السالفه يعني يستهبلون والا وش يحسون به
المهم تبون الجد قلت ياولد خل الشريحه منظر بالجوال الين يفرجها ربك...




بعد هيك رجعنا للبيت وجلسنا سواليف وخرابيط وكذا...


طبعا زي ماانتو عارفين ان من بكرا راح يكون يوم الاثنين اول يوم دوام...

طبعا رحنا مرينا على موتيلات بنفس الشارع
وطحنا لنا بموتيل حلو وسعره ارخص بكثير من الموتيل اللي كنا فيه
واتفقنا معهم اننا بكرا الصبح ان شاء الله نجيب اغراضنا وكذا

ورجعنا الموتيل ونمنا ...
اصبح الصبح جهزنا عفشنا وشيكنا على اغراضنا وسلمنا الغرفه ورحنا للموتيل الثاني اللي بننقل فيه...
عقب كذا توجهنا للجامعه طبعا قطع الشارع بس خخخخخ




دخلنا المبنى اللي مقررين ان يكون اجتماع الطلاب الجدد فيه
والله كان زحمة الصراحه
اول مادخلنا القاعه كان فيه طاولات على اليمين وثلاث اشخاص يستقبلون الطلاب يسلمونهم زي الملف فيه خريطه للجامعه طبعا مطبوعه على ورق ابيض يعني مو خريطه خريطه
وفيها الاشياء اللي مطلوبة من الطالب انه يسويها


طبعا عقب ماتستلم الملف تروح لطاولة ثانيه يعلمونك وش تسوي بالضبط وكذا
رحنا للطاوله الثانيه وقال لنا المطلوب منكم الحين انو ترحون تطلعون بطاقة طالب وتروحون تطعمون ضد الحمى الشوكيه


عقب جلسنا نفرفر شوي بالقاعه وطحنا لنا بواحد حساوي(يعني من اهل الشرقيه وبالضبط من الاحساء)ومره الولد ماشاء الله لا اله الا الله خدوم مرا وحبوب وماقصر ابد
حتى سالته يعني قلت له وشو له متعب نفسك وكذا قال والله شفت نفسي فاضي قلت اخدم الطلاب هنا
وطبعا هو له فتره موجود بالمدينه وعارف كل شي وماشاء الله لغته مرا اوكيه الله يزيده من فضله

المهم عطانا رقمه وقال لا خلصتو من البطايق دقو علي ونشوف وش نسوي عقب
قلنا اوكيه

طبعا رحنا مبنى ثاني عشان نطلع البطايق ولقينا طابو طويل صفينا معاهم الين جا دورنا

طبعا الاشياء اللي لازم تكون معاك الجواز حقك والاي توينتي وبالتحديد الصفحه الاولى منه..

طبعا فيه ابلكيشن لونه ازرق تعبيه
مطلوب بيانات الجواز ورقم الطالب الموجود على صفحة الاي توينتني تحصله موجود فوق بالصفحه على اليمين
اسمه ستيودينت إي دي Studint ID وطبعا يبدا اول رقمين منه تكون صفرين 00
وتوقع على الابلكيشن وتحتري الين ينادونك

لما ينادونك ياخذون جوازك ويتاكدون من الملعومات عقب يقولون لك ارجع شوي ورا ياخذون لك صوره عشان يطبعونها على البطاقه

طبعا العمليه كلها على بعضها من تعبية الابلكيشن الين تستلم البطاقه ماتاخذ عشر دقايق
وخذ في بالك اول يوم يكون مظهرك كويس لان هالبطاقه بتطول معك خخخخخ
وطبعا قيمة البطاقه 25 دولار تدفعها بعدين على حسابك الطلابي
وهذي الطريقه مدري الى الحين وشلون لكن ان شاء الله بسأل عنها واشرحها هنا





عقب مااخذنا البطايق تصادفنا مع الحساوي طبعا اسمه علي عشان نختصر المسأله
تصادفنا مع علي في نفس المبنى وكان جايب معه برضو شباب ثانين
المهم يوم وداهم للبطايق جا عندنا وقلنا له اننا خلصنا من البطايق واستلمناهم
قال اوكيه يلا نروح مبنى ثاني عشان التطعيم
وفعلا رحنا للمبنى الثاني عشان التطعيم
قالو لنا قد طعمتو قبل قلنا ايه قالو اوكيه عطونا شي يثبت انكم طعمتو
قلنا والله ماعندنا
قالو لازم تطعمون اجل مره ثانيه وماعليها ضرر اصلا يعني عادي
لكن راح تطعمون مرتين ابرة اليوم وابرة عقب شهر
وطبعا الابرة الوحد ب 70 دولار برضو ماتدفعها الحين تدفعها عقب اونلاين على حسابك الطلابي
المهم عطتنا ورقة وكتبنا بياناتنا كاملة وفيه اسئله بضو تجايب عليها ب yes او no
والاسئله طبعا روتينيه زي مثلا هل تعاني من الضغط او حساسية اتجاه اي نوع من الاكل مثل البيض واذا عندك امراض مزمنة وهل مرضت بالانفلونزا قبل فتره قريبه .....
وهيك اسئله يعني

لاحظو ياجماعة الخير اللي عند اي مرض يفضل انه يبلغ الدكتور فيه لانو ممكن الابره تسبب اعراض جانبيه ...


المهم وقتها امطرت وكان مرا الجو شبه بارد وروووووووووووووووووووعه لابعد درجه
يعني تخيلو كذا مطر وبرااااد ياسلام<<<يبي يقهر سكان الرياض هههههههههههه

المهم ياطويلين العمر مالكم بالطويلة كان معنا الاخ علي
وعقب قال وش باقي لكم قلنا ابد باقي نفتح حساب بالبنك
وجزاه الله خير ماقصر ودانا للبنك اللي هو بنك اوف اميركا



طبعا للمعلوميه الملحقية تطلب منك انك تفتح حساب اسمه حساب طلابي
لكن بنك اوف اميركا لما قلنا للموظف نبي حساب طلابي قال للاسف هالحساب وقفناه
واستبدلناه ب حساب جديد اسمه إي بانكينج e banking طبعا ماني متأكد من الاسم

وطبعا الحساب هذا بدون فوائد وحساب عادي يعني تقدر تسحب وتودع وتحول وكل شي حساب متكامل
بعلمكم الفرق


الفرق ياطويلين العمر انهم راح ياخذون عليك تقريبا 9 دولار على كل عمليه تسويها في البنك
يعني اي عمليه تبي تسويها لازم تسويها عن طريق الصراف الالي او عن طريق حسابك على الانترنت
يعني سوي عملياتك عن طريق الصراف او اونلاين كذا ماراح يخصمون عليك

لكن لو رحت للبنك نفسه وطلبت عمليه سحب او ايداع او تحويل او اي عمليه تقدر تسويها عن طريق الصراف او اونلاين لكن مسكت معك انك تسويها في البنك راح يسحبون عليك تقريبا 9 دولار

لكن في حالة ان الخدمة اللي تبيها ماتقدر تسويها عن طريق الصراف او ماتقدر تسويها اونلاين لازم تروح للبنك ماراح يسحبون عليك اي شي ..

ارجو ان المعلومة تكون وصلت واي استفسار بهالموضوع انا حاضر...

طبعا نظامهم في فتح الحساب معقد شوي
وياخذ وقت طويل صراحه



الاوراق المطلوبة منك هي الجواز حقك وبطاقة الطالب وعنوان سكنك بامريكا وبالسعوديه ومبلغ عشان تودعه في الحساب وأقل مبلغ 125 دولار لاتنسى هالمبلغ(طبعا تقدر تسحبه اول ماتفتح الحساب)
ملاحظه(لازم يكون عندك عنوان سكن لانو البطاقه راح توصلك على العنوان)
واحتياطا خذ معك الاي توينتي حقكـ

طبعا بعد ماتعبي لك البيانات الرسميه حقتك زي الاسم والعنوان وكذا راح تعطيك بطاقة صراف مؤقته وتعطيك الكيبورد تدخل لها رقم سري
وعقب تعطيك الكيبورد عشان تدخل لك اسم مستخدم تستخدمه للدخول على حسابك البنكي عن طريق الانترنت(اونلاين)
طبعا اختر لك اسم مناسب وانت اخبر باللي تبي لكن اختر اسم ماتنساه
بعد كذا توريك صفحه فيها صور تختار الصورة اللي تبي وتكتب اسمها
مثلا اخترت صورة فيل تكتب تحتها فيل بالانقليزي طبعا
ومو شرط تكتب فيل عادي اكتب اي شي يعني اانا اخترت صورة وكتبت تحتها اسمي يعني عادي

بعد كذا تخليك تختار ثلاث اسئلة امان وتكتب جوابهم
زي الاسئلة اللي بالهوتميل وكذا
مثلا اي سنة تخرجت او وش نوع سيارتك او وش اسمك الاوسط وهكذا .....
بعد كذا تتاكد من البيانات وتعطيك رقمك السري حق الاونلاين ومبروك عليك الحساب ...
عقب هيك تروحون للصراف عشان تودع المبلغ اللي هو 125 وبعد كذا انتهت السالفه ومبروك خخخخخ

طبعا البطاقة اللي معك مؤقته والبطاقة الاصليه راح توصلك على عنوانك خلا اسبوع او اقل وراح يكون رقم البطاقة الجديده نفس رقم البطاقة المؤقتة اللي معك...

موضوعك رهييييب وجى في وقته

يعجبني فيك انك مفصل تفصيل مهم جدا عند الكثير

الله يوفقك ويجزاك خير وييسر امووورك على هالموضوع الحلو ..

بصراحه انا شايل هم كبير وودي اسئلك

اللي مثلي متنح مايعرف انجليزي

تتوقع انه بيتوهق ويجيب العيد هههههه

لأني شايف تفاصيل كثيييره والله اني خايف احس اني بصير مثل الشغاله اللي جايه للسعوديه وماتعرف عربي

رحلتي بإذن الله راح تكون بإذن الله الرياض >>> لندن >>> واشنطن >>>> ولاية واشنطن مدينة سبوكان

فماادري وش رايك

بمثل حالتي وش تنصحني ؟؟

اخوي اقصد انا جاي على حسابي
احجز من السعوديه الفندق حق الملحقيه؟
والصباح اروح مع الطلاب الملحقيه؟

مش ممكن مش ممكن مش ممكن خلينا نعبر خلينا نحكي خلينا نريح ونتراح ما هذا يابن الصحراء <<< عصام الشوالي


موضوع جدا رائع وانا اندمج معك فوق ما تتصور

جزاك الله الف خير وهذا اندل على شيئ يدل على حرصك واهتمامك بخوانك الي للحين ما سافروو